Pagkaplag og Kalipay diha kang Kristo
Ang labing sigurado nga paagi sa pagkaplag og kalipay niini nga kinabuhi mao ang pag-apil kang Kristo sa pagtabang sa uban.
Ang Ginoo wala naghangyo sa atong kabatan-onan sa Aaronic nga Pagkapari sa pagbuhat sa tanan, apan unsay Iyang gihangyo makapahingangha.
Pipila ka tuig ang milabay, ang among gamay nga pamilya nakasinati sa unsay giatubang sa daghang pamilya niining napukan nga kalibotan. Ang among kinamanghuran nga anak nga lalaki, si Tanner Christian Lund, nasakit og kanser. Talagsaon siya nga bata, sama sa kalagmitan sa mga nag-edad og nwebe. Siya siaw nga makalingaw ug, sa samang higayon, talagsaon nga nahibalo sa espirituhanon nga paagi. Buluyagon ug anghel, badlongon ug maayo. Sa dihang gamay pa siya ug nakapalibog kanamo matag adlaw sa iyang kasipat, naghunahuna kami kon modako ba siya nga mahimong ang propeta o tulisan og banko. Bisan hain, ingon og magbilin siya og malungtaron nga epekto sa kalibotan.
Ug dayon nasakit siya og maayo. Sa misunod nga tulo ka tuig, ang modernong pagpanambal migamit og risgo nga mga pamaagi, nga naglakip sa duha ka bone marrow transplant, diin nataptan siya og pulmonya, nga nagkinahanglan nga siya magpabilin nga walay panimuot sulod sa 10 ka semana diha sa usa ka ventilator. Sa milagroso nga paagi, naayo siya sulod sa mubo nga panahon; apan mibalik dayon ang iyang kanser.
Sa wala pa siya mitaliwan, ang sakit ni Tanner misulod sa iyang kabukogan, ug bisan pa sa isog nga mga tambal para mawala ang sakit, gibati gihapon niya ang kasakit. Halos dili na siya makabangon gikan sa higdaanan. Usa ka Dominggo sa buntag, ang iyang mama, si Kalleen, misulod sa iyang kwarto aron sa pagsusi kaniya sa dili pa molakaw ang pamilya padulong sa simbahan. Nasurprisa si Kalleen nga nakakita nga nakailis siya ug naglingkod sa kilid sa iyang higdaanan, sakit nga nanglimbasog sa pagbutones sa polo. Mitupad si Kalleen kaniya. “Tanner,” miingon siya, “sigurado ka ba nga aduna kay igong kusog aron moadto sa simbahan? Tingali kinahanglan kang magpabilin sa balay ug mopahulay karon.”
Mitutok siya sa salog. Usa siya ka deacon. Aduna siyay korum. Ug aduna siyay buluhaton.
“Gikinahanglan nakong moapod-apod sa sakramento karon.”
“Aw, sigurado kong dunay lain nga makabuhat niana alang kanimo.”
“Oo,” miingon siya, “apan … makakita ko kon sa unsang paagi ang mga tawo motan-aw kanako sa dihang moapod-apod ko sa sakramento. Nagtuo ko nga kini makatabang kanila.”
Busa si Kalleen mitabang kaniya sa pagbutones sa iyang polo ug sa paghigot sa iyang korbata, ug midrayb sila paingon sa simbahan. Klaro kaayo, usa ka importanting butang ang mahitabo.
Miabot ko sa simbahan gikan sa usa ka nag-una nga miting ug mao nga nasurprisa ko nga nakakita ni Tanner nga naglingkod sa laray sa mga deacon. Hilom nga misulti si Kalleen nako nganong anaa siya didto ug unsay iyang giingon: “Makatabang kini sa mga tawo.”
Ug busa mitan-aw ko samtang ang mga deacon mibarog atubangan sa lamesa sa sakramento. Hinay siyang misandig sa laing deacon samtang ang mga priest mitunol kanila sa mga tray sa pan. Ug dayon milakaw si Tanner nga nagsaguyod ang mga tiil padulong sa iyang gitakda nga lugar ug migunit sa tumoy sa lingkoranan [pew] aron makabarog ang iyang kaugalingon samtang iyang gipresentar ang sakramento.
Ingon og ang matag mata diha sa chapel nagtan-aw kaniya, nga naapektohan sa emosyonal nga paagi sa iyang panglimbasog samtang gihimo niya ang iyang yano nga bahin. Sa usa ka paagi si Tanner mipahayag og hilom nga sermon samtang ligdong, nagtakiang siyang mibalhin gikan sa usa ka lingkoranan ngadto sa lain—iyang upaw nga ulo nga gisingot—nga nagrepresentar sa Manluluwas sa paagi nga buhaton sa mga deacon. Ang iyang dili mabuntog kaniadto nga lawas sa deacon nga sa kaugalingon niini nabun-og og gamay, nabalian, ug nasamdan, andam nga nag-antos sa pagserbisyo kanila pinaagi sa pagdala sa mga timaan sa Pag-ula sa Manluluwas ngadto sa atong mga kinabuhi.
