Ang Talagsaon nga Kanindot nga Gasa sa Anak
Pinaagi ni Jesukristo, kita makalingkawas sa angayan nga mga tumang kasakit gumikan sa atong moral nga mga kapakyasan ug mabuntog ang dili angay nga mga tumang kasakit nga atong masinati sa atong mortal nga kinabuhi.
Samtang nagbasa sa Basahon ni Mormon alang sa Dali, Sunod Kanako sa miaging summer, nahingangha ko sa report ni Alma nga sa dihang hingpit siya nga nasayud sa tanan niyang mga sala, “wala nay labaw ka hapdos ug labaw ka pait ingon sa [iyang] mga kasakit.” 1 Motug-an ko, nga kanang paghisgot sa talagsaon nga kasakit mikuha sa akong pagtagad tungod sa akong pagkigbisug nianang semanaha sa pito ka milimetro nga bato sa pantog. Walay usa ka tawo nga nakasinati sa ingon ka “dagko nga butang” kon ang ingon ka “gagmay ug yano” nga butang “gipahinabo.” 2
Ganahan sab ko sa pulong ni Alma tungod sa pulong talagsaon, diha sa Iningles nga hubad sa Basahon ni Mormon, sagad naghulagway sa mga butang nga hilabihan katahum o dili hitupngan nga kaanindot. Sama pananglit, si Joseph Smith mihinumdom nga ang kupo nga gisul-ob ni Moroni may “talagsaon nga kaputi,” “sa kaputi nga labaw sa bisan unsa nga yutan-on nga wala pa [niya] makita sukad.” 3 Apan ang talagsaon mahimo usab nga magpasabut sa usa ka hilabihan ka grabe gani alang sa mangil-ad nga mga butang. Sa ingon si Alma ug ang nag-unang mga diksyonaryo mikonektar sa talagsaong kasakit ngadto sa “gihasol,” “gisakit” ug “gisamok” ngadto sa “walay katapusan nga sukod.” 4
Ang mga paghulagway ni Alma nagpakita og mahinuklugong kamatuoran nga sa ubang punto ang hingpit, tumang kahasol sa tanlag sa matag sala nga atong nabuhat kinahanglan mabati gayud. Ang kaangayan nagmando niini ug ang Dios Mismo dili mousab niini. 5 Sa dihang nahinumdom si Alma sa “tanan” niyang mga sala—ilabi na kadtong nakaguba sa pagtuo sa uban—ang iyang kasakit dili madaug, ug ang hunahuna sa pagpanubag niini sa atubangan sa Dios milukop kaniya inubanan sa “dili matukib nga kahadlok.” Siya nangandoy nga “dili na igkita lakip ang kalag ug lawas.” 6
Apan, miingon si Alma ang tanang butang misugod sa pagkausab sa higayon nga ang iyang “hunahuna naghinuktok” diha sa gipanagna nga “pag-anhi sa usa ka Jesukristo … aron sa pag-ula sa iyang dugo alang sa mga sala sa kalibutan” ug siya “nangamuyo sulod sa [iyang] kasingkasing: O Jesus, ikaw nga Anak sa Dios, malooy ka kanako.” Nianang usa ka hunahunaa ug nianang usa ka hangyo, si Alma napuno sa “talagsaon” nga hingpit nga kalipay nga “labaw sa [iyang] kasakit.” 7
Kita kinahanglan gayud nga dili mahikalimot nga ang matag katuyoan sa paghinulsol mao ang pagtangtang sa piho nga kauyamot ug usbon kini ngadto sa lunsay nga kalipay. Salamat sa Iyang “diha-diha nga kaayo,” 8 sa diha-diha kita makaduol ni Kristo—mopakita og hugot nga pagtuo diha Kaniya ug usa ka tinuod nga pagka-usab sa kasingkasing—ang modat-og nga kabug-at sa atong mga sala mosugod sa pagbalhin gikan kanato ngadto Kaniya. Kini posible lang tungod kay Siya nga walay sala miantus sa “dili masukod ug dili matukib nga tumang kasakit” 9 sa matag sala diha sa uniberso sa Iyang mga gilalang, alang sa tanan Niyang gilalang—usa ka pag-antus nga hilabihan, ang dugo manggawas sa matag lungag sa Iyang panit. Gikan sa direkta, personal nga kasinatian ang Manluluwas nagpasidaan kanato, diha sa kasulatan sa modernong panahon, nga kita walay ideya kon unsa ka “hilabihan” ang atong mahimong mga “pag-antus” kon kita dili maghinulsol. Apan uban sa dili matugkad nga kamanggihatagon Siya miklaro usab nga “Ako, ang Dios, nag-antus niini nga mga butang alang sa tanan, nga sila unta dili mag-antus kon sila maghinulsol;” 10 —usa ka paghinulsol nga makatugot kanato sa “pagtagamtam” sa “naghingapin nga kalipay” nga natagamtam ni Alma. 11 Sa niining doktrina lang, “ako nagpabilin nga natingala.” 12 Gani, makapahingangha, nga si Kristo mihalad pa og dugang.
