Kita Naghisgot kang Kristo
Samtang ang kalibutan maghisgot og gamay ni Jesukristo, maghisgot kita og daghan bahin Kaniya.
Akong ipadayag ang akong gugma alang ninyo, among minahal nga mga higala ug isig ka tumutuo. Akong gidayeg ang inyong pagtuo ug kaisug niining milabayng mga bulan, samtang kining tibuok kalibutan nga pandemya midisturbo sa atong kinabuhi ug mikuha sa minahal nga mga sakop sa pamilya ug mga higala.
Atol niining panahon sa walay kasiguroan, gibati nako ang dili kasagaran nga pasalamat sa akong sigurado ug piho nga kahibalo nga si Jesus mao ang Kristo. Mibati na ba kamo niana? Adunay mga kalisud nga nakapabalaka sa matag usa nato, apan anaa kanunay kanato Siya kinsa mapainubsanong mipahayag, “Ako mao ang dalan, ang kamatuoran, ug ang kinabuhi.”1 Samtang kita molahutay og panahon sa pisikal nga pagdistansya sa atong kaugalingon gikan sa uban, dili gayud unta kita moagi og panahon sa espirituhanong pagdistansya sa atong kaugalingon gikan Kaniya kinsa mahigugmaong nagtawag kanato, “Duol ngari kanako.”2
Sama sa bitoon nga naggiya sa tin-aw ngitngit nga kalangitan, si Jesukristo midan-ag sa atong dalan. Siya mianhi sa yuta diha sa kabus nga pasungan. Siya nagpuyo og perpekto nga kinabuhi. Siya miayo sa mga masakiton ug mibuhi sa mga patay. Siya higala sa mga biniyaan. Siya mitudlo nato sa pagbuhat og maayo, sa pagsunod, ug sa paghigugma sa usag usa. Siya gilansang sa krus, halangdong nabanhaw paglabay sa tulo ka adlaw, nagtugot nato ug niadtong atong gimahal nga mabuhi lapas sa lubnganan. Uban sa Iyang dili matandi nga kalooy ug grasya, Siya midala diha Kaniya sa atong mga sala ug sa atong pag-antus, naghatag og kapasayloan kon kita maghinulsol ug kalinaw diha sa mga unos sa kinabuhi. Kita nahigugma Kaniya. Kita nagsimba Kaniya. Kita nagsunod Kaniya. Siya mao ang angkla sa atong mga kalag.
Makapaikag, samtang kining espirituhanong kombiksiyon naglambo diha kanato, adunay daghang tawo dinhi sa yuta nga gamay ra kaayo og nahibaloan ni Jesukristo, ug sa pipila ka bahin sa kalibutan diin ang Iyang ngalan gipahayag sulod sa gatusan ka tuig, ang pagtuo diha ni Jesukristo nagkawala. Ang maisugong mga Santos sa Europe nakakita nga ang pagtuo nagkahuyang sa ilang mga nasud sa paglabay sa mga dekada.3 Subo usab, dinhi sa Estados Unidos, ang pagtuo nagkawala. Usa ka bag-ong pagtuon nagpadayag nga sa miaging 10 ka tuig, 30 ka milyon ka tawo sa Estados Unidos miingon nga sila wala na motuo sa kabalaan ni Jesukristo.4 Nagtan-aw sa tibuok kalibutan, laing pagtuon ang nanagna nga sa mga dekada nga moabut, labaw sa kaduhaon ang gidaghanon ang mobiya sa Kristiyanismo kay sa modawat niini.5
Kita, dayag lang, motahud sa katungod sa matag usa sa pagpili, bisan ang atong Langitnong Amahan mipahayag, “Kini mao ang akong hinigugmang Anak: paminaw kaniya.”6 Ako mosaksi nga ang adlaw moabut nga ang matag tuhod moluhod ug ang matag dila mokumpisal nga si Jesus mao ang Kristo.7
Unsaon nato sa pag-atubang ang atong nagkausab nga kalibutan? Samtang ang uban mibaliwala sa ilang pagtuo, ang uban nangita sa kamatuoran. Kita midala diha sa atong mga kaugalingon sa ngalan sa Manluluwas. Unsa pay atong buhaton?