Ang pagkakita kon sa unsang paagi siya mihunahuna mahitungod sa pagkahimong usa ka deacon nakapahimo kanamo nga maghunahuna sa lahi nga paagi pag-usab—mahitungod sa sakramento, mahitungod sa Manluluwas, ug mahitungod sa mga deacon ug mga teacher ug mga priest.
Naghunahuna ko sa wala nasulti nga milagro nga midasig kaniya niana nga buntag sa maisogon nga pagsanong ngadto nianang hinay, hinagawhaw nga tawag sa pagserbisyo, ug mahitungod sa kalig-on ug sa mga kapasidad sa tanan sa atong nagtubo nga kabatan-onan samtang naningkamot sila sa pagtubag sa tawag sa propeta sa pag-apil sa mga batalyon sa Dios ug sa pag-apil sa buhat sa kaluwasan ug kahimayaan.
Matag panahon nga ang usa ka deacon mogunit sa usa ka tray sa sakramento, gipahinumdoman kita sa sagrado nga istorya sa Katapusang Panihapon, sa Getsemani, sa Kalbaryo, ug sa tanaman sa lubnganan. Sa dihang ang Manluluwas miingon ngadto sa Iyang Apostoles, “Buhata ninyo kini aron paghandom kanako,” 1 nagsulti usab Siya latas sa katuigan ngari sa matag usa kanato. Nagsulti Siya sa walay kataposang milagro nga Iyang ihatag samtang ang umaabot nga mga deacon, mga teacher, ug mga priest mopresentar sa Iyang mga timaan ug modapit sa Iyang mga anak sa pagdawat sa Iyang maulaon nga gasa.
Ang tanan nga mga simbolo sa sakramento nagpunting kanato ngadto niana nga gasa. Namalandong kita sa pan nga Iyang gipikas-pikas kaniadto—ug sa pan nga karon, sa ilang turno, gipikas-pikas sa mga priest. Naghunahuna kita sa kahulogan sa tubig [liquid] nga gipahinungod, kaniadto ug karon, samtang ang mga pulong niadtong mga pag-ampo sa sakramento ligdong nga moagi gikan sa mga baba sa batan-on nga mga priest paingon sa atong mga kasingkasing ug ngadto sa kalangitan, nga nagbag-o sa mga pakigsaad nga nagkonektar kanato ngadto sa mismong mga gahom sa kaluwasan ni Kristo. Mahimo kitang maghunahuna kon unsay gipasabot niini kon ang usa ka deacon magdala sa sagrado nga mga timaan ngari kanato, nagbarog ingon sa usa ka deacon sa dapit diin si Jesus mobarog kon Siya anaa dinha, nagtanyag sa pagkuha sa atong nga mga palas-anon ug sa atong kasakit.
Maayo nalang gani, ang batan-on nga mga lalaki ug mga babaye dili na kinahanglan nga masakit aron lang makadiskobre sa hingpit nga kalipay ug katuyoan sa pagserbisyo sa Manluluwas.
Si Elder David A. Bednar mitudlo kanato nga aron molambo ug mahimong sama kon unsa ang mga misyonaryo, kinahanglan buhaton nato kon unsay buhaton sa mga misyonaryo, ug dayon, “lagda human sa usa ka lagda, … [kita] sa hinayhinay mahimong misyonaryo nga … gilauman sa Manluluwas.” 2
Sa samang paagi, kon magtinguha kita nga “mahisama kang Jesus,” 3 kinahanglan nga mobuhat kita sa unsay gibuhat ni Jesus, ug sa usa ka talagsaon nga kapahayag, ang Ginoo nagpasabot unsa kini nga Iyang gibuhat: Siya miingon, “Kay tan-awa, mao kini ang akong buhat ug ang akong himaya—ang pagpahinabo sa pagka-imortal ug sa kinabuhi nga dayon sa tawo.” 4
Ang misyon sa Manluluwas sa kanunay ug sa kahangtoran mao ang pagserbisyo sa Iyang Amahan pinaagi sa pagluwas sa Iyang mga anak.
Ug ang labing sigurado nga paagi sa pagkaplag og kalipay dinhi niini nga kinabuhi mao ang pag-apil kang Kristo sa pagtabang sa uban.
Kini ang yano nga kamatuoran nga midasig sa programa sa Kabataan ug Kabatan-onan.
Ang tanan nga mga kalihokan sa Kabataan ug Kabatan-onan ug tanan nga mga pagtulun-an sa Kabataan ug Kabatan-onan mahitungod sa pagtabang sa mga batan-on nga mahimong mas sama ni Jesus pinaagi sa pag-apil uban Kaniya diha sa Iyang buhat sa kaluwasan ug kahimayaan.