Usahay ang hilabihan nga kasakit dili maggikan sa sala apan gikan sa dili tinuyo nga mga kasaypanan, sa mga binuhatan sa uban, o mga pwersa nga dili nato kapugngan. Niining mga higayuna, kamo mahimong motuaw sama sa matarung nga Salmista:
“Ang akong kasingkasing misakit sa hilabihan sa sulod nako: Ug ang mga kalisang sa kamatayon nangahulog sa ibabaw nako.
“… Ug ang kalisang midaug kanako.
“… Oh nga aduna unta akoy mga pako nga sama sa salampati! Unya makalupad ako sa halayo ug makapahulay.” 13
Ang medikal nga siyensya, propesyunal nga pagtambag, o legal nga pag-usab makatabang sa pagpagaan sa maong mga pag-antus. Apan timan-i, ang tanang maayong mga gasa—lakip niini—naggikan sa Manluluwas. 14 Dili igsapayan ang mga hinungdan sa atong pinakagrabe nga mga kasakit ug mga kagul-anan, ang labing dakong tinubdan sa kahupayan mao gihapon: si Jesukristo. Siya lang ang naghupot sa hingpit nga gahum ug sa makaayo nga haplas sa pagtul-id sa matag hiwi, paghusto sa matag sayop, pag-usab sa matag dili perpekto, pagtambal sa matag samad, ug pagtubos sa matag nalangay nga panalangin. Sama sa karaang mga saksi, ako mopamatuod nga “ang atong labawng sacerdote dili siya usa nga dili arang mobati sa pagkalooy kanato sa atong mga kaluyahon,” 15 hinoon usa ka mahigugmaon nga Manunubos kinsa mikanaog gikan sa Iyang trono sa kahitas-an ug mianhi aron “mag-antus sa mga sakit ug mga kasakit ug mga pagtintal sa matag matang … , nga siya mahimo nga masayud … , unsaon pagtabang ang iyang mga katawhan.” 16
Kang bisan kinsa karon nga may mga kasakit nga hilabihan o lahi kaayo nga kamo mobati nga walay laing hingpit nga makasabut niini, mahimong sakto kamo. Tingali walay sakop sa pamilya, higala, o lider sa pagkapari—bisan unsa pa ka sensitibo ug ka maayo ang gibuhat sa matag usa—nga nasayud kon unsa gayud ang inyong gibati o adunay tukmang mga pulong sa pagtabang ninyo nga mamaayo. Apan hibaloi kini: adunay Usa nga makasabut sa hingpit kon unsay inyong gisinati, kinsa “mas gamhanan pa kay sa tibuok yuta” 17 ug si kinsa “makahimo sa tanang mga butang sa sukod nga labaw pa gayud kadaghan kay sa [inyong] arang mapangayo o mahunahuna.” 18 Ang proseso mabutyag diha sa Iyang paagi ug sa Iyang panahon, apan si Kristo andam kanunay sa pag-ayo sa matag tipik ug aspeto sa inyong tumang kasakit.
