Panagtukaw Kamo sa Tanang Panahon, ug Manag-ampo
Karon akong ipadangat ang akong panawagan alang sa pag-ampo sa tanang katawhan gikan sa matag nasud sa tibuok kalibutan.
Minahal kong mga kaigsoonan, atol sa katapusang semana sa Iyang mortal nga pagpangalagad, si Jesus mitudlo sa Iyang mga disipulo nga “panagtukaw kamo sa tanang panahon, ug manag-ampo, nga unta maihap kamo nga takus nga makalingkawas niining tanan nga mga butang nga mahinabo, ug mobarug sa atubangan sa Anak sa tawo.”1
Lakip sa “mga butang nga mahinabo” sa dili pa ang Iyang Ikaduha nga Pag-anhi mao ang “mga gubat sa duol ninyo ug mga balita mahitungod sa mga gubat[,] … mga kagutom, ug mga linog sa tanang dapit.”2
Sa Doktrina ug mga Pakigsaad miingon ang Manluluwas, “Ug ang tanan nga mga butang magkaguliyang; … kay ang kahadlok moabut diha sa tanan nga mga katawhan.”3
Klaro, nagpuyo kita sa panahon diin ang mga butang nagkaguliyang. Daghang mga tawo ang nahadlok sa umaabut, ug daghang kasingkasing ang mibiya sa ilang pagtuo sa Dios ug sa Iyang Anak, si Jesukristo.
Mga report sa balita puno sa mga sugilanon sa kabangis. Pagpakubos sa moral gimantala sa online. Mga menteryo, mga simbahan, mga mosque, mga sinagoga, ug mga relihiyusong alampoan gihugawhugawan.
Ang tibuok kalibutan nga pandemya naabut sa hapit tanang suok sa yuta: milyon ka mga tawo ang nataptan, lapas sa milyon ang nangamatay. Mga gradwasyon sa eskwela, mga tulumanon sa pagsimba, mga kasal, misyonaryong pagserbisyo, ug daghan pa kaayong importante nga mga kalihokan sa kinabuhi ang nabalda. Dugang pa, dili maihap nga katawhan ang napasagdan nga nag-inusara ug nahilayo.
Mga kagubot sa ekonomiya nahimong hagit sa daghan kaayo, ilabi na sa labing huyang nga mga anak sa atong Langitnong Amahan.
Atong nakita ang mga tawo nga sa mabinationg paagi migamit sa ilang katungod sa malinawong pagprotesta, ug nakakita kita og masuk-anong mga manggugubot.
Sa samang panahon, padayon kitang nakakita og mga panagsungi sa tibuok kalibutan.
Maghunahuna ko kanunay niadtong kinsa kaninyo nga mga nanag-antus, nabalaka, nahadlok, o mibating nag-inusara. Akong ipaniguro sa matag usa kaninyo nga ang Ginoo nakaila kaninyo, nga nasayud Siya sa inyong mga problema ug mga kasubo, ug nga Siya nahigugma kaninyo—sa suod gayud, ug sa personal nga paagi, halawom ug hangtud sa hangtud.
Matag gabii kon mag-ampo ako, mohangyo ako sa Ginoo nga panalanginan ang tanan nga nabug-atan sa kasubo, sa kasakit, sa pag-inusara, ug sa kaguol. Nasayud ako nga ang ubang mga lider sa Simbahan mipalanog sa samang pag-ampo. Ang among mga kasingkasing, sa indibidwal ug sa tiningob nga paagi, maanaa kaninyo ug ang among mga pag-ampo gipaabut sa Dios alang kaninyo.
Migahin ako og daghang adlaw sa miaging tuig didto sa amihanang sidlakang bahin sa Estados Unidos sa pagbisita sa mga luna sa kasaysayan sa Amerika ug sa Simbahan, nagtambong og mga miting uban sa atong mga misyonaryo ug sa atong mga miyembro, ug nagbisita sa mga lider sa gobyerno ug sa mga patigayon.
