Mekem Stret mo Gud Fasin, Lavem Ol Man Tumas, mo Wokbaot wetem God wetem Tingting I Stap Daon
Blong mekem stret mo gud fasin, i minim blong mekem samting wetem ona. Yumi mekem samting wetem ona wetem God taem yumi wokbaot wetem Hem wetem tingting i stap daon. Yumi mekem samting wetem ona wetem ol narawan, taem yumi lavem man tumas.
Olsem ol man we yumi stap folem Jisas Kraes, mo olsem ol Lata-dei Sent, yumi traehad—mo oli leftemap tingting blong yumi mas traehad—blong mekem gud moa mo kam gud moa.1 Maet yu bin askem yuwan, olsem mi: “?Mi mi stap mekem inaf o no?” ?Wanem moa bae mi mekem? o “?Olsem wanem, mi we mi no stret gud, mi kwalifae blong ‘stap wetem God long wan ples blong hapi we i neva gat en’?”2
Profet Maeka blong OlTesteman i askem kwestin ia olsem ia: “?Hae God i God blong heven,mo sapos mi mi go blong mekem wosip long hem, bambae mi karem wanem samting blong mekem sakrifaes long hem?”3 Maeka i jikim hemwan, mo askem hemwan se bae wan bigfala ofring bae i inaf blong pem praes blong sin, mo i talem: “?No sapos mi givim plante taosen sipsip long hem, … sapos mi stap karem [ten taosen reva blong olif oel] oli kam long hem, … sapos mi kilim fasbon pikinini boe blong mi, … sakrifaes ya i save pemaot sin blong mi?”4
Ansa hem i, no. Ol gudfala wok, oli no inaf. Fasin blong sevem man, i wan samting we yu no save pem.5 Iven ol bigfala sakrifaes we Maeka i bin save se i no posibol, i save pemaot sin ia we i moa smol evriwan. Sapos yumi dipen long paoa blong yumi, tingting ia blong gobak laef long ples we God i stap long hem, i no gat hop from.6
Sapos i no gat ol blesing we oli kam long Papa long Heven mo Jisas Kraes, yumi neva save mekem inaf,o kam inaf, long paoa blong yumiwan. Gud nius i we, from Jisas Kraes mo tru long Hem, yumi save kam inaf.7 Evri pipol bae Hem i sevem olgeta long ded blong bodi tru long gladhat blong God, tru long ded mo laef bakegen blong Jisas Kraes.8 Mo sapos yumi tanem hat blong yumi i go long God,fasin blong sevem yumi long ded long spirit, i stap blong yumi evriwan “tru long Atonmen blong Jisas Kraes … mo tru long fasin blong obei long ol loa mo ol odinens blong Gospel.”9 Oli save pemaot yumi long sin blong yumi stanap klin mo klin evriwan long fes blong God. Olsem we Maeka i eksplenem: “Ol samting we i gud blong mekem,Hae God i talemaot finis long yumi.Hem … i wantem … yumi stap mekem ol fasin we i stret gud, mo … yumi lavem ol man, mo [yumi wokbaot wetem God wetem tingting i stap daon].”10
Daereksen blong Maeka blong tanem hat blong yumi long God, mo stap kwalifae from fasin blong sevem man,i gat trifala samting we oli joenjoenem olgeta. Blong mekem stret mo gud fasin, i minim blong mekem samting wetem ona wetem God mo ol nara pipol. Yumi mekem samting wetem ona wetem God taem yumi wokbaot wetem Hem wetem tingting i stap daon. Yumi mekem samting wetem ona wetem ol narawan, taem yumi lavem man tumas. Blong mekem stret mo gud fasin, i wan blong putum long praktis, nambawan mo nambatu hae komanmen, “blong lavem God ia [blong yu wetem ful hat, mo wetem ful sol, mo wetem ful tingting blong yu, mo yu mas lavem neba blong yu olsem yu lavem yuwan.”11
Blong mekem stret mo gud fasin, mo blong wokbaot wetem God, hem i blong minim blong karemaot han blong yumi long rabis fasin, wokbaot folem rul blong Hem, mo stap tru blong stap fetful.12 Wan stret man i tanem baksaed blong hem long sin mo i fesem God, i mekem ol kavenan wetem Hem, mo hem i kipim ol kavenan ia. Wan stret man i jusum blong obei ol komanmen blong God, i sakem sin taem hem i mestem rod, mo i gohed blong traem.
