Sumalig Kamo
Ang atong dili matarug nga pagtuo sa doktrina sa gipahiuli nga ebanghelyo ni Jesukristo mogiya sa atong mga lakang ug mohatag kanato og kalipay.
Sa katapusang mga adlaw sa Iyang mortal nga kinabuhi, si Jesukristo misulti sa Iyang mga Apostoles mahitungod sa mga pagpanglutos ug kalisdanan nga ilang antuson. 1 Mitapos Siya uban niining dakong kasiguroan: “Dinhi sa kalibutan aduna kamoy kagul-anan; apan sumalig kamo, gidaug ko na ang kalibutan” (Juan 16:33). Mao kana ang mensahe sa Manluluwas ngadto sa tanang anak sa atong Langitnong Amahan. Mao kana ang labing maayong balita alang sa matag usa kanato sa atong mortal nga kinabuhi.
Ang “sumalig kamo” usa usab ka gikinahanglang kasiguroan sa kalibutan diin gipadala sa nabanhaw nga Kristo ang Iyang mga Apostoles. “Gisakit kami sa tanang paagi,” si Apostol Pablo sa wala madugay misulti sa mga taga-Corinto, “apan wala gayod mapukan; naglibog apan wala gayod kawad-ig paglaom; gilutos kami sa mga tawo apan wala gayod biyai sa Dios ug bisan tuod gidagmalan sa makadaghan, wala kami mamatay” (2 Mga Taga-Corinto 4:8–9).
Paglabay sa duha ka libo ka tuig kita usab “gisakit sa tanang paagi,” ug kita usab nagkinahanglan nianang samang mensahe nga dili mawad-an og paglaom apan magmasaligon. Ang Ginoo adunay espesyal nga gugma ug pagpakabana alang sa Iyang bililhong mga anak nga babaye. Nasayud Siya sa inyong mga gusto, sa inyong mga panginahanglan, ug sa inyong mga kahadlok. Ang Ginoo labing gamhanan. Salig Kaniya.
Si Propeta Joseph Smith gitudloan nga “ang mga buhat, ug mga laraw, ug ang katuyoan sa Dios dili gayud makawang, ni sila mahimo nga walay kapuslanan” (Doktrina ug mga Pakigsaad 3:1). Ngadto sa Iyang nanlimbasog nga mga anak, ang Ginoo mihatag niining dagko nga mga kasiguroan:
“Tan-awa, mao kini ang saad sa Ginoo nganha kaninyo, O kamo nga akong mga sulugoon.
“Busa, paglipay, ug ayaw kahadlok, kay Ako ang Ginoo anaa uban kaninyo, ug mobarug diha kaninyo; ug kamo magpamatuod kanako, gani si Jesukristo, nga Ako ang Anak sa buhi nga Dios” (Doktrina ug mga Pakigsaad 68:5–6).
Ang Ginoo nagbarug duol kanato, ug Siya miingon:
“Unsa nga Ako mosulti ngadto sa usa Ako mosulti ngadto sa tanan, pagmalipayon, mga bata; kay Ako anaa sa inyong taliwala, ug Ako wala mobiya kaninyo” (Doktrina ug mga Pakigsaad 61:36).
“Kay human sa daghan nga kalisdanan moabut ang mga panalangin” (Doktrina ug mga Pakigsaad 58:4).
Mga sister, ako mopamatuod nga kini nga mga saad, gihatag taliwala sa mga pagpanglutos ug personal nga mga trahedya, magamit nganha sa matag usa kaninyo diha sa inyong makahasol nga mga sirkumstansya karon. Kini bililhon ug nagpahinumdom sa matag usa kanato nga mosalig ug magbaton og kalipay diha sa kahingpitan sa ebanghelyo samtang kita mopadayon agi sa mga hagit sa mortalidad.
Ang kalisdanan ug mga hagit mao ang komon nga mga kasinatian sa mortalidad. Ang oposisyon usa ka mahinungdanong bahin sa balaang plano alang sa pagtabang kanato nga molambo, 2 ug taliwala niana nga proseso, aduna kitay kasiguroan sa Dios nga, sa mahangturong panglantaw, ang oposisyon dili tugutan nga makabuntog kanato. Uban sa Iyang tabang ug sa atong pagkamatinud-anon ug paglahutay, magmadaugon kita. Sama sa mortal nga kinabuhi nga kini kabahin, ang tanang kalisdanan temporaryo. Sa mga kontrobersiya nga nag-una sa usa ka grabeng gubat, ang presidente sa Estados Unidos nga si Abraham Lincoln maalamong mipahinumdom sa iyang mga tigpaminaw sa karaang panultihon nga “kini, usab, molabay lang.” 3
Sama sa inyong nasayran, ang mortal nga kalisdanan nga akong gihisgutan—nga nakapalisud aron mahimong malipayon—usahay moabut kanato nga komon lakip sa daghan pang uban, sama sa minilyon nga nanlimbasug karon sa pipila sa daghang makahugno nga mga epekto sa COVID-19 nga pandemya. Sa samang paagi, sa Estados Unidos minilyon ang nag-antus tadlas sa panahon sa kayugot ug panagbangi nga kanunay mag-uban sa presidensyal nga mga eleksyon apan karon maoy labing grabe nga mahinumdoman sa daghan sa labing tigulang kanato.
