Ipatigbabaw ang Dios Labaw sa Tanan
Andam ba kamo nga ipatigbabaw ang Dios labaw sa tanan diha sa inyong kinabuhi? Andam ba kamo nga tugutan ang Dios nga maoy mahimong labing importante nga impluwensya sa inyong kinabuhi?
Minahal nga kaigsoonan, mapasalamaton kaayo ko sa maanindot nga mga mensahe niini nga komperensya ug sa akong pribilehiyo nga mamulong kaninyo karon.
Sa sobra sa 36 ka tuig nga usa ako ka Apostol, ang doktrina sa pagpundok sa Israel nakapaikag kaayo kanako.1 Ang tanan mahitungod niini nakadani kanako, lakip sa mga pagpangalagad ug mga ngalan2 ni Abraham, Isaac, ug Jacob; sa ilang mga kinabuhi ug mga asawa; sa pakigsaad nga gihimo sa Dios uban kanila ug gipadayon tadlas sa ilang kaliwatan;3 sa pagkatibulaag sa napulog duha ka tribo; ug sa daghang propesiya mahitungod sa pagpundok sa atong panahon.
Akong gitun-an ang pagpundok, nag-ampo mahitungod niini, mibasa sa matag kasulatan nga dunay kalabutan, ug mihangyo sa Ginoo nga dugangan ang akong pagsabut.
Busa hunahunaa ang akong kalipay sa dihang nagiyahan ko bag-ohay lang ngadto sa usa ka bag-ong panabut. Uban sa tabang sa duha ka eskolar nga Hebreo, akong nakat-unan nga usa ka kahulugan sa Hebreo sa pulong nga Israel mao ang “ipatigbabaw ang Dios labaw sa tanan.”4 Mao nga ang ngalan mismo nga Israel nagpasabut og tawo kinsa andam nga ipatigbabaw ang Dios labaw sa tanan diha sa iyang kinabuhi. Kana nga konsepto hilabihang nakadasig kanako!
Ang pulong nga andam mahinungdanon niini nga paghubad sa Israel.5 Kitang tanan adunay atong kabubut-on. Makapili kita nga mahimong kabahin sa Israel, o dili. Makapili kita nga ipatigbabaw ang Dios labaw sa tanan diha sa atong mga kinabuhi, o dili. Makapili kita nga tugutan ang Dios nga maoy labing gamhanang impluwensya sa atong mga kinabuhi, o dili.
Sa makadiyot, atong hinumduman ang usa ka importanting higayon nga nakatino sa direksyon sa kinabuhi ni Jacob, ang apo ni Abraham. Sa dapit nga ginganlan ni Jacob og Peniel (nga nagpasabut og “ang nawong sa Dios”),6 si Jacob nakigdumog og seryuso nga hagit. Ang iyang kabubut-on gisulayan. Pinaagi niini nga pakigdumog, gipamatud-an ni Jacob kon unsa ang labing importante kaniya. Iyang gipakita nga andam siyang mopatigbabaw sa Dios labaw sa tanan diha sa iyang kinabuhi. Agig tubag, giusab sa Dios ang ngalan ni Jacob ngadto sa Israel,7 nga nagpasabut nga “ipatigbabaw ang Dios labaw sa tanan.” Ang Dios dayon misaad kang Israel nga ang tanan nga mga panalangin nga gisaad kang Abraham maiya usab.8
Subo lang, ang kaliwat ni Israel wala motuman sa ilang mga pakigsaad sa Dios. Gibato nila ang mga propeta ug dili sila andam nga ipatigbabaw ang Dios labaw sa tanan diha sa ilang mga kinabuhi. Isip resulta, ang Dios mipatibulaag kanila ngadto sa tanang bahin sa kalibutan.9 Maayo na lang, misaad Siya wala madugay sa pagpundok kanila, sama sa gisulti ni Isaias: “Gibiyaan ko ikaw [Israel] sa makadiyot, apan mobalik ako kanimo ug mahalon ko ikaw pag-ayo.”10
Kon maghunahuna sa buot ipasabot sa Hebreo sa pulong nga Israel, atong makaplagan nga ang pagpundok sa Israel adunay dugang nga kahulugan. Ang Ginoo nagpundok niadtong andam nga mopatigbabaw sa Dios labaw sa tanan diha sa ilang mga kinabuhi. Ang Ginoo nagpundok niadtong mopili nga tugutan ang Dios nga maoy labing importante nga impluwensya diha sa ilang mga kinabuhi.
