Imo na ang Sukli
Pinaagi ni Jesukristo, gihatagan kita sa kalig-on sa paghimo og malungtarong mga kausaban. Samtang kita mapainubsanong moduol ngadto Kaniya, Siya modugang sa atong kapasidad sa pag-usab.
Mga sister, gikalipay gayud nako og dako nga ikauban kamo.
Hunahunaa nga adunay usa ka tawo nga moadto sa merkado aron sa pagpalit og usa ka butang. Kon siya mobayad sa kahera og kantidad nga labaw pa kay sa balor sa butang, ang kahera mohatag niya og sukli.
Si Hari Benjamin mitudlo sa iyang katawhan sa karaang Amerika sa dako kaayong mga panalangin nga atong nadawat gikan sa atong Manluluwas, si Jesukristo. Siya ang milalang sa mga langit, sa yuta ug sa tanang katahum nga atong matagamtam. 1 Pinaagi sa Iyang mahigugmaon nga Pag-ula, Siya nag-andam og paagi alang kanato nga matubos gikan sa sala ug kamatayon. 2 Samtang atong ipakita ang atong pasalamat ngadto Kaniya pinaagi sa makugihong pagsunod sa Iyang mga sugo, Siya diha-diha dayon mopanalangin kanato, magpabilin kitang kanunay nga anaay utang Kaniya.
Siya naghatag kanato og daghan, labaw pa kadaghan kay sa bili sa unsa ang atong mabalik ngadto Kaniya. Busa, unsa ang atong mahatag ngadto Kaniya, kinsa mibayad og dili masubay nga kantidad alang sa atong mga sala? Kita makahatag Kaniya og sukli. Kita makahatag Kaniya sa atong kausaban. Kini mahimong usa ka kausaban sa hunahuna, usa ka kausaban sa kinaiya, o usa ka kausaban sa direksyon nga atong padulngan. Agig balos sa Iyang bililhon nga bayad alang sa matag usa kanato, ang Ginoo nangayo kanato og kausaban sa kasingkasing. Ang kausaban nga Iyang gihangyo kanato dili alang sa Iyang kaayohan apan alang sa kanato. Busa, dili sama sa mamalitay sa merkado nga kuhaon ang sukli nga atong ihatag, ang atong mabination nga Manluluwas nagsinyas kanato nga imo na ang sukli.
Human madungog ang mga pulong nga gipamulong ni Hari Benjamin, ang iyang mga katawhan misinggit, nagpahayag nga ang ilang mga kasingkasing nausab nag-ingon, “Tungod kay ang Espiritu sa Ginoong Makagagahum, nga nakahimo og dako nga kausaban dinhi kanamo, … kami wala nay hilig sa pagbuhat og dautan, apan sa pagbuhat og maayo sa kanunay.” 3 Ang mga kasulatan wala mag-ingon nga sila diha dayon nahimo nga hingpit, hinoon, ang ilang tinguha sa pag-usab mipugos kanila sa paglihok. Ang ilang kausaban sa kasingkasing nagpasabut sa pagsalikway sa kinaiyanhon nga pagkalalaki o pagkababaye ug motahan ngadto sa Espiritu samtang naningkamot nga mahimong mas mahisama ni Jesukristo.
Si Presidente Henry B. Eyring mitudlo: “Ang tinuod nga pagkakabig nag-agad sa gawasnong tinguha diha sa hugot nga pagtuo, uban sa dakong paningkamot ug ginagmay nga kasakit. Dayon ang Ginoo mao kinsa ang motugot … sa milagro sa paglimpyo ug kausaban.” 4 Hiusahon ang atong mga paningkamot uban sa abilidad sa Manluluwas sa pag-usab kanato, kita mahimong bag-ong mga binuhat.
