Wan Niu Nomol
Mi stap invaetem yufala blong tanem hat, maen, mo sol blong yufala i go long Papa blong yumi long Heven mo long Pikinini blong Hem, Jisas Kraes.
Ol dia brata mo sista. !Tufala dei blong jeneral konfrens ia oli ol dei blong glori! Mi agri wetem Elda Jeffrey R. Holland. Olsem we hem i bin talem, ol mesej, ol prea, mo miusik oli kam tru long insperesen we i kam long Lod. Mi mi glad tumas long evriwan we oli bin tekpat long wan wei.
Truaot long ol miting ia, mi bin gat pikja blong yufala insaed long maen blong mi we yufala i stap lisin long konfrens ia. Mi bin askem Lod blong helpem mi blong andastanem wanem yufala i stap filim, stap wari long hem, o traem stretem. Mi bin askem miwan wanem bae mi save talem blong endem konfrens ia we bae i sendemaot yufala i go wetem hop abaot fiuja ia we mi mi save se Lod i wantem yu yu filim.
Yumi stap laef long wan taem blong glori, we ol profet bifo oli bin stap luk blong plante handred yia. Hemia i dispensesen ia we i no gat wan blesing long saed blong spirit we bae Lod i holemtaet mo no givim long olgeta we oli stret mo gud.1 Nomata se wol ia i muvmuv,2 Lod bae i wantem yumi “luk fored i go long fiuja wetem wan glad i wet insaed long hat.”3 Bae yumi no stap spinim wil blong yumi wetem ol memori blong yestedei. Kam tugeta blong Isrel i stap muv fored i go. Lod Jisas Kraes i daerektem ol afea blong Jos blong Hem, mo bae i kasem ol tabu stamba wok blong Hem.
Jalenj blong yu mo mi, i blong meksua se wanwan long yumi bae i kasem ful tabu paoa blong hem. Tedei, yumi stap harem plante abaot wan “niu nomol laef.” Sapos yu rili wantem akseptem wan niu nomol, mi stap invaetem yu blong tanem hat, maen, mo sol blong yu i go long Papa blong yumi long Heven mo long Pikinini blong Hem, Jisas Kraes. Letem hemia nao i niu nomol blong yu.
Akseptem niu nomol blong yu taem yu sakem sin evri dei. Lukaotem blong kam antap oltaem blong stap klin gud long tingting, toktok, mo wok blong yu. Givhan long ol narafala man. Oltaem gat wan lukluk i go long taem we i no save finis. Wok strong long ol koling blong yu. Mo nomata wanem jalenj i kam, ol dia brata mo sista, laef evri dei long wei blong yu rere gud blong mitim Meka blong yu.4
Hemia nao from wanem yumi gat ol tempol. Ol odinens mo ol kavenan blong Lod oli mekem yumi rere from laef we i no save finis, we i blesing ia we i moa bigwan long evriwan long ol blesing.5 Olsem we yufala i save, KOVID wol sik i mekem se i nid blong klosem ol tempol blong yumi blong sot taem. Afta, yumi statem, wetem kea, blong openem ol tempol, step folem step. Wetem Step 2 naoia we i stap long plante tempol, ol taosen kapol oli bin sil, mo ol taosen oli kasem endaomen blong olgeta jes long ol las manis we oli pas. Yumi luk fored from dei ia taem we evri memba blong Jos we oli klin inaf oli save givim seves long ol bubu blong olgeta mo wosip long wan tabu tempol.
Naoia, mi glad tumas blong anaonsem ol plan blong bildim sikis niu tempol, mo bae oli bildim long ol ples ia: Tarawa, Kiribas; Port Vila, Vanuatu; Lindon, Yuta, Hae Gwatemala Siti, Gwatemala; Sao Paolo Is, Brasil; mo Santa Krus, Bolivia.
Traem yumi stap bildim mo mentenem ol tempol ia, mifala i prea se wanwan long yufala bae i bildimap mo mentenem yufalawan blong yufala i save klin inaf blong go insaed long tabu tempol.
Naoia, ol dia brata mo sista. Mi blesem yufala blong yufala i fulap wetem pis blong Lod Jisas Kraes. Pis blong Hem i bitim evri save blong ol man long wol ia.6 Mi blesem yufala se bae yufala i gat moa filing long hat blong paoa blong stap obei long ol loa blong God. Mi promesem yufala se taem yufala i stap mekem olsem, bambae yufala i swim long ol blesing, wetem moa bigfala paoa long tingting, moa revelesen blong yuwan, mo swit pis insaed long hom blong yufala, mo glad, iven long medel blong taem ia we i no klia.
Bae yumi go fored blong mekem tabu wok we Hem i givim long yumi—we i blong mekem yumiwan i rere, mo mekem wol i rere from Seken Kaming blong Lod. Mi prea olsem, mo talemaot lav blong mi long yufala, long tabu nem blong Jisas Kraes, amen.