Akseptem Fiuja Wetem Fet
Fiuja bae i gat glori blong olgeta we oli rere mo oli gohed blong rere blong stap olsem ol tul insaed long han blong Lod.
Hemia i wan naet we bae yumi no save fogetem. Ol dia sista blong mi. Mi gat ona blong stap wetem yufala. Yufala i bin stap long maen blong mi plante taem long ol las manis ia we oli pas. Yufala i moa bitim eit milian strong woman. Yufala i gat bigfala namba be tu, paoa long saed blong spirit blong jenisim wol ia. Mi stap lukluk yufala i stap mekem hemia nao long taem blong wol sik ia.
Sam long yufala, yufala i stap lukaotem ol smol samting we i stap, o stap lukaotem wan niu wok. Plante oli tijim ol pikinini mo lukaot gud long ol neba. Sam oli welkamem ol misinari long hom eli nomo, mo sam moa oli tanem hom i kam ol misinari trening senta. Yufala i bin yusum teknoloji blong joen wetem ol famli mo ol fren, givhan long olgeta we oli filim se oli stap olgetawan, mo stadi long Kam Folem Mi wetem ol narawan. Yufala i faenem ol niu wei blong mekem Sabat i wan glad. Mo yufala i bin mekem ol mask blong protektem man—!plante milian mask!
Wetem lav mo sore we mi gat long hat, hat blong mi i sore long plante woman raon long wol we oli lusum wan we oli lavem. Mifala i krae wetem yufala. Mifala i prea from yufala. Mifala i presem mo prea from evriwan we oli wok we oli wok blong mekem helt blong ol narawan i stap sef.
Yufala, ol yang woman, yufala i bin gud tumas. Nomata we sosol media i fulap wetem ol raorao, plante long yufala i faenem ol wei blong leftemap tingting blong ol narawan mo serem laet ia blong Sevya.
Ol sista. !Yufala i ol hiro! Mi sapraes tumas long paoa mo fet blong yufala. Yufala i bi soem fet long ol had situesen ia, yufala i leftemap hed mo gohed. Mi lavem yufala mo mekem tingting blong yufala i kwaet se Lod i lavem yufala mo i stap luk bigfala wok we yufala i stap mekem. Tangkyu! Bakegen, !yufala i pruvum se yufala nao i stret hop blong Isrel!
Yufala i tekem gud ol hop we Presiden Gordon B. Hinckley i bin gat long yufala taem hem i bin presentem “Famli: Wan Ofisol Toktok I Go long Wol,” hemia 25 yia i pas long Septemba 1995 jeneral Rilif Sosaeti miting.1 Hem i impoten tumas se hem i bin jusum blong presentem impoten ofisol toktok ia long ol sista blong Jos. Taem hem i bin mekem olsem, Presiden Hinckley i makem gud paoa ia, we oli no save riplesem, blong ol woman insaed long plan ia blong Lod.
Naoia, mi wantem save wanem yufala i bin lanem long yia ia. ?Yu yu bin groap we yu kam kolosap moa long Lod, o yu yu filim we yu stap go longwe moa long Hem? ?Ol samting we oli stap hapen naoia oli mekem yu yu filim olsem wanem abaot fiuja?
Mi mas admitim se Lod i tokbaot taem blong yumi wetem ol toktok we i series. Hem i givim woning se long taem blong yumi, “hat blong ol man i nomo strong”2 mo we iven olgeta we Hem i bin jusum olgeta bae oli stap long denja blong foldaon long trik.3 Hem i talem long Profet Josef Smit se “pis bae i kamaot long wol”4 mo ol bigfala trabol bae i foldaon long ol man.5
Yet, Lod i givim tu wan visen long hao nao dispensesen ia, bae i wan gudwan. Hem i givim insperesen long Profet Josef Smit blong taltalemaot se “wok blong ol las dei ia, i wan bigbigfala strong wok. … Ol glori blong hem, toktok i no save tokbaot, mo hamas i bigwan, i bitim evri samting.”6
Nao, !maet, bigwan, i no toktok we bae yu jusum blong tokbaot ol las manis we oli pas! ?Hao nao bae yumi mas dil wetem tugeta ia, ol dak profesi mo ol glori toktok we oli kamaot abaot taem blong yumi? Lod i bin talem long yumi, wetem stret kwaet toktok nomo: “Sapos yufala i rere, bae yufala i no fraet”7
!Hemia i wan gudfala promes! Hem i wan promes we i save jenisim stret wei we yumi save luk fiuja blong yumi. I no longtaem i pas, mi harem wan woman we i gat wan dip testemoni i admitim se, wol sik ia, wetem wan etkwek long Sol Lek Vale, i bin helpem hem blong luksave se hem i no bin rere olsem we hem i bin ting se hem i rere. Taem mi askem hem sapos hem i bin stap tokbaot storej blong kaekae o testemoni blong hem, hem i smael, mo talem: “!Yes!”