Sa bata-bata pa ko, naghunahuna ko sa akong kaugalingon nga naglakaw sa usa ka sakaon, pinatindog nga dalan paingon sa akong tumong nga kinabuhing dayon. Matag higayon nga ako mohimo o mosulti og sayop, gibati nako ang akong kaugalingon nga modailos sa dalan, unya magsugod og balik sa akong panaw. Sama kadto sa pagtugpa niadtong usa ka kwadro diha sa dula sa mga bata nga Chutes and Ladders nga makapabalik kaninyo gikan sa ibabaw sa board balik ngadto sa sinugdanan sa dula! Makapasagmuyo kaayo kadto! Apan samtang ako misugod sa pagkasabut sa doktrina ni Kristo 5 ug unsaon paggamit niini matag adlaw sa akong kinabuhi, akong nakit-an ang paglaum.
Si Jesukristo naghatag kanato og usa ka nagpadayon nga sumbanan sa kausaban. Siya nagdapit kanato sa pagpakita og hugot nga pagtuo diha Kaniya, nga nagdasig kanato sa paghinulsol—“ang hugot nga pagtuo ug paghinulsol nga nagdala og kausaban sa kasingkasing.” 6 Samtang kita maghinulsol ug mopunting sa atong mga kasingkasing ngadto Kaniya, kita makaangkon og mas dakong tinguha sa paghimo ug pagsunod sa sagradong mga pakigsaad. Makalahutay kita hangtud sa katapusan pinaagi sa padayon nga paggamit niining mga baruganan sa tibuok natong kinabuhi ug sa pagdapit sa Ginoo sa pag-usab kanato. Ang paglahutay hangtud sa katapusan nagpasabut nga mag-usab hangtud sa katapusan. Ako karon nakasabut nga ako dili magsugod og balik sa matag pakyas nga pagsulay, apan nga sa matag pagsulay, ako nagpadayon sa proseso sa kausaban.
Adunay dinasig nga mga pulong diha sa tema sa Young Women nga namahayag, “Akong hatagan og bili ang gasa sa paghinulsol ug magtinguha nga molambo sa matag adlaw.” 7 Ako nag-ampo nga kita mohatag og bili niining matahum nga mga gasa ug nga kita tuyo nga magtinguha og kausaban. Usahay ang mga kausaban nga atong gikinahanglan nga buhaton adunay kalabutan sa grabe nga sala. Apan kasagaran, maningkamot kita sa paghashas sa atong kinaiya aron sa pagpahiangay sa atong mga kaugalingon sa mga kinaiya ni Jesukristo. Ang atong inadlaw nga mga pagpili mahimong makatabang o makapugong sa atong pag-uswag. Gamay apan sa kanunay, ang tinuyo nga mga kausaban makatabang kanato nga molambo. Ayaw pagpakawala sa kadasig. Ang kausaban usa ka tibuok kinabuhi nga proseso. Ako mapasalamaton nga sa atong mga kalisud sa pag-usab, ang Ginoo mapailubon kanato.
Pinaagi ni Jesukristo, gihatagan kita sa kalig-on sa paghimo og malungtarong mga kausaban. Samtang kita mapainubsanong moduol ngadto Kaniya, Siya modugang sa atong kapasidad sa pag-usab.
Agig dugang sa makapausab nga gahum sa Pag-ula sa Manluluwas, ang Espiritu Santo mosuporta ug mogiya kanato samtang kita maningkamot. Gani Siya makatabang kanato nga masayud kon unsa nga mga kausaban ang kinahanglan natong buhaton. Makaplagan usab nato ang tabang ug pagdasig pinaagi sa mga panalangin sa pagkapari, pag-ampo, pagpuasa, ug pagtambong sa templo.
Sa samang paagi, ang kasaligan nga mga sakop sa pamilya, mga lider, ug mga higala mahimong makatabang sa atong mga paningkamot sa pag-usab. Sa dihang ako otso anyos, akong magulang nga lalaki, si Lee, ug ako mogahin og panahon uban sa among mga higala sa pagdula diha sa mga sanga sa kahoy sa kasilinganan. Ganahan mi nga mag-uban nga makigdait sa among mga higala diha sa landong niadto nga kahoy. Usa ka adlaw, si Lee nahulog sa kahoy ug nabali ang iyang bukton. Ang pagkaangkon og bali sa bukton nakapalisud kaniya sa pagkatkat sa kahoy nga siya ra. Apan ang pagdula diha sa kahoy lahi ra gayud kon wala siya. Mao nga ang uban kanamo miabag kaniya gikan sa ubos samtang ang uban mibira sa iyang maayo nga bukton,ug sa walay dakong paningkamot, si Lee nabalik sa ibabaw sa kahoy. Ang iyang bukton bali lang gihapon, apan siya nakauban kanamo pag-usab nalingaw sa among panaghigalaay samtang siya nagpaalim.