Pagkadominggo, sa Oktubre 20, namulong ako sa dakong pundok duol sa Boston, Massachusetts. Samtang namulong ako, giaghat ako sa pag-ingon, “Mohangyo ko ninyo … sa pag-ampo alang niini nga nasud, alang sa atong mga lider, alang sa atong katawhan, ug alang sa mga pamilya nga nagpuyo niining talagsaong nasud nga gitukod sa Dios.”4
Miingon sab ako nga ang Amerika ug daghan sa mga nasud sa kalibutan, sama sa nangagi, anaa na usab sa laing lisud nga panahon sa paghimo og mahinungdanon nga mga desisyon ug nagkinahanglan sa atong mga pag-ampo.5
Ang akong pangaliya wala sa giandam nako nga pakigpulong. Kadto nga mga pulong miabut kanako samtang mibati ako sa Espiritu nga miaghat kanako sa pagdapit niadtong mga nanambong nga mag-ampo alang sa ilang nasud ug sa ilang mga lider.
Karon akong ipadangat ang akong panawagan alang sa pag-ampo sa tanang katawhan gikan sa matag nasud sa tibuok kalibutan. Bisan sa unsang paagi kamo mag-ampo, palihug gamita ang inyong pagtuo—bisan tingali unsay inyong tinuohan—ug mag-ampo alang sa inyong nasud ug sa inyong mga lider sa nasud. Sama sa akong giingon sa milabayng Oktubre sa Massachusetts, nagbarug kita karon sa kasaysayan sa dagkong lisud nga mga pagdesisyon, ug ang mga nasud sa yuta labihan ang panginahanglan sa balaang inspirasyon ug giya. Dili kini mahitungod sa politika o polisiya. Mahitungod kini sa kalinaw ug pagkaayo nga moabut ngadto sa tinagsa-tagsa nga mga kalag ingon man ngadto sa mga tawo sa kanasuran—ilang mga siyudad, mga lungsod, ug mga balangay—pinaagi sa Prinsipe sa Kalinaw ug sa tinubdan sa tanang pagkamaayo, ang Ginoo nga si Jesukristo.
Atol sa milabayng pipila ka bulan adunay miabut kanako nga impresyon nga ang labing maayong paagi sa pagtabang sa kasamtangang kahimtang sa kalibutan mao nga ang tanang katawhan mosalig nga mas hingpit sa Dios ug mobati sa ilang kasingkasing ngadto Kaniya pinaagi sa tinuoray nga pag-ampo. Ang pagpaubos sa atong kaugalingon ug pagtinguha sa inspirasyon sa langit aron makalahutay o makabuntog unsay naa sa atong atubangan maoy pinakaluwas ug pinakasiguradong paagi aron makapadayon uban sa pagsalig latas niining makalibug nga mga panahon.
Ang mga kasulatan mihatag og gibug-aton sa mga pag-ampo nga gihalad ni Jesus ingon man ang Iyang mga pagtulun-an bahin sa pag-ampo atol sa Iyang mortal nga pangalagad. Hinumdumi ninyo ang Pag-ampo sa Ginoo:
“Amahan namo nga anaa sa langit, balaanon ang imong ngalan.
“Maghari ka kanamo. Tumanon ang imong pagbuot dinhi sa yuta, sama nga gituman kini didto sa langit.
“Ihatag kanamo ang pagkaon nga among gikinahanglan karong adlawa.
“Ug pasayloa kami sa among mga sala sama nga kami nagpasaylo sa mga nakasala kanamo.
“Ayaw kami itugyan sa pagsulay; luwasa hinuon kami gikan sa daotan: Kay imo ang gingharian, ang gahom ug ang himaya hangtod sa kahangtoran. Amen.”6
Kining may tumong, matahum nga pag-ampo, nga gisubli kanunay sa tibuok Kristiyanidad, nagklaro nga tukma ang direkta nga pagpangaliyupo ngadto sa “Atong Amahan nga anaa sa langit” alang sa mga tubag sa nagsamok kanato. Busa, mag-ampo kita alang sa balaanong giya.
Dapiton ko kamo sa pag-ampo kanunay.7 Pag-ampo alang sa inyong pamilya. Pag-ampo alang sa mga lider sa mga nasud. Pag-ampo alang sa maisugong mga tawo nga nagtrabaho sa kasamtangang pagpakig-away batok sa sosyal, kalikupanhon, politikanhon, ug biyolohikal nga mga sakit nga mihampak sa tanang katawhan sa tibuok kalibutan, sa mga adunahan ug mga kabus, sa mga batan-on ug sa tigulang.
