Paniguroa nga ang Inyong Pagkamalahutayon Mahingpit, ug Ipha Kining Tanan nga Hingpit nga Kalipay!
Kon kita mopakita og pailub, ang atong pagtuo molambo. Samtang ang atong pagtuo molambo, mao usab ang atong kalipay.
Duha ka tuig ang milabay, ang akong manghod nga lalaki, si Chad, namatay. Ang iyang pagbalhin ngadto sa pikas kinabuhi nagbilin og kahaw-ang sa kasingkasing sa akong bayaw nga si Stephanie; sa ilang duha ka gagmay nga mga anak, si Braden ug Bella; ingon man sa tibuok pamilya. Nakakaplag kami og kahupayan diha sa mga pulong ni Elder Neil L. Andersen sa kinatibuk-ang komperensya sa semana sa wala pa mamatay si Chad: “Sa panglimbasog sa yutan-ong mga pagsulay, nga nagmapailubon sa pagpadayon, ang makaayo nga gahum sa Manluluwas magdala og kahayag, panabut, kalinaw, ug paglaum” (“Nasamdan,” Liahona, Nob. 2018, 85).
Kami adunay hugot nga pagtuo kang Jesukristo; kami nasayud nga makauban namo si Chad pag-usab, apan sakit ang mawad-an sa iyang pisikal nga presensya! Daghan ang nawad-an og mga minahal. Lisud ang pagpailub ug paghulat sa panahon nga makauban nato sila pag-usab.
Sa tuig human siya namatay, among gibati nga daw adunay ngitngit nga panganod nga mitabon kanamo. Nagtinguha kami og kahupayan diha sa pagtuon sa among mga kasulatan, sa mas mainiton nga pag-ampo, ug mas kanunay nga pagtambong sa templo. Ang mga linya niini nga himno nakakuha sa among pagbati nianang panahona: “Duol nang kaadlawon, katawhan mamangon, ang gabiing mangitngit nagkahanaw” (“Duol Na ang Kaadlawon,” Mga Himno, nu. 28).
Ang among pamilya nakatino nga ang 2020 usa ka makadasig nga tuig! Nagtuon kami sa among leksyon sa Dali, Sunod Kanako diha sa Bag-ong Tugon nga basahon ni Santiago sa ulahing bahin sa Nobyembre 2019 sa dihang nakita namo ang usa ka tema. Ang Santiago, kapitulo 1, bersikulo 2 mabasa nga, “Akong kaigsoonan, ipha kining tanan nga hingpit nga kalipay kon kamo mahulog ngadto sa daghan nga mga kasakit” (Hubad ni Joseph Smith, Santiago 1:2 [sa Giya ngadto sa mga Kasulatan]). Sa among tinguha nga buksan ang bag-ong tuig, ang bag-ong dekada, uban sa kalipay, nakahukom kami nga sa 2020 among “iphon kining tanan nga hingpit nga kalipay.” Kusganon kaming mibati niini nga sa miaging Pasko gigasahan namo og mga T-shirt ang among mga igsoon nga nagsulti sa pinabagang mga letra, “Ipha Kining Tanan nga Hingpit nga Kalipay.” Ang tuig nga 2020 sigurado gayud nga tuig sa kalipay ug pagmaya.
Karon, ania na kita—ang 2020 nagdala hinoon og COVID-19 nga pandemya sa tibuok kalibutan, kagubot sa mga tawo, dugang nga mga katalagman sa kinaiyahan, ug ekonomikanhong kalisdanan. Ang atong Langitnong Amahan tingali naghatag kanato og panahon sa pagpamalandong ug pagkonsiderar sa atong pagsabut sa pailub ug sa atong tuyo nga desisyon sa pagpili og kalipay.
Ang basahon ni Santiago adunay bag-ong kahulugan alang kanamo sukad niini. Ang Santiago, kapitulo 1, mga bersikulo 3 ug 4 nagpadayon:
“Kay nasayod kamo nga ang inyong pagtuo gisulayan lamang aron kamo mahimong malahutayon.
“Paniguroa nga ang inyong pagkamalahutayon mahingpit aron mahingpit gayod kamo, ug dili makulangan sa bisan unsa.”
Sa atong mga paningkamot sa pagpangita og kalipay taliwala sa atong mga pagsulay, atong nalimtan nga ang pagbaton og pailub mao ang yawe aron kadtong mga pagsulay moepekto alang sa atong kaayohan.
Si Hari Benjamin mitudlo kanato sa pagsalikway sa kinaiyanhon nga pagkatawo ug mahimo nga “usa ka santos pinaagi sa pag-ula ni Kristo ang Ginoo, ug mahimo nga ingon sa usa ka bata, manunuton, maaghup, mapainubsanon, mapailubon, puno sa gugma, mauyunon sa pagdawat sa tanan nga mga butang” (Mosiah 3:19).
