Mga importanting panghitabo sa Ika-190 nga Semiannual nga Kinatibuk-ang Komperensya

Taliwala sa pagkawalay kasiguroan, minilyon ka tawo ang nakakaplag og panahon sa kalinaw atol sa kinatibuk-ang komperensya nga gipahigayon niadtong Oktubre 3–4, 2020. Ang mga lider sa Simbahan mipatumong kanato ngadto ni Jesukristo uban sa mga mensahe sa panaghiusa ug gugma, paglaum ug pagkaayo, ug kalinaw diha sa balaan nga katuyoan.

Si Presidente Russell M. Nelson mitudlo kanato unsaon sa pag-angkon sa mga panalangin sa pagkahimong katawhan sa Dios.

“Samtang mopili kamo nga ipatigbabaw ang Dios labaw sa tanan diha sa inyong kinabuhi, inyong masinati alang sa inyong kaugalingon nga ang atong Dios ‘usa ka Dios sa mga milagro’ [Mormon 9:11].” —Presidente Russell M. Nelson (tan-awa sa pahina 92)

Daghang mamumulong ang naghisgot bahin sa personal nga paglambo pinaagi sa pagsunod ni Jesukristo, pagsalig Kaniya, ug pagtugyan sa atong kabubut-on ngadto sa Iyang kabubut-on.

“Samtang kita mapainubsanong moduol ngadto [ni Jesukristo], Siya modugang sa atong kapasidad sa pag-usab.” —Becky Craven (tan-awa sa pahina 58)

Sa makausa pa, ang novel coronavirus nakaapekto sa unsay atong nakita ug nadungog sa komperensya. Hinoon, uban sa dugang nga kasinatian miabut ang mas dakong panglantaw samtang ang mga mamumulong nakatutok dili lang sa paglaum apan usab sa mas dakong pagsabut sa plano sa Dios alang sa atong mahangturong kalipay.

“Ang mga pasulit sa pagtungha dinhi sa mortalidad usa ka importanting elemento sa atong mahangturon nga kauswagan. … Ako nag-ampo nga kita … nagkat-on og bililhong mga leksyon nga ang mahagitong mga kasinatian ra ang makatudlo kanato.” —Elder David A. Bednar (tan-awa sa pahina 8)

Tungod sa sosyal nga kasamok nga nakaapekto sa daghang bahin sa kalibutan, ang mga lider mipanghimaraut sa diskriminasyon ug kagubot. Mitawag sila kanato isip mga Santos sa Ulahing mga Adlaw nga mahimong usa diha sa pagkamatarung, makakaplag og panaghiusa diha sa pagkalain-lain, ug motabang sa pagtukod og moral ug mahigugmaon nga katilingban.

“Nagpuyo kita sa usa ka higayon sa kusog kaayo nga mga panagbahin. … Mahimo kita nga usa ka pwersa sa pagpalambo ug pagpanalangin sa kinatibuk-an sa katilingban.”—Elder Quentin L. Cook (tan-awa sa pahina 18)

Samtang sination ninyo pag-usab ang komperensya pinaagi niini nga isyu, naglaum kami nga masinati usab ninyo ang paglaum ug inspirasyon nga inyong gibati sa unang higayon, ingon man sa pagkaangkon og bag-o nga mga panabut pinaagi sa inyong pagtuon sa umaabut nga mga bulan.