Taem we Kraes we i laef bakegen long ded i bin visitim Ol Man blong Nifae, Hem i bin eksplenem se loa blong Moses, wan loa we i hae moa i tekem ples blong hem. Hem i talem olgeta blong nomo “mekem ol sakrifaes mo ol ofring we [oli] stap bonem,” be blong givim “wan hat we i fulap wetem sore mo wan spirit we i wantem blong sakem sin.” Mo tu,Hem i bin promesem: “Mo huia we bae i kam long mi wetem wan hat we i fulap wetem sore mo wan spirit we i wantem blong sakem sin, hem, bae mi baptaesem wetem faea mo wetem Tabu Spirit.”13 Taem we yumi kasem, mo yusum presen we i Tabu Spirit afta long baptaes, yumi save stap glad long kampani blong Tabu Spirit oltaem, mo kasem tijing long evri samting we yumi sapos blong mekem,14 we i tekem tu blong wokbaot wetem God wetem tingting i stap daon.
Sakrifaes blong Jisas Kraes from sin mo fasin blong sevem man long ded long saed blong spirit, i stap long evriwan we oli gat wan hat ia we i fulap long sore mo wan spirit we i wantem sakem sin.15 Wan hat we i fulap long sore mo wan spirit we i sakem sin wetem glad, i pusum yumi blong sakem sin evri dei mo traem blong kam moa olsem Papa long Heven mo Jisas Kraes. Taem yumi mekem olsem, Hem i klinim, hilim mo mekem yumi kam strong moa wetem paoa. Yumi mekem samting i stret mo gud, be tu, yumi wokbaot wetem God wetem tingting i stap daon; yumi lanem tu blong lavem ol man tumas long wei ia we Papa long Heven mo Jisas Kraes i stap mekem.
God i stap glad long sore mo i no griri long fasin blong gat sore. Long toktok blong Maeka i go long Jehova: “Hae God. I no gat wan narafala God we i olsem yu. … yu sore bakegen long mifala, yu tekemaot sin blong mifala i gowe long mifala, … yu sakem i godaon olgeta long medel solwota.”16 Blong lavem man tumas olsem we God i mekem, i joen evriwan wetem fasin blong mekem stret mo gud fasin long ol narawan, mo no tritim nogud olgeta.
Hamas i impoten blong no tritim nogud ol narawan i kamaot bigwan long wan sot stori blong Hilel we I Olfala Man, wan man Jiu we i bin laef long fasfala senturi bifo Kraes i kam. Wan long ol studen blong Hilel i harem se Tora ia i had tumas—ol faef buk blong Moses wetem ol 613 komanmen blong hem wetem ol raeting blong ol rabae. Studen i givim jalenj long Hilel blong eksplenem Tora ia, be bae i mekem long taem we Hilel i save stanap long wan leg nomo. Hilel i no save balensem gud hem, be i akseptem jalenj. Hem i kwot long Levitikas, i talem se: “Mo sapos wan man i mekem i nogud long yufala, yufala i no mas mekem wan samting long hem blong givimbak fasin ya, mo yufala i no mas lukluk nogud long man olsem. Yufala i mas lavem ol man we oli stap raonabaot long yufala, mo yufala i mas mekem i gud long olgeta, olsem we yufala i stap mekem i gud long yufala nomo.”17 Hilel i endem kwik i se: “Samting we yu no laekem, yu no mekem long neba blong yu. Hemia nao ful Torah; haf we i stap i toktok nomo. Yu go mo yu stadi.”18
Blong oltaem mekem samting wetem ones fasin wetem ol narawan, i pat blong lavem man tumas. Tingting long wan storian we mi bin harem plante yia i pas long imejensi dipatmen blong Johns Hopkins Hospital long Baltimo, Merilan, long Yunaeted Stet. Wan sikman, Masta Jakson, i wan man we i gat gud fasin, i kaen mo oli save gud hem long hospital ia. Bifo finis oli putum hem long hospital blong tritim hem long ol sik from fasin blong dring strong dring. Long tetaem ia, Masta Jakson i gobak long hospital from sam saen blong sik we oli talem se hem i kasem soa long waet liva from strong dring we hem i stap dring.
