Yumi Toktok abaot Kraes
Taem we wol ia i nomo tokabaot tumas Jisas Kraes tumas, bae yumi tokbaot moa long saed blong Hem.
Mi talemaot lav we mi gat long yufala, ol fren we mifala i lavem tumas mo yufala we i bilif. Mi glad long fet mo strong paoa long tingting blong yufala long ol las manis ia, taem we wol sik ia i spolem laef blong yumi, mo i tekem ol impoten memba blong famli mo ol dia fren.
Long taem we samting i no stret, mi bin filim wan tangkyu we i no olsem oltaem, mo sua mo stret save ia se Jisas, Hem I Kraes. ?Yu yu filim olsem tu? I gat ol had samting we oli hevi long wanwan long yumi, be oltaem, long fored blong yumi, Hem we tingting blong Hem i stap daon i talem: “Mi nao rod ya, mo mi mi stamba blong trutok, mo mi stamba blong laef.”1 Taem we yumi stap gotru long taem blong bodi i no stap kolosap tumas long man, yumi nid blong neva gotru long wan taem blong no stap kolosap long Hem we, i singaotem yumi wetem lav, “Kam long mi.”2
Be olsem wan sta we i soem rod long klia dak skae, Jisas Kraes i saenem rod blong yumi. Hem i bin kam long wol ia insaed long wan simpol haos blong animol. Hem i laef long wan laef we i stret evriwan. Hem i hilim ol sikman mo mekem olgeta we oli ded oli laef bakegen. Hem i fren blong olgeta we oli fogetem olgeta. Hem i tijim yumi blong mekem gud, blong obei, mo lavlavem wanwan long yumi. Oli nilim Hem long kros, i girap wetem hae paoa tri dei afta, mo i letem yumi mo olgeta we yumi lavem olgeta blong laef afta long gref. Wetem sore mo gladhat blong Hem we i no gat samting blong komperem wetem, Hem i bin tekem long Hemwan ol sin mo ol safaring blong yumi, i tekem fogivnes taem yumi stap sakem sin, mo i tekem pis long taem blong ol strong win blong laef. Yumi lavem Hem. Yumi wosipim Hem. Yumi stap folem Hem. Hem i angka blong sol blong yumi.
I gud blong luk se, taem strong tingting ia i stap kam bigwan insaed long yumi, i gat plante long planet wol ia, we oli save smol nomo abaot Jisas Kraes, mo, long sam pat blong wol we oli taltalemaot nem blong Hem blong plante handred yia, fet long Jisas Kraes i stap go daon. Ol strong Sent long Yurop oli bin luk se fasin blong bilif i godaon bigwan long kantri blong olgeta truaot ol yia.3 Sore, be long Yunaeted Stet, fet i stap godaon tu. Wan stadi we oli jes mekem i soemaot se long ol las 10 yia, 30 milian pipol long Yunaeted Stet oli kamaot long bilif blong olgeta we Jisas Kraes i hae.4 Long lukluk i go long wol, wan nara stadi i talem se long ol nekis ten yia i go, namba ia bae i dabdabol moa we bae oli lego Kristin fasin, mo semmak namba bae oli akseptem.5
Yumi, yes, yumi tokbaot bigwan raet ia blong wanwan i save mekem joes, be yet, Papa blong yumi long Heven i talem strong : “Hem, Hem i Pikinini blong mi we mi lavem tumas: Lisin gud long hem”6 Mi witnes se dei bae i kam, taem we evri ni bae i bendaon mo evri tang i konfes se Jisas Hem i Kraes.7
?Bae yumi mekem olsem wanem blong fesem wol ia we i stap jenis? Sam oli no wantem save long bilif blong olgeta, mo sam moa oli stap lukaotem trutok. Yumi, yumi tekem finis long yumi, nem ia blong Sevya. ?Wanem moa yumi mas mekem?
Olsem Wanem Lod I Mekem Rere Presiden Russell M. Nelson
Haf ansa i save kam taem yumi tingbaot wei we Lod i bin tijim Presiden Russell M. Nelson long ol manis bifo oli singaotem hem i kam Presiden blong Jos. Taem hem i stap toktok wan yia bifo oli singaotem hem, Presiden Nelson i bin invaetem yumi blong stadi long wan moa dip fasin ol 2, 200 refrens long nem blong Jisas Kraes we oli stap long lis insaed long Topik Gaed.8
Tri manis afta, long Epril jeneral konfrens, hem i tokbaot olsem wanem, iven wetem we hem i bin stap olsem disaepol ova long plante yia, stadi ia abaot Jisas Kraes i bin tajem hem bigwan. Sista Wendy Nelson, i bin askem hem abaot hao stadi ia i tajem hem. Hem i ansa: “!Mi mi wan defren man!” ?Hem i wan defren man? ?92 yia, mo i wan defren man? Presiden Nelson i eksplenem:
“Taem yumi stap putum taem blong stap lanem abaot Sevya mo sakrifaes blong Hem we i pem praes, nao yumi go kolosap moa long Hem. …
“ … Lukluk blong yumi i kam blong stap nomo long Sevya mo gospel blong Hem.”9
Lod i talem se, “Lukluk long mi long evri tingting long yufala.”10
Long wan wol blong wok, blong wari, blong ol gudfala tingting, yumi kipim hat blong yumi, maen blong yumi, mo tingting blong yumi i stap long Hem we i hop mo Sevya blong yumi.
Sapos wan niu stadi abaot Sevya i bin helpem Presiden Nelson blong i rere, ?bae hemia i no save helpem yumi tu blong rere?
Taem hem i bin tokbaot bigwan nem blong Jos, Presiden Nelson i bin tijim: “Sapos yumi … wantem yusum paoa blong Atonmen blong Jisas Kraes—blong i klinim mo hilim yumi, blong mekem yumi kam strong moa mo leftemap yumi, mo long en, i mekem yumi kam wan god—yumi mas luksave, kliawan, se Hem i stamba blong paoa ia.”11 Presiden Nelson i bin tijim yumi se, blong oltaem yusum stret nem blong Jos, wan samting we yumi luk se i smol, be i no smol nating, mo bae i jenisim fiuja blong