Ang kapitulo 6 sa Isangyaw ang Akong Ebanghelyo nagtudlo og mga hiyas ni Kristo nga mahimo natong sundon: “Ang pailub mao ang kapasidad sa paglahutay sa kadugay, kasamok, oposisyon, o pag-antus nga dili masuko, mahigawad, o mabalak-on. Mao kini ang abilidad sa pagbuhat sa kabubut-on sa Dios ug sa pagdawat sa Iyang tayming. Kon mapailubon ka, makasugakod ka kon ubos sa pressure [kaapiki] ug makahimo sa pagsagubang sa kalisdanan sa kalma ug malaumong paagi” (Isangyaw ang Akong Ebanghelyo: Usa ka Giya sa Misyonaryo nga Pangalagad, [2004], 145).
Ang paghingpit sa pailub mahimo usab nga mahulagway diha sa kinabuhi sa usa sa nag-unang mga disipulo ni Kristo, si Simeon nga Canaanhon. Ang mga Patriyota usa ka grupo sa mga nasyonalistang Judeo kinsa kusganong nakigbatok sa Romano nga pagmando. Ang Patriyota nga kalihokan nag-awhag og kagubot batok sa mga Romano, sa ilang kakumbuya nga mga Judeo, ug sa mga Saduseo pinaagi sa pagpanguha sa ilang mga pagkaon ug paghimo og ubang kalihokan aron sa pagtabang sa ilang kawsa (tan-awa sa Encyclopedia Britannica, “Zealot,” britannica.com). Si Simon nga Canaanhon usa ka Patriyota (tan-awa sa Lucas 6:15). Hunahunaa si Simon nga misulay sa paghulhog sa Manluluwas nga mogamit og hinagiban, mangulo og militanteng grupo, o maghimo og kagubot sa Jerusalem. Si Jesus mitudlo:
“Bulahan ang mapaubsanon kay maila ang tibuok yuta. …
“Bulahan ang maluluy-on kay kaluy-an sila sa Dios. …
“Bulahan ang naningkamot nga managdait ang katawhan kay isipon sila sa Dios nga iyang mga anak” (Mateo 5:5, 7, 9).
Si Simon tingali mihangup ug mipasiugda sa iyang pilosopiya uban sa kasibot ug kamainiton, apan ang mga kasulatan nagsugyot nga pinaagi sa impluwensya ug ehemplo sa Manluluwas, nausab ang iyang tumong. Ang iyang pagkadisipulo ni Kristo nahimong nag-unang tumong sa mga paningkamot sa iyang kinabuhi.
Samtang kita mohimo ug motuman sa mga pakigsaad sa Dios, ang Manluluwas makatabang kanato nga “matawo pag-usab; oo, matawo sa Dios, mausab gikan [sa usa ka] kalibutanon ug napukan nga kahimtang, ngadto sa usa ka kahimtang sa pagkamatarung, ingon nga natubos sa Dios, nahimo nga iyang mga anak nga lalaki ug mga anak nga babaye” (Mosiah 27:25).
Sa tanang mainitong sosyal, relihiyuso, ug politikanhong mga paningkamot sa atong panahon, himoa ang disipulo ni Jesukristo nga maoy atong labing prominente ug importanting pakig-abin. “Kay hain gani ang inyong bahandi atua usab didto ang inyong kasingkasing” (Mateo 6:21). Dili usab nato kalimtan nga bisan human nga ang matinud-anong mga disipulo nakabuhat sa “kabubut-on sa Dios,” sila “kinahanglan nga magmapailubon” (Mga Hebreo 10:36).
Sama nga ang pagsulay sa atong pagtuo makaugmad og pailub sulod kanato, kon kita mopakita og pailub, ang atong pagtuo molambo. Samtang ang atong pagtuo molambo, mao usab ang atong kalipay.
Niining milabay nga Marso, ang among ikaduhang anak nga babaye, si Emma, sama sa daghang misyonaryo sa Simbahan, mipaubos sa gikinahanglan nga paglain [isolation]. Daghang misyonaryo ang mipauli. Daghang misyonaryo ang naghulat og kausaban sa assignment. Daghan ang wala makadawat sa ilang mga panalangin sa templo sa wala pa mobiya padulong sa dapit nga serbisyohan. Salamat, mga elder ug mga sister. Kami nagmahal kaninyo.
Si Emma ug ang iyang kompanyon sa Netherlands misinati og emosyonal nga kalisud niadtong unang pipila ka semana—kalisud nga misangpot sa paghilak sa daghang higayon. Tungod kay mubo ra ang mga oportunidad sa personal nga inter-aksyon ug limitado ang paggawas, ang pagsalig ni Emma sa Dios milambo. Nag-ampo kami uban kaniya diha sa internet ug nangutana unsaon namo sa pagtabang. Mihangyo siya kanamo nga mougmad og relasyon sa mga higala nga iyang gitudloan diha sa internet!