Sa personal nga paagi, ang matag usa kanato tagsa-tagsa nga nanlimbasug og pipila sa daghang kalisdanan sa mortalidad, sama sa kakabus, diskriminasyon, sakit sa lawas, pagkawala o mga kasagmuyo sa trabaho, nagpabadlong nga mga anak, dili maayo nga kaminyoon o wala maminyo, ug ang mga epekto sa sala—atong kaugalingon o sa uban.
Apan, taliwala niining tanan, aduna kita nianang langitnong tambag nga mosalig ug magmalipayon diha sa mga baruganan ug mga saad sa ebanghelyo ug sa mga bunga sa atong mga paghago. 4 Kana nga tambag kanunay nga anaa, alang sa mga propeta ug alang kanatong tanan. Nasayud kita niini gikan sa mga kasinatian sa mga nag-una kanato ug sa unsay gisulti sa Ginoo kanila.
Hinumdumi ang mga sirkumstansya ni Propeta Joseph Smith. Kon tan-awon agi sa mga lente sa kalisdanan, ang iyang kinabuhi maoy usa sa kakabus, pagpanglutos, kahigawad, mga kaguol sa pamilya, ug sa katapusan pagkamartir. Samtang nag-antus siya og pagkabilanggo, ang iyang asawa ug mga anak ug ang ubang mga Santos misinati og grabeng kalisud samtang gipapahawa sila sa Missouri.
Sa dihang nangayo og kahupayan si Joseph, ang Ginoo mitubag:
“Akong anak, kalinaw nganha sa imong kalag; ug ang imong kalisdanan ug ang imong mga kasakitan sulod lamang sa mubo nga higayon;
“Ug unya, kon ikaw molahutay pag-ayo, ang Dios mobayaw kanimo sa kahitas-an; ikaw magmadaugon ibabaw sa imong tanan nga mga kaaway” (Doktrina ug mga Pakigsaad 121:7–8).
Mao kini ang personal, mahangturong tambag nga nakatabang ni Propeta Joseph sa pagpadayon sa iyang tiunay nga malipayong buot ug sa gugma ug pagkamaunungon sa iyang katawhan. Kining sama nga mga hiyas nakalig-on sa mga lider ug mga pioneer nga misunod ug makalig-on usab kaninyo.
Hunahunaa kadtong unang mga miyembro! Sa makadaghan, gipapahawa sila gikan sa lain-laing dapit. Sa katapusan gisagubang nila ang kalisdanan sa pag-establisar sa ilang mga panimalay ug sa Simbahan diha sa kamingawan. 5 Duha ka tuig human ang unang grupo sa mga pioneer miabut sa walog sa Great Salt Lake, naglisud gihapon sa pagpakabuhi ang mga pioneer nianang dili maayo nga dapit. Kadaghanan sa mga miyembro nagbiyahe gihapon tadlas sa mga kapatagan o nanlimbasug nga makakita og mga kapanguhaan sa pagbuhat niini. Apan ang mga lider ug mga miyembro malaumon gihapon ug masaligon.
Bisan og ang mga Santos wala pa makapahimutang diha sa ilang bag-ong mga panimalay, sa Oktubre 1849 nga kinatibuk-ang komperensya ang bag-ong grupo sa mga misyonaryo gipadala ngadto sa Scandinavia, France, Germany, Italy, ug sa Habagatang Pasipiko. 6 Sa panahon nga gikonsiderar nga anaa sila sa labing ubos nga sitwasyon, aduna gihapon silay nahimo nga mahinungdanon kaayo. Ug paglabay lang sa tulo ka tuig, ang laing 98 gitawag usab aron mosugod sa pagpundok sa nagkatibulaag nga Israel. Usa sa mga lider sa Simbahan mipasabut nga kini nga mga misyon “sa kasagaran, dili gyud kaayo dugay; tingali gikan sa 3 ngadto sa 7 ka tuig maoy kinadugayan nga mahilayo ang usa ka tawo sa iyang pamilya.” 7
Mga Sister, ang Unang Kapangulohan nagpakabana sa inyong mga hagit. Gimahal namo kamo ug nag-ampo alang kaninyo. Sa samang higayon, kanunay kitang magpasalamat nga ang atong pisikal nga mga hagit—gawas sa mga linog, mga sunog, mga baha, ug mga bagyo—sa kasagaran minos kay sa gisagubang sa mga nag-una kanato.