Sulod sa daghang mga siglo, ang mga propeta nanagna niini nga pagpundok,11 ug nahitabo na kini karon! Isip usa ka gikinahanglang mag-una nga panghitabo sa dili pa ang Ikaduhang Pag-anhi sa Ginoo, kini ang labing importante nga buhat sa kalibutan!
Kini nga pagpundok sa wala pa ang milenyum maoy usa ka indibidwal nga istorya sa nagkalapad nga pagtuo ug espirituhanong kaisog alang sa minilyon ka tawo. Ug isip mga miyembro sa Ang Simbahan ni Jesukristo sa mga Santos sa Ulahing mga Adlaw, o ang “nakigsaad nga Israel sa ulahing mga adlaw,”12 kita gisangonan sa pagtabang sa Ginoo niining importante kaayo nga buhat.13
Kon maghisgot kita sa pagpundok sa Israel sa duha ka habig sa tabil, naghisgot kita, siyempre, sa buhat sa misyonaryo, templo, ug family history. Naghisgot usab kita sa paglig-on sa pagtuo ug pagpamatuod diha sa mga kasingkasing niadtong kauban nato sa pagpuyo, pagtrabaho, ug pagserbisyo. Bisan kanus-a nga mobuhat kita og bisan unsa sa pagtabang ni bisan kinsa—sa matag habig sa tabil—sa paghimo ug pagtuman sa ilang mga pakigsaad sa Dios, nagtabang kita sa pagpundok sa Israel.
Dili pa lang dugay, ang asawa sa usa sa among mga apo nanlimbasug sa espirituhanong paagi. Ako siyang tawgon og “Jill.” Bisan pa sa pagpuasa, pag-ampo, ug mga panalangin sa pagkapari, himatyon ang amahan ni Jill. Nahadlok siya pag-ayo nga mawad-an siya sa iyang amahan ug sa iyang pagpamatuod.
Sa usa ka lawom na nga kagabhion, ang akong asawa, si Sister Wendy Nelson, misulti kanako sa sitwasyon ni Jill. Pagkasunod buntag gibati ni Wendy nga ipaambit kang Jill nga ang akong tubag sa iyang espirituhanon nga pakigdumog mao ang usa ka pulong! Ang pulong mao ang myopic.
Si Jill sa kaulahian miangkon kang Wendy nga sa sinugdanan nahugno siya sa akong tubag. Miingon siya, “Naglaum ko nga si Lolo mosaad nako og usa ka milagro alang sa akong papa. Nagsige ko og hunahuna nganong ang pulong nga myopic mao ang gibati niya nga isulti.”
Human mitaliwan ang amahan ni Jill, ang pulong nga myopic nagbalik-balik sa iyang hunahuna. Gibuksan niya ang iyang kasingkasing aron mas makasabut og maayo nga ang myopic nagpasabut og “mubo nga panglantaw.” Ug ang iyang panghunahuna misugod sa pagkausab. Si Jill miingon, “Ang myopic nakapahimo nako sa paghunong, paghunahuna, ug pagkaayo. Kana nga pulong karon mipuno kanako og kalinaw. Nagpahinumdom kini kanako nga palapdan ang akong panglantaw ug magtinguha sa mahangturon. Nagpahinumdom kini kanako nga adunay balaanong plano ug nga ang akong papa buhi pa ug nagmahal ug nagbantay kanako. Ang myopic midala kanako ngadto sa Dios.”
Mapagarbuhon kaayo ko sa bililhong asawa sa among apo. Atol niining makaguol kaayo nga panahon sa iyang kinabuhi, si Jill nakakat-on sa paghangop sa kabubut-on sa Dios alang sa iyang papa, uban sa mahangturong panglantaw alang sa iyang kaugalingong kinabuhi. Pinaagi sa pagpili nga ipatigbabaw ang Dios labaw sa tanan, nakakaplag siya og kalinaw.
Kon ato kining tugutan, adunay daghang paagi nga kining hubad sa Hebreo sa Israel makatabang kanato. Hunahunaa kon sa unsang paagi ang atong mga pag-ampo alang sa atong mga misyonaryo—ug alang sa atong kaugalingong mga paningkamot sa pagpundok sa Israel—mausab kon maghunahuna niini nga konsepto. Kanunay kitang mag-ampo nga kita ug ang mga misyonaryo giyahan ngadto niadtong andam nga modawat sa mga kamatuoran sa gipahiuli nga ebanghelyo ni Jesukristo. Naghunahuna ko, ngadto kang kinsa kita giyahan kon mangamuyo kita nga makit-an kadtong andam nga mopatigbabaw sa Dios labaw sa tanan diha sa ilang kinabuhi?
