Ol Hat Oli Joen Tugeta long Fasin blong Stap Stret mo Gud mo Fasin blong Stap Wan
Long 200-yia we i makem wan poen blong gro blong Jos, letem yumi komitim yumi olsem ol memba blong Jos blong Lod blong laef folem stret mo gud laef mo stap yunaet long wan wei we i neva hapen bifo.
Fasin blong stap stret mo gud mo fasin blong stap wan i impoten tumas.1 Taem pipol oli lavem God wetem ful hat blong olgeta mo traehad blong stap stret mo gud blong kam olsem Hem, hemia, i daonem fasin blong raorao insaed long komuniti. I gat moa yuniti. Mi laekem wan tru stori we i soemaot fasin ia.
Olsem wan yang man we i no blong fet blong yumi, Jeneral Thomas L. Kane i bin givim sapot mo difendem ol Sent long gavman level taem oli askem olgeta blong aot long Nauvu. Hem i bin wan loya blong Jos blong plante yia.2
Long 1872, Jeneral Kane, waef blong hem we i gat fulap talen, Elizabeth Wood Kane, mo tufala boe blong tufala oli bin travel aot long haos blong olgeta long Pensilvania, i go kasem Sol Lek Siti. Oli folem kampani blong Brigham Yang mo ol grup blong hem long wan rod long Saot i go long Sent Joj, Yuta. Elizabeth i bin putum taem blong spendem wetem ol woman we bae hem i mitim long fas visit blong hem wetem ol Sent long Yuta. Hem i sapraes bigwan long sam long ol samting we hem i bin lanem. Eksampol, hem i faenemaot se ol woman oli save wok long eni wok we wan woman i save mekem blong winim mane, long Yuta.3 Hem i faenemaot tu se ol memba blong Jos oli kaen mo oli gat respek long ol Ameriken Indian.4
Long trip ia oli stap long Filmo long haos blong Thomas R. mo Matilda Robison King.5
Elizabeth i bin raetem se taem Matilda i stap rere long kaekae blong Presiden Yang wetem grup blong hem, faef Ameriken Indian oli kam insaed long rum. I nomata se oli no invaetem olgeta, be i soem klia se bae oli joenem kampani we i stap. Sista King i toktok long olgeta “long lanwis blong olgeta.” Oli sidaon wetem ol blangket blong olgeta wetem wan lukluk we i naes long fes blong olgeta. Elizabeth i askem wan long ol pikinini blong King, “?Mama blong yu i talem wanem long ol man ia?”
Ansa blong boe blong Matilda hem i “Hem i se, ‘Ol strenja ia oli kam faswan, mo mi bin kuk i naf nomo blong olgeta; be kaekae blong yufala i stap kuk long faea naoia, mo bae mi singaot yufala taem bae i rere.’”
Elizabeth i askem: “?Bae hem i mekem olsem we hem i talem, o bae i givim hafhaf kaekae nomo long olgeta long doa blong kijin?”6
Boe blong Matilda i ansa: “Mama ba i givim kaekae long olgeta semmak olsem i mekem wetem yufala mo bae i givim wan ples long olgeta long tebol blong hem.”
Mo hem i mekem olsem, mo “oli kakae wetem gudfala fasin blong kakae.” Elizabeth i eksplenem se, hem i givim 100 pesen long Matilda from seves blong hem.7 Ol pipol oli save kam moa tugeta taem oli tritim olgeta wetem respek nomata long olsem wanem ol man i lukluk olgeta.
