Pinaagi sa Panaghiusa sa Pagbati Kita Makaangkon og Gahom sa Dios
Samtang magtinguha kita og panaghiusa sa pagbati, atong magamit ang gahom sa Dios sa paghimong hingpit sa atong mga paningkamot.
Ang inahan ni Gordon misulti niya nga kon iyang humanon ang iyang buluhaton, ang iyang inahan mohimo niya og pie. Ang iyang paborito. Para lang gyud niya. Milihok si Gordon aron mahuman kadto nga mga buluhaton, ug ang iyang inahan mihimo sa pie. Ang iyang magulang nga si Kathy miabut sa balay uban ang usa ka higala. Iyang nakita ang pie ug mihangyo kon siya ug ang iyang higala pwede ba nga makakuha og usa ka hiwa.
“Dili,” miingon si Gordon, “akoa na nga pie. Si Mama miluto ana para nako, ug kinahanglan nako na nga trabahoan.”
Si Kathy nasuko sa iyang manghud. Siya naghunahuna ra sa kaugalingon ug dalo. Nganong iyahon ra man ni tanan?
Paglabay sa pipila ka oras sa dihang miabli si Kathy sa sakyanan aron ihatud ang iyang higala, anaa sa lingkuranan ang duha ka maayong pagkapilo nga napkin, gipatongan og duha ka tinidor, ug duha ka lagpad nga hiwa sa pie nga naa sa plato. Si Kathy misaysay niini nga istorya sa haya ni Gordon aron mapakita unsa ka andam si Gordon nga mag-usab ug magpakita og kaayo niadtong dili kanunay angayan niini.
Niadtong 1842, ang mga Santos naningkamot pag-ayo sa pagtukod sa Templo sa Nauvoo. Human matukod ang Relief Society pagka-Marso, si Propeta Joseph Smith kanunay nga moapil sa ilang mga miting aron sa pag-andam nila alang sa sagrado, makahiusang mga pakigsaad nga sa dili madugay ilang himoon diha sa templo.
Pagka-Hunyo 9, ang Propeta “misulti nga mosangyaw siya mahitungod sa kalooy[.] Pananglit nga si Jesukristo ug [ang] balaang mga anghel mosaway kanato tungod sa walay hinungdang mga butang, unsa ang mahitabo kanato? Kita kinahanglang magmaloloy-on ug pasagdan ang walay hinungdang mga butang.” Si Presidente Smith mipadayon, “Nakapasubo kanako nga walay hingpit nga panaghiusa sa pagbati—kon ang usa ka miyembro nag-antus ang tanan mobati niini—pinaagi sa panaghiusa sa pagbati kita makaangkon og gahum sa Dios.” 1
Kanang gamay nga kapahayag adunay dakong epekto kanako. Pinaagi sa panaghiusa sa pagbati kita makaangkon og gahom sa Dios. Dili nako gusto nga ingon niini ang kalibutan. Dunay daghang butang nga gusto nakong maimpluwensyahan ug mahimong mas maayo. Ug sa prangkang pagkasulti, dunay daghang oposisyon sa unsay akong gilauman, ug usahay daw wala akoy mahimo. Bag-o lang, duna akoy laglom nga mga pangutana sa akong kaugalingon: Unsaon nako nga mas maayong makasabut sa mga tawo sa akong palibut? Unsaon nako pagmugna nianang “panaghiusa sa pagbati” kon lahi kaayo ang tanan? Unsa nga gahom gikan sa Dios ang mahimo nakong magamit kon mas nahiusa lang ko og gamay ngadto sa uban? Gikan sa akong pagtimbang-timbang sa kaugalingon, duna akoy tulo ka sugyot. Tingali makatabang usab kini kaninyo.
Pagbaton og Kalooy
Mabasa sa Jacob 2:17, “Hunahunaa ang inyong [mga kaigsoonan] sama nganha sa inyong mga kaugalingon, ug sinatia ang tanan, ug pakig-angay sa inyong kabtangan, nga sila mahimo nga adunahan ingon kaninyo.” Atong ilisan ang pulong nga kabtangan og kalooy—pakig-angay sa inyong kalooy nga sila mahimo nga adunahan ingon kaninyo.
Kasagaran natong gisabut ang kabtangan isip pagkaon o kwarta, apan tingali ang mas gikinahanglan nato sa atong pagpangalagad mao ang kalooy.
Ang akong kaugalingong presidente sa Relief Society bag-o lang miingon: “Ang akong … ikasaad … nimo mao nga akong ampingan ang imong ngalan. … Ang akong pagtan-aw kanimo nakabase sa imong kinamaayohan. … Dili ko mosulti og bisan unsa nga dili maayo mahitungod kanimo, nga dili makabayaw kanimo. Mohangyo ko nga ingon ana pud ang buhata alang kanako tungod kay nahadlok ko, sa tinuod lang, nga makapasagmuyo kanimo.”