Tingali giyahan kita ngadto sa pipila kinsa wala gayud motuo sa Dios o ni Jesukristo apan karon nangandoy nga makat-on mahitungod Kanila ug sa Ilang plano sa kalipay. Ang uban tingali “natawo diha sa pakigsaad”14 apan nahisalaag palayo sa dalan sa pakigsaad. Tingali andam na sila karon nga maghinulsol, mobalik, ug mopatigbabaw sa Dios labaw sa tanan. Makatabang kita kanila pinaagi sa paghangop kanila uban sa bukas nga mga bukton ug kasingkasing. Ug ang uban diin ngadto kita pagagiyahan tingali kanunay nga mibati nga adunay kulang sa ilang mga kinabuhi. Sila usab nangandoy sa pagkakompleto ug kalipay nga moabot niadtong andam nga ipatigbabaw ang Dios labaw sa tanan diha sa ilang kinabuhi.
Ang pukot sa ebanghelyo sa pagpundok sa nagkatibulaag nga Israel lapad kaayo. Adunay luna alang sa matag tawo nga hingpit nga mohangop sa ebanghelyo ni Jesukristo. Ang matag kinabig mahimong usa sa mga anak sa pakigsaad sa Dios,15 pinaagi man sa pagkahimugso o sa pagsagop. Ang matag usa mahimong hingpit nga sumusunod sa tanang gisaad sa Dios ngadto sa matinud-anong mga anak sa Israel!16
Ang matag usa kanato adunay balaanong potensyal tungod kay ang matag usa anak sa Dios. Ang matag usa managsama diha sa Iyang panan-aw. Ang mga implikasyon niini nga kamatuoran lawom kaayo. Mga kaigsoonan, palihug paminaw og maayo sa unsay akong isulti. Ang Dios wala magmahal sa usa ka kaliwat nga labaw kay sa lain. Ang Iyang doktrina mahitungod niini klaro. Siya nagdapit sa tanan nga moduol ngadto Kaniya, “itom ug puti, ulipon ug gawasnon, lalaki ug babaye.”17
Akong isiguro kaninyo nga ang inyong kahimtang atubangan sa Dios dili tinoon pinaagi sa kolor sa inyong panit. Ang pagkanauyonan o wala mauyoni sa Dios mag-agad sa inyong debosyon ngadto sa Dios ug sa Iyang mga sugo ug dili sa kolor sa inyong panit.
Naguol ko nga ang atong Itom nga mga kaigsoonan sa tibuok kalibutan nag-antus sa mga kasakit sa diskriminasyon ug pagkamapihigon. Karon moawhag ko sa atong mga miyembro bisan asa nga manguna sa pagbiya sa mga kinaiya ug binuhatan sa diskriminasyon. Mohangyo ako kaninyo sa pag-awhag og respeto sa tanang anak sa Dios.
Ang pangutana alang sa matag usa kanato, bisan unsa pa ang kaliwatan, managsama. Andam ba kamo nga ipatigbabaw ang Dios labaw sa tanan diha sa inyong kinabuhi? Andam ba kamo nga tugutan ang Dios nga maoy mahimong labing importante nga impluwensya sa inyong kinabuhi? Tugutan ba ninyo ang Iyang mga pulong, Iyang mga sugo, ug Iyang mga pakigsaad nga moimpluwensya sa inyong buhaton matag adlaw? Tugutan ba ninyo ang Iyang tingog nga maoy prayoridad kay sa bisan unsa pang uban? Andam ba kamo nga himoon ang bisan unsa nga Iyang ipabuhat kaninyo nga mas importante kay sa bisan unsang ambisyon? Andam ba kamo nga ipatuhop ang inyong kabubut-on ngadto sa Iyang kabubut-on?18
Hunahunaa kon sa unsang paagi ang ingon nga kaandam makapanalangin kaninyo. Kon wala pa kamo maminyo ug nangita og mahangturong kompanyon, ang inyong tinguha nga mahimong “kabahin sa Israel” motabang kaninyo sa pagpili kinsa ang i-date ug unsaon.
Kon naminyo kamo sa usa ka kompanyon kinsa nakasupak sa iyang mga pakigsaad, ang inyong kaandam nga ipatigbabaw ang Dios labaw sa tanan diha sa inyong kinabuhi makapabiling lunsay sa inyong mga pakigsaad sa Dios. Ang Manluluwas moayo sa inyong nasakitan nga kasingkasing. Ang kalangitan moabli samtang magtinguha kamo nga masayud unsaon sa pagpadayon. Dili kinahanglan nga kamo mahisalaag o matingala.