Olsem ol lida, yumi no mas gat mistek ia blong bilif se long bifo evri rilesensip i stret gud, evri fasin i olsem blong Kraes, o evri desisen i stret. Nomata long hemia, fet blong yumi i tijim yumi se yumi evriwan i ol pikinini blong Papa blong yumi long Heven, mo yumi wosipim Hem mo Pikinini blong hem Jisas Kraes, we i Sevya blong yumi. Wanem we yumi wantem hem i blong ol hat mo maen blong yumi i joen tugeta wetem fasin blong stap stret mo gud mo yuniti, mo bae yumi kam wan wetem Tufala.8
Blong stap stret mo gud, i wan toktok we i bigwan blong andastanem be i minim tu blong laef folem ol komanmen blong God.9 Hem i mekem yumi kwalifae from ol tabu odinens we i putum yumi long rod blong kavenan mo blesem yumi blong gat Spirit blong i lidim yumi long laef.10
I no nid blong wanwan long yumi blong gat evri blesing long laef blong yumi long taem naoia, blong save stap stret mo gud. Maet bae yumi no save mared o gat blesing ia blong gat ol pikinini o gat ol nara blesing we yumi wantem naoia. Be Lod i bin promes se olgeta we oli stret mo gud mo stap fetful “oli save stap wetem God long wan ples blong hapi we i neva gat en.”11
Yuniti, i wan toktok tu we i bigwan blong andastanem gud, be hem i givim eksampol blong fas mo seken komanmen blong lavem God mo lavem ol pikinini blong Hem.12 I makem ol pipol blong Saeon we hat blong olgeta mo maen blong olgeta i “joen tugeta blong kam wan long lav.”13
Mesej blong mi i abaot ol defren samting mo ol lesen aot long ol tabu skripja.
Hem i bin 200 yia nao stat long taem we Papa mo Pikinini blong Hem, oli bin kamaot long wol ia mo statem Restoresen blong gospel blong Jisas Kraes long 1820. Stori long buk blong 4 Nifae long Buk blong Momon i gat wan taem we i semmak long 200 yia taem afta we Sevya i bin kam long olgeta mo i bin stanemap Jos blong Hem long Amerika blong bifo.
Long rekod blong histri ia we yumi ridim long 4 Nifae, i tokbaot wan pipol we i no bin gat ol tingting blong gat samting blong narafala man, o ol rao, o ol faet, o ol fasin blog slip olbaot, o ol giaman, ol ol fasin blong kilim man i ded, o eni kaen fasin blong gat rabis tingting. From stret mo gudfala fasin ia oli bin raetemdaon, “i tru we i no save gat wan pipol we i moa hapi long medel blong evri pipol we han blong God i mekem olgeta.”14
Long saed blong yuniti, 4 Nifae i rid olsem: “I no gat eni rao long graon, from lav blong God we i bin stap insaed long hat blong ol pipol.”15
Nomata long hemia, 4 Nifae tokbaot wan bigfala jenis we i bin stat long “tu handred mo wan yia,”16 taem rabis fasin mo fasin blong seraot i smasem gud fasin blong stap stret mo gud mo yuniti. Bigfala fasin nogud ia we i bin hapen i kam moa nogud i mekem bigfala profet ia Momon, i stap toktok sore long boe blong hem Moronae:
“Be o boe blong mi, olsem wanem wan pipol olsem ia, we glad blong olgeta i stap tumas long rabis sin—
“?Olsem wanem nao yumi save ting se, God bae i no holembak han blong hem long jajmen agensem yumi?”17
Long dispensesen ia, nomata we yumi laef long wan spesel taem, wol i no bin kasem blesing from stret mo gud fasin mo yuniti we oli stap tokbaot long 4 Nifae. I tru yumi laef long wan taem long fasin blong stap seraot we i strong tumas. I nomata, milien long olgeta we oli akseptem gospel blong Jisas Kraes oli komitim olgeta blong mekem se fasin blong stap stret mo gud mo yuniti i hapen. Yumi evriwan i save se yumi save mekem i moa gud, mo hemia i jalenj blong yumi long dei ia tedei. Yumi save stap olsem wan paoa blong leftemap mo blesem ful sosaeti. Long 200-yia we i makem wan poen blong gro blong Jos, letem yumi komitim yumi olsem ol memba blong Jos blong Lod blong laef folem stret mo gud laef mo stap yunaet long wan wei we i neva hapen bifo. Presiden Russell M. Nelson i bin askem yumi “blong soemaot bigfala fasin we i gud, kam tugeta olsem ol pipol blong ol defren kala mo defren kantri mo soem respek long evriwan.”18 Hemia i minim blong lavem wanwan long yumi mo God mo akseptem evriwan olsem ol brata mo sista mo stap olsem ol tru pipol blong Saeon.