Ang Kabataan ug Kabatan-onan usa ka himan sa pagtabang sa matag bata sa Primary ug batan-on nga molambo sa pagkadisipulo ug makaangkon og puno sa pagtuo nga panglantaw kon unsay daw dagway sa dalan sa kalipay. Mahimo silang makakat-on sa pagpaabot ug pagpangandoy alang sa mga hunonganan ug mga timaan subay sa dalan sa pakigsaad, diin mabunyagan sila ug makumpirmahan sa gasa sa Espiritu Santo ug sa dili madugay maapil sa mga korum ug mga klase sa Young Women, diin mabati nila ang kalipay sa pagtabang sa uban pinaagi sa sunod-sunod nga Kristohanon nga mga buhat sa serbisyo. Mohimo sila og mga tumong, dagko ug gagmay, nga magdala og balanse sa ilang kinabuhi samtang mahimo silang mas sama sa Manluluwas. Ang Alang sa Kalig-on sa mga Kabatan-onan nga mga komperensya ug mga magasin, ang Higala, ug ang Gospel Living App motabang sa pagsentro kanila sa pagpangita og kalipay diha kang Kristo. Magpaabot sila sa mga panalangin sa paghupot og rekomend sa templo nga may limitasyon ang paggamit ug mobati sa espiritu ni Elias pinaagi sa impluwensya sa Espiritu Santo samtang tinguhaon nila ang mga panalangin sa templo ug family history. Magiyahan sila pinaagi sa patriyarkal nga mga panalangin. Sa dili madugay, makita nila ang ilang mga kaugalingon nga moadto sa mga templo aron matugahan og gahom ug aron makakaplag og kalipay didto samtang makonektar sila sa ilang mga pamilya sa kahangtoran, bisan unsa pa ang mahitabo.
Batok sa mga pwersa sa pandemya ug kalamidad, ang pagpahinabo sa hingpit nga saad sa bag-o nga programa sa Kabataan ug Kabatan-onan usa pa gihapon ka nag-uswag nga buhat—apan dunay kadinalian. Ang atong kabatan-onan dili mahimong maghulat alang sa kalibotan nga maghusto sa kaugalingon niini sa dili pa sila makaila sa Manluluwas. Pipila ang naghimo og mga desisyon bisan karon nga dili nila himoon kon nakasabot sila sa ilang tinuod nga mga pagkatawo—ug sa Iyaha.
Ug busa ang dinalian nga tawag gikan sa mga batalyon sa Dios nga anaa sa importanting pagbansay mao “ang tanan gikinahanglang motabang!”
Mga inahan ug mga amahan, ang inyong mga anak nga lalaki nagkinahanglan kaninyo sa pagsuporta kanila karon sama sa kamabination ninyong gibuhat kanunay kaniadto sa dihang naghimo sila sa dili kaayo importante nga mga butang sama sa mga badge ug mga pin. Mga inahan ug mga amahan, mga lider sa pagkapari ug Young Women, kon ang inyong kabatan-onan naglisod, ang Kabataan ug Kabatan-onan motabang og dala kanila ngadto sa Manluluwas, ug ang Manluluwas magdala kanila og kalinaw. 5
Mga kapangulohan sa korum ug klase, angkona ang responsibilidad ug angkona ang inyong hustong lugar diha sa buhat sa Ginoo.
Mga bishop, ikonektar ang inyong mga yawe niadtong mga presidente sa korum, ug ang inyong mga korum—ug ang inyong mga ward—mausab sa kahangturan.
Ug ngadto kaninyo sa nagtubo nga henerasyon, magpamatuod ako, isip usa kinsa nasayod, nga kamo minahal nga mga anak nga lalaki ug mga anak nga babaye sa Dios ug Siya adunay buhat nga ipahimo kaninyo.
Samtang inyong tumanon ang kaimportante sa inyong mga buluhaton, uban sa tibuok ninyo nga kasingkasing, gahum, hunahuna, ug kusog, makakat-on kamo sa paghigugma sa Dios ug sa pagtuman sa inyong mga pakigsaad ug mosalig sa Iyang pagkapari samtang mobuhat kamo sa pagpanalangin sa uban, sugod sa inyong kaugalingon nga mga panimalay.
Nag-ampo ako nga kamo maningkamot, uban sa dugang nga kusog nga takos niini nga panahon, sa pagserbisyo, pagpakita og hugot nga pagtuo, paghinulsol, ug paglambo sa matag adlaw, aron mahimong takos nga makadawat sa mga panalangin sa templo ug sa malungtaron nga kalipay nga moabot pinaagi lamang sa ebanghelyo ni Jesukristo. Nag-ampo ako nga mangandam kamo nga mahimong kugihan nga misyonaryo, maunongon nga bana o asawa, mahigugmaon nga amahan o inahan nga gisaad kaninyo nga sa kataposan kamo mamahimo pinaagi sa pagkahimong matinud-anon nga disipulo ni Jesukristo.
Hinaot motabang kamo sa pag-andam sa kalibotan alang sa pagbalik sa Manluluwas pinaagi sa pagdapit sa tanan nga moduol ngadto ni Kristo ug modawat sa mga panalangin sa Iyang Pag-ula. Sa ngalan ni Jesukristo, amen.