Holemtaet Jenis Ia
Tru long Jisas Kraes, yumi kasem paoa blong mekem ol jenis we i save stap oltaem. Taem yumi putum tingting blong yumi i stap daon mo tanem yumi i go long Hem, Hem bae i mekem i paoa blong yumi blong jenis i kam antap moa.
Ol Sista, i wan bigfala glad blong stap wetem yufala.
Pikjarem long maen wan man we i stap go long maket blong pem wan samting. Sapos hem i pem stoa kipa moa mane bitim praes blong samting we hem i wantem pem, stoa kipa bae i givim jenis blong hem.
King Benjamin i tijim ol pipol blong hem long ol taem bifo long Amerika abaot ol bigfala blesing we yumi kasem tru long Sevya blong yumi, Jisas Kraes. Hem i krietem ol heven, wol mo evri naesfala samting we yumi stap glad long hem.1 Tru long Atonmen blong Hem we i gat bigfala lav, Hem i mekem wan wei blong yumi fri long sin mo ded.2 Taem yumi folemgud ol komanmen blong Hem, yumi stap soem fasin blong talem tangkyu long Hem, kwiktaem Hem i blesem yumi, mo putum yumi oltaem long kaon blong Hem.
Hem i givim yumi plante, plante moa samting bitim praes blong wanem we yumi save givim i gobak long Hem. So, ?wanem nao yumi save givim long Hem, Hem we i pemaot bigfala praes blong ol sin blong yumi? Yumi save givim long Hem jenis. Yumi save givim long Hem jenis blong yumi. Maet bae i wan jenis long tingting, wan jenis blong fasin, o wan jenis long daereksen long ples we yumi stap go from. Lod i askem nomo long yumi blong gat wan jenis long hat olsem peimen i gobak long hem from bigfala praes we Hem i bin pem from wanwan long yumi. Jenis we Hem i stap askem long yumi i no blong gud blong Hem be blong yumi nomo. Sevya i no olsem man we i pem samting long maket we bae i tekembak haf jenis blong hem we yumi givim. Hem we i fulap long sore mo gladhat i askem nomo long yumi blong holemtaet jenis.
Afta we oli harem ol toktok we King Benjamin i bin talem, oli pipol blong hem i bin singaot blong talemaot se hat blong olgeta i jenis mo talem “from Spirit blong Lod we I Gat Ol Paoa, i bin mekem wan bigfala jenis long mifala, … mifala i nomo wantem blong mekem nogud fasin, be blong gohed blong mekem gudfala fasin oltaem.”3 Ol skripja i no talem se kwiktaem oli kam stret evriwan; be from we hat blong olgeta we i wantem jenis, i fosem olgeta blong tekem aksen. Jenis blong hat blong olgeta i minim blong putumaot man o woman we i folem fasin blong wol mo lisingud long Spirit taem oli stap traehad blong kam moa olsem Jisas Kraes.
Presiden Henry B. Eyring i tijim se: “Tru Fasin blong jenis i dipen long fasin blong stap lukaotem fri wetem fet, wetem bigfala hadwok mo sam harem nogud. Afta, i Lod nao we i save givim … merikel blong wasemaot nogud fasin mo jenis. ”4 Blong stap putum tugeta hadwok blong yumi wetem paoa blong Sevya blong jenisim yumi, yumi kam olsem ol niu man.
Taem mi yangfala, mi pikjarem miwan we mi stap wokabaot i go antap, long stret rod i go from gol blong mi we i laef we i no save finis. Evri taem taem mi mekem o talem wan rong samting, mi filim olsem se mi stap glis i go daon long rod, mo afta mi mas statem wokbaot blong mi bakegen. I olsem se mi foldaon long wan skwea long pleiplei gem bod blong ol pikinini mo lada we i mekem yu glis i go daon, aot long top blong bod mo gobak long stat blong gem bakegen. !I stap mekem tingting i foldaon bigwan! Be taem mi kam blong andastanem doktrin blong Kraes5 mo olsem wanem mi save praktisim long evri dei laef blong mi, mi faenem hop.
Jisas Kraes i bin givim long yumi wan paten blong stap gogohed blong jenis. Hem i invaetem yumi blong eksasaesem fet long Hem, long wei we i givim insperesen long yumi blong sakem sin—“we fet mo fasin blong sakem sin i karem wan jenis blong hat.”6 Taem yumi sakem sin mo tanem hat blong yumi i go long Hem, yumi kasem wan moa strong tingting long hat blong mekem mo laef folem ol tabu kavenan. Yumi stanap strong kasem en taem yumi stap gohed blong praktisim ol prinsipol ia truaot long laef blong yumi mo stap invaetem Lod blong jenisim yumi. Blong stanap strong kasem en i minim blong stap jenis go kasem en. Naoia mi andastanem se mi no stap stat bakegen afta evri taem mi foldaon, be we, evri taem mi traem, mi stap gohed long rod blong mi blong jenis.