Ang Pagpangandam ni Presidente Russell M. Nelson
Kabahin sa atong tubag moabut samtang atong hinumduman kon giunsa pagtudlo sa Ginoo si Presidente Russell M. Nelson sa mga bulan sa wala pa siya matawag isip Presidente sa Simbahan. Namulong usa ka tuig sa wala pa ang iyang pagkatawag, si Presidente Nelson midapit kanato sa pagtuon pag-ayo sa 2,200 ka pakisayran sa ngalan ni Jesukristo nga nalista sa Topical Guide.8
Paglabay sa tulo ka bulan sa kinatibuk-ang komperensya sa Abril, siya namulong kon sa unsa nga paagi, bisan sa iyang mga dekada sa mahalaron nga pagkadisipulo, kining lawom nga pagtuon kang Jesukristo nakaapekto pag-ayo kaniya. Si Sister Wendy Nelson, nangutana kaniya mahitungod sa epekto. Siya mitubag, “Ako usa ka lahi nga tawo!” Siya lahi na nga tawo? Sa edad nga 92, usa ka lahi nga tawo? Si Presidente Nelson mipasabut:
“Samtang kita mogahin og panahon sa pagkat-on mahitungod sa Manluluwas ug sa Iyang maulaong sakripisyo, maagni kita ngadto [Kaniya]. …
“… Kinahanglang [mahimong] lig-on kitang nakatutok sa Manluluwas ug sa Iyang ebanghelyo.”9
Ang Manluluwas miingon, “Paghunahuna ngari kanako sa matag hunahuna.”10
Sa usa ka kahimtang sa trabaho, mga kabalaka, ug takus nga mga paningkamot, kita mosentro sa atong kasingkasing, sa atong pangisip, ug sa atong hunahuna diha Kaniya kinsa mao ang atong paglaum ug kaluwasan.
Kon ang gibag-o nga pagtuon bahin sa Manluluwas nakatabang sa pag-andam ni Presidente Nelson, dili ba makatabang usab kini sa pag-andam kanato?
Sa pagpasabut sa ngalan sa Simbahan, si Presidente Nelson mitudlo: “Kon kita … gustong makagamit sa gahum sa Pag-ula ni Jesukristo—sa paglimpyo ug pag-ayo kanato, sa paglig-on ug pagpalambo kanato, ug sa katapusan sa paghimaya kanato—kinahanglan nga atong klarohon ang pag-ila Kaniya isip ang tinubdan niana nga gahum.”11 Si Presidente Nelson mitudlo kanato nga ang kanunay nga paggamit sa saktong ngalan sa Simbahan, nga ingon og gamay nga butang, dili gayud gamay nga butang, ug makaimpluwensya sa umaabut sa kalibutan.
Usa ka Saad alang sa Inyong Pagpangandam
Ako mosaad kaninyo nga samtang andamon ninyo ang inyong kaugalingon, sama sa gibuhat ni Presidente Nelson, kamo usab mahimong lahi, magsige og hunahuna sa Manluluwas, kanunay maghisgot Kaniya ug wala kaayoy pagduha-duha. Samtang kamo makaila ug mahigugma Kaniya pag-ayo, ang inyong mga pulong mas hanoy nga mogawas, sama kon kamo mamulong sa usa sa inyong mga anak o sa usa ka mahal nga higala. Kadtong maminaw kaninyo mobati nga dili makigdebati o mosalikway kaninyo ug gusto nga makat-on gikan kaninyo.
Kamo ug ako naghisgot bahin ni Jesukristo, apan kita makahimo kanunay og mas maayo pa. Kon ang kalibutan dili kaayo maghisgot mahitungod Kaniya, kinsa ang maghisgot og dugang mahitungod Kaniya? Kita! Uban sa laing mahalaron nga mga Kristiyano!
Paghisgot ni Kristo diha sa Atong Panimalay
Aduna bay mga imahe sa Manluluwas sa atong mga panimalay? Naghisgot ba kita kanunay ngadto sa atong mga anak mahitungod sa mga sambingay ni Jesus? “Ang mga istorya [ka]bahin ni Jesus mahimong makatabang sa pagpalambo sa pagtuo diha sa mga kasingkasing sa atong mga anak.”12 Kon ang inyong mga anak mangutana kaninyo, hunahunaa ang mahitungod sa pagtudlo unsay gitudlo sa Manluluwas. Pananglitan, kon ang imong anak mangutana, “ Papa, nganong mag-ampo man kita?” Mahimo kang motubag, “Nindot kana nga pangutana. Nakahinumdom ka ba sa dihang si Jesus nag-ampo? Hisgutan nato ngano nga Siya nag-ampo ug giunsa Niya sa pag-ampo.”
