Ol Haelaet blong Namba 190 Medel Yia Jeneral Konfrens

Long medel blong wan taem we yumi no save stret wanem bae i hapen, ol milian pipol oli bin faenem wan taem blong pis long taem blong jeneral konfrens we oli bin holem long 3 kasem 4 Oktoba 2020. Ol lida blong Jos oli bin poenem rod long yumi i go long Jisas Kraes wetem ol mesej blong yuniti, mo lav, hop mo hiling, mo pis long tabu stamba tingting.

Presiden Russel M. Nelson i bin tijim yumi olsem wanem blong kasem ol blesing blong kam wan pipol blong God.

“Taem yufala i stap jusum blong letem God i stap win insaed long laef blong yufala, bambae yufala i gat eksperiens, blong yufalawan, se God i ‘wan God blong ol merikel’ [Momon 9:11].” —Presiden Russell M. Nelson (luk long pej 92)

Plante spika oli bin toktok fasin blong yuwan i groap tru long fasin blong folem Jisas Kraes, trastem Hem, mo mekem tingting blong yumi i folem tingting blong Hem.

“Taem yumi putum tingting blong yumi i stap daon mo tanem yumi i go long [Jisas Kraes], Hem bae i mekem i paoa blong yumi blong jenis i kam antap moa .” —Becky Craven (luk long pej 58)

Bakegen, niu koronavaeres ia i bin tajem wanem we yumi bin luk mo harem long taem blong konfrens. Be, wetem moa eksperiens, lukluk i kam bigwan moa taem we ol spika oli bin lukluk nomo long hop, be tu, long fasin blong andastanem moa plan ia blong God from hapines blong yumi we i no save finis.

“Ol tes insaed long skul blong laef blong wol ia oli ol impoten pat blong progres blong yumi from taem ia we i no save finis. … Mi prea se, … yumi stap lanem ol impoten lesen we ol eksperiens we i gat jalenj nomo oli save tijim long yumi.” —Elda David A. Bednar (luk long pej 8)

Wetem plante fasin blong no spel long sosol laef we i tajem plante pat blong wol ia, ol lida oli tok agensem fasin blong lukluk kala blong skin mo vaelens. Oli bin singaotem yumi, olsem ol Ol Lata-dei Sent, blong kam wan long stret mo gud fasin, blong faenem yuniti taem evri samting i defren, mo blong help blong bildimap wan sosaeti we i gat gud fasin mo i gat lav.

“Yumi laef long wan taem we fasin blong stap seraot we i strong tumas. … “Yumi save stap olsem wan paoa blong leftemap mo blesem ful sosaeti.” —Elda Quentin L. Cook (luk long pej 18)

Taem yu gotru long konfrens ia tru long namba ia, mifala i hop se bae yu gat eksperiens bakegen long hop mo insperesen we yu bin filim long fas taem, mo tu, taem yu kasem ol niu tingting tru long stadi blong yu long ol manis we oli stap kam.