Kon aduna kamoy sinsero nga mga pangutana mahitungod sa ebanghelyo o sa Simbahan, samtang mopili kamo nga ipatigbabaw ang Dios labaw sa tanan, giyahan kamo nga makakita ug makasabot sa hingpit, mahangturon nga mga kamatuoran nga mogiya sa inyong kinabuhi ug motabang kaninyo nga magpabiling lig-on diha sa dalan sa pakigsaad.
Kon mag-atubang kamo og tintasyon—bisan kon ang tintasyon moabut samtang kamo gikapoy o mibati nga nag-inusara o wala masabti—hunahunaa ang kaisog nga inyong makuha samtang mopili kamo nga ipatigbabaw ang Dios labaw sa tanan diha sa inyong kinabuhi ug samtang mohangyo kamo Kaniya sa paglig-on kaninyo.
Kon ang inyong labing dakong tinguha mao ang pagpatigbabaw sa Dios labaw sa tanan, nga mahimong kabahin sa Israel, daghan kaayo nga mga desisyon ang mahimong mas sayon. Daghan kaayong mga isyu ang mahimong walay hinungdan! Masayud kamo unsay labing maayong paagi sa pagpresentar sa inyong kaugalingon. Masayud kamo unsay tan-awon ug basahon, asa igahin ang inyong panahon, ug kinsay ikauban. Masayud kamo unsay inyong gustong makab-ot. Masayud kamo unsa nga matang sa tawo gusto gayud ninyo nga mamahimo.
Karon, minahal nga kaigsoonan, nagkinahanglan og pagtuo ug kaisog aron mapatigbabaw ang Dios labaw sa tanan. Nagkinahanglan og mapadayunon, tinud-anay nga espirituhanong buhat aron maghinulsol ug mosalikway sa kinaiyanhon nga tawo pinaagi sa Pag-ula ni Jesukristo.19 Nagkinahanglan og makanunayon, inadlaw-adlaw nga paningkamot aron makapalambo og personal nga mga gawi sa pagtuon sa ebanghelyo, pagkat-on pa mahitungod sa Langitnong Amahan ug ni Jesukristo, ug pagtinguha ug pagtubag sa personal nga pagpadayag.
Atol niining lisud nga mga panahon nga gipanagna ni Apostol Pablo,20 si Satanas wala na gani maningkamot sa pagtago sa iyang mga pag-ataki sa plano sa Dios. Daghang dautan nga mga ideya ang inila sa kalibutan. Busa, ang bugtong paagi aron espirituhanong makasugakod mao ang pagkahimong determinado nga ipatigbabaw ang Dios labaw sa tanan diha sa atong mga kinabuhi, sa pagkat-on nga makadungog sa Iyang tingog, ug sa paggamit sa atong kusog aron motabang sa pagpundok sa Israel.
Karon, unsa ang gibati sa Ginoo mahitungod sa mga tawo kinsa motugot nga ipatigbabaw ang Dios labaw sa tanan? Si Nephi maayong misulti niini: “[Ang Ginoo] nahigugma niadto kinsa modawat kaniya nga ilang Dios. Tan-awa, siya nahigugma sa atong mga amahan, ug siya nakigsaad uban kanila, oo, gani [ni] Abraham, Isaac, ug Jacob; ug siya nahinumdom sa mga pakigsaad diin siya mihimo.”21
Ug unsa ang andam nga buhaton sa Ginoo alang sa Israel? Ang Ginoo misaad nga Siya “makigbisog sa [atong] mga pakig-away, ug sa mga gubat sa [atong] mga anak ug sa [mga gubat] sa mga anak sa atong mga anak… ngadto sa ikatulo ug ikaupat nga kaliwatan”!22
Samtang magtuon kamo sa inyong mga kasulatan sa mosunod nga unom ka bulan, moawhag ako kaninyo sa paghimo og lista sa tanan nga gisaad sa Ginoo nga Iyang buhaton alang sa nakigsaad nga Israel. Nagtuo ko nga mahingangha kamo! Pamalandongi kini nga mga saad. Hisgoti kini uban sa inyong pamilya ug mga higala. Dayon sunda ug tan-awa kini nga mga saad nga matuman diha sa inyong kaugalingong kinabuhi.
Akong minahal nga kaigsoonan, samtang mopili kamo nga ipatigbabaw ang Dios labaw sa tanan diha sa inyong kinabuhi, inyong masinati alang sa inyong kaugalingon nga ang atong Dios “usa ka Dios sa mga milagro.”23 Isip usa ka katawhan, kita Iyang mga anak sa pakigsaad, ug kita pagatawgon pinaagi sa Iyang ngalan. Niini ako mopamatuod sa sagradong ngalan ni Jesukristo, amen.