Si Joseph Smith misulti sa mga sister niana nga adlaw sa Hunyo sa 1842:
“Kon ang mga tawo mopakita og bisan gamay nga pagbati ug gugma ngari kanako, O unsa ka gamhanan kini sa akong hunahuna. …
“… Kon mas maduol kita sa atong Langitnong Amahan, mas labaw kita nga motan-aw uban ang kalooy sa nagkalaglag nga mga kalag—[atong bation nga kita buot] mopas-an kanila ug mosalibay sa ilang mga sala sa atong luyo. [Ang akong pakigpulong gituyo alang sa] tanan niining Society—kon kamo buot nga ang Dios adunay kalooy kaninyo, pagbaton og kalooy sa usag usa.” 2
Kini tambag nga alang gayud sa Relief Society. Dili nato hukman ang usag usa o mosulti og makapasakit nga mga pulong. Atong ampingan ang ngalan sa usag usa ug mohatag sa gasa sa kalooy. 3
Himoa nga Mo-swing ang Inyong Sakayan
Niadtong 1936, usa ka wala hiilhi nga rowing team gikan sa University of Washington mibiyahe ngadto sa Germany aron moapil sa Olympic Games. Panahon kadto sa Dakong Ekonomikanhong Kalisud [Great Depression]. Mga anak kini og mga trabahante kansang gagmay nga mga lungsod sa minahan ug kahoy midonar og ginagmayng kwarta aron makabiyahe sila ngadto sa Berlin. Ang matag aspeto sa kompetensya daw subidahon para nila, apan dunay nahitabo sa lumba. Sa kalibutan sa dula nga rowing, gitawag nila kini og “swing.” Paminawa kining paghulagway nga gibase sa libro The Boys in the Boat [Ang Batan-ong mga Lalaki sa Sakayan]:
Adunay butang nga usahay mahitabo nga lisud himoon ug lisud ihulagway. Gitawag kini og “swing.” Mahitabo lang kini kon ang tanan nagbugsay sa ingon ka hingpit nga pagdungan nga walay usa ka lihok nga naglahi.
Ang mga tigbugsay kinahanglang mopugong sa ilang pagkamakaugalingon ug sa samang panahon masaligon sa ilang indibidwal nga mga katakos. Ang mga lumba dili madaog tungod kay ang magkauban managsama gayud. Ang maayo nga mga grupo maayo nga pagkasagol—dunay mangulo, dunay pangreserba, dunay agresibong molihok, dunay mopakalma. Walay tigbugsay nga mas bililhon kay sa uban, ang tanan gikinahanglan sa sakayan, apan aron sila maayong makabugsay og dungan, ang matag usa kinahanglang mopahaum sa mga panginahanglan ug mga katakos sa uban—ang mas mubo og bukton mokab-ot pa og diyutay, ang mas taas og bukton mopamubo og gamay.
Ang mga kalahian pwede nga mahimong bentaha imbis nga makadaot. Niana lamang nga mabati nga ang sakayan daw naglihok sa iyang kaugalingon. Niana lamang nga ang kasakit mapulihan sa kalipay. Ang maayo nga “swing” mabati nga daw balak. 4
Batok sa lisud kaayo nga mga babag, kini nga team nakakaplag sa hingpit nga swing ug midaog. Ang bulawan sa Olympic makalipay kaayo, apan ang panaghiusa nga nasinati sa matag tigbugsay nianang adlawa usa ka balaang higayon nga nagpabilin kanila sa tibuok nilang kinabuhi.
Hawana ang mga Dautan sama Kapaspas sa Pagtubo sa Maayo
Sa talagsaong pasumbingay diha sa Jacob 5, ang Ginoo sa ubasan mitanom og maayong kahoy sa maayong yuta, apan nadaot kini paglabay sa panahon ug namunga og ihalas nga bunga. Ang Ginoo sa ubasan misulti sa walo ka higayon: “Kini nakapaguol kanako [nga] mawad-an niini nga kahoy.”
Ang sulugoon miingon ngadto sa Ginoo sa ubasan: “Kaloy-i [ang kahoy] og diyutay pa. Ug ang Ginoo miingon: Oo, Ako malooy niini og diyutay pa.” 5
Ug dayon miabut ang instruksyon nga magamit kanatong tanan nga naningkamot sa pagkalot ug pagpangita og maayong bunga sa atong kaugalingong gagmay nga mga ubasan: “Kamo mohawan sa mga dautan ingon nga ang maayo motubo.” 6
Ang panaghiusa dili mahitabo nga daw madyik; kinahanglan kining trabahoon. Lisud kini, usahay dili komportable, ug hinay-hinay nga mahitabo samtang atong hawanon ang mga dautan sama kapaspas sa pagtubo sa maayo.