Ang Manluluwas mitudlo kanato sa dili pag-limita kinsay atong iampo. Miingon siya, “Higugmaa ang inyong mga kaaway, pagpanalangin kanila nga nagtunglo kaninyo, pagbuhat og maayo ngadto kanila nga nagdumot kaninyo, ug pag-ampo alang kanila kinsa nag-amung-among kaninyo, ug nanggukod kaninyo.”8
Didto sa krus sa Kalbaryo, diin si Jesus namatay alang sa atong mga sala, Iyang gihimo unsay Iyang gitudlo dihang nag-ampo Siya, “Amahan, pasayloa sila; kay wala sila makasabut sa ilang gibuhat.”9
Ang pag-ampo nga sinsero alang niadtong tingali makonsidera nga atong mga kaaway nagpakita sa atong pagtuo nga ang Dios makausab sa atong kasingkasing ug sa kasingkasing sa uban. Ang ingon niana nga mga pag-ampo makalig-on sa atong panghukom sa paghimo sa bisan unsa nga gikinahanglan nga mga kausaban sa kaugalingon natong kinabuhi, mga pamilya, ug mga komunidad.
Bisan asa kamo nagpuyo, unsay inyong sinultihan, o mga hagit nga inyong giatubang, ang Dios maminaw ug motubag kaninyo sa Iyang kaugalingon nga paagi ug sa Iyang kaugalingon nga panahon. Kay kita Iyang mga anak, makaduol kita Kaniya sa pagpangayo og tabang, paghupay, ug nabag-ong tinguha sa paghimo og positibong kalainan sa kalibutan.
Ang pag-ampo alang sa kaangayan, kalinaw, sa mga kabus, ug sa mga masakiton sa kasagaran dili paigo. Human nga kita moluhod sa pag-ampo, kinahanglan kitang mobarug ug mobuhat unsay atong ikatabang—sa pagtabang sa atong kaugalingon ug sa uban.10
Ang mga kasulatan puno sa mga ehemplo sa mga tawo nga may pagtuo kinsa mihiusa sa pag-ampo nga gipaubanan og lihok aron makahimo og kalainan sa kaugalingon nilang kinabuhi ug sa kinabuhi sa uban. Diha sa Basahon ni Mormon, sama pananglit, atong mabasa ang mahitungod ni Enos. Gibana-bana nga “mga duha sa tulo ka bahin sa mubo niya nga basahon naghulagway og usa ka pag-ampo o sunod-sunod nga mga pag-ampo, ug ang nahibiling bahin naghisgot unsay iyang gihimo agig resulta sa mga tubag nga iyang nadawat.”11
Aduna kitay daghang ehemplo kon sa unsang paagi ang pag-ampo mihimo og kalainan sa kaugalingon natong kasaysayan sa Simbahan, nagsugod sa unang pinakusog nga paglitok nga pag-ampo ni Joseph Smith sa kakahoyan duol sa troso nga panimalay sa iyang ginikanan niadtong tingpamulak sa 1820. Nangita og kapasayloan ug espirituhanong direksyon, ang pag-ampo ni Joseph miabli sa kalangitan. Karon kita mga benipisaryo ni Joseph nga Propeta ug sa ubang matinud-anon nga Santos sa Ulahing mga Adlaw nga kalalakin-an ug kababayen-an kinsa nag-ampo ug milihok aron sa pagtabang og tukod sa Ang Simbahan ni Jesukristo sa mga Santos sa Ulahing mga Adlaw.
Sa kasagaran maghunahuna ako sa mga pag-ampo sa matinud-anong kababayen-an sama ni Mary Fielding Smith kinsa, uban sa tabang sa Dios, maisugong midala sa iyang pamilya gikan sa nagkagrabing pagpanglutos sa Illinois ngadto sa kasiguroan dinhi niini nga walog, diin ang iyang pamilya miuswag sa espirituhanon ug sa temporal nga paagi. Human mag-ampo sa tinuorayng paagi nga nagluhod, siya dayon naningkamot sa pagbuntog sa iyang mga hagit ug pagpanalangin sa iyang pamilya.
