Mata aron sa Pagtan-aw
Pinaagi sa gahum sa Espiritu Santo, si Kristo makapahimo nato nga makatan-aw sa atong kaugalingon ug makatan-aw sa uban sama sa Iyang pagtan-aw.
Pagkakita sa Kamot sa Dios
Ganahan ko sa istorya sa Daang Tugon sa usa ka batan-ong lalaki kinsa nagserbisyo ni Propeta Eliseo. Sayo sa usa ka buntag ang batan-ong lalaki nahigmata, migawas, ug nakita ang siyudad nga gilibutan sa daghang kasundalohan nga ang tuyo mao ang paglaglag kanila. Midagan siya ngadto ni Eliseo: “Unsa may atong buhaton?”
Si Eliseo mitubag, “Ayaw kahadlok kay ang ania uban kanato mas daghan kay niadtong uban kanila.”
Si Eliseo nasayud nga ang batan-ong lalaki nagkinahanglan og labaw pa sa makapakalma nga kasiguroan; kinahanglan siya og panan-awon. Ug mao nga “nag-ampo si Eliseo, … O Ginoo, buksi ang iyang mata aron siya makakita. Busa gipakita sa Ginoo ang batan-ong sulugoon ni Eliseo sa nagkatag nga mga kabayo ug mga karwahi nga kalayo nga naglibot kang Eliseo.” 1
Tingali dunay mga higayon nga kamo, sama sa sulugoon, nakigbisog sa inyong kaugalingon aron makakita kon sa unsa nga paagi naglihok ang Dios sa inyong kinabuhi—sa mga higayon nga kamo mibati nga giataki—sa higayon nga ang mga pagsulay sa pagka-mortal makapaluhod ninyo. Paghulat ug salig sa Dios ug sa Iyang tayming, tungod kay makasalig kamo sa Iyang kasingkasing nganha kaninyo. Apan adunay ikaduhang leksyon dinhi. Minahal kong mga kaigsoonan, kamo, usab, makaampo nga ablihan sa Ginoo ang inyong mga mata aron sa pagtan-aw sa mga butang nga dili ninyo normal nga makita.
Pagtan-aw sa Atong mga Kaugalingon sama sa Pagtan-aw sa Dios Kanato
Tingali ang labing importanting butang nga klaro natong makita kon kinsa ang Dios ug kinsa gayud kita—anak nga mga lalaki ug anak nga mga babaye sa langitnong mga ginikanan nga adunay “diosnong kinaiya ug mahangturong padulngan.” 2 Hangyoa ang Dios sa pagpadayag niini nga mga kamatuoran nganha kaninyo, uban sa unsay Iyang gibati mahitungod kaninyo. Kon daghan kamong nasabtan sa inyong tinuod nga pagkatawo ug katuyoan, lig-on kaayo nga pagsabut, mas makaimpluwensya kini sa tanan sa inyong kinabuhi.
Pagtan-aw sa Uban
Ang pagsabut kon sa unsa nga paagi ang Dios motan-aw kanato makaandam sa paagi sa pagtabang nato nga motan-aw sa uban sama sa Iyang pagtan-aw. Ang kolumnista nga si David Brooks miingon: “Daghan sa dagkong mga problema sa atong katilingban resulta gikan sa mga tawo nga mibati nga gibaliwala ug wala hatagi og bili sa uban. … [Adunay] mahinungdanon … nga hiyas nga atong makuha … mahimong mas maayo[, ug kana mao] ang hiyas nga motan-aw sa usag usa sa kinasingkasing ug kinasingkasing nga tan-awon.” 3
Si Jesukristo motan-aw sa kasingkasing sa mga tawo. Siya motan-aw sa mga indibidwal, sa ilang mga panginahanglan, ug kinsa sila mamahimo. Diin ang uban nakakita og mga mananagat, mga makasasala, o mga kobrador sa buhis, si Jesus nakakita og mga disipulo; diin ang uban nakakita og tawo nga nasudlan sa mga dautan, si Jesus mibaliwala sa nangagi, miila sa tawo, ug miayo kaniya. 4
Bisan sa atong nagkapuliki nga kinabuhi, makasunod kita sa ehemplo ni Jesus ug motan-aw sa mga indibidwal—sa ilang mga panginahanglan, sa ilang pagtuo, sa ilang pakigbisog, ug kinsa sila mamahimo. 5
Samtang mag-ampo ko sa Ginoo nga ablihan ang akong mga mata aron pagtan-aw sa mga butang nga dili normal nakong makita, sa kasagaran akong pangutan-on ang akong kaugalingon sa duha ka pangutana ug magbantay sa mga impresyon nga moabut: “Unsay akong gibuhat nga kinahanglang hunungon nako sa pagbuhat?” ug “Unsay wala nako buhata nga kinahanglan nga akong sugdan sa pagbuhat?” 6
Mga bulan na ang milabay, atol sa sakramento, akong gipangutana ang akong kaugalingon niini nga mga pangutana ug nasurprisa sa impresyon nga miabut. “Hunong sa pagtan-aw sa imong telepono kon ikaw maghulat diha sa linya.” Ang pagtan-aw sa akong telepono samtang maglinya hapit na lang awtomatik; nakita nako ni nga maayong panahon sa paghimo og laing mga butang, sa pagbasa ug pagtubag sa email, pagtan-aw sa importante nga mga balita, o pagtan-aw sa unsay anaa sa social media.
