Elda Dean M. Davies
Jeneral Atoriti Seventi
Taem hem i bin aot long wok, i draev i gobak hom long 1989, Elda Dean M. Davies i fas long wan etkwek long San Fransisko, Kalifonia, YSA, we i seksekem nogud trak blong hem. Samtaem afta long hemia, taem hem i stap tingtingbak long damej we i bin hapen long eria ia, hem i tingbaot olsem wanem i impoten blong bildimap laef blong yumi antap long wan sua fandesen.
“I no gat wan long yumi we bae i bildim hom blong yumi, ples blong wok, o ol tabu haos blong wosip antap long sanbij, o graon we i no strong, o sapos hem i no gat wan plan mo ol tul blong bildim haos,” hem i talem. “Bae yumi akseptem invitesen blong Sevya blong go long Hem. Bae yumi bildimap laef blong yumi antap long wan fandesen we i sef mo i sua, o strong gud.”1
Elda Davies, we i bin givim seves insaed long Prisaeding Bisoprik stat long Epril 2012, oli bin sastenem hem i kam wan Jeneral Atoriti Seventi long namba 3 Oktoba 2020. Insaed long Prisaeding Bisoprik, Elda Davies i bin givim seves olsem Seken Kaonsela long Bisop Gary E. Stevenson kasem taem we oli bin sastenem Bisop Stevenson olsem wan memba blong Kworom blong Olgeta Twelef Aposol long namba 3 Oktoba 2015. Afta long hemia, oli bin sastenem Elda Davies olsem Fas Kaonsela long Bisop Gérald Caussé, we i bin tekem ples blong Elda Stevenson olsem niufala Prisaeding Bisop.
Dean Myron Davies i bon long Sol Lek Siti, Yuta, YSA, long 1951. Afta we hem i wok olsem wan fultaem misinari long Yurugwe/Paragwe Misin, hem i bin maredem Darla James long 1973 long Sol Lek Tempol. Tufala i gat 5 pikinini mo 17 apupikinini.
Long Julae 1995, hem i stat wok blong Jos, mo hem i bin stap olsem manejing daerekta blong Dipatmen blong Ol Spesel Projek, wetem responsabiliti blong lukaotem ol graon, ol tempol disaen, mo wok blong bildim ol tempol. Bifo hem i wok blong Jos, Elda Davies i bin wok blong High Industries Inc, blong Lankasta, Pensilvania, YSA, mo blong Bechtel Investments Inc, blong San Fransisko. Hem i kasem wan digri long agrikalja ekonomi long Brigham Yang Yunivesiti, mo i finisim sam hae strong program long Stanfod mo NotWes Yunivesiti.
Bisop Davies i bin stap olsem presiden blong Pueto Riko San Ruan Misin, i kaonsela blong misin presiden, stek presiden, kaonsela blong stek presiden, stek eksekutiv sekretari, hae kaonsela, mo i bin stap long samfala bisoprik.