Dili gayud kita mag-inusara sa atong mga paningkamot sa pagmugna og panaghiusa. Ang Jacob 5 mipadayon, “Ang mga sulugoon miadto ug mibuhat ug miugmad uban sa ilang mga kusog; ug ang Ginoo sa ubasan miugmad usab uban kanila.” 7
Ang matag usa kanato makaangkon og grabeng makapasakit nga mga kasinatian, mga butang nga dili gayud angay nga mahitabo. Ang matag usa kanato, sa lain-laing panahon, mitugot usab sa garbo ug kamapahitas-on nga modaot sa bunga nga atong gidala. Apan si Jesukristo mao ang atong Manluluwas sa tanang butang. Ang iyang gahom moabot ngadto sa labing ubos nga mga higayon ug masaligan nga anaa alang kanato kon motawag kita Kaniya. Kitang tanan nangayo og kalooy alang sa atong mga sala ug mga kapakyasan. Libre niya kining gihatag. Ug naghangyo Siya kanato kon makahatag ba kita nianang samang kalooy ug pagsabut sa usag usa.
Si Jesus direktang misulti niini: “Paghiusa; ug kon kamo dili magkahiusa kamo dili akò.” 8 Apan kon magkahiusa kita—kon makahatag kita og usa ka piraso sa atong pie o mopahaum sa atong indibidwal nga mga talento aron ang sakayan mahimong mo-swing sa hingpit nga pagdungan—niana kita Iya. Ug Siya motabang sa paghawan sa dautan sama kapaspas sa pagtubo sa maayo.
Propetikanhong mga Saad
Kita tingali wala pa sa asa nato gustong maanaa, ug wala kita karon sa asa kita sa umaabot. Nagtuo ko nga ang kausaban nga atong gitinguha sa atong kaugalingon ug sa mga grupo nga atong naapilan moabut dili kaayo tungod sa pakigbisog apan tungod sa aktibong pagpaningkamot matag adlaw sa pagsabut sa usag usa. Ngano? Tungod kay nagtukod kita sa Zion—katawhan nga “usa sa kasingkasing ug usa sa hunahuna.” 9
Isip mga babaye sa pakigsaad, dako ang atong impluwensya. Kana nga impluwensya gamiton sa matag adlaw nga mga higayon kon kita nagtuon uban sa usa ka higala, nagpatulog og mga bata, nakig-istorya sa katupad diha sa bus, nangandam sa presentasyon uban sa katrabaho. Kita adunay gahom sa pagwagtang sa diskriminasyon ug pag-ugmad og panaghiusa.
Ang Relief Society ug Young Women dili lamang mga klase. Kini mahimo usab nga dili malimtang mga kasinatian diin ang lahi kaayo nga mga babaye mosakay sa samang sakayan ug mobugsay hangtod atong makaplagan ang atong swing. Motanyag ako niini nga pagdapit: apil sa tinipong pwersa nga mousab sa kalibutan alang sa kaayohan. Ang atong buluhaton ubos sa pakigsaad mao ang pagpangalagad, pag-isa sa mga kamot nga naluya, pag-alsa sa naglisud nga mga tawo diha sa atong likod o sa atong mga bukton ug pagdala kanila. Dili lisud ang pagkasayud unsay buhaton, apan kasagaran kining supak sa atong hinakog nga mga interes, ug kinahanglan kitang mosulay. Ang mga babaye niini nga Simbahan walay kinutuban ang potensyal sa pag-usab sa katilingban. Hingpit ang akong espirituhanong pagsalig nga, samtang magtinguha kita og panaghiusa sa pagbati, atong magamit ang gahom sa Dios sa paghimong hingpit sa atong mga paningkamot.
Sa dihang gisaulog sa Simbahan ang 1978 nga pagpadayag mahitungod sa pagkapari, si Presidente Russell M. Nelson mihatag og gamhanang propetikanhong panalangin: “Akong pag-ampo ug panalangin nga akong ibilin ngadto sa tanang naminaw nga kita makabuntog sa bisan unsang mga palas-anon sa diskriminasyon ug maglakaw nga matarung uban sa Dios—ug sa usag usa—sa hingpit nga kalinaw ug panaghiusa.” 10
Hinaut nga atong mapahimuslan kining propetikanhong panalangin ug gamiton ang atong indibidwal ug hiniusang paningkamot sa pagpadako sa panaghiusa sa kalibutan. Akong ibilin ang akong pagpamatuod sa mga pulong sa mapaubsanon, mahangturong pag-ampo ni Ginoong Jesukristo: “Nag-ampo ako nga mausa unta sila. Amahan, mausa unta sila dinhi kanato sama nga ikaw ania kanako ug ako anaa kanimo.” 11 Sa ngalan ni Jesukristo, amen.