Taem Yumi Wan long Filing Yumi Kasem Paoa Wetem God
Taem yumi joen long filing blong stap wan, bambae yumi singaotem paoa blong God i kam daon blong mekem ol hadwok blong yumi oli fulwan moa.
Mama blong Gordon i talem long hem se, sapos hem i finisim ol wok blong hem long haos, bae hem i mekem wan pae blong hem. Fevret kaen blong hem. Blong hemwan nomo. Gordon i go blong mekem ol wok blong hem long haos, mo mama blong hem i mekem pae. Bigfala sista blong hem, Kathy, i kam insaed long haos wetem wan fren. Hem i luk pae mo i askem sapos hem mo fren blong hem i save kakae wan pis.
“No”, Gordon i talem, “pae blong mi. Mama i mekem blong mi, mo mi wok from.”
Kathy i kros long smol brata blong hem. Gordon i luk hemwan nomo mo i no gat hat. ?Man, bae i kakae pae ia hemwan nomo?
Sam aoa afta, taem we Kathy i openem doa blong trak blong go putum fren blong hem i gohom, long jea i gat 2 napkin we oli foldem gud, mo 2 fok antap, mo 2 bigfala pis pae long plet. Kathy i talem stori ia long ded blong Gordon blong soem se brata blong hem i glad blong jenis mo soem kaen fasin long olgeta we i no nid blong kasem.
Long 1842, Ol Sent oli bin stap wokhad blong bildim Nauvu Tempol. Afta we oli stanemap Rilif Sosaeti long Maj, Profet Josef i bin kam long miting blong olgeta blong mekem olgeta oli rere from ol tabu kavenan we i joenem man, we bae oli mekem long tempol i no longtaem.
Long 9 Jun, Profet i “talem se bae hem i prij abaot sore[.] ?Weswe sapos Jisas Kraes mo ol enjel oli no wantem helpem yumi from sam smol samting nating nomo? ?Bae olsem wanem long yumi? Yumi mas gat sore mo lukluk i ova long ol smol samting.” Presiden Smit i gohed: “I mekem mi harem nogud se i no gat ful felosip—sapos wan memba i safa, evriwan i filim—taem yumi wan long filing, yumi kasem paoa wetem God.”1
Smol sentens ia i kilim mi olsem laetning. Taem yumi wan long filing, yumi kasem paoa wetem God. Wol ia i no wanem we mi wantem. I gat plante samting we mi wantem stiarem mo mekem i kam gud moa. Mo, blong talem stret, i gat plante agens long wanem mi stap hop from, mo samtaem, mi filim se mi no gat paoa. Mi bin stap askem miwan ol kaen kwestin ia: ?Hao nao bae mi andastanem gud moa ol pipol raon long mi? ?Olsem wanem bae mi krietem “yuniti long filing” ia taem yumi evriwan i defdefren? ?Wanem paoa we i kam long God nao mi save yusum sapos mi mi stap wan smol moa wetem ol narawan? Taem mi bin stap luklukgud insaed long sol blong mi, mi kasem trifala tingting. Maet bae i save helpem yu tu.
Gat Sore
Jekob 2:17 i rid i go olsem: “Tingting long ol [brata mo sista] blong yufala olsem yufala nomo, mo mekem fren wetem olgeta evriwan mo serem plante long evri samting blong yufala, blong mekem se oli save kam rij olsem yufala.” Bae yumi riplesem toktok ia, samting wetem sore—serem plante long evri sore blong yufala blong mekem se oli save kam rij olsem yufala.”
Plante taem, yumi tingting se samting hem i kaekae o mane, be maet wanem we yumi nidim moa long givhan wok blong yumi, hem i sore.
Rilif Sosaeti presiden blong mi i jes talem: “Samting we mi promesem yufala, i we, bae mi kipim nem blong yufala i sef i stap. … Bae mi luk yu from huia yu, mo bes blong yu. … Bae mi neva talem eni samting abaot yu we i no kaen, we bae i no save leftemap yu. Mi askem yufala blong mekem sem samting blong mi, from se, blong talem stret, mi mi fraet blong mekem yu harem nogud.”
Josef Smit i talem long ol sista long dei ia long manis Jun long 1842.
