Naghulat sa Ginoo
Ang hugot nga pagtuo nagpasabut nga mosalig sa Dios sa maayo ug sa dautang mga panahon, bisan og naglakip kini sa mga pag-antus hangtud atong makita ang Iyang mga bukton nga ipadayag tungod og alang kanato.
Pinalangga kong mga kaigsoonan, kitang tanan mahinamon—labaw pa ako—nga makapaminaw gikan sa atong pinalangga nga Propeta, si Presidente Russell M. Nelson. Usa kini ka katingalahang komperensya, apan ikaduha kining higayon nga ang sakit nga COVID-19 miusab sa atong naandan nga mga kalihokan. Luya na kaayo kita niini nga kagaw, nga daw mobati kita nga manglarot na ang atong mga buhok. Ug dayag lang, pipila sa akong mga Kaigsoonan mao kana ang nahitabo. Palihug hibaloi nga kami padayon gayud nga nag-ampo alang niadtong naapektuhan sa bisan unsang paagi, ilabi na niadtong nawad-an og mga minahal. Ang tanan mouyon nga dugay na gyud kini, og taas na kaayo ang panahon.
Unsa kadugay kitang maghulat og kahupayan gikan sa mga kalisud nga miabut kanato? Unsa kahay atong mahimo aron makalahutay sa personal nga mga pagsulay samtang magsige kita og hulat ug ang tabang daw dugay kaayong moabut? Nganong malangay man kon ang mga palas-anon sobra sa atong makaya?
Samtang mangutana bahin niana, kita, kon atong sulayan, makadungog og hilak sa usa ka tawo gikan sa usa ka umog, ngitngit nga bilanggoan atol sa pinakatugnawng panahon nga sukad nasinati niana nga dapit.
“O Dios, hain ba ikaw?” nga atong madungog gikan sa kinahiladman sa Bilanggoan sa Liberty. “Ug hain ang imong gambalay nga nagsalipod sa imong tagoanan? Hangtud kanus-a ikaw mogamit sa imong kamot?”1 Hangtud kanus-a, O Ginoo, hangtud kanus-a?
Busa, dili kita ang una o dili kita ang katapusang mangutana og ingon nianang mga pangutana kon ang mga kasubo moluya kanato o ang kangutngot sa atong kasingkasing magpadayon. Wala ako maghisgot karon bahin sa mga pandemya o sa mga bilanggoan apan bahin kaninyo, sa inyong pamilya, ug sa inyong kasilinganan kinsa nag-atubang og mga hagit. Mamulong ako bahin sa pangandoy sa daghan kinsa gustong magminyo ug wala pa naminyo o kinsa naminyo ug nangandoy nga unta ang relasyon madugangan ang pagka-celestial. Mamulong ako bahin niadtong nagsagubang og wala damhang grabe nga kahimtang sa medikal—tingali sakit nga walay kaayohan—o nag-atubang og tibuok kinabuhing sakit sa kaliwat nga wala nay remedyo. Mamulong ako bahin sa padayong panglimbasog uban sa mga hagit sa emosyonal ug kahimsog sa pangisip nga nagpalisud gayud sa daghan nga nanag-antus uban niini, ug sa mga kasingkasing niadtong mga nahigugma ug nag-antus uban kanila. Mamulong ako bahin sa mga kabus, kinsa giingon sa Manluluwas nga dili gayud kalimtan, ug mamulong ako bahin kaninyo nga naghulat sa pagbalik sa usa ka anak, bisan unsa pay edad, kinsa mipili og dalan nga lahi sa inyong giampo nga iyang subayon.