Ang among pamilya misugod sa pagkontak diha sa internet, sa tagsa-tagsa, sa mga higala ni Emma sa Netherlands. Midapit kami nila sa pag-apil sa among sinemana nga pagtuon sa pamilya sa Dali, Sunod Kanako diha sa internet. Si Floor, Laura, Renske, Freek, Benjamin, Stal, ug Muhammad nahimo namong mga higala. Ang pipila sa among mga higala sa Netherlands misulod sa “higpit nga ganghaan” (3 Nephi 14:13). Ang uban gipakita sa “kahigpit sa dalan, ug sa kapig-ot sa ganghaan, diin sila kinahanglan mosulod” (2 Nephi 31:9). Sila atong mga igsoon diha ni Kristo. Matag semana kami “[moihap niining] tanan nga hingpit nga kalipay” samtang magtambayayong diha sa among pag-uswag sa dalan sa pakigsaad.
Atong “paniguro[on] nga ang [atong] pagkamalahutayon mahingpit” (Santiago 1:4) sa atong dili mahimo nga panagtagbo sa personal isip mga pamilya sa ward sulod sa usa ka panahon. Apan atong iphon nga kalipay ang pagtuo sa atong mga pamilya nga nagkadako pinaagi sa bag-ong mga koneksyon sa teknolohiya ug sa Dali, Sunod Kanako nga pagtuon sa Basahon ni Mormon.
Si Presidente Russell M. Nelson misaad, “Ang inyong makanunayong mga paningkamot niini nga tinguha—bisan sa mga gutlo nga tingali mibati kamo nga dili kaayo kamo malampuson—mousab sa inyong kinabuhi, sa inyong pamilya, ug sa kalibutan” (“Padayon Uban sa Hugot nga Pagtuo,” Liahona, Mayo 2020, 114).
Ang dapit nga mohimo kita og sagrado nga mga pakigsaad sa Dios—ang templo—temporaryo nga sirado. Ang dapit nga motuman kita sa sagrado nga mga pakigsaad sa Dios—ang panimalay—bukas! Kita adunay oportunidad diha sa panimalay sa pagtuon ug pagpamalandong sa talagsaong kaanindot sa mga pakigsaad sa templo. Bisan tuod dili makasulod nianang sagradong pisikal nga luna, ang atong “mga kasingkasing … malipay sa hilabihan sa sangputanan sa mga panalangin nga ibu-bu” (Doktrina ug mga Pakigsaad 110:9).
Daghan ang nawad-an og trabaho; ang uban nawad-an og mga oportunidad. Kita malipay, hinoon, uban ni Presidente Nelson, kinsa bag-o lang misulti: “Ang boluntaryo nga mga halad sa puasa gikan sa atong mga miyembro sa tinud-anay misaka, ingon man ang boluntaryo nga mga kontribusyon ngadto sa atong makitawhanong mga pundo [humanitarian funds]. … Magkauban kitang mobuntog niining lisud nga panahon. Ang Ginoo mopanalangin kaninyo samtang mopadayon kamo sa pagpanalangin sa uban” (Facebook page ni Russell M. Nelson, post niadtong Ago. 16, 2020, facebook.com/russell.m.nelson).
“Ayaw kamo kahadlok” mao ang sugo gikan sa Ginoo, dili ang pagbaton kamo og kahadlok (Mateo 14:27).
Usahay mawad-an kita og pailub kon maghunahuna kita nga atong “gibuhat ang tanang husto” ug wala gihapon nato madawat ang mga panalangin nga atong gitinguha. Si Enoch nagkinabuhi nga matinumanon sa Dios sulod sa 365 ka tuig sa wala pa siya ug ang iyang katawhan gidala sa Dios ngadto sa langit nga wala moagi og kamatayon. Tulo ka gatos ug kan-uman ug lima ka tuig nga paningkamot sa pagbuhat sa tanang husto, ug dayon nahitabo kini! (Tan-awa sa Doktrina ug mga Pakigsaad 107:49.)
Ang pagkamatay sa akong igsoong si Chad nahitabo pipila lang ka bulan human kami ma-release sa pagdumala sa Utah Ogden Mission. Milagroso kadto nga samtang nagpuyo kami sa Habagatang Bahin sa California, sa tanang 417 ka mission nga mahimo kaming ma-assign sa tuig 2015, na-assign kami sa amihanang bahin sa Utah. Ang mission home 30 minutos lang nga pag-drive padulong sa panimalay ni Chad. Nahiling si Chad nga dunay cancer human namo madawat ang among mission assignment. Bisan pa sa labing lisud nga sirkumstansya, nasayud kami nga ang atong Langitnong Amahan naghunahuna kanamo ug nagtabang kanamo nga makakaplag og kalipay.
Mosaksi ko sa makatubos, makabalaan, makapaubsanon, ug makalipay nga gahum sa Manluluwas nga si Jesukristo. Mosaksi ko nga kon mag-ampo kita ngadto sa atong Amahan sa Langit sa ngalan ni Jesus, Siya motubag kanato. Mosaksi ko nga samtang kita maminaw, mopatalinghug, ug mosunod sa tingog sa Ginoo ug sa Iyang buhi nga propeta, si Presidente Russell M. Nelson, atong “[mapaniguro] nga ang [atong] pagkamalahutayon mahingpit,” ug “[moihap niining] tanan nga hingpit nga kalipay.” Sa ngalan ni Jesukristo, amen.