“Taem ol man oli soemaot kaen fasin mo lav long mi, O hem i givim paoa long maen blong mi. …
“ … Moa yumi go kolosap long Papa long Heven, mo yumi glad blong lukluk long ol sol we oli stap go lus wetem lav mo sore—[yumi filim se yumi wantem] tekem olgeta long solda blong yumi, mo sakem ol sin blong olgeta biaen long bak blong yumi. [Toktok blong mi i blong] evri Sosaeti ia—sapos yu wantem blong God i gat sore long yu, gat sore long wanwan long ol narawan.”2
Hemia kaonsel we i go stret long Rilif Sosaeti nomo. Bae yumi no jajem wanwan long yumi, o letem toktok blong yumi i kakae man. Bae yumi kipim nem blong wanwan long yumi i stap sef, mo givim presen ia we i sore.3
Mekem Sip blong Yu I Swing
Long 1936, wan rowing tim we oli no save gud olgeta, blong Yunivesiti blong Wasington i travel i go long Jemani blong tekpat long Olimpik Gem. Hem i taem blong Bigfala Hadtaem blong Mane. Olgeta ia, oli ol boe we oli wok, we taon blong olgeta we oli gat maen mo wud, oli donetem smol mane blong oli save travel i go long Berlin. Long evri saed blong kompetisen, evri samting i agensem olgeta, be wan samting i hapen long taem blong resis. Long wol blong rowing, oli singaotem “swing.” Lisin long wanem i hapen, folem wanem i stap long buk ia, Ol Boe Insaed long Sip:
I gat wan samting i hapen samtaem we i had blong kasem, o i had blong eksplenem. Oli singaotem “swing.” I hapen nomo taem we evri rowing i muv semtaem evriwan, we i no gat wan aksen i kam biaen o i go fored.
Ol man we oli pul oli mas kontrolem fasin blong mekem samting olgetawan, mo semtaem, stap tru long paoa blong olgetawan. Oli no winim ol resis from evriwan i semsemmak. Ol gudfala kru, oli gat ol gud defren kwaliti—wan i lidim grup, wan blong holem wan samting i stap, wan blong faet long faet, wan blong mekem pis. I no gat wan man blong pul we i moa impoten long wan narawan, evriwan oli ol impoten rul long sip, be sapos oli pul gud tugeta, wanwan i mas stretem nid mo paoa blong hem i folem ol narawan—hem we han i sot, i pul i longwan moa, hem we han i longwan, i pul long sot ples nomo.
Ol samting we oli defren, oli save tanem olgeta i blong gud, be i no blong nogud. Long tetaem ia nomo, bae oli filim se bot ia i stap muv hemwan nomo. Long tetaem ia nomo, harem nogud long bodi i go lus. Wan gud “swing” i mekem wan i filim se i stap flae.4
Oli fesem ol bigfala hil, be tim ia i faenem stret swing mo i win. Olimpik Gol medol ia, i gud we i gud, be yuniti blong wanwan we i pul we oli filim long dei ia, i bin wan tabu taem we i stap wetem olgeta ful laef blong olgeta.
Tekemaot Ol Nogudwan long Semfala Spid we Ol Gudfalawan Oli Stap Gro
Long bigfala parabol long Jekob 5, Lod blong plantesen i bin planem wan gudfala tri long gudfala graon, be i kam roten wetem taem, mo i stap tekem ol wael frut. Lod blong plantesen i talem eit taem: “Mi harem nogud se bae mi lusum tri ia.”
Wokman i talem long Lod blong plantesen se: “Livim hem i stap smol taem moa. Mo Lod i talem: Yes, bae mi livim i stap smol taem moa.”5
Mo afta, instraksen ia i kam, we yumi evriwan i save yusum, blong digdigim graon raon long hem, mo faenem sam gud frut long smol yad blong yumiwan: “bae yufala i tekemaot ol nogudwan long semfala spid we ol gudfalawan oli stap gro.”6
Yuniti, i no hapen olsem majik; yumi wokhad from. Hem i save go olbaot, samtaem i mekem yumi harem i soa, i hapen sloslo taem yumi tekemaot ol nogudwan long semfala spid we ol gudfalawan oli stap gro.