Sapos blong rere i ki blong yumi akseptem dispensesen ia mo fiuja blong yumi wetem fet, ?hao nao bae yumi rere long wan moa gud wei?
Blong plante yia, ol profet blong Lod oli bin askem strong long yumi blong hivimap kaekae, wota mo mane blong wan taem blong nid. Wol sik we i stap tedei, i kam sapotem strong bakegen se hemia i wan waes kaonsel. Mi askem strong long yufala blong tekem step blong rere from laef long wol ia. Be mi mi wari moa se yufala i rere long saed blong spirit mo filing o no.
Long saed ia, yumi save lanem plante aot long Kapten Moronae. Olsem komanda blong ol ami blong Ol Man blong Nifae, hem i bin fesem ol fos we oli agens we oli strong moa, oli plante moa, mo oli moa nogud. Mekem se, Moronae i mekem ol pipol blong hem oli rere long trifala stamba wei.
Faswan, hem i bin help blong mekem ol eria we bae oli sef—”ol sef ples” hem i singaotem olgeta.8 Nambatu, hem i bin “ mekem rere ol tingting blong ol man blong stap fetful long Lod.”9 Mo nambatri, hem i neva stop blong stap mekem ol pipol blong hem oli rere—long saed blong bodi mo spirit.10 Bae yumi lukluk long ol trifala prinsipol ia.
Prinsipol Nambawan: Mekem Ol Sef Ples.
Moronae i mekem evri siti blong Ol Man blong Nifae i gat ol reva wol, ol strong taon, mo ol strong wol.11 Taem we Ol Man blong Leman oli kam agensem olgeta, oli “sapraes tumas, from waes tingting blong Ol Man blong Nifae blong mekem rere ol sef ples blong olgeta.”12
Semmak, taem we trabol i stap go raon long yumi, yumi nid blong mekem ol ples we bae yumi stap sef, tugeta long bodi mo long spirit. Taem we hom blong yu i kam wan ples blong fet blong haed long hem—ples we Spirit i stap long hem—bae hom blong yu i fas laen blong difendem yumi.
Semmak, ol stek blong Saeon oli “wan ples blong haed long strong win,”13 from we olgeta we oli holem ol prishud ki oli lidim olgeta, mo oli yusum atoriti blong prishud. Taem we yu stap gohed blong folem kaonsel blong olgeta we Lod i bin givim raet long olgeta blong oli lidim yu, bae yu filim se yu stap sef moa.
Tempol—haos blong Lod—i wan ples blong sekiuriti we i no olsem ol nara ples. Long ples ia, yufala ol sista, oli kavremap yufala wetem prishud paoa tru long ol tabu prishud kavenan we yufala i bin mekem.14 Long ples ia, ol famli blong yufala oli sil tugeta blong taem we i no save finis. Iven long yia ia, taem we i bin had blong go long tempol, endaomen blong yufala i givim yufala rod blong yusum oltaem paoa blong God taem we yufala i gohed blong givim ona long ol kavenan blong yufala wetem Hem.
Blong talem simpol, wan sef ples i eni ples we yu filim se Tabu Spirit i stap long hem mo Hem i lidim yu taem yu stap long hem.15 Taem we Tabu Spirit i stap wetem yu, yu save tijim trutok, iven we i ron i blokem ol tingting blong agens. Mo yu save tingting hevi long ol tru kwestin abaot gospel long wan ples we yu kasem revelesen.
Mi invaetem yufala, ol dia sista blong mi, blong mekem wan hom we i wan sef ples. Mo mi mekem bakegen invitesen blong mi blong yufala i kam antap blong andastanem paoa blong prishud mo ol kavenan mo blesing blong tempol. Blong gat ol sef ples we yu save go haed long hem bae i helpem yu blong akseptem mo fesem fiuja wetem fet.
Prinsipol Nambatu: Mekem Maen blong Yu I Rere blong Yu Stap Fetful long God.
Mifala i statem wan bigfala projek blong seftem laef mo paoa blong Sol Lek Tempol.
sam oli kwestinim nid ia blong tekem ol bigfala sef step olsem. Be, taem we Sol Lek Vale i bin fesem wan etkwek blong 5.7 eli long yia ia, !tempol ia i seksek strong inaf mekem se pupu blong statiu blong enjel Moronae i bin foldaon!16
Semmak olsem we fandesen blong Sol Lek Tempol i mas strong inaf blong stanap agensem ol disasta, fandesen blong yumi long saed blong spirit i mas strong gud tu. Afta, taem ol nara kaen etkwek oli seksekem laef blong yumi, bae yumi save stanap “ strong mo no muvmuv” from fet blong yumi.17
Lod i tijim yumi olsem wanem blong lukaotem “blong lanem samting, tru long stadi, mo tu, tru long fet.”18 Yumi mekem fet blong yumi long Jisas Kraes i kam strong moa taem yumi stap traehad blong obei ol komanmen blong Hem, mo “oltaem tingbaot Hem.”19 Moa long hemia, fet blong yumi i kam antap evri taem we yumi stap praktisim fet blong yumi long Hem. Hemia nao wanem i minim blong stap lanem samting tru long fet.