Ako kanunay naghunahuna sa akong kasinatian sa pagdula diha sa kahoy isip usa ka matang sa among kalihokan diha sa ebanghelyo ni Jesukristo. Diha sa landong sa mga sanga sa ebanghelyo, kita makatagamtam og daghang mga panalangin nga may kalabutan sa atong mga pakigsaad. Ang pipila tingali mahulog gikan sa kahilwasan sa ilang mga pakigsaad ug nanginahanglan sa atong tabang sa pagsaka og balik ngadto sa kasiguroan sa mga sanga sa ebanghelyo. Mahimong lisod alang kanila ang pagbaik nga sila ra. Mahimo bang atong hinayon og bira og gamay dinhi ug iduot pataas og gamay didto aron sa pagtabang kanila nga maayo samtang sila makatagamtam sa atong pakighigalaay?
Kon kamo nag-antus og sakit gikan sa pagkahulog, palihug tugoti ang uban sa pagtabang kaninyo nga makabalik ngadto sa inyong mga pakigsaad ug sa mga panalangin nga gitanyag niini. Ang Manluluwas makatabang kaninyo nga mamaayo ug mag-usab samtang gipalibutan niadtong mga nahigugma kaninyo.
Ako usahay makatagbo og mga higala nga wala na nako igkita sulod sa daghang katuigan. Usahay sila moingon, “Wala gayud ka mausab!” Matag higayon nga makadungog ko niana, dili kaayo ko mahimutang, tungod kay nanghinaut ko nga nausab ko sulod sa katuigan. Ako naghinaut nga nausab ko sukad gahapon! Ako nanghinaut nga ako mas namabination, dili na kaayo mahukmanon, ug mas maloloy-on. Ako nanghinaut nga mas ni paspas ko nga motubag sa mga panginahanglan sa uban, ug ako nanghinaut nga ako mas namapailubon bisan gamay lang.
Ganahan kong mag-hiking sa kabukiran duol sa akong panimalay. Kasagaran, masudlan og gagmay nga bato ang akong sapatos samtang maglakaw ko sa agianan. Sa kadugayan, mohunong ko ug motaktak sa akong sapatos. Apan kini nakapatingala kanako unsa ka dugay nako gitugutan ang akong kaugalingon nga maglakaw sa kasakit una pa ko mohunong ug motaktak sa gagmay nga bato.
Samtang kita maglakaw sa dalan sa pakigsaad, usahay masudlan kita og mga bato sa atong sapatos pinaagi sa dili maayo nga kinaiya, mga sala, o ngil-ad nga pamatasan. Ang mas dali natong pagtaktak kanila gikan sa atong kinabuhi, mas makahimong malipayon sa atong mortal nga panaw.
Ang pagpadayon sa kausaban nagkinahanglan og paningkamot. Dili nako makita nga mohunong diha sa agianan aron lang sa pagbutang og balik sa akong sapatos sa samok ug sakit nga gagmay’ng bato nga bag-o lang nakong gitangtang. Dili ko gusto nga mobuhat niana labaw pa kay sa usa ka matahum nga alibangbang nga mopili sa pagbalik ngadto sa iyang uloran.
Ako mopamatuod nga tungod ni Jesukristo, kita mahimong mag-usab. Kita makapahiangay sa atong mga gawi, mousab sa atong mga hunahuna, ug mohashas sa atong kinaiya aron mahimong mas mahisama Kaniya. Ug uban sa Iyang tabang, atong mapadayon ang kausaban. Sa ngalan ni Jesukristo, amen.