Bishop L. Todd Budge
Ikaduhang Magtatambag sa Presiding Bishopric
Human moserbisyo og 18 ka bulan isip General Authority Seventy, si Bishop L. Todd Budge gipaluyohan isip Ikaduhang Magtatambag sa Presiding Bishopric. Gipulihan niya si Bishop Dean M. Davies, kinsa gitawag isip General Authority Seventy.
Si Bishop Budge migradwar gikan sa Brigham Young University niadtong 1984 nga dunay bachelor’s degree sa economics. Mitrabaho siya sa Bain & Company Japan; Citibank, N.A.; ug sa GE Capital sa Japan ug Atlanta, Georgia, USA. Nahimo siyang presidente ug chief executive officer sa Tokyo Star Bank Limited niadtong 2003, miserbisyo isip chairman of the board sa bangko sugod sa 2008 hangtud 2011. Nakaserbisyo usab siya isip sakop sa hunta direktiba [board of directors] sa Hawaiian Airlines.
Sa usa ka higayon sa iyang kinabuhi, samtang si Bishop Budge naghunahuna nga mobalhin og laing trabaho, nakadawat siya og bililhong tambag. “Nagkinahanglan kami og mga tawo nga adunay integridad sa negosyo,” usa ka mentor miingon kaniya, midugang nga ang iyang gisubay nga panarbaho mohatag kaniya og daghang oportunidad sa pagtambag ug pagtabang sa mga tawo.
Ang panarbaho ni Bishop Budge, sa pagkatinuod, mihatag kaniya og daghang oportunidad nga mahimong impluwensya alang sa kaayohan diha sa kalibutan sa negosyo, lakip ang pag-abli sa pultahan sa mga oportunidad aron mapaambit ang ebanghelyo didto sa Japan, diin nakaserbisyo siya kaniadto isip usa ka misyonaryo sa Japan Fukuoka Mission. Wala madugay miserbisyo siya isip presidente sa Japan Tokyo Mission.
“Ang maayong mga balita sa ebanghelyo,” mitudlo siya, “wala magsaad og usa ka kinabuhi nga walay kasub-anan ug kalisdanan apan usa ka kinabuhi nga puno sa katuyoan ug kahulogan—usa ka kinabuhi diin ang mga kasub-anan ug mga kasakit mahimong ‘mabuntog diha sa hingpit nga kalipay ni Kristo’ [Alma 31:38].”1
Si Lawrence Todd Budge natawo sa Disyembre 29, 1959, sa Pittsburg, California, USA. Nahimamat niya si Lori Capener panahon sa ilang katuigan isip freshman sa Brigham Young University. Naminyo sila niadtong 1981 sa Templo sa Logan Utah. Mga ginikanan sila sa unom ka anak.
Sa wala pa ang iyang tawag isip General Authority Seventy, si Bishop Budge miserbisyo isip Area Seventy, presidente sa stake, executive secretary sa stake, presidente sa Young Men sa stake, bishop, ug presidente sa korum sa mga elder.