Yumi neva stap yumiwan long ol hadwok blong yumi blong mekem yuniti i stap. Jekob 5 i gohed: “ol wokman oli bin go mo wok wetem paoa blong olgeta; mo Lod blong plantesen i bin wok tu wetem olgeta.”7
Wanwan long yumi bae i kasem ol eksperiens we i mekem bigfala soa, ol samting we oli sapos blong neva hapen. Wanwan long yumi tu, long sam taem, i letem hae tingting mo ol flas tingting oli spolem frut ia we yumi tekem. Be Jisas Kraes i Sevya blong yumi long saed blong evri samting. Paoa blong Hem i go kasem man mo ples we i stap daon we daon evriwan, mo i stap evri taem blong helpem yumi taem yumi stap singaotem Hem. Yumi evriwan i pusum han mo krae from sore from ol sin blong yumi mo ol samting we yumi no stap mekem. Hem i givim hemia i fri. Mo Hem i askem yumi sapos yumi save givim semfala sore ia mo andastaning long wanwan long yumi.
Jisas i putum stret: “Stap wan; sapos yufala i no stap wan, yufala i no blong mi.”8 Be sapos yumi wan—sapos yumi save serem pis pae blong yumi, o stretem wanwan talen blong yumi blong mekem se sip i swing long semfala taem—nao yumi blong Hem. Mo bambae Hem i helpem yumi blong tekemaot nogudwan long semfala spid we gudwan i stap gro.
Ol Promes blong Profet
Maet yumi no stap yet long ples we yumi wantem stap long hem, mo yumi no stap naoia long ples we bambae yumi stap long hem afta. Mi biliv se, jenis ia we yumi lukaotem insaed long yumiwan, mo long ol grup we yumi pat long olgeta, bae oli kam sapos yumi no tokbaot samting tumas, be bae i kam moa sapos yumi muv blong traem evri dei blong andastanem wanwan long yumi. ?From wanem? From se yumi stap bildimap Saeon—wan pipol “we i gat wan hat mo wan maen.”9
Olsem ol kavenan woman, paoa blong yumi i kasem bigfala ples. Paoa ia, yumi yusum long evri taem evri dei, taem yumi stap stadi wetem wan fren, stap mekem pikinini i go slip, toktok long wan we i sidaon kolosap long bas, taem yumi stap rere wan presentesen wetem wok fren. Yumi gat paoa blong karemaot fasin blong no mekem i stret long man mo bildimap yuniti.
Rilif Sosaeti mo Ol Yang Woman, oli no jes ol klas. Oli ol taem blong eksperiens we wan i no save fogetem, taem we evri defren woman oli jiam long semfala sip ia mo oli pul kasem taem oli faenem swing blong olgeta. Mi givim invitesen ia: blong yumi pat blong wan semfala paoa o fos we bae i jenisim wol blong kam gud. Wok blong yumi tru long kavenan, i blong givhan, blong leftemap han we i hang daon, blong karem ol pipol wetem trabol long baksaed blong yumi, o tekem olgeta long han blong yumi. I no hadwok blong save wanem blong mekem, be plante taem, i no folem selfis intres blong yumi, mo yumi mas traem. Ol woman insaed long Jos ia oli gat wan paoa we i no gat limit blong jenisim sosaeti. Mi gat ful tras long saed blong spirit, se, taem yumi joen long filing blong yumi, bambae yumi singaotem paoa blong God i kam daon blong mekem ol hadwok blong yumi oli fulwan moa.
Taem we Jos i makem revelesen blong 1978 long saed blong prishud, Presiden Russell M. Nelson i givim wan strong blesing blong profet: “Hem i prea mo blesing blong mi we mi givim long yufala evriwan we i stap lisin, se bae yumi winim eni trabol blong no mekem stret long man, mo blong yumi wokbaot stret wetem God—mo wetem wanwan long yumi—long wan pis mo fasin we i stret gud.10
Bae yumi yusum blesing blong profet ia, mo yusum hadwok blong yumi wanwan mo evriwan we i joen tugeta, blong mekem se i gat moa yuniti long wol ia. Mi livim testemoni blong mi wetem ol toktok blong prea blong Masta Jisas Kraes, wetem tingting i stap daon: “Mi mi prea, blong olgeta evriwan oli save stap wan nomo. Papa, Laef blong yu i joen gud long laef blong mi, mo laef blong mi i joen gud long laef blong yu.”11 Long nem blong Jisas Kraes, amen.