I gat wan sentens we i kam tru long insperesen long Stamba Toktok blong Ol Yang Woman we i talem se, “Mi lukaotem gud presen blong fasin blong sakem sin mo lukaotem blong kam moa gud evri dei.”7 Mi prea se bae yumi lukaotem gud naesfala presen ia se, yumi wantem blong jenis. Samtaem ol jenis we yumi nidim blong mekem i joen wetem series sin. Be plante taem, yumi traehad blong mekem gud fasin blong yumi i go stret wetem ol fasin olsem hemia blong Jisas Kraes. Ol evri dei joes blong yumi bae i helpem o stopem progres blong yumi. Smolsmol be wetem fasin blong no muvmuv, ol gudfala jenis bae oli helpem yumi blong kam antap moa gud. Yu no tingdaon long yuwan. Jenis i wan proses blong ful laef. Mi glad tumas se long ol traehad blong yumi blong jenis, Lod i gat fasin blong save wet longtaem wetem yumi.
Tru long Jisas Kraes, yumi kasem paoa blong mekem ol jenis we i save stap oltaem. Taem yumi putum tingting blong yumi i stap daon mo tanem yumi i go long Hem, Hem bae i mekem i paoa blong yumi blong jenis i kam antap moa.
Antap long paoa blong Atonmen blong Sevya blong jenisim man, Tabu Spirit bae i sapotem mo lidim yumi taem yumi stap traehad. Hem i save helpem yumi blong save wanem ol jenis we yumi nid blong mekem. Yumi save faenem help mo fasin blong leftemap tingting tu, tru long ol prishud blesing, prea, fasin blong livim kaekae, mo stap go long tempol.
Long semmak fasin, ol famli memba, ol lida, mo ol fren we yumi trastem oli save helpem yumi long hadwok blong yumi blong jenis. Taem mi gat 8 yia, bigfala brata blong mi, Li mo mi i stap spenem taem wetem ol fren blong mitufala blong stap pleplei long ol branj long tri blong wan neba. Mitufala i laekem blong stap tugeta wetem ol fren blong mitufala andanit long sed blong tri ia. Wan dei Li i foldaon aot long tri mo brekem han blong hem. Blong gat wan han we i brok i mekem i had blong klaem long tri hemwan. Be laef long tri ia i jes nomo semmak olsem taem hem i stap long tri. So, sam long mifala i holemtaet mo pusum hem biaen mo semtaem olgeta long fored, oli pulum gudfala han we i no brok, mifala i no hadwok tumas blong karem Li i kambak antap long tri. Han blong Li i brok i stap yet, be hem i stap wetem mifala bakegen blong stap glad long frensip blong mifala mo stap hil long semmak taem.
Oltaem mi stap tingting long eksperiens blong mi blong pleplei long tri olsem wan kaen aktiviti blong yumi long gospel blong Jisas Kraes. Long sed blong ol branj blong gospel, yumi stap glad long plante blesing we i kam wetem ol kavenan blong yumi. Sam, maet oli bin foldaon aot long sef ples blong ol kavenan blong olgeta mo oli nidim help blong klaem i kambak insaed long sekiuriti blong ol branj blong gospel. I save had long olgeta blong kambak olgetawan. ?Bae yumi save pulum smol long ples ia mo leftemap smol long we blong helpem olgeta oli hil long semtaem we oli stap glad long frensip blong yumi?
Sapos yu stap safa long wan kil we yu kasem from yu foldaon, plis letem ol narawan oli helpem yu blong kambak long ol kavenan blong yu mo ol blesing we i kam wetem olgeta. Sevya u save helpem yu blong yu hil mo jenis, taem olgeta we oli lavem yu oli stap raonem yu.
Wanwan taem mi stap mitim ol fren we mi nomo stap luk olgeta blong plante yia. Samtaem oli se, “!Yu no jenis nating!” Evri taem we mi harem hemia, bae mi sem smol, from mi hop se mi bin jenis ova long ol yia we i pas. !Mi hop se mi bin jenis stat yestedei finis! Mi hop se mi bin stap kaen moa, no stap jajem ol narawan tumas, mo gat moa sore. Mi hop se mi save ansa kwiktaem long ol nid blong ol narawan, mo mi hop se mi save gat fasin blong wet longtaem smol moa.
Mi laekem blong wokbaot long ol longfala rod long ol maonten kolosap long hom blong mi. Oltaem, wan smol ston bae i go insaed long sus blong mi taem mi stap wokbaot long rod blong maonten. Long en, bae mi mas stop blong seksekemaot ston long sus blong mi. Be mi stap sapraes long miwan we mi save letem miwan blong wokbaot longfala rod mo stap harem nogud bifo mi stop blong karemaot smol ston ia.
Taem yumi travel long rod blong kavenan, samtaem yumi pikimap ol ston insaed long ol sus blong yumi tru long ol wei olsem, ol nogud fasin we yumi stap ripriptim oltaem o ol sin. Taem yumi hariap blong seksekemaot olgeta long laef blong yumi, rod blong yumi long wol ia bae i gat moa glad.
Blong stap holemtaet jenis we yu mekem, i nidim hadwok. Mi no save pikjarem blong stap stop folem rod blong maonten blong stap putumbak ston ia nomo we i stap mekem mi harem nogud, i gobak long sus blong mi. Mi nomo wantem blong mekem hemia bakegen semmak olsem wan naesfala bataflae we i no wantem blong gobak long haos blong hem.
Mi testifae se from Jisas Kraes, yumi save jenis. Yumi save stretem ol evri dei fasin blong yumi, stretem ol tingting mo stretem fasin blong yumi blong kam moa olsem Hem. Mo wetem help blong Hem, yumi save holemtaet jenis ia. Long nem blong Jisas Kraes, amen.