Eksampol, evri taem we yumi gat fet blong stap obei long ol loa blong God—iven taem ol popula tingting oli daonem yumi—o evri taem we yumi stanap agensem ol entetenmen o ol tingting we oli stap selebretem fasin blong brekem kavenan, yumi stap praktisim fet blong yumi, we afta, i mekem fet blong yumi i kam antap moa.
Moa long hemia, sam samting nomo oli bildimap fet blong yumi moa bitim fasin blong draon long Buk blong Momon evri dei. I no gat wan nara buk we i stap testifae abaot Jisas Kraes wetem kaen paoa mo klia tok olsem. Ol profet insaed, olsem we Lod i givim insperesen long olgeta, i bin luk taem blong yumi mo oli bin jusum ol doktrin mo ol trutok we bae oli helpem yumi moa tedei. Buk blong Momon hem i lata-dei gaed blong meksua se bae yumi laef.
I tru, !bigfala sekiuriti blong yumi i kam taem yumi hangem yumi long Papa long Heven mo Jisas Kraes! Laef we i no gat God insaed long hem, i wan laef we i fulap wetem fraet. Laef we i gat God insaed long hem, i wan laef we i fulap wetem pis. Hemia i from ol blesing long saed blong spirit we i kam long olgeta we oli stap fetful. Blong kasem revelesen we i blong yuwan, i wan long ol hae blesing olgeta.
Lod i bin promesem se, sapos yumi askem, bae yumi kasem “revelesen i folem revelesen.”20 Mi promes se taem yufala i kam antap long paoa blong yufala blong kasem revelesen, Lod bae i blesem yufala wetem moa daereksen blong laef blong yufala, mo wetem plante presen we i kam long Spirit.
Prinsipol Nambatri: Neva Stop blong Stap Rere
Iven taem ol samting oli bin go gud Kapten Moronae i bin gohed blong mekem ol pipol blong hem oli rere i stap. Hem i neva stop. Hem i neva lego tingting blong hem i kam slak.
Enemi i neva stop blong kam agensem man. Mekem se !yumi neva save stop blong stap rere! Moa yumi kam indipenden—long laef ia, long saed blong filing mo spirit—moa yumi kam rere blong agensem ol atak blong Setan we i neva stop.
Ol dia sista. Yufala i gat spesel skil ia blong mekem ol ples oli sef blong yufalawan mo olgeta we yufala i lavem. Moa long hemia, yufala i gat wan tabu endaomen we i mekem se yufala i save bildimap fet long ol narawan long ol wei we i gat paoa blong winim tingting.21 Mo yufala i neva stop. Yufala i bin soem hemia bakegen long yia ia.
!Plis, yufala i gogohed! Strong wok blong yufala blong mekem hom blong yufala i sef, mo wok blong putum fet sloslo insaed long hat blong olgeta we yufala i lavem, bae i tekem frut blong hem long ol jeneresen we oli stap kam.
Ol dia sista blong mi. !Yumi gat plante samting blong luk fored from! Lod i putum yufala long ples we yufala i stap long hem naoia from se Hem i bin save se yufala i gat paoa ia blong lukluk long tumas samting we bae i hapen long las pat blong ol las dei ia. Hem i bin save se bae yufala i kasem hamas wok ia blong Hem i bigwan, mo bae yufala i wantem tumas blong help blong mekem hemia i hapen.
Mi no stap talem se ol dei we oli stap kam bae oli isi, be mi promesem yufala se fiuja bae i gat glori blong olgeta we oli rere mo oli gohed blong rere blong stap olsem ol tul insaed long han blong Lod.
Ol dia sista blong mi. Bae yumi no jes stap strong tru long hadtaem blong naoia. !Bae yumi akseptem mo fesem fiuja wetem fet! Ol taem blong trabol oli ol janis blong yumi traehad long saed blong spirit. I gat ol taem we paoa blong yumi blong lidim tingting i save wok strong moa bitim long ol kwaet taem.
Mi promesem se, taem yumi stap mekem ol sef ples, mekem maen blong yumi i rere blong stap fetful long God, mo neva stop blong rere, God bambae i blesem yumi. Bambae Hem i “tekemaot [yumi]; yes, inaf we i mekem se hem i toktok pis long sol blong [yumi], mo hem i givim long [yumi] bigfala fet, mo i mekem [yumi] … gat hop se tru long hem bae hem i sevem [yumi].”22
Taem yufala i stap rere blong akseptem mo fesem fiuja wetem fet, !ol promes ia bambae oli blong yufala! Mi testifae olsem, mo talemaot lav blong mi long wanwan long yufala, mo tras we mi gat long yufala, long tabu nem blong Jisas Kraes, amen.