Pagtinguha kang Kristo sa Matag Hunahuna
Ang pagpakigbatok sa tintasyon nagkinahanglan og tibuok kinabuhi nga kakugi ug kamatinud-anon. Apan palihug hibaloi nga ang Ginoo andam nga motabang kanato.
Sa iyang balaknon nga himno sa pagdayeg, ang Salmista mipahayag:
“O Ginoo, gisusi mo ako ug nakaila ka gayod kanako.
“Nasayod ka sa tanan kong gibuhat; nasayod ka sa akong gihunahuna bisag halayo ka.
“Gisusi mo ako, nagtrabaho man o nagpahulay; nahibalo ka sa tanan kong buhaton.”1
Diha sa kahulugan sa paghan-ay sa mga pulong niini nga balak, ang Salmista nagdayeg sa diosnong hiyas sa Ginoo sa pagkasayud sa tanan tungod kay Siya tinuod nga nasayud sa matag aspeto sa atong mga kalag.2 Kay nasayud sa tanang kinahanglanon nato niini nga kinabuhi, ang Manluluwas midapit kanato sa pagtinguha Kaniya sa matag hunahuna ug pagsunod Kaniya sa tibuok natong kasingkasing.3 Kini naghatag kanato sa saad nga kita makalakaw diha sa Iyang kahayag ug nga ang Iyang giya makapugong sa impluwensya sa kangitngit diha sa atong kinabuhi.4
Ang pagtinguha kang Kristo sa matag hunahuna ug pagsunod Kaniya sa tibuok natong kasingkasing nagkinahanglan nga kita mopahiangay sa atong pangisip ug mga tinguha sa Iya.5 Ang mga kasulatan nagtudlo niini nga pagpahiangay isip nga “paglig-on diha sa Ginoo”6 Kini nga binuhatan nagpasabot nga kanunay kitang magpakabuhi subay sa ebanghelyo ni Kristo ug motutok matag adlaw sa tanang butang nga maayo.7 Diha lamang atong makab-ot “ang kalinaw sa Dios, nga dili matugkad sa tawo” ug “manalipod sa [atong] kasingkasing ug mga hunahuna diha sa atong pagkahiusa kang Kristo Jesus.”8 Ang Manunubos Mismo mitudlo sa mga elder sa Simbahan niadtong Pebrero 1831, “Mahala kini nga mga butang diha sa inyong mga kasingkasing, ug palandonga ang mga kaligdong sa kahangturan diha sa inyong mga hunahuna.”9
Bisan sa atong padayon nga paningkamot sa pagtinguha sa Ginoo, ang dili maayong mga hunahuna mahimong mosulod sa atong pangisip. Kon ang sama nga mga hunahuna tugutan ug gani dapiton nga magpabilin, kini mo-umol sa mga tinguha sa atong kasingkasing ug motudlo kanato ngadto sa unsay atong makab-ot niini nga kinabuhi ug sa katapusan sa unsay atong mapanunod sa kahangturan.10 Si Elder Neal A. Maxwell sa makausa mipasabot pag-ayo niini nga baruganan pinaagi sa pagsulti nga, “Ang mga tinguha … motino usab sa mga sangputanan, lakip sa ngano nga ‘daghan ang gitawag, apan pipila lamang ang mga gipili.’”11
Ang atong karaan ug moderno nga mga propeta kanunay nga nagpahinumdom kanato sa pagsukol sa tintasyon aron malikayan ang pagkawala sa atong espiritwal nga kusog ug pagkalibog, pagkahisalaag, ug pagkahiubos sa kinabuhi.
Sa sambingay nga pagkasulti, ang pagtugyan ngadto sa tintasyon susama sa pagduol ngadto sa magnet nga may dala nga puthaw. Ang dili makita nga pwersa sa magnet mobira sa puthaw ug hugot nga motaput niini. Ang magnet mawad-an lamang og pwersa niana nga butang kon ang puthaw ipalayo gikan niini. Busa, sama nga ang magnet walay gahum sa pagpwersa sa puthaw nga layo ra niini, samtang atong suklan ang mga tintasyon, kini magkaluya og mawad-an og gahum diha sa atong pangisip ug kasingkasing ug, ingon man, sa atong mga buhat.