Dugang pa, moangkon ako nga gani kining taas nga lista sa mga butang nga tingali personal natong gihulat walay paghana nga motubag sa dagkong mga problema sa ekonomiya, politika, ug sa katilingban nga sa tiningob nga paagi miharong kanato. Ang atong Amahan sa Langit dayag nga naglaum kanato sa pagtubag niining lisud kaayong mga problema sa katawhan ug sa personal, apan dunay mga panahon sa atong kinabuhi nga gani ang atong pinaka-espirituhanong paningkamot, ug matinguhaong mga pag-ampo dili moani sa kadaugan nga atong gipangandoy, kabahin man sa dagko nga mga isyu sa kalibutan o sa ginagmay nga personal nga mga isyu. Busa samtang magtrabaho kita ug magpaabut sa mga tubag sa pipila sa atong mga pag-ampo, akong ihalad kaninyo ang akong apostolikanhong saad nga kini gidungog ug gitubag, apan tingali dili sa panahon o sa paagi nga atong gusto. Apan kanunay kini nga gitubag sa panahon ug sa paagi nga kini tubagon sa usa nga nasayud sa tanan ug walay paglurang nga maloloy-ong ginikanan. Pinalangga kong mga igsoon, palihug sabta nga Siya kinsa dili gayud magduka o matulog2 mahunahunaon alang sa kalipay ug sa umaabut nga kahimayaan sa Iyang mga anak labaw sa tanan nga buhaton sa usa ka balaang binuhat. Siya ang mahimayaon nga hulagway sa tiunay nga gugma, ug Manggiloy-on nga Amahan ang Iyang ngalan.
“Kon mao man kana,” tingali makaingon kamo nga, “dili ba angay nga unta ang Iyang gugma ug kalooy moiway na lang sa among personal nga mga Pulang Dagat [Kalisdanan] ug tugutan kaming mobaktas latas sa among mga problema subay sa uga nga yuta? Dili ba angay nga ipadala Niya kadtong ika-21 nga siglo nga mga kanaway aron motukob diha dayon sa mga gangis nga nagdala sa kalisdanan karon?”
Ang tubag niana nga mga pangutana “Oo, ang Dios makahatag og mga milagro diha dayon, apan sa dili madugay mahibaloan nato nga ang mga panahon sa atong mortal nga panaw Iyaha ug Siya lamang ang makabuot.” Siya ang nagdumala sa mga hitabo ug sa mga gutlo sa atong kinabuhi sa tinagsatagsa. Alang sa matag tawong masakiton nga naayo diha dayon samtang naghulat siya nga makasulod sa Linaw sa Betsata,3 adunay laing tawo nga naghulat og 40 ka tuig sa desyerto aron makasulod sa gisaad nga yuta.4 Alang sa matag Nephi ug Lehi nga balaanong gipanalipdan pinaagi sa naglibut nga kalayo tungod sa ilang hugot nga pagtuo,5 adunay kitay Abinadi nga gitambog sa nagdilaab nga kalayo tungod sa iyang hugot nga pagtuo.6 Ug hinumdumi nga ang sama nga Elijah kinsa nagtawag og kalayo gikan sa langit diha dayon sa pagsaksi batok sa mga pari ni Baal7 siya gihapon nga Elijah ang nag-antus sulod sa katuigan nga walay ulan ug kinsa, sulod sa panahon, gipakaon lamang og diyutay nga bitbit sa kuko sa usa ka uwak.8 Sa akong bana-bana, dili nato kadto matawag og “makalingaw nga pagpangaon sa McDo [happy meal].”
Ang punto? Ang punto mao nga ang hugot nga pagtuo nagpasabut nga mosalig sa Dios sa maayo ug sa dautang mga panahon, bisan og naglakip kini sa mga pag-antus hangtud atong makita ang Iyang mga bukton nga ipadayag tungod og alang kanato.9 Posibling lisud kana sa moderno natong kalibutan diin daghan ang nagtuo nga ang pinakamaayo sa kinabuhi mao ang paglikay sa tanang pag-antus, nga walay usa ang angayng maghingutas sa bisan unsa.10 Apan kana nga pagtuo dili gayud mosangpot aron “mahingkod kita sama sa kahingkod ni Kristo.”11
