Sistem blong Sendem Nem I Go long Misinari: Simpol, Hariap
Hem i simpol mo i isi bitim bifo blong ol memba oli save helpem fren blong olgeta blong oli mit wetem ol misinari, hemia from ol las apdeit long sistem blong ol memba oli sendem nem i go long ol misinari. Rod ia we oli mekem i kam gud moa, oli mekem blong i hariap blong konektem ol misinari mo ol memba we oli sendem nem, blong mekem se oli save plan blong gat wan eksperiens we bae i save helpem ol fren blong ol memba blong oli gat gud taem wetem ol lesen blong gospel we ol misinari oli presentem.
Hemia wei ia we program ia i wok:
-
Taem we fren blong yu, o wan we yu save hem i agri blong mit wetem ol misinari, bae yu fulumap wan fom nomo blong sendem nem tru long ap blong Member Tools o long websaet long ChurchofJesusChrist.org/referrals. Yu save lego kontak namba blong yu long ples ia wetem wan not i stap blong ol misinari.
-
Afta we oli sendem fom ia i go, wan sista misinari we i gat wok ia blong help wetem ol nem we ol memba oli sendem i kam, bae oli kontaktem yu. Bae hem i sendem nem ia i go long stret ples mo bae i helpem yu blong konek wetem ol lokol misinari.
-
Ol lokol misinari bae oli kasem kontak namba blong yu, wetem nem we yu bin givim. Hemia bae i mekem se bae yufala i save toktok raon long situesen we i stap, mo bae i nid blong fren blong yu i mit wetem ol misinari. Yu save toktok long olgeta abaot wei blong helpem fren blong yufala blong gat wan gudfala eksperiens. Mo tu, yu save gat joes ia blong save stap long taem blong ol misinari lesen, olsem we yu wantem.
“Oli tijim evri misinari se, evri nem we oli givim, o kasem long wan memba, oli mas tekem se i wan samting we i impoten tumas,” Elda Marcus B. Nash blong Olgeta Seventi i bin talem. “Taem we ol misinari oli kasem wan nem, oli tijim olgeta blong oli askem yu wanem wei nao i moa stret blong helpem fren blong yu. Taem we ol memba mo ol misinari oli wok tugeta, Lod bae i givim insperesen long olgeta blong krietem wan eksperiens we i gat mining blong save helpem ol fren blong yu blong oli kam kolosap moa long Jisas Kraes.”
Niufala tul ia we oli yusum onlaen, i stap naoia long 33 lanwis.