Kolosap long en blong taem blong wok blong hem, Dokta Kohen, wan dokta we i wok had mo oli respektem hem, i jekem Masta Jakson mo talem se bae oli mas admitim hem. Dokta Kohen i givim wok long Dokta Jones, nekis dokta we bae i wok, blong i admitim Masta Jakson mo lukluk long tritmen blong hem.
Dokta Jones i bin go long wan bigfala medikol skul, mo i statem sam moa stadi blong hem afta digri blong hem. Strong trening, plante taem i go wetem fasin blong no slip tumas, we i mekem se Dokta Jones i no ansa gud. Nao, hem i fesem nambafaef sikman blong admitim long naet ia, mo hem i komplen laod long Dokta Kohen. Woman ia i filim se i no stret se bae hem i spendem plante aoa blong kea long Masta Jakson iven we sik blong hem, hemwan nomo i givimbak long hemwan.
Strong ansa blong Dokta Kohen i kamaot long wan kwaet voes nomo. Hem i talem: “Dokta Jones, yu yu kam wan dokta blong yu kea long ol pipol, mo wok blong hilim olgeta. Yu no kam wan dokta blong yu stap jajem olgeta. Sapos yu no andastanem tufala defren samting ia, yu no gat raet blong trenem yu long hospital ia.” Folem tok ia blong stretem hem, Dokta Jones i mekem gud blong kea long Masta Jackson long taem we hem i slip long hospital.
Masta Jakson i ded finis nao. Tugeta, Dokta Jones mo Dokta Kohen, tufala i bin gat ol top wok. Be long wan impoten taem long trening blong hem, Dokta Joes i nidim blong kasem wan tok blong hem i mas mekem i stret mo gud, i mas lavem man tumas mo i kea long Masta Jakson we hem i no mas jajem hem.19
Ova long ol yia, toktok ia i bin helpem mi bigwan. Lavem man tumas i minim se yumi no lavem nomo sore ia we God i givim long yumi; yumi glad tumas se God i givim semfala sore ia long ol narawan. Mo yumi folem eksampol blong Hem. “Evriwan i semmak long God,”20 mo yumi evriwan i nidim tritmen long saed blong spirit blong i helpem mo hilim yumi. Lod i bin talem: “Yufala i no mas tekem wan bodi blong mit mo bun i moa hae long narawan, o wan man i no mas tingting se hem i moa hae long narawan.”21
Jisas Kraes i soem eksampol blong mining blong mekem i stret mo gud, mo blong lavem man tumas. Hem i stap joen wetem ol man we oli mekem sin, i tritim olgeta wetem ona mo wetem respek. Hem i tijim glad ia blong stap kipim ol komanmen blong God mo blong lukaotem blong leftemap man be i no blong panisim olgeta we oli stap gat hadtaem blong traem kam gud. Long pablik, Hem i bin poenem fingga long olgeta we oli talem se Hem i rong blong givhan long ol pipol we oli ting se oli no klin inaf.22 Kaen fasin blong tinghae long yuwan, i bin mekem Hem i harem nogud mo i stap mekem Hem i harem nogud yet.23
Blong stap olsem Kraes, wan i mas mekem stret mo gud fasin, i mekem samting wetem ona wetem God, mo tu, ol nara pipol. Wan stret mo gud man i gat fasin long toktok mo aksen, mo i luksave se, taem man i luk laef o bilif i defren, hemia i no stopem man blong gat tru fasin blong stap kaen mo stap wan fren. Wanwan we i mekem i stret mo gud “i no gat wan tingting blong givim kil long wanwan long yufala, be blong stap long pis”24 wetem wanwan long yufala.