Wetem evri doktrin we yumi gat, yumi save stap olsem wan grup we i yunaet mo glad blong wok tugeta wetem ol defren pipol. Yuniti mo blong gat defren pipol long wan ples i wan samting nomo. Yumi save mekem wok ia blong karem ol defdefren pipol i kam tugeta sapos yumi wok plante blong respektem ol defren kalja mo mekem olgeta i wok tugeta. Long taem we mi bin stap long stek presidensi blong San Fransisko Kalifonia Stek, mifala i gat olgeta we oli toktok long ol lanwis ia: Spanis-, Tonga-, Samoa-, Tagalog-, mo Mandarin. Wod blong mifala we i toktok Inglis oli gat ol pipol we oli kam ol defren ples mo gat defren kalja. I gat lav, fasin blong stap stret mo gud mo yuniti.
Ol wod mo ol branj insaed long Jos Ia blong Jisas Kraes blong Ol Lata-dei Sent oli serem olgeta tru long ol eria o lanwis,19 be i no folem ol defren kala o kalja blong man. Defren kala blong man i no gat insaed long ol membasip rekod.
Long stat blong Buk blong Momon kolosap 550 yia bifo Kraes i bon, oli bin tijim yumi abaot stamba komanmen blong rilesensip bitwin ol pikinini blong Papa long Heven. Evriwan oli mas kipim komanmen blong Lod, mo evriwan oli invaetem olgeta blong tekem pat blong gud fasin blong Lod; “mo hem i no tanem baksaed blong hem long eniwan we i kam long hem, blak mo waet, slef mo fri, man mo woman; mo hem i tingbaot olgeta we oli no gat respek long tru God; mo evriwan i semmak long God, Ol Jiu tugeta wetem Ol Jentael.”20
Ministri mo mesej blong Sevya i oltaem talemaot i klia defdefren man mo defren kala blong man oli ol pikinini blong God. Yumi ol brata mo sista. Long doktrin blong yumi, yumi biliv se long kantri we Restoresen i tekem ples long hem, Ol Yunaeted Stet, Konstitusen blong Yunaeted Stet21 mo ol nara toktok we i go wetem,22 we ol man we oli no stret evriwan oli bin raetem, God i bin givim insperesen long olgeta blong blesem ol pipol. Olsem we yumi ridim long Doktrin mo Ol Kavenan, oli “putum tugeta ol loa ia, mo oli mas holemtaet from ol raet mo proteksen blong evri bodi blong mit mo bun, folem ol stret mo tabu prinsipol.”23 Tu long ol prinsipol ia oli fridom blong mekem joes mo man i ansa from sin blong hemwan. Lod Hemwan i talemaot se:
“From hemia, hem i no stret blong wan man i stap slef blong wan narafala man.
“Mo from stamba tingting ia, mi bin setemap Konstitusen blong kantri ia, tru long ol han blong ol waes man we mi mekem olgeta oli girap from stret stamba tingting ia, mo mi tekembak graon ia tru long fasin blong mekem blad i ron.”24
Revelesen ia oli kasem long 1830 taem ol Sent long Misuri oli fesem bigfala harem nogud. Long hed taetol blong Doktrin mo Ol Kavenan seksen 101 sam pat i rid: “Ol grup blong ol nogud pipol oli ronemaot olgeta aot long haos blong olgeta long Jakson Kaonti. … Ol strong toktok blong kilimded man we oli kam agensem [ol memba] blong Jos oli bin plante.”25
Hemia i bin wan taem blong bigfala hadtaem. Plante long ol man we oli stap long Misuri oli tingting long ol Ameriken Indian olsem ol strong enemi we oli wantem aotem olgeta long graon ia. Antap long hemia, plante long ol man oli stap long Misuri oli stap lukaotem ol slef mo oli no glad long ol man we oli no laekem fasin blong mekem man i kam slef.
Long nara lukluk, doktrin blong yumi respektem ol stret man Amerika mo wanem yumi wantem, i blong tijim olgeta gospel blong Jisas Kraes. Folem fasin blong mekem man i kam slef, skripja blong yumi i mekem i klia se i no stret blong wan man i stap slef blong wan narafala man.26
Be long en, oli ronemaot ol Sent aot long Misuri27 afta oli fosem olgeta blong oli muv i go long Wes.28 Ol Sent oli kam antap mo oli faenem pis we i kam tru long fasin blong stap stret, yuniti, mo laef folem gospel blong Jisas Kraes.