Pagkasunod buntag, naghulat ko diha sa taas nga linya sa tindahan. Gikuha nako ang akong telepono ug dayon nahinumdom sa impresyon nga akong nadawat. Gihipos nako ang akong telepono ug mitan-aw sa palibut. Akong nakita ang hamtong nga lalaki nga nag-una nako sa linya. Ang iyang cart walay sulod gawas sa pipila ka mga lata sa pagkaon sa iring. Gibati nako ang pagduha-duha apan misulti og inantigo gayud sama sa, “Akong nakita nga ikaw adunay iring.” Siya miingon nga adunay umaabut nga unos, ug siya dili gusto nga maabtan nga walay pagkaon sa iring. Nag-istorya kami og kadiyot, ug dayon milingi siya nako ug miingon, “Kahibalo ka, wala akoy gisultihan niini, apan karon mao ang akong adlaw nga natawhan.” Natandog ang akong kasingkasing. Nanghinaut ako kaniya og malipayong adlaw nga natawhan ug mihalad og hilom nga pag-ampo sa pasalamat nga wala ko magtan-aw sa akong telepono ug milabay ang oportunidad nga tinud-anay nga makakita ug makakonektar sa laing tawo kinsa nagkinahanglan niini.
Sa akong sinsero nga tinguha ako dili gusto nga mapareha sa pari o sa Levita nga diha sa dalan padulong sa Jerico—kinsa mitan-aw ug miagi lang. 7 Apan sa kasagaran sa akong hunahuna ako mao.
Pagtan-aw sa Sugo sa Dios alang Kanako
Ako bag-ong nakakat-on og bililhon nga leksyon mahitungod sa pagtan-aw sa kinasingkasing sa usa ka batan-ong babaye nga ginganlan og Rozlyn.
Ang istorya gipaambit kanako sa akong higala kinsa nahugno sa dihang ang iyang bana sa 20 ka tuig mibiya. Tungod kay magpuli-puli ang mga bata pag-adto sa papa ug sa mama ang ideya nga mosimba nga mag-inusara ingon og malisud. Siya miistorya:
“Sa usa ka simbahan diin ang pamilya importante kaayo, ang paglingkod nga mag-inusara makaguol. Nianang unang Dominggo misulod ko nga nag-ampo nga walay usa nga makigsulti kanako. Kalma lang gihapon ko, ug hapit na makahilak. Milingkod ko sa naandan nako nga lugar, naglaum nga walay makamatikod sa mora og bakante nga lingkuranan.
“Usa ka batan-ong babaye sa among ward milingi ug mitan-aw kanako. Nagpakaaron-ingnon ko nga nagpahiyom. Mibalos siya sa pagpahiyom. Akong nakita ang kabalaka sa iyang nawong. Hilom akong nangamuyo nga dili siya moduol aron makigsulti nako—wala akoy positibo nga ikasulti ug nasayud nga makahilak ra ko. Miduko ko ug milikay nga magkatinan-away.