Kini nga pagtandi nagpahinumdom kanako sa usa ka kasinatian nga gipaambit ngari kanako sa usa ka matinud-anon nga miyembro sa Simbahan sa milabay nga panahon. Kini nga miyembro misulti kanako nga sa pagmata niya nianang usa ka buntag, usa ka law-ay nga hunahuna nga wala pa niya masinati sukad wala damha nga misulod sa iyang pangisip. Bisan og hingpit siya nga nasurprisa niini, iyang gibatukan ang sitwasyon diha-diha dayon, misulti sa iyang kaugalingon ug niana nga hunahuna, “Dili!” ug gipulihan kini og usa ka butang nga maayo aron makalimtan ang wala niya ikahinangup nga hunahuna. Siya misulti kanako nga samtang siya migamit sa iyang moral nga kabubut-on diha sa katarung, kanang negatibo, wala tuyoa nga hunahuna nawala dayon.
Sa dihang si Moroni mitawag sa iyang katawhan nga motuo ni Kristo ug maghinulsol, siya miawhag kanila sa pagduol ngadto sa Manluluwas sa tibuok nilang kasingkasing, nga molimpyo kanila gikan sa tanang kahugaw. Dugang pa, si Moroni mitambag kanila sa paghangyo sa Dios, uban sa dili matarug nga determinasyon, nga sila dili mahulog ngadto sa tintasyon.12 Ang paggamit niini nga mga baruganan sa atong mga kinabuhi nagkinahanglan og labaw pa kay sa pagtuo lamang; apan kini nagkinahanglan usab sa pagpahiuyon sa atong mga pangisip ug mga kasingkasing ngadto niining balaanon nga mga baruganan. Ang ingon nga pagpahiuyon nagkinahanglan og kada adlaw ug kanunay nga personal nga paningkamot, dugang sa atong pagsalig sa Manluluwas, kay ang atong mga mortal nga kahilig dili mawala nga sila lang. Ang pagpakigbatok sa tintasyon nagkinahanglan og tibuok kinabuhi nga kakugi ug kamatinud-anon. Apan palihug sayri nga ang Ginoo andam nga moabag kanato sa atong personal nga mga paningkamot ug nagsaad og maanindot nga mga panalangin kon kita molahutay hangtud sa katapusan.
Atol sa usa ka malisud kaayo nga panahon dihang si Joseph Smith ug ang iyang kauban nga mga piniriso didto sa Bilanggoan sa Liberty walay kagawasn sa bisan unsang butang gawas lang sa ilang mga hunahuna, ang Ginoo mihatag og makatabang nga tambag ug usa ka saad ngadto kanila nga gipaabot ngari kanatong tanan:
“Himoa usab ang inyong mga kasingkasing nga mapuno sa gugma nga putli ngadto sa tanan nga mga tawo, ug ngadto sa mga sakop sa pagtuo, ug himoa ang hiyas nga modayan-dayan sa inyong mga hunahuna nga walay paghunong; unya ang inyong pagsalig mosamot pagkalig-on diha sa atubangan sa Dios; …
“Ang Espiritu Santo mao ang inyong kauban sa kanunay, ug ang inyong pagmando usa ka dili mausabon nga pagmando sa pagkamatarung ug kamatuoran”13
Sa paghimo niini, balaan nga mga hunahuna padayon nga modayan-dayan sa atong mga pangisip ug putli nga mga tinguha motudlo kanato ngadto sa matarung nga mga buhat.
Si Moroni mipahinumdom usab sa iyang katawhan nga dili magpaulipon sa ilang mga kahigal.14 Ang pulong nga kahigal nagpasabot sa kusganon nga gana sa og dili angay nga tinguha alang sa usa ka butang.15 Kini naglangkob sa ngil-ad nga mga hunahuna o dautan nga mga tinguha nga maoy hinungdan nga ang usa ka indibidwal motutok sa hinakog nga mga buhat o kalibutanong mga kabtangan kay sa pagbuhat og maayo, pagkamabination, pagsunod sa mga sugo sa Dios, ug uban pa. Kasagaran mabati kini pinaagi sa pinakalawasnon nga pagbati sa kalag. Ang Apostol Pablo miila sa uban niini nga mga pagbati, sama sa kahugaw, kahilawasnon, kasilag, kasuko, kagubot, kasina, ug uban nga sama niani.16 Gawas sa tanang dautan nga aspeto sa kahigal, dili nato mahimong kalimtan nga ang kaaway mogamit niini isip sekreto nga hinagiban batok kanato kon siya motintal kanato sa pagbuhat og usa ka butang nga sayop.