Kon Siya inyong tugutan sa pagbuhat sa ingon, inyong madiskubrihan nga ang inyong pag-antus wala makawang. Sa paghisgot og daghan sa labing bantugan nga mga bayani sa Biblia ug sa ilang mga pagbangutan, si Apostol Pablo miingon nga “gikatagana man sa Dios … ang labi pa ka maayong butang alang kanila pinaagi sa ilang mga pag-antus, kay kon wala ang mga pag-antus sila unta dili mahimo nga hingpit.” 19 Nakita ninyo, ang kinaiyahan gayud sa Dios ug ang tumong sa atong yutan-ong pagpakabuhi mao ang kalipay, 20 apan kita dili mahimong hingpit nga mga binuhat sa balaan nga kalipay kon walay mga kasinatian nga mosulay nato, usahay sa atong tibuok kusog. Si Pablo miingon pa gani nga ang Manluluwas Mismo sa kahangturan nahimong “hingpit [o kompleto] pinaagi sa mga pag-antus.” 21 Busa pagbantay sa yawan-ong paghunghong nga kon kamo usa pa ka mas maayong tawo, inyong malikayan ang maong mga pagsulay.
Kinahanglan usab ninyong pakigbatukan ang may kalabutan nga bakak nga ang inyong mga pag-antus nagsugyot nga kamo walay labot sa sirkulo sa mga pinili sa Dios, kinsa nakasinati og kalipay ug mga panalangin ug wala gayud maglisud. Hinoon, tan-awa ang inyong kaugalingon sama sa pagtan-aw ni Juan ang Tigpadayag diha kaninyo sa iyang talagsaong pagpadayag bahin sa ulahing mga adlaw. Tungod kay si Juan nakakita og “dakong panon sa katawhan, nga walay bisan kinsa nga makaihap, gikan sa tanang kanasuran, sa tanang kabanayan ug katawhan ug pinulongan, [kinsa] sa atubangan sa trono ug sa atubangan sa Kordero nanagtindog sila nga nanagsul-ob ug maputi ug tag-as nga mga bisti, … [kinsa] nanagsinggit sa makusog nga tingog, nga nag-ingon, ang Kaluwasan gikan sa atong Dios.” 22
Sa dihang gipangutana: “Kinsa man kini sila nga nanagsul-ob og mga bisting maputi ug tag-as? ug diin man sila gikan?” Si Juan nakadawat sa tubag: “Mao kini sila ang nanagpakalabang sa dagkong kasakitan, ug ang ilang mga tag-as nga bisti gilabhan nila, ug gipaputi diha sa dugo sa Kordero.” 23
Mga kaigsoonan, ang pag-antos sa pagkamatarung makatabang sa pagpasarang kaninyo, kay sa ipalahi kamo gikan sa, pinili sa Dios. Ug kini makapahimo sa ilang mga saad nga inyong mga saad. Sama sa gipamahayag ni Juan, kamo “dili na gutumon, ug dili na usab pagauhawon; dili na pagahasulon sa adlaw [kaninyo], ni sa bisan unsang makasunog nga kainit. Kay ang Kordero nga anaa sa taliwala sa trono mopakaon [kaninyo], ug siya magatultol [kaninyo] ngadto sa mga tuburan sa mga tubig nga nagahatag og kinabuhi; ug pagapahiran sa Dios ang tanang luha sa [inyong] mga mata.” 24
“Ug ang kamatayon wala na, ug wala na usab unyay pagminatay, ni paghilak, ni kasakit.” 25
Ako mosaksi nganha kaninyo nga pinaagi sa makapahingangha nga kamaayo ni Jesukristo ug sa Iyang walay kinutoban nga Pag-ula, kita makalingkawas sa angayan nga mga tumang kasakit gumikan sa atong moral nga mga kapakyasan ug mabuntog ang dili angay nga mga tumang kasakit nga atong nasinati sa atong mortal nga kinabuhi. Ubos sa Iyang direksyon, ang inyong balaan nga padulngan mao ang dili hitupngan nga katalagsaon ug dili matukib nga kalipay—usa ka kalipay nga maghingapin ug alang lamang kaninyo, ang inyong kaugalingong “mga abo” mahimong purongpurong nga bulak nga “labaw sa bisan unsa nga yutan-on.” 26 Nga unta inyong matagamtaman kining kalipay karon ug mapuno niini hangtud sa kahangturan, ako modapit kaninyo sa pagbuhat sa gibuhat ni Alma: itugot nga ang inyong hunahuna ligdong nga mohupot sa talagsaon nga kanindot nga gasa sa Anak sa Dios sumala sa gipadayag pinaagi sa Iyang ebanghelyo diha niining Iyang tinuod ug buhi nga Simbahan. Sa ngalan ni Jesukristo, amen.