Ngaahi Peesi Fakalotofonuá
ʻOku Tokoniʻi ʻe ha Talavou Fisi ha Kau Sola ʻoku Maumau ʻEnau Meʻalelé he Veʻehalá
“Naʻa mo e ngaahi taimi faingataʻa ʻoku tau fekuki mo iá, ko ʻeni . . . ʻai pē ke u malimali”.
Naʻe fononga atu ʻa ʻApi Tuʻitupou ke ʻaʻahi ki he ʻapi ʻa ʻene ongomātuʻá ofi ki Suva, Fisi peá ne fakatokangaʻi ha meʻalele, kalasi tatau mo ʻene meʻalelé, ʻoku maumau ʻi he veʻehalá. Ko ʻApí, ko ha mēmipa ia ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, naʻá ne tuʻu peá ne ʻeke ange kiate kinautolu pe ko e hā e palopalemá.
Koeʻuhí naʻe ʻi ai e ngaahi kongokonga ʻo ʻene meʻalelé ʻi he ʻapi ʻo ʻene ongomātuʻá ofi mai pē, naʻá ne kamata ke ngāue ki heʻenau meʻalelé, ka naʻe vave ʻene fakatokangaʻi ʻoku kiʻi faingataʻa ange ʻa e palopalemá ʻi he meʻa naʻá ne ʻuluaki fakakaukau ki aí. ʻE fie maʻu ha tokoni ia ʻa ha tokotaha ngāue fakaʻenisinia.
Naʻe mahino kia Tuʻitupou naʻe kole ʻe hono ngaahi kaungāmeʻa foʻoú, ʻa e kā mei honau kāingá pea nau fononga mamaʻo mai mei honau koló ʻi Ra ke fakatau atu e fua ʻo ʻenau ngoué ʻi he māketi ʻi Suvá. Koeʻuhi ko ʻene ʻosi maʻu e konga ke fetongi ʻakí, naʻá ne fakakaukau ke ʻoange ia kiate kinautolu pea aleaʻi mo ha taha taukei ange ke ne ngaohi ʻenau meʻalelé.
Naʻe pehē ʻe Tuʻitupou, “Hili ʻeku fakakaukauʻi ʻenau fononga maí mo e feilaulau kuo nau fakahoko ki hono ʻomi e fua ʻo ʻenau ngoué ki he māketí, ne u fakakaukau ke u foaki ange ʻa e konga ke fetongi ʻakí maʻanautolu (koeʻuhí ʻoku ou maʻu ia). ʻI heʻeku vakai ki he fakafōtunga honau fofongá . . . naʻe ongo ki hoku lotó.”
Hili ha ngaahi uike siʻi, naʻe ʻaʻahi fakatuʻupakē mai e tokotaha haʻana ʻe meʻalele naʻe ngaohi ʻe Tuʻitupoú. Naʻá ne pehē, “Naʻa nau omi mo ha tangai manioke mo ha foʻi niu ʻe uofulu-mā-fā.” “Naʻe ʻomi ʻe he loto houngaʻia ne nau omi mo iá ha fuʻu fakafiemālie lahi.”
Ko e tokotaha haʻana ʻe kaá, “naʻá ne talamai ko e meʻa ko ia kuó ne ʻomaí ʻoku ʻikai lava ke fakatataua ia ki he konga naʻe (fetongi) ʻakí, ka ʻokú ne houngaʻia mo hono fāmilí pea ʻoku nau faʻa lotua au mo hoku fāmilí,” ko e meʻa ia ne fakatokangaʻi ʻe Tuʻitupoú.
Naʻá ne hoko atu, “Kuó ne kei vahevahe pē mo hono fāmilí mo e ngaahi kaungāmeʻá ʻa e founga ne tokoniʻi kakato ai ʻe ha sola hono ʻilamutú ʻi he halá, pea mo e founga kuo tuku ai kinautolu ʻe he ʻOtuá ʻi he feituʻu totonu pea ʻi he taimi totonu ke u haʻu ai ʻo tokoniʻi kinautolú.”
Naʻe pehē ʻe Tuʻitupou ʻokú ne fiefia naʻe lava ke ne tokoni. “ʻOku ou tui kapau ʻoku tau maʻu ha faingamālie ke tokoni ki ha taha, tau tokoniʻi kinautolu, koeʻuhí te ke lava ke fakalotoa e tokotaha ko iá ʻi ha founga lelei ʻe tāpuekina lahi ai koe.”
“Naʻa mo e ngaahi taimi faingataʻa ʻoku tau fononga aí, ko e fanga kiʻi maliu nounou pehē ʻo e ngaahi meʻa ʻoku hokó ʻokú ne ʻai au ke u malimali pea ngaohi au ke u mateuteu ke toe lahi ange ke tokoni ʻi he taimi ʻoku ou lava ai ke tokoní.”
ʻI he Konifelenisi Lahi ʻi ʻOkatopa 2019 ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, naʻe pehē ʻe Palesiteni Lāsolo M. Nalesoni: “ʻOku kumi maʻu pē ʻe he Kau Māʻoniʻoni ʻi he Ngaahi ʻAho Kimui Ní, hangē ko e kau muimui kehe ʻo Sīsū Kalaisí, ha ngaahi founga ke tokoni ai, hiki hake, pea mo ʻofa ki he niʻihi kehé. Ko kinautolu ʻoku loto ke ui ko e kakai ʻa e ʻEikí ‘ʻoku nau loto ke fefuaʻaki ʻa ʻenau ngaahi kavengá, . . . ke tangi fakataha mo kinautolu ʻoku tangí; . . . pea [ke] fakafiemālieʻi ʻa kinautolu ʻoku ʻaonga ki ai ʻa e fakafiemālié.” ʻOku nau fekumi moʻoni ke moʻui ʻaki ʻa e fekau lahi ʻuluakí mo hono uá. ʻI he taimi ʻoku tau ʻofa ai ki he ʻOtuá ʻaki e kotoa hotau lotó, ʻokú Ne fakatafoki hotau lotó ki he lelei ʻa e niʻihi kehé, ʻi ha founga fakaʻofoʻofa mo maʻa” (Russell M. Nelson, “Ko e Fekau Lahi Hono Uá”, Liahona, Nōvema 2019, 96).