Taliwala sa mga kalisdanan, ang balaanong kasiguroan kanunay nga “pagmasaligon, kay Ako mogiya kaninyo. Ang gingharian mainyo ug ang mga panalangin niana mainyo, ug ang mga katigayunan sa kahangturan mainyo” (Doktrina ug mga Pakigsaad 78:18). Sa unsang paagi kini mahitabo? Sa unsang paagi kini nahitabo sa mga pioneer? Sa unsang paagi kini mahitabo sa kababayen-an sa Dios karon? Pinaagi sa atong pagsunod sa propetikanhong giya, “ang mga ganghaan sa impyerno dili makabuntog batok [kanato],” miingon ang Ginoo pinaagi sa pagpadayag niadtong Abril 1830. “Oo,” miingon Siya, “… ang Ginoong Dios mopatibulaag sa mga gahom sa kangitngit gikan sa imong atubangan, ug mohimo sa mga langit sa pagkurog alang sa imong kaayohan, ug himaya sa iyang ngalan” (Doktrina ug mga Pakigsaad 21:6). “Ayaw kahadlok, gagmay nga panon; pagbuhat og maayo; tuguti nga ang yuta ug impyerno maghiusa sa pagbatok kaninyo, kay kon kamo gitukod diha sa akong lig-on nga sukaranan, sila dili makabuntog” (Doktrina ug mga Pakigsaad 6:34).
Uban sa mga saad sa Ginoo, kita “[mo]pataas [sa atong mga] kasingkasing ug [mag]lipay” (Doktrina ug mga Pakigsaad 25:13), ug “uban sa kamaya sa kasingkasing ug malipayon nga panagway” (Doktrina ug mga Pakigsaad 59:15), mopadayon kita diha sa dalan sa pakigsaad. Kadaghanan kanato dili magsagubang og mga desisyon nga hilabihan ka dagko, sama sa pagbiya sa atong mga panimalay aron mahimong pioneer sa usa ka wala hiilhing dapit. Ang atong mga desisyon kasagaran nga sa inadlaw-adlaw nga mga buluhaton sa kinabuhi, apan sama sa gitudlo kanato sa Ginoo, “Ayaw pagluya diha sa maayo nga buhat, kay kamo nagpahimutang sa tukuranan sa usa ka mahinungdanon nga buhat. Ug gikan sa gagmay nga mga butang magagikan ang mga dagko” (Doktrina ug mga Pakigsaad 64:33).
Adunay walay kinutubang gahom sa doktrina sa gipahiuli nga ebanghelyo ni Jesukristo. Ang atong dili matarug nga pagtuo niana nga doktrina mogiya sa atong mga lakang ug mohatag kanato og kalipay. Molamdag kini sa atong mga hunahuna ug mohatag og kalig-on ug pagsalig sa atong mga lihok. Kini nga giya ug paglamdag ug gahom mao ang gisaad nga mga gasa nga atong nadawat gikan sa atong Langitnong Amahan. Pinaagi sa pagsabut ug pagpahiuyon sa atong mga kinabuhi ngadto niana nga doktrina, lakip sa balaanong gasa sa paghinulsol, mahimo kitang magmasaligon samtang atong ipadayon ang atong kaugalingon diha sa dalan padulong sa atong mahangturong padulngan—panag-uban pag-usab ug kahimayaan uban sa atong langitnong mga ginikanan.
“Tingali nag-atubang kamo og grabe nga mga hagit,” mitudlo si Elder Richard G. Scott. “Usahay bug-at kini kaayo, walay puas, nga mobati kamo nga lapas na kini sa inyong kapasidad sa pagkontrolar. Ayaw atubanga ang kalibutan nga mag-inusara. ‘Salig sa Ginoo sa bug-os mong kasingkasing. Ayaw gayod pagsalig sa imong kaalam’ [Mga Panultihon 3:5]. … Gituyo nga ang kinabuhi usa ka hagit, dili aron mapakyas kamo, apan aron magmalampuson kamo pinaagi sa pagbuntog.” 8
Kabahin kining tanan sa plano sa Dios nga Amahan ug sa Iyang Anak, si Jesukristo, kang kinsa ako nagpamatuod, samtang ako nag-ampo nga magpadayon kitang tanan ngadto sa atong langitnong destinasyon, sa ngalan ni Jesukristo, amen.