Nasulayan, Napamatud-an, ug Nahashasan
Ang labing dakong panalangin nga moabut kon mapamatud-an nato ang atong kaugalingon nga matinud-anon sa atong mga pakigsaad atol sa atong mga pagsulay mao ang kausaban sa atong mga kinaiya.
Minahal nga kaigsoonan, mapasalamaton ko nga mamulong kaninyo karon. Naglaum ko nga makahatag og pagdasig sa panahon nga ang kinabuhi daw lisud kaayo ug walay kasiguroan. Sa pipila kaninyo, kana nga panahon mao karon. Kon dili man, ang ingon nga panahon moabut.
Dili kana magul-anong panglantaw. Tinud-anay kana—apan malaumon—tungod sa katuyoan sa Dios diha sa Paglalang niini nga kalibutan. Kana nga katuyoan mao ang paghatag sa Iyang mga anak og oportunidad nga mapamatud-an ang ilang kaugalingon nga makahimo ug andam sa pagpili sa matarung kon kini lisud. Sa paghimo niini, ang ilang kinaiya mausab ug pwede silang mahimong mas sama Kaniya. Nasayud Siya nga magkinahanglan kana og dili matarug nga pagtuo diha Kaniya.
Kadaghanan sa akong nahibaloan naggikan sa akong pamilya. Sa mga otso anyos pa ko, ang akong maalamong inahan misugo nako ug sa akong igsoon sa pagpangibut og sagbot kuyog niya sa tanaman sa pamilya sa luyong nataran. Karon, daw yano lang kana nga tahas, apan nagpuyo kami sa New Jersey. Kanunayng mag-ulan didto. Ang yuta pilit kaayo. Ang mga sagbot mas paspas nga mitubo kay sa mga utanon.
Nakahinumdom ko sa akong pagkaugtas kon ang mga sagbot maputol sa akong mga kamot, nga ang ilang mga gamot pabiling nakalubong sa pilit nga lapok. Ang akong inahan ug igsoon layo na kaayo diha sa ilang mga laray. Sa akong pagpaningkamot og maayo, mas nabiyaan na hinoon ko.
“Lisud kaayo ni!” Misinggit ko.
Imbis nga magpakita og kalooy, ang akong inahan mipahiyom ug miingon, “Oy, Hal, siyempre lisud na. Ingon ana gyud na. Ang kinabuhi usa ka pagsulay.”
Nianang higayona, nasayran nako nga ang iyang mga pulong tinuod ug magpadayon nga tinuod sa akong umaabut.
Ang rason sa mapinanggaong pahiyum sa akong Mama naklaro paglabay sa katuigan sa dihang nagbasa ko mahitungod sa Langitnong Amahan ug sa Iyang Pinalanggang Anak nga namulong sa Ilang katuyoan sa paglalang niini nga kalibutan ug sa paghatag sa espiritung mga anak sa oportunidad sa mortal nga kinabuhi:
“Ug kita mosulay kanila dinhi, aron pagsuta kon sila mobuhat ba sa tanan nga mga butang bisan unsa ang isugo sa Ginoo nga ilang Dios ngadto kanila;
Ug sila kinsa nagpuyo sumala sa ilang kinabuhi sa wala pa dinhi sa yuta pagatugahan; ug sila kinsa wala magpuyo sumala sa ilang kinabuhi sa wala pa dinhi sa yuta walay himaya diha sa sama nga gingharian uban niadto kinsa nagpuyo sumala sa ilang kinabuhi sa wala pa dinhi sa yuta; ug sila kinsa nagpuyo sumala sa ilang kinabuhi dinhi sa yuta adunay himaya nga idugang diha sa ilang mga ulo hangtud sa kahangturan.”1
Kamo ug ako midawat nianang pagdapit nga sulayan ug momatuod nga mopili kita sa pagsunod sa mga sugo sa Dios kon wala na kita sa presensya sa atong Langitnong Amahan.
Bisan pa sa ingon ka mahigugmaong pagdapit sa atong Langitnong Amahan, si Lucifer nakaagni sa ikatulong bahin sa espiritung mga anak sa pagsunod kaniya ug pagsalikway sa plano sa Amahan alang sa atong pag-uswag ug mahangturong kalipay. Tungod sa pagsukol ni Satanas, gisalikway siya uban sa iyang mga sumusunod. Karon naningkamot siya nga mapalayo sa Dios ang labing daghan nga iyang mahimo panahon niining mortal nga kinabuhi.
