Paoa blong Stanap Strong Kasem En
Fet mo tok blong God nomo i inaf blong save fulumap mo sapotem sol blong yumi—mo save letem yumi blong kasem paoa blong Hem.
Taem mi stap luklukbak long ol tijing blong dia profet blong yumi, Presiden Russell M. Nelson, mi faenem wan toktok we oltaem hem i stap yusum long plante toktok blong hem. Toktok ia i paoa.
Long fas jeneral konfrens, afta we oli bin singaotem hem olsem wan Aposol, Presiden Nelson i bin tokbaot paoa.1 Hem i gohed blong stap tij abaot paoa long ol yia we oli bin kam. Stat long taem we yumi sastenem Presiden Nelson olsem profet blong yumi, hem i bin tij abaot prinsipol blong paoa—speseli paoa blong God—mo olsem wanem yumi save kasem. Hem i bin tijim olsem wanem yumi save yusum paoa blong God taem yumi stap tijim ol narawan,2 olsem wanem fasin blong sakem sin i invaetem paoa blong Jisas Kraes mo Atonmen blong Hem insaed long laef blong yumi,3 mo olsem wanem prishud—paoa ia mo atoriti blong God—i save blesem olgeta we oli mekem mo kipim ol kavenan wetem Hem.4 Presiden Nelson i bin testifae se paoa blong God bae i gohed blong kasem olgeta we oli endao insaed long tempol, taem oli kipim ol kavenan blong olgeta.5
Miwan, mi bin filim paoa tru long wan jalenj we Presiden Nelson i givim long Epril 2020 jeneral konfrens. Hem i talem long yumi blong “stadi mo prea blong lanem moa abaot paoa mo save we Lod i kavremap yu long hem long tempol—o paoa ia we bambae Lod i kavremap yu yet wetem.”6
Blong mekem jalenj ia, mi bin stadi mo prea mo bin lanem sam gudfala samting abaot paoa mo save ia we Lod i bin kavremap mi wetem—o hemia we bae mi kasem yet.
Blong andastanem wanem yumi mas mekem blong kasem paoa blong God long laef blong yumi i no isi, be mi bin faenem se yumi save mekem taem yumi stadi gud long hem insaed long maen blong yumi mo prea from Tabu Spirit blong i mekem yumi andastanem.7 Elda Richard G. Scott i bin givim wan klia mining blong wanem i paoa blong God: hem i “paoa ia we i save mekem moa samting bitim wanem we yumi save mekem yumiwan.”8
Blong stap fulumap hat mo iven sol blong yumi wetem tok blong God mo putum fandesen blong fet blong yumi long Jisas Kraes i impoten tumas blong yusum paoa blong God blong helpem yumi long ol taem ia blong ol jalenj. Blong no stap tekem tok blong God mo fet long Jisas Kraes dip insaed long hat blong yumi, ol testemoni mo fet blong yumi i save lus, mo bae yumi save lusum janis ia blong kasem paoa we God i wantem blong givim long yumi. Blong biliv nomo, i no inaf. Fet mo tok blong God nomo i inaf blong save fulumap mo sapotem sol blong yumi—mo save letem yumi blong kasem paoa blong Hem.
Taem we mi mo sista Jonson i stap tijim ol pikinini blong mitufala, mitufala i leftemap tingting blong olgeta blong lanem blong plei long wan miusik tul. Be bae mitufala i letem olgeta blong tekem ol miusik lesen nomo, sapos oli mekem pat blong olgeta mo praktisim tul blong miusik ia evri dei. Long wan Satedei, gel blong mitufala, Jalynn i glad tumas blong go plei wetem ol fren, be hem i no bin praktis yet long piano. From we hem i save se hem i mas praktis blong 30 minit, hem i wantem blong taemem hem from hem i no wantem blong praktis i go ova long wan minit blong 30 minit ia.
Taem hem i wokabaot pas bitim maekrowev blong go long ples blong piano, hem i stop mo prestem sam baten. Be hem i mestem blong setemap taem nomo, mo i setemap taem blong maekrowev i kuk blong 30 minit mo prestem stat baten. Afta 20 minit blong praktis i pas, hem wokbaot i gobak long kijin blong jekem hamas minit i stap yet mo luk faea i stap bonem maekrowev.
Hem i ron i go biaen long haos long ples we mi stap mekem sam wok blong yad, mo stap singaot se faea i bonem haos. Kwiktaem mi ron i go insaed long haos mo yes, mi luk faea long maekrowev.
Mi traem blong stopem faea blong no bonem haos, mo mi pusum han i go biaen long maekrowev, pulumaot rop long paoa mo yusum rop blong maekrowev ia blong leftemap maekrowev ia we faea i stap bonem aot long tebol. From se mi wantem stap olsem hiro blong sevem dei ia mo tu hom blong mifala, mi holem rop blong maekrowev we i stap bon long faea ia mo swing swingim i go raonraon blong stap longwe long bodi blong mi. Mi go biaen long yad mo bakegen, mi swingim maekrowev mo sakem i go aotsaed long gras blong yad. Long ples ia mifala i bin save wasemaot faea wetem wota long wan kaoju.
?Wanem nao i bin go rong? Wan maekrowev i nidim wan samting blong kakae paoa blong hem, mo taem i nogat wan samting insaed blong kakae paoa ia, bae i kam hot mo faea i save kasem, mo bae i spolem gud hemwan long wan hip blong faea mo asis.9 Ful maekrowev blong mifala i bon long faea from se i nogat wan samting insaed long hem.