Mangayo ako og pasaylo ni Elder Neal A. Maxwell nga usabon ug ipaambit ang iya nang gisulti makausa, ako usab mosugyot nga sa “kinabuhi sa tawo … dili mahimong madungan ang kapuno sa pagtuo ug walay pagkahasol.” Dayag lang nga dili ingon ani “nga magpakabuhi nga wala masayud og kalisud,” moingon samtang magsige kita og relaks: “Ginoo, hatagi ako sa pinakapinili nga mga hiyas, apan isiguro nga ayaw ako hatagi og kasubo, o kaguol, o kasakit, o oposisyon. Palihug ayaw itugot nga dunay dili ganahan kanako o moluib kanako, ug labaw sa tanan, ayaw gayud ako pabatia nga gitalikdan Nimo ako o sa akong mga minahal. Gani, Ginoo, matnguni nga ilayo ako sa tanang kasinatian nga naghimo Kanimong balaan. Ug dayon, kon ang kalisdanan sa uban tapos na, palihug tugoti ako nga makig-uban Kanimo, diin ako makapanghambog bahin sa pagkaparehas sa atong kalig-on ug sa atong mga kinaiya samtang nag-utaw-utaw ako sa kalipay sa komportable nga Relihiyon.”12
Minahal kong mga kaigsoonan, ang Kristiyanidad [Relihiyon] makahupay, apan sa kasagaran dili komportable. Ang dalan sa pagkabalaan ug kalipay dinhi ug human dinhi layu ug usahay batoon. Nagkinahanglan og panahon ug determinasyon ang pagsubay niini. Apan siyempre, ang ganti sa paghimo niini dako ug mahinungdanon kaayo. Kini nga kamatuoran gitudlo sa tataw ug sa makaagni nga paagi sa ika-32 nga kapitulo sa Alma diha sa Basahon ni Mormon. Diha ang bantogan nga halangdon nga pari mitudlo nga kon ang pulong sa Dios matanom diha sa atong kasingkasing isip usa lang ka liso, ug kon igo ang atong pagbu-bu niini, paghabok, pag-alima, ug pag-awhag niini, kini ugma damlag mamunga og “bililhon kaayo, … tam-is labaw sa tanan nga tam-is,” ang pagkaon niini mosangput sa kahimtang nga wala nay pagkauhaw ug wala nay pagkagutom.13
Daghang leksyon ang gitudlo dinhi niining talagsaon nga kapitulo, apan ang sentro niining tanan mao ang pamahayag nga ang liso kinahanglang alimahan ug ato gayud nga hulaton nga kini mohingkod, “naglantaw uban ang mata sa hugot nga pagtuo sa bunga niini.”14 Ang atong pag-ani, miingon si Alma, moabut sa “dili madugay.”15 Dili kaayo ikatingala nga gitapos niya ang iyang talagsaong instruksyon pinaagi sa pagsubli sa makatulo nga higayon sa panawagan alang sa kakugi ug pailub sa pag-alima sa pulong sa Dios diha sa atong kasingkasing, “magpaabut,” sama sa iyang giingon, uban sa “pagkamainantuson … sa kahoy nga mamunga nganha kaninyo.”16
COVID ug kanser, pagduha-duha ug kasagmuyo, problema sa pinansyal ug mga pagsulay sa pamilya. Kanus-a man kini nga mga palas-anon matapos? Ang tubag “sa dili madugay.”17 Ug bisan kini sa mubo man nga panahon o taud-taod pa, dili atoa ang paglitok, apan pinaagi sa grasya sa Dios, ang mga panalangin moabut niadtong kinsa hugot nga mohupot sa ebanghelyo ni Jesukristo. Kana nga isyu gisulbad didto gayud sa pribadong tanaman ug sa publiko kaayo nga bungtod sa Jerusalem dugay na.
Samtang maminaw kita karon sa atong pinalanggang propeta nga motapos niini nga komperensya, unta atong hinumduman, ang gipakita ni Russell Nelson sa tibuok niyang kinabuhi, nga kadtong “mosalig sa Ginoo makabaton og bag-ong kusog [ug] manglupad sila daw agila; managan sila, ug dili kapuyan; … manlakaw, ug dili maluya.”18 Mag-ampo ako nga “sa dili madugay”—haduol na o taud-taod pa—kadto nga mga panalangin moabut sa matag usa kaninyo nga nangayo og kahupayan gikan sa inyong kasubo ug sa kagawasan gikan sa inyong kasub-anan. Mosaksi ako mahitungod sa gugma sa Dios ug sa Pagpahiuli sa Iyang mahimayaon nga ebanghelyo, nga mao, o sa lahi nga paagi, maoy tubag sa matag isyu nga atong giatubang. Pinaagi sa makatubos nga ngalan ni Ginoong Jesukristo, amen.