Kita nga midawat sa plano mibuhat niini tungod sa atong pagtuo kang Jesukristo, kinsa mitanyag nga mahimong atong Manluluwas ug Manunubos. Kita siguradong mituo kaniadto nga ang bisan unsang mortal nga kahuyang nga maanaa kita ug ang bisan unsang dautan nga pwersa nga makigbatok kanato, ang mga pwersa sa maayo mas hilabihan ka daghan.
Ang Langitnong Amahan ug si Jesukristo nakaila ug nahigugma kaninyo. Gusto Nila nga mobalik kamo Kanila ug mahimong sama Kanila. Ang inyong kalampusan mao ang Ilang kalampusan. Inyong nabati kana nga gugma nga gikumpirmahan sa Espiritu Santo sa dihang inyong nabasa o nadungog kini nga mga pulong: “Kay tan-awa, mao kini ang akong buhat ug ang akong himaya—ang pagpahinabo sa pagka-imortal ug sa kinabuhi nga dayon sa tawo.”2
Ang Dios adunay gahum sa paghimong mas sayon sa atong dalan. Mipakaon Siya og mana sa mga anak sa Israel sa ilang paglatagaw padulong sa gisaad nga yuta. Ang Ginoo sa Iyang mortal nga pangalagad miayo sa masakiton, mibuhi sa patay, ug mipakalma sa dagat. Human sa Iyang Pagkabanhaw, Siya miabli “sa bilanggoan ngadto kanila nga mga ginapos.”3
Apan si Propeta Joseph Smith, usa sa labing halangdon sa Iyang mga propeta, nag-antus sa bilanggoan ug gitudloan sa leksyon nga makat-unan natong tanan ug gikinahanglan sa atong pabalik-balik nga mga pagsulay sa pagtuo: “Ug kon ikaw ihulog ngadto sa lungag, o ngadto sa mga kamot sa mamumuno, ug ang silot sa kamatayon ipahamtang diha kanimo; kon ikaw itambug ngadto sa ilawom; kon ang dagko nga mga balud nagkunsabo batok kanimo; kon ang mapintas nga mga hangin mahimo nga imong kaaway; kon ang mga langit mopundok og kangitngit, ug ang tanan nga mga elemento magkahiusa nga mobabag sa agianan; ug labaw sa tanan, kon ang mga apapangig gayud sa impyerno mobuka ug moabli sa ba-ba og dako diha kanimo, ikaw masayud, akong anak, nga kining tanan nga mga butang makahatag kanimo og kasinatian, ug alang sa imong kaayohan.”4
Kamo tingali makapangutana nganong ang usa ka mahigugmaon ug labing gamhanan nga Dios motugot sa atong mortal nga pagsulay nga mahimong lisud kaayo. Kini tungod kay nasayud Siya nga kinahanglan gayud natong molambo diha sa espirituhanong kalimpyo ug kalig-on aron makahimo sa pagpuyo isip mga pamilya diha sa Iyang presensya sa kahangturan. Aron mahimo kanang posible, ang Langitnong Amahan mihatag kanato og Manluluwas ug sa gahum sa pagpili alang sa atong kaugalingon pinaagi sa pagtuo aron sa pagsunod sa Iyang mga sugo ug sa paghinulsol ug sa ingon moduol Kaniya.
Ang labing importante nga bahin sa plano sa Amahan alang sa kalipay mao ang atong pagkahimong mas sama sa Iyang Pinalanggang Anak, si Jesukristo. Sa tanang butang, ang ehemplo sa Manluluwas mao ang atong labing maayong giya. Kinahanglan usab Niyang pamatud-an mismo ang Iyang kaugalingon. Siya milahutay alang sa tanang anak sa Langitnong Amahan, mibayad sa bugti sa tanan natong sala. Siya mibati sa pag-antus sa tanan kinsa mianhi ug moanhi pa sa mortalidad.
Kon maghunahuna kamo asa kutob ang kasakit nga inyong maantus, hinumdumi Siya. Siya miantus sa unsay inyong giantus aron Siya masayud unsaon sa pagtabang kaninyo. Siya tingali dili motangtang sa palas-anon, apan mohatag Siya kaninyo og kusog, kahupayan, ug paglaum. Siya nasayud sa agianan. Siya miinom sa pait nga kopa. Siya milahutay sa pag-antus sa tanan.