Hinigugma kong mga kaigsoonan, ako mopamatuod nga kon kita mosalig sa lig-on nga sukaranan sa kaluwasan, ang Manunubos sa atong mga kalag, ug mosunod sa tambag ni Moroni, ang atong abilidad sa pagkontrol sa atong mga hunahuna madugangan pag-ayo. Ako mopaniguro kaninyo nga ang atong espiritwal nga kahamtong molambo sa magkadugang nga gikusgon, mousab sa atong mga kasingkasing, mohimo kanato nga mas sama ni Jesukristo. Dugang pa, ang impluwensya sa Espiritu Santo mahimong mas hugot ug makanunayon diha sa atong kinabuhi. Dayon ang mga tinstasyon sa kaaway, sa hinayhinay, mawad-an og gahum ibabaw kanato, moresulta sa usa ka mas malipayon ug mas putli ug mapahinunguron nga kinabuhi.
Alang niadtong kinsa, sa bisan unsa nga rason, nadala sa tintasyon ug nagpuyo sa dili matarung nga mga buhat, ako mopasalig kaninyo nga adunay paagi aron makabalik, ug adunay paglaum diha ni Kristo. Pipila ka tuig ang milabay, ako may kahigayunan sa pagpakighinabi sa usa ka minahal nga miyembro sa Simbahan ni Jesukristo sa mga Santos sa Ulaing mga Adlaw kinsa nakasinati og usa ka malisud kaayo nga panahon sa iyang kinabuhi human makahimo og dakong kalapasan. Dihang una nako siyang nakita, akong nakita ang kaguol sa iyang mga mata, inubanan sa kahayag sa paglaum sa iyang panagway. Ang iya mismong panagway nagpadayag og usa ka mapaubsanon ug nausab nga kasingkasing. Kanhi usa siya ka matinuoron nga Kristiyano ug buhong sa panalangin sa Ginoo. Hinuon, gitugutan niya ang usa ka dili angay nga hunahuna nga mosulod sa iyang pangisip, nga dayon misangput sa laing butang. Samtang padayon nga nagkadugang ang iyang pagtugot niini nga mga hunahuna, sa wala madugay migamot kini sa iyang pangisip ug misugod sa pagtubo sa kahiladman sa iyang kasingkasing. Siya sa katapusan mibuhat niini nga mga dili takus nga mga tinguha, nga mitudlo kaniya sa paghimo og mga desisyon batok sa tanan nga pinakabililhon sa iyang kinabuhi. Siya misulti kanako nga kon wala pa unta niya hatagi og lugar kadtong binuang nga mga hunahuna sa pagsugod pa lang, wala unta siya madutli ug madala sa mga tintasyon sa kaaway—mga tintasyon nga nakaingon sa tumang kasubo sa iyang kinabuhi, maayo gani sulod lang sa usa ka panahon.
Maayo na lang, sama sa nawala [usikan] nga anak diha sa bantugan nga istorya sa ebanghelyo ni Lucas, “nakaamgo siya” ug nahigmata gikan sa iyang sayop nga binuhatan.17 Iyang gibag-o ang iyang pagsalig sa Ginoo ug mibati og tinuod nga pagmahay ug nakaangkon og tinguha nga sa katapusan mobalik ngadto sa panon sa Ginoo. Nianang adlawa gibati namong duha ang matubsanon nga gugma sa Manluluwas alang kanamo. Pagkahuman sa among mubo nga pag-istoyahanay, gidaog kaming duha sa emosyon, ug hangtud karon, akong mahinumduman ang masanagon nga kalipay sa iyang panagway dihang siya mibiya sa akong opisina.
