Update sa Kausaban sa Hymnbook

Niadtong Hunyo 2018, usa ka kausaban sa hymnbook sa Simbahan ug sa songbook sa mga bata ang gipahibalo, uban sa hangyo nga mohatag og feedback ang mga miyembro mahitungod sa sagrado nga musika ug sa panawagan nga ang mga miyembro mosumiter og orihinal nga mga himno, mga awit, ug mga teksto. Dul-an sa 50,000 ka miyembro ang mitubag sa feedback survey kabahin sa atong kasamtangang sagrado nga musika. Ang mga nanubag mipaambit usab sa ilang mga pagbati mahitungod sa gisugyot nga mga piniling musika gikan sa ubang relihiyon nga gikonsiderar nga ilakip.

Sobra sa 16,000 ka gisumiter nga mga musika ang nadawat gikan sa mga miyembro sa 66 ka nasud. Kining orihinal nga mga himno ug mga awit giribyu nga wala tan-awa ang mga tagsulat sulod sa makadaghang hugna pinaagi sa usa ka internasyonal nga grupo sa mga hanas nga mga miyembro ug sa mga komitiba sa pag-usab diha sa punoang buhatan sa Simbahan.

Ang mga komitiba mapasalamaton sa mga miyembro sa tibuok kalibutan tungod sa paghalad sa ilang panahon ug mga talento sa pagtabang sa uban nga mas mapaduol sa Manluluwas pinaagi sa sagradong musika. Tungod kay ang tanang gisumiter ug mga sugyot mainampingong gikonsiderar, gilauman nga ang bag-ong mga koleksyon maanaa na sulod sa pipila ka tuig.