Kamo giamuma ug gihupay sa mahigugmaong Manluluwas, kinsa nasayud unsaon sa pagtabang kaninyo sa bisan unsang pagsulay nga inyong giatubang. Si Alma mitudlo:
“Ug siya magpadayon, mag-antus sa mga sakit ug mga kasakit ug mga pagtintal sa matag matang; ug kini aron ang pulong matuman nga nag-ingon nga siya modala diha kaniya sa mga sakit ug mga balatian sa iyang mga katawhan.
“Ug siya modala diha kaniya sa kamatayon, nga siya mahimo nga mobadbad sa mga higot sa kamatayon diin naghigot sa iyang mga katawhan; ug siya modala diha kaniya sa ilang mga kahuyang, nga ang iyang kasingkasing mahimo nga mapuno uban sa kalooy, sumala sa unod, nga siya mahimo nga masayud sumala sa unod unsaon pagtabang ang iyang mga katawhan sumala sa ilang mga kahuyang.”5
Usa ka paagi nga Siya motabang kaninyo mao ang pagdapit kaninyo sa kanunay sa paghinumdom Kaniya ug pagduol ngadto Kaniya. Siya miawhag kanato:
“Duol kamo kanako, kamong tanan nga gikapuyan ug gibug-atan sa inyong gipas-an ug papahulayon ko kamo.
“Isangon ang akong yugo ug sunda ninyo ako kay malumo ako ug mapaubsanon sa espiritu ug makapahulay kamo.”6
Ang paagi sa pagduol Kaniya mao ang pagbusog diha sa Iyang mga pulong, sa pagpakita og pagtuo ngadto sa paghinulsol, sa pagpili nga mabunyagan ug makumpirmahan sa Iyang gitugutan nga sulugoon, ug dayon sa pagtuman sa inyong mga pakigsaad sa Dios. Siya mipadala sa Espiritu Santo aron mahimo ninyong kauban, tighupay, ug tiggiya.
Samtang magpuyo kamo nga takus sa gasa sa Espiritu Santo, ang Ginoo makagiya kaninyo ngadto sa kasiguroan bisan kon dili kamo makakita sa agianan. Alang kanako, kanunay Niyang gipakita ang sunod nga usa o duha ka lakang nga himoon. Panagsa ra nga daklit Niya nga gipakita kanako ang layo pang umaabut, apan bisan kadtong panagsa nga daklit nga mga pagpakita migiya sa akong gipili nga buhaton sa inadlaw-adlaw nga pagpakabuhi.
Ang Ginoo mipasabut:
“Kamo dili makakita uban sa inyong kinaiyanhon nga mga mata, alang karon nga panahon, sa paagi sa inyong Dios mahitungod niadto nga mga butang nga moabut sa umaabut, ug ang himaya nga mosunod … sa daghan nga kalisdanan.
“Kay human sa daghan nga kalisdanan moabut ang mga panalangin.”7
Ang labing dakong panalangin nga moabut kon mapamatud-an nato ang atong kaugalingon nga matinud-anon sa atong mga pakigsaad atol sa atong mga pagsulay mao ang kausaban sa atong mga kinaiya. Pinaagi sa atong pagpili nga motuman sa atong mga pakigsaad, ang gahum ni Jesukristo ug ang mga panalangin sa Iyang Pag-ula moepekto diha kanato. Ang atong mga kasingkasing mahumok aron mohigugma, mopasaylo, ug modapit sa uban nga moduol ngadto sa Manluluwas. Ang atong pagsalig diha sa Ginoo modako. Ang atong mga kahadlok mokunhod.
Karon, bisan sa ingon nga mga panalangin nga gisaad pinaagi sa kalisdanan, dili kita magtinguha og kalisdanan. Sa mortal nga kasinatian, makaangkon kita og daghang kahigayonan nga pamatud-an ang atong kaugalingon, sa pagpasar sa mga pagsulay nga igo ang kalisud aron mahimong mas sama sa Manluluwas ug sa atong Langitnong Amahan.
Dugang pa, kinahanglan gayud kitang motimaan sa kalisdanan sa uban ug mosulay sa pagtabang. Kana lisud gayud kaayo kon kita mismo grabe nga gisulayan. Apan atong madiskubrihan samtang moalsa kita sa palas-anon sa laing tawo, bisan gamay lang, nga ang atong likod malig-on ug makabantay kita og kahayag diha sa kangitngit.