“Kami naghisgot kang Kristo, kami nalipay diha kang Kristo, … nga ang among mga anak mahimo nga masayud sa unsa nga tinubdan sila mahimo nga mangita alang sa kapasayloan sa ilang mga sala.”13
Maghisgot ni Kristo diha sa Simbahan
Kining sama nga kasulatan nagdugang nga “kita nagsangyaw kang Kristo.”14 Sa atong mga tulumanon sa pagsimba, tutukan nato ang Manluluwas nga si Jesukristo ug ang gasa sa Iyang maulaong sakripisyo. Kini wala magpasabut nga dili kita makasulti og kasinatian gikan sa atong kaugalingong kinabuhi o makapaambit og mga hunahuna gikan sa uban. Samtang ang atong hilisgutan mahimong mahitungod sa mga pamilya o pagserbisyo o mga templo o sa usa ka bag-o nga misyon, ang tanan sa atong pagsimba kinahanglang magtudlo ngadto ni Ginoong Jesukristo.
Katloan ka tuig ang milabay, si Presidente Dallin H. Oaks naghisgot sa usa ka sulat nga iyang nadawat “gikan sa usa ka tawo kinsa miingon nga siya nakatambong og panagtigum alang sa [usa ka sakramento] ug naminaw sa napulog pito ka pagpamatuod nga wala makadungog nga gihisgutan ang Manluluwas.”15 Si Presidente Oaks dayon miingon, “Tingali kana nga paghulagway nasobrahan [apan] gikutlo nako kini tungod kay kini naghatag og klaro nga pahinumdom alang natong tanan.”16 Dayon siya midapit nato sa paghisgot pa og dugang bahin ni Jesukristo sa atong mga pakigpulong ug mga panaghisgutan sa klase. Ako nakaobserbar nga nagtutok kita og mas dugang pa kang Kristo diha sa atong mga miting sa Simbahan. Magpadayon kita nga maghunahuna niining positibo kaayo nga mga paningkamot.
Paghisgot ni Jesukristo ngadto sa Uban
Uban niadtong anaa sa atong palibut, mas magmatinuoron kita, mas andam nga maghisgot bahin ni Kristo. Si Presidente Nelson miingon, “Ang tinuod nga mga disipulo ni Jesukristo andam nga mobarug, motingog, ug magpalahi gikan sa mga tawo sa kalibutan.”17
Usahay kita maghunahuna nga ang pagpakig-istorya sa usa ka tawo kinahanglang moresulta nga moadto sila sa simbahan o makigkita sa mga misyonaryo. Tuguti nga ang Ginoo mogiya kanila kon sila andam, samtang kita maghunahuna og dugang mahitungod sa atong responsibilidad nga mahimong tingog alang Kaniya, nga mahunahunaon ug sinsero nga makig-istorya bahin sa atong pagtuo. Si Elder Dieter F. Uchtdorf mitudlo kanato nga kon ang usa ka tawo mangutana unsay atong kalihokan sa katapusan sa semana, kita kinahanglan nga andam nga malipayong motubag kita ganahan nga maminaw sa mga bata sa Primary nga mokanta sa “Maninguha Kong Mahimong Mahisama kang Jesus.”18 Mabination natong saksihan ang atong pagtuo diha kang Kristo. Kon dunay mopaambit og problema sa iyang personal nga kinabuhi, mahimong moingon kita, “John, Mary, kahibalo mo nga nagtuo ko ni Jesukristo. Naghunahuna ko og butang nga Iyang gisulti nga makatabang ninyo.”
Pagmadayganon diha sa social media sa paghisgot sa inyong pagsalig kang Kristo. Kadaghanan motahud sa inyong pagtuo, apan kon ang usa ka tawo wala manumbaling kon kamo maghisgot sa Manluluwas, pagbaton og kaisug gikan sa Iyang saad: “Bulahan kamo kon biaybiayon sa mga tawo… tungod sa inyong pagsunod kanako. … Kay dako ang ganti nga gitagana alang kaninyo didto sa langit.”19 Mas palabihon pa nato nga mahimong Iyang mga sumusunod kay sa “magustuhan” sa atong kaugalingong mga sumusunod. Si Pedro mitambag: “Pangandam kamo kanunay sa pagtubag [alang] sa inyong paglaum nga anaa kaninyo.”20 Maghisgot kita kang Kristo.