Blong stap olsem Kraes, wan i mas lavem man tumas. Ol pipol we oli lavem man tumas, oli no jajem man; oli soem lav mo sore long ol narawan, speseli olgeta we oli no gat tumas samting; oli gat gladhat, oli kaen, mo oli gat respek. Ol pipol ia oli tritim evriwan wetem lav mo andastaning, i nomata se oli olsem wanem, oli no lukluk long kala blong skin, se oli man o woman, wanem relijin, wanem tingting long saed blong seks, wanem ples oli gat long sosaeti, wanem traeb, klan o kantri oli kamaot long hem. Evri samting ia, lav olsem hemia blong Kraes i winim olgeta evriwan.
Blong stap olsem Kraes, wan i jusum God,25 i wokbaot wetem Hem wetem tingting i stap daon, i lukaot blong mekem gud Hem, mo i kipim ol kavenan wetem Hem. Ol pipol we oli wokbaot wetem God wetem tingting we i stap daon, oli tingbaot wanem we Papa long Heven mo Jisas Kraes i bin mekem blong olgeta.
?Mi mi mekem inaf o no? ?Wanem moa mi sapos blong mekem? Aksen we yumi tekem blong ansarem ol kwestin ia, i stamba blong hapines blong yumi long laef ia, mo long ol taem we i no save finis. Sevya i no wantem yumi blong tekem fasin blong sevem man, i samting nating. Iven afta we yumi mekem ol tabu kavenan, i gat janis blong yumi “save lusum gladhat mo aot long God we i stap laef.” Mekem se, yumi “mas lukaot gud mo mas prea oltaem” blong no stap foldaon long temtesen.”26
Be long semtaem, Papa blong yumi long Heven mo Jisas Kraes, Tufala i no wantem yumi blong tingting blong yumi i fasfas long wokbaot blong yumi long laef long wol ia, we yumi stap wokem askem yumiwan sapos yumi bin mekem inaf blong Hem i sevem yumi mo mekem yumi kam olsem wan god. Tufala i no wantem se yumi wari tumas wetem ol mistek we yumi bin sakem sin from finis, mo tingting se oli ol kil we bae oli neva save kam oraet,27 o Tufala i no wantem yumi wari tumas se bae yumi foldaon bakegen.
Yumi save makem progres blong yumi. Yumi save kam blong save se “rod blong laef we yumi stap wokbaot long hem, i folem tingting blong God”28 taem yumi mekem stret mo gud fasin, lavem ol man tumas, mo wokbaot wetem God blong yumi wetem tingting i stap daon. Yumi tekem sloslo ol fasin blong Papa long Heven mo Jisas Kraes insaed long fasin blong yumi, mo yumi lavlavem wanwan long yumi.
Taem yu stap mekem ol samting ia, bambae yu folem kavenan rod ia mo kwalifae blong “stap wetem God long wan ples blong hapi we i neva gat en.”29 Sol blong yu bae tekem sloslo glori ia blong God mo laet blong laef we i no gat en.30 Bae yu fulap long glad ia we bae yu no andastanem.31 Mi testifae se God i stap laef, mo se Jisas Hem I Kraes, Sevya mo Ridima blong yumi, mo wetem lav mo glad, Hem i givim sore blong Hem long evriwan. !Yufala i no laekem hemia! Long nem blong Jisas Kraes, amen.