Niini, ang Ginoo mao ang atong Ehemplo. Diha sa krus sa Golgota, human makaantus og grabeng kasakit nga namatay na unta Siya kon dili pa Siya ang Bugtong Anak sa Dios, mitan-aw Siya sa mga mopatay Kaniya ug miingon sa Iyang Amahan, “Pasayloa sila; kay wala sila mahibalo sa ilang gibuhat.”8 Samtang nag-antus alang sa tanan kinsa mabuhi dinhi sukad, mitan-aw Siya, gikan sa krus, ngadto ni Juan ug sa Iyang kaugalingong naguol nga inahan ug nangalagad kaniya sa iyang pagsulay:
“Sa pagkakita ni Jesus sa iyang inahan, ug sa tinun-an nga iyang gimahal nga nagbarog didto, miingon siya sa iyang inahan, Babaye, siya ang imong anak!
“Unya miingon siya sa tinun-an, Siya ang imong inahan! Sukad niadto gidala sa tinun-an si Maria aron didto na mopuyo sa iyang balay.”9
Pinaagi sa Iyang gipangbuhat nianang labing sagrado sa mga adlaw, boluntaryo Niyang gihatag ang Iyang kinabuhi alang sa matag usa kanato, nagtanyag og dili lang tabang niini nga kinabuhi apan kinabuhing dayon sa panahon nga moabut.
Nakakita ko og mga tawo nga talagsaon ang nakab-ut pinaagi sa pagpakita og kamatinud-anon atol sa grabe nga mga pagsulay. Sa tibuok Simbahan karon adunay mga ehemplo. Ang mga tawo nahimong mapaubsanon tungod sa kalisdanan. Pinaagi sa ilang matinud-anong paglahutay ug paningkamot, nahimo silang mas sama sa Manluluwas ug sa atong Langitnong Amahan.
Nakakat-on ko og laing leksyon gikan sa akong inahan. Sa dihang bata pa aduna siyay diphtheria ug hapit mamatay. Wala madugay aduna siyay spinal meningitis. Sayo nga namatay ang iyang amahan, mao nga ang akong inahan ug iyang mga igsoong lalaki mitabang sa pagsuporta sa ilang inahan.
Sa tibuok niyang kinabuhi, gibati niya ang mga epekto sa mga pagsulay sa sakit. Sa katapusang 10 ka tuig sa iyang kinabuhi, nagkinahanglan siya og daghang pag-opera. Apan agi niining tanan, nagmatinud-anon siya sa Ginoo, bisan niadtong naglubog siya sa higdaanan. Ang bugtong hulagway sa bungbong sa iyang kwarto mao ang sa Manluluwas. Ang katapusan niyang gisulti kanako sa dihang hapit na mamatay mao kini: “Hal, mora ka og gisip-on. Angay nimong atimanon ang imong kaugalingon.”
Sa iyang haya ang katapusang mamumulong mao si Elder Spencer W. Kimball. Human maghisgot kalabut sa mga pagsulay ug sa pagkamatinud-anon sa akong inahan, misulti siya og ingon niini: “Ang uban kaninyo tingali natingala nganong grabe ug dugay nga nag-antus si Mildred. Sultihan ko kamo ngano. Tungod kini kay gusto sa Ginoo nga mohashas pa og diyutay kaniya.”
Akong ipadayag ang akong pasalamat alang sa daghang matinud-anon nga mga miyembro sa Simbahan ni Jesukristo kinsa nagdala og mga palas-anon uban sa makanunayong pagtuo ug kinsa mitabang sa uban sa pagpas-an sa ilaha samtang ang Ginoo nagtinguha og diyutay pa nga paghashas kanila. Mopadayag usab ako og gugma ug pagdayeg alang sa mga tig-atiman ug mga lider sa tibuok kalibutan kinsa miserbisyo sa uban samtang sila ug ang ilang mga pamilya naglahutay sa ingon nga paghashas.
Ako mopamatuod nga kita mga anak sa usa ka Langitnong Amahan, kinsa nagmahal kanato. Akong gibati ang gugma ni Presidente Russell M. Nelson alang kanatong tanan. Siya ang propeta sa Ginoo sa kalibutan karon. Niini ako mopamatuod sa sagradong ngalan ni Ginoong Jesukristo, amen.