Mi glad long Prea blong Sevya we oli raetem long Gospel blong Jon. Sevya i talemaot se Papa i bin sendem Hem mo we Hem, Sevya, i finisim wok we oli sendem Hem blong mekem. Afta we Hem i prea from ol disaepol blong Hem mo olgeta we bae oli biliv long Kraes: “Blong oli save kam wan; olsem yu, Papa, i joen long mi, mo mi long yu, blong mekem se olgeta tu oli save joen wetem yumitufala.”29 Blong kam wan i wanem we Kraes i bin prea from bifo oli givim hem long ol man nogud mo krusifaem Hem.
Long fas yia blong Restoresen blong Gospel blong Jisas Kraes, we oli raetem insaed long seksen 38 blong Doktrin mo Ol Kavenan, Lod i bin tokbaot ol wo mo fasin nogud mo i talem, “Mi talem long yufala i mas stap wan, mo sapos yufala i no stap wan, yufala i no blong mi.”30
Kalja blong Jos blong yumi i kamaot long gospel blong Jisas Kraes. Leta blong Aposol Pol i go long Ol Man Rom i gat paoa.31 Eli long taem blong Jos long Rom, i gat ol Jiu mo ol Jentael oli stap long hem. Ol Man Jiu long taem ia oli gat kalja blong Juda mo oli “winim fridom mo stat blong kam plante mo stap kam antap gud.”32
Ol Jentael long Rom oli gat wan kalja we i kolosap semmak long kalja blong ol man Gris, we Aposol Pol i save gud from eksperiens blong hem long Aten mo long Korin.
Pol i setemap gospel blong Jisas Kraes long wan wei we i simpol long ol man blong andastanem. Hem i putum long oda tufala kalja Juda mo Jentael33 we i go agensem tru gospel blong Jisas Kraes. Hem i askem gud wanwan long olgeta blong lego pat blong kalja mo bilif blong olgeta we i no sapotem gospel blong Jisas Kraes. Pol i askem long Ol Jiu mo Ol Jentael blong kipim ol komanmen, lavlavem olgeta, mo blong stret mo gud fasin i lid i go long gudfala laef.34
Kalja blong gospel blong Jisas Kraes i no wan kalja blong Jentael o blong Juda. I no blong wan kala blong skin o weaples yu stap laef long hem. Taem yumi stap glad from yumi gat plante defren kalja yumi mas lego ol pat blong ol kalja we oli go agensem gospel blong Jisas Kraes. Ol memba blong yumi oltaem oli kam long ol defren kala blong pipol mo defren kalja. Sapos i nid blong yumi folem toktok blong Presiden Nelson blong karem i kam tugeta ol laen blong Isrel we oli seraot i stap, bae yumi fanem se yumi defren semmak long ol Jiu mo Jentael long taem blong Pol. Yumi save kam wan long lav mo fet blong yumi long Jisas Kraes. Leta blong Pol we i go long Ol Man Rom we i stanemap ol prinsipol we yumi folem kalja mo doktrin blong gospel blong Jisas Kraes. I wan model blong yumi blong tedei.35 Ol odinens blong tempol oli karem yumi kam wan long wan spesel wei mo i letem yumi blong stap wan long impoten fasin we i no save finis.
Yu givim ona long ol paeonia memba blong yumi raon long wol, i no from se oli stret evriwan be from se oli winim ol hadtaem, oli mekem ol sakrifaes, oli wantem blong stap olsem Kraes, mo oli wokhad blong bildim fet mo stap wan wetem Sevya. Fasin we oli stap wan wetem Sevya i mekem olgeta oli wan wetem olgeta wanwan. Prinsipol ia i tru blong yu mo blong mi tedei.
Wan strong singaot i go long ol memba blong Jos Ia blong Jisas Kraes blong Ol Lata-dei Sent hem i blong oli wokhad blong stap wan Saeon pipol we oli gat wan hat mo wan maen mo stap laef long stret mo gud fasin.36
Hem i prea blong mi se bae yumi stap stret mo gud mo yunaet mo lukluk fulwan blong givim seves mo wosip long Sevya blong yumi Jisas Kraes, we mi stap testifae long hem. Long nem blong Jisas Kraes, amen.