Ang Kinatibuk-ang Tamdanan nga Basahon Anaa sa Digital nga Format

Ang proseso sa pag-usab sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw nagpadayon, diin ang mga hubad sa pinili nga mga materyal diha sa 21 ka dagkong pinulongan hapit na ipagawas.

Ang bag-ong tamdanan nga basahon gimantala sa digital nga porma sa Iningles niadtong Pebrero 2020, diin adunay dugang nga mga pagpagawas sa giusab nga mga materyal niadtong Marso ug Hulyo. Sa pagkakaron, 16 sa 38 ka kapitulo sa basahon giusab og sulat ug gimantala. Ang nahabilin nga mga kapitulo usbon sa umaabot nga mga bulan, lakip ang mga kausaban aron sa pagpaminos sa gitas-on ug pagpayano sa level sa pagbasa.

Human dayon sa Oktubre 2020 nga kinatibuk-ang komperensya, ang kapitulo 32, “Paghinulsol ug mga Konseho sa Pagkamiyembro diha sa Simbahan,” ug mga porsyon sa seksyon 38.6, “Mga Polisiya sa Moral nga mga Isyu” (nga nagsuporta sa kapitulo 32), sugdan sa pagmantala sa 21 ka pinulongan (agig dugang sa Iningles). Ang dugang nga mga kapitulo gisegihan na sa paghubad ug giandam alang sa publikasyon sa umaabut nga mga bulan, ug sa kadugayan ang tanang materyal maanaa na sa 35 ka pinulongan.

Bisan og ang tamdanan nga basahon anaa sa website sa Simbahan ug sa Gospel Library app, ang nag-unang mga tigbasa sa materyal mao ang mga lider sa Simbahan. Ang giusab nga handbook mipuli sa Tamdanan nga Basahon 1 (alang sa mga presidente sa stake ug mga bishop) ug Tamdanan nga Basahon 2 (alang sa tanang mga lider) ug mihiusa sa tanang impormasyon sa tamdanan nga basahon ngadto sa usa ka publikasyon.

Ang estraktura sa pag-organisar alang sa bag-ong tamdanan nga basahon mao ang buhat sa kaluwasan ug kahimayaan, nga naglakip sa upat ka aspeto nga tutukan samtang moduol kita kang Kristo ug motabang sa buhat sa Dios:

1. Pagsunod sa ebanghelyo ni Jesukristo

2. Pag-atiman niadtong nanginahanglan

3. Pagdapit sa tanan nga modawat sa ebanghelyo

4. Paghiusa sa mga pamilya alang sa kahangturan

Ang mga kapitulo gituyo aron makatabang sa mga lider sa tibuok kalibutan nga moserbisyo uban sa Kristohanong pag-amuma kon mag-implementar sa nagkalain-laing mga programa, mga polisiya, ug mga pamaagi sa Simbahan ug, kon gikinahanglan, sa pagpahiangay niini ngadto sa lokal nga mga kahimtang.

Ang digital nga publikasyon sa tamdanan nga basahon nagtugot nga mahimo ang mga update ug mga kausaban samtang naglambo ang Simbahan ug samtang ipahaum ang mga polisiya. Ang mga baruganan sa pagpailin-ilin ug pagpahiangay nga gilakip diha sa tamdanan nga basahon makatabang sa mga lider ug mga miyembro nga epektibong magamit ang mga baruganan ug mga programa sa Simbahan diha sa mga kongregasyon nga lain-lain og gidak-on ug sa nagkadaiya, tibuok kalibutan nga komunidad sa mga Santos.