“Pagkasunod oras, nakamatikod ko nga molingi siya kanako og panagsa. Pagkahuman gayud sa miting, midiretso siya og duol kanako. ‘Hi Rozlyn,’ mihunghong ko. Gigakus ko niya ug miingon, ‘Sister Smith, makasulti ko nga karon dili maayong adlaw alang kanimo. Pasayloa ko. Gimahal ko ikaw.’ Sumala sa gipaabut na, ang mga luha miagas samtang siya migakus kanako pag-usab. Apan sa akong paglakaw, naghunahuna ko, ‘Tingali mahimo ra nako kini.’
“Kanang buotan nga 16-anyos nga batan-ong babaye, nga wala gani katunga sa akong edad, mangita kanako matag Dominggo sulod nianang tuiga aron mogakus nako ug mangutana, ‘Kumusta ka?’ Kini nakahimo og dakong kalainan sa unsay akong gibati sa pag-adto sa simbahan. Ang tinuod ako nagsugod sa pagsalig niadto nga mga paggakus. Dunay nakamatikod kanako. Dunay masayud nga didto ko. Dunay nagpakabana.”
Uban sa tanang mga gasa nga andam nga ihatag sa Amahan, ang pagtan-aw nga kinasingkasing nagkinahanglan nga kita mangayo Kaniya—ug dayon molihok. Mangayo nga makatan-aw sa uban sama sa Iyang pagtan-aw—ang Iyang tinuod nga mga anak nga lalaki ug mga anak nga babaye nga dunay walay kinutuban ug balaan nga potensyal. Dayon molihok pinaagi sa pagmahal, pagserbisyo, ug pagmatuod sa ilang ka bililhon ug potensyal kon giaghat. Samtang mahimo kining sumbanan sa atong kinabuhi, makita nato ang atong kaugalingon nga mahimong “tinuod nga mga sumusunod ni … Jesukristo.” 8 Ang uban makahimo sa pagsalig sa atong mga kasingkasing ngadto sa ilang mga kasingkasing. Ug niini nga sumbanan madiskobrehan usab nato ang atong kaugalingong tinuod nga pagkatawo ug katuyoan.
Ang akong higala nahinumdom og laing kasinatian samtang naglingkod nianang samang bakante nga lingkuranan, nga nag-inusara, naghunahuna kon ang 20 ka tuig nga paningkamot sa pagsunod sa ebanghelyo sa iyang panimalay nahulog nga walay kapuslanan. Siya nagkinahanglan og labaw sa makapakalma nga kasiguroan; nagkinahanglan siya og panan-awon. Siya mibati nga adunay pangutana nga midulot sa iyang kasingkasing: “Nganong gibuhat nimo kadtong mga butanga? Gibuhat ba nimo kini alang sa ganti, pagdayeg gikan sa uban, o sa gitinguha nga sangputanan?” Siya nagduha-duha makadiyot, misiksik sa iyang kasingkasing, ug dayon nakahimo sa pagtubag nga masaligon, “Gibuhat nako kini tungod kay gihigugma nako ang Manluluwas. Ug gihigugma nako ang Iyang ebanghelyo.” Ang Ginoo miabli sa iyang mga mata aron sa pagtabang kaniya nga makakita. Kining yano apan gamhanan nga kausaban sa panan-awon nakatabang kaniya sa pagpadayon uban sa hugot nga pagtuo diha ni Kristo, bisan pa sa iyang mga sirkumstansya.
Ako mosaksi nga si Jesukristo nahigugma kanato ug makahatag nato og mga mata nga makakita—bisan kon kini lisud, bisan kon kita gikapoy, bisan kon kita nagmasulub-on, ug bisan kon ang mga sangputanan dili mao ang atong gilauman. Pinaagi sa Iyang grasya, Siya mopanalangin kanato ug modugang sa atong kapasidad. Pinaagi sa gahum sa Espiritu Santo, si Kristo makapahimo nato nga makatan-aw sa atong kaugalingon ug makatan-aw sa uban sama sa Iyang pagtan-aw. Uban sa Iyang tabang, kita makahibalo unsay labing gikinahanglan. Kita makasugod nga makakita sa impluwensya sa Ginoo nga naglihok ug pinaagi sa ordinaryo nga mga detalye sa atong kinabuhi—kita makakita sa kinasingkasing.
Ug dayon, nianang mahinungdanon nga adlaw “kon siya moabut kita mahisama kaniya, kay kita makakita kaniya nga mao gihapon; nga kita mahimo nga makabaton niini nga paglaum” 9 mao ang akong pag-ampo pinaagi sa ngalan ni Jesukristo, amen.