Minahal nga mga higala, kon kita mosukol sa mga gagmay nga mga tintasyon, nga kasagaran dili damhon nga moabut sa atong kinabuhi, mas sarang kita nga makalikay sa mas grabe nga mga kalapasan. Sama sa gisulti ni President Spencer W. Kimball: “Panagsa ra ang tawo makahimo og dagkong kalapasan nga wala una mag-agi sa ginagmay nga sala, nga maoy nagbukas sa ganghaan sa mas bug-at nga sala. … ‘[Ang] hawan nga umahan [dili] kalit lamang nga nahimo dayong sagbuton.’”18
Samtang nangandam sa pagtuman sa Iyang diosnon nga misyon sa kalibutan, ang Manluluwas nga si Jesukristo mipakita sa importansya sa kanunay nga pagsukol sa tanan nga makapugong kanato sa pagkaamgo sa atong mahangturong katuyoan. Human sa pipila ka pakyas nga pag-atake sa kaaway, kinsa nangahas sa pagpatipas Kaniya gikan sa Iyang misyon, ang Manluluwas piho nga mipapahawa kaniya pinaagi sa pag-ingon: “Pahawa, Satanas. … Busa ang yawa mibiya kaniya ug unya nangabot ang mga anghel ug miatiman kaniya.”19
Mahanduraw ba ninyo, akong mga igsoon, unsa kaha ang mahitabo kon mokuha kita og kusog ug kaisug gikan sa Manluluwas ug moingon nga “Dili” ug “Pahawa” ngadto sa dili mahiyason nga mga hunahuna sa unang higayon gayud nga kini moabut sa atong mga pangisip? Unsa man ang mga epekto diha sa mga tinguha sa atong mga kasingkasing? Sa unsang paagi ang atong resulta nga mga buhat makapaduol nato kanunay sa Manluluwas ug motugot sa padayon nga impluwensya sa Espiritu Santo sa atong mga kinabuhi? Ako nasayud nga sa pagsunod sa ehemplo ni Jesus, kita makalikay sa mga trahedya ug dili angay nga mga kinaiya nga tingali makahatag og mga problema sa pamilya ug mga panagbangi, negatibo nga mga emosyon ug mga kahilig, maghimo og kahiwian ug pangabuso, mahimong ulipon sa daotan pinaagi sa pagkaadik, ug uban pa nga mahimong sukwahi sa mga sugo sa Ginoo.
Sa iyang makasaysayon ug makatandog nga mensahe sa Abril niining tuiga, ang atong pinangga nga propeta, si Presidente Russell M. Nelson, misaad nga tanan kadtong andam sa “[pag]paminaw Kaniya” ug pagsunod sa Iyang mga sugo “mapanalanginan og dugang gahum sa pag-atubang sa tintasyon, mga pakigbisog, ug kahuyang” ug nga ang atong kapasidad sa pagbati og hingpit nga kalipay madugangan, bisan pa sa nagkadugang nga kasamtanang kasamok.20
Ako mopamatuod kaninyo nga ang mga saad nga gihatag sa atong minahal nga propeta mao ang mga saad nga gihatag sa Manluluwas Mismo. Dapiton ko kitang tanan sa “[pag]paminaw Kaniya” sa matag hunahuna ug sa pagsunod Kaniya sa tibuok natong kasingkasing aron makadawat sa kalig-on ug kaisug sa pagsulti og “Dili” ug “Pahawa” ngadto sa tanang mga butang nga tingali makahatag og kagul-anan sa atong kinabuhi. Kon kita mobuhat niini, ako mosaad nga ang Ginoo mopadala og dugang nga impluwensya sa Iyang Espiritu Santo aron sa paglig-on ug paghupay kanato ug mamahimo kitang mga indibidwal nga makapahimuot sa Ginoo.21
Ako mohatag sa akong pagsaksi nga si Jesukristo buhi ug nga pinaagi Kaniya, kita mahimong magmadaugon sa dautan nga impluwensya sa kaaway ug mahimong takus nga mabuhi alang sa kahangturan uban sa Ginoo ug diha sa presensya sa atong hinigugma nga Amahan sa Langit. Ako mopamatuod niini nga mga kamatuoran uban sa tanan nakong gugma alang kaninyo ug alang sa atong matahum nga Manluluwas, kang kinsang ngalan ako mohatag sa himaya, pagtahud, ug pagdayeg sa kahangturan. Gisulti ko kining tanan sa sagradong ngalan ni Jesukristo, amen.