Ang Basahon ni Mormon usa ka gamhanan nga saksi ni Jesukristo. Hapit tanang pahina nagpamatuod sa Manluluwas ug sa Iyang balaan nga misyon.21 Ang pagsabut sa Iyang Pag-ula ug grasya mipuno sa mga pahina niini. Isip kauban sa Bag-ong Tugon, ang Basahon ni Mormon nagtabang nato nga mas makasabut ngano nga ang Manluluwas mianhi aron sa pagluwas kanato ug unsaon nga kita mas makapaduol ngadto Kaniya.
Ang pipila sa atong isig ka mga Kristiyano, usahay, nagduha-duha sa atong gituohan ug mga motibo. Magmaya kita sa tinud-anay uban kanila sa atong giambitan nga pagtuo kang Jesukristo ug sa mga kasulatan sa Bag-ong Tugon nga ganahan natong tanan. Sa mga adlaw nga umaabut, kadtong kinsa nagtuo ni Jesukristo magkinahanglan og panaghigala ug suporta sa usag usa.22
Samtang ang kalibutan maghisgot og gamay ni Jesukristo, maghisgot kita og daghan bahin Kaniya. Samtang ang atong tinuod nga kinaiya isip Iyang mga disipulo mapadayag, daghan sa naglibut nato ang maandam sa pagpaminaw. Samtang kita mopaambit sa kahayag nga atong nadawat gikan Kaniya, ang Iyang kahayag ug ang Iyang balaan nga makaluwas nga gahum modan-ag niadtong andam nga moabli sa ilang mga kasingkasing. Si Jesus miingon, “Mianhi … ko [ingon] nga kahayag sa kalibutan.”23
Pagbayaw sa Atong Tinguha sa Paghisgot ni Kristo
Walay makadasig sa akong tinguha sa pagpamulong bahin ni Kristo labaw pa kay sa paghanduraw sa Iyang pagbalik. Samtang kita wala makahibalo kanus-a Siya moabut, ang mga panghitabo sa Iyang pagbalik makapahingangha! Siya moabut sa mga panganud sa langit diha sa kahalangdon ug himaya uban sa tanan Niyang balaan nga mga anghel. Dili lamang pipila ka anghel, apan ang tanan sa Iyang balaan nga mga anghel. Dili kini ang pulahon og aping nga kerubin nga gipintal ni Raphael nga atong makita sa atong mga Valentine card. Kini mao ang mga anghel sa mga siglo, ang mga anghel nga mopatak-om sa ba-ba sa mga liyon,24 nga moabli sa mga pultahan sa prisohan,25 sa pagpahibalo sa Iyang dugay nang gihulat nga pagkatawo,26 sa paghupay Kaniya sa Getsemani,27 sa paghatag sa Iyang mga disipulo og kasiguroan sa Iyang Pagkayab,28 ug sa pag-abli sa mahimayaong pagpahiuli sa ebanghelyo.29
Makahanduraw ba kamo nga bayawon sa pagsugat Kaniya, niini nga habig o sa pikas habig sa tabil?30 Kana ang Iyang saad ngadto sa matarung. Kining talagsaon nga kasinatian moimpluwensya sa atong mga kalag sa kahangturan.
Mapasalamaton kita sa atong minahal nga propeta, si Presidente Russell M. Nelson, kinsa mibayaw sa atong tinguha sa paghigugma sa Manluluwas ug mopahayag sa Iyang pagkabalaan. Ako usa ka saksi sa impluwensya sa Ginoo diha kaniya ug sa gasa sa pagpadayag nga naggiya kaniya. Presidente Nelson, mahinamon kaming naghulat sa imong tambag.
Minahal kong mga higala sa tibuok kalibutan, maghisgot kita ni Kristo, magpaabut sa Iyang mahimayaong saad: “Ang … moangkon kanako atubangan sa mga tawo, angkonon ko … atubangan sa akong Amahan.”31 Ako mopamatuod nga Siya mao ang Anak sa Dios. Sa ngalan ni Jesukristo, amen.