Long semmak fasin, olgeta we oli gat fet mo tok blong God dip insaed long hat blong olgeta, bae oli save tekem mo winim ol spia blong devel we i gat faea long hem, we enemi bae i wantem sakem blong prapa spolem yumi.10 Sapos no, bae fet, hop mo bilif blong yumi bae i no save stap strong, mo olsem emti maekrowev ia, yumi save kasem kil.
Mi bin lanem se blong gat tok blong God dip insaed long sol blong mi, tugeta wetem fet long Lod Jisas Kraes mo Atonmen blong Hem, i letem mi blong yusum paoa blong God blong winim enemi mo eni samting we hem i save sakem long mi. Taem yumi fesem ol jalenj, yumi save dipen long promes blong Lod we Pol i bin tijim: “Spirit ya we God i givim long yumi, hem i no blong mekem yumi fraet … Spirit ya i blong mekem yumi gat paoa, … lavem ol man, … mekem yumi naf blong blokem ol samting we yumi nomo i wantem.”11
Yumi save taem Sevya i stap olsem wan pikinini “Nao pikinini ya i gruap, i kam bigwan, mo hem i kam waes we i waes. Mo oltaem God i stap mekem i gud tumas long hem.”12 Yumi save se taem Hem i kam moa bigwan, “Jisas i … groap moa long bodi, … [mo] waes. Mo oltaem God i glad tumas long hem, mo ol man tu oli glad tumas long hem.”13 Mo yumi save se long taem we ministri blong Hem i stat, olgeta we oli harem Hem “oli sapraes long hem, from we tok blong hem i gat paoa.”14
Tru long fasin blong stap rere, Sevya i gro long paoa mo i bin save stap longwe long ol temtesen blong Setan.15 Taem yumi folem eksampol blong Sevya mo rere tru long fasin blong stap stadi tok blong God mo mekem fet blong yumi i kam moa dip, yumi tu, i save yusum paoa blong God blong stap longwe long ol temtesen.
Long taem ia we i loa i blokem ol kam tugeta we i mekem i no posibol blong go long tempol evri dei, mi bin mekem wan poen blong gohed blong stadi mo lanem moa abaot paoa blong God we i kam long yumi, taem yumi mekem mo kipim ol kavenan blong tempol. Olsem promes long dedikesen prea blong blong Ketlan Tempol, yumi lego tempol mo holem tul blong faet we i paoa blong God.16 I nogat wan ekspae deit we i kam wetem paoa blong God, we Hem i givim long olgeta we oli mekem mo kipim ol kavenan o, wan rul we i blokem olgeta blong no save kasem paoa ia long taem blong wan wol sik. Paoa blong Hem bae i lus long laef blong yumi sapos nomo yumi no stap kipim ol kavenan blong yumi mo no stap laef long wan wei we yumi save kwalifae blong gohed blong kasem paoa blong Hem.
Taem we waef blong mi mo mi i stap givim seves olsem misin lida long Taelan, Laos, mo Yanmar, mitufala i witnesem stret paoa blong God we i kam long olgeta we oli mekem mo kipim ol tabu kavenan insaed long tempol. Tempol Petron Help Fan i bin mekem i posibol blong plante Sent long ol trifala kantri ia blong go long tempol afta long plante samting nomo we oli bin save mekem tru long sakrifaes blong olgetawan mo fasin blong stap rere blong go. Mi tingbaot taem mi mitim wan grup blong 20 fetful Sen long Laos long eapot long Bangkok, Taelan, blong helpem olgeta blong transfea i go long wan nara eapot long Bangkok blong kasem flaet blong olgeta blong go long Hong Kong. Ol memba ia oli fulap long glad from naoia nao, bae oli save stap travel i go long haos blong Lod.
Taem mitufala i mitim ol Sent ia taem oli kambak long tempol, yu save luksave we save blong olgeta long gospel i kam moa bigwan, joenem wetem paoa we oli kasem olsem risal blong tempol endaomen blong olgeta mo ol kavenan we oli mekem wetem Lod. I klia se ol Sent ia oli go fored aot long “we oli fulap long paoa blong [Hem].”17 Paoa ia blong mekem moa samting bitim wanem we olgetawan oli save mekem, i givim long olgeta paoa blong oli go tru long ol jalenj blong olgeta olsem ol memba blong Jos long hom kantri blong olgeta mo go fored blong stap talemaot “ol gud nius we oli bigwan tumas, long tru fasin,”18 taem oli gohed blong stap bildimap kingdom blong Lod long Laos.
Long taem ia we yumi no save go long tempol, ?wan wan long yumi i stap dipen long ol kavenan we yumi bin mekem long tempol, blong setemap wan rod we i klia mo no save stap jenis long laef blong yumi? Olgeta kavenan ia, sapos yumi stap kipim, i givim yumi visen mo mekem yumi save wanem i stap kam long fiuja, mo wan klia mo strong tingting blong save kwalifae blong kasem evri samting we Lod i bin promesem blong givim sapos yumi stap fetful.
Mi invaetem yufala blong lukaotem paoa we God i wantem blong givim long yu. Mi testifae se sapos yumi lukaotem paoa ia, bae yumi kasem blesing blong gat wan bigfala save moa long lav we Papa long Heven i gat long yumi.
Mi testifae se, from we Papa long Heven i lavem yu mo mi, Hem i bin sendem pikinini Boe blong Hem, Jisas Kraes, blong kam Sevya mo Ridima blong yumi. Mi testifae abaot Jisas Kraes, Hem we i gat olgeta paoa,19 mo talem olsem long nem blong Jisas Kraes, amen.