Jeneral Hanbuk we I Stap long Dijitol Fael

Wok ia blong luklukbak long Jeneral Hanbuk: Stap Givim Seves Insaed long Jos Ia blong Jisas Kraes blong Lata-dei Sent i stap gohed, wetem translesen blong samfala pat we bae oli kamaot long 21 bigfala lanwis.

Niufala hanbuk ia, oli pablisim long dijitol fael nomo long Inglis long Febwari 2020, wetem sam moa rilis blong ol pat we oli jenisim long ol manis Maj mo Julae. Kasem naoia, i gat 16 aot long ol 38 japta blong buk ia we oli raetem bakegen, mo oli pablisim. Samfala japta i stap yet blong luklukbak long olgeta long ol manis we oli stap kam, wetem tu ol revisen blong daonem longfala blong hem, mo mekem fasin blong rid i simpol nomo.

Sot taem afta long Oktoba 2020 Jeneral Konfrens, japta 32, “Fasin blong Sakem Sin mo Ol Kaonsel blong Jos Membasip,” mo pat blong seksen 38.6, “Ol Polisi long Saed blong Ol Fasin blong Laef” ( we i sapotem japta 32), bae oli stat blong pablisim olgeta long 21 lanwis (antap long Inglis lanwis). I gat samfala japta we oli stap transletem olgeta, mo oli stap mekem olgeta oli rere blong oli pablisim long ol manis we oli stap kam, mo long en, ful buk ia bae i stap long 35 lanwis.

I nomata se hanbuk ia i stap long websaet blong Jos mo long Gospel Laebri ap nomo, buk ia, oli putum se ol fas pipol blong ridim, oli ol lida blong Jos. Hanbuk ia, we oli luklukbak long hem, i tekem ples blong Handbook 1 (blong ol stek presiden mo ol bisop) mo Handbook 2 (blong evri lida) mo i joenem tugeta evri infomesen blong hanbuk i kam long wan buk ia nomo.

Ol stamba pos blong niufala hanbuk ia, hem i, wok ia blong fasin blong sevem man mo mekem oli kam olsem wan god, we i tekem ol fofala eria blong stamba lukluk taem yumi stap kam long Kraes mo help long wok ia blong God:

1. Stap laef folem gospel blong Jisas Kraes

2. Stap kea long olgeta we oli stap long nid

3. Stap invaetem evriwan blong akseptem gospel

4. Joenem ol famli blong taem we i no save finis

Ol japta ia, oli raetem olgeta blong helpem ol lida raon long wol blong oli givim seves wetem kea we i olsem hemia blong Kraes taem we oli stap praktisim ol defren program, polisi, fasin blong wok blong Jos, mo taem i nid, blong oli stretem olgeta blong oli go stret wetem ol lokol situesen.

Taem oli pablisim hanbuk ia onlaen, i mekem se i save gat ol apdeit mo ol revisen taem we Jos i stap gro i kam antap, mo taem we oli stap stretem ol polisi. Ol prinsipol we i givim spes blong stretem mo jenisim smol i folem lokol situesen, we i stap long hanbuk ia, bae i helpem ol lida mo ol memba blong oli wok gud blong praktisim olgeta prinsipol ia mo ol program ia blong Jos insaed long ol kongregesen, i nomata wanem saes blong hem, mo truaot long wan komuniti blong Ol Sent we evriwan i defdefren, mo i wan wol komuniti.