Ang pag-ampo mobayaw kanato ug dungan nga mohiusa kanato isip mga indibidwal, isip mga pamilya, isip usa ka Simbahan, ug isip usa ka kalibutan. Ang pag-ampo moimpluwensya sa mga scientist ug makatabang nila sa pagdiskobre og mga bakuna ug mga tambal nga mobugto niini nga pandemya. Ang pag-ampo mohupay niadtong nawad-an og usa ka minahal. Mogiya kini kanato sa pagkahibalo unsay buhaton alang sa kaugalingon natong personal nga panalipod.
Mga kaigsoonan, awhagon ko kamo sa pagdoble og usab sa inyong pasalig nga mag-ampo. Awhagon ko kamo sa pag-ampo diha sa inyong tago nga mga dapit, sa inyong inadlawng paglakaw, sa inyong mga panimalay, sa inyong mga ward, ug, sa kanunay diha sa inyong mga kasingkasing.12
Alang sa mga lider sa Ang Simbahan ni Jesukristo sa mga Santos sa Ulahing mga Adlaw, magpasalamat ako sa inyong mga pag-ampo alang kanamo. Moawhag ako kaninyo sa pagpadayon sa pag-ampo aron kami makadawat sa inspirasyon ug pagpadayag sa paggiya sa Simbahan latas niining malisud nga mga panahon.
Ang pag-ampo makausab sa atong kinabuhi. Gidasig pinaagi sa sinserong pag-ampo, kita makapalambo ug makatabang sa uban sa paghimo og samang butang.
Nahibalo ako sa gahum sa pag-ampo tungod sa akong kaugalingon nga kasinatian. Bag-o lang nag-inusara ako sa akong opisina. Bag-o lang ko nahuman sa usa ka proseso sa pagpatambal sa akong kamot. Nangitom kini ug ninglagom, mihubag, ug sakit kaayo. Samtang naglingkod ko dapit sa akong lamesa, dili ako makatutok sa importante ug lisud nga mga butang tungod kay nabalda ako sa kasakit niini.
Miluhod ako sa pag-ampo ug mihangyo ako sa Ginoo nga tabangan ako nga makatutok sa akong trabahoon aron molampus. Mibarug ko ug mibalik ngadto sa nagtipun-og nga papel sa akong lamesa. Diha-diha dayon, ang katin-aw ug ang focus miabut sa akong hunahuna, ug akong nahuman ang dinalian kaayong mga butang sa akong atubangan.
Ang kasamtangan nga samok nga sitwasyon sa kalibutan ingon og makalisang kon maghunahuna kita sa nagtipun-og nga problema ug mga hagit. Apan maoy akong tinuorayng pagpamatuod nga kon kita mag-ampo ug mohangyo sa Langitnong Amahan sa gikinahanglang mga panalangin ug giya, atong mahibaloan kon sa unsang paagi kita makapanalangin sa atong mga pamilya, mga silingan, mga komunidad, ug gani sa mga nasud nga atong gipuy-an.
Ang Manluluwas nag-ampo ug dayon Siya “naghimog mga maayong butang”13 pinaagi sa pagpakaon sa mga kabus, paghatag og kaisug ug suporta sa nanginahanglan, ug pagtabang pinaagi sa gugma, pagpasaylo, kalinaw, ug pahulay sa tanan nga moduol Kaniya. Padayon siya nga motabang kanato.
Akong dapiton ang tanang mga miyembro sa Simbahan, ingon man ang atong mga silingan ug mga higala sa ubang tinuohan sa tibuok kalibutan, sa paghimo sama sa gitambag sa Manluluwas sa Iyang mga disipulo: “Pagbantay gayud kamo, ug pag-ampo kanunay”14 alang sa kalinaw, alang sa kahupayan, alang sa kasiguroan, ug alang sa mga oportunidad sa pagserbisyo sa usag usa.
Katalagsaon sa gahum sa pag-ampo, ug kadako sa panginahanglan sa atong mga pag-ampo uban sa hugot nga pagtuo diha sa Dios ug sa Iyang Hinigugmang Anak sa kalibutan karon! Hinumduman nato ug pasalamatan ang gahum sa pag-ampo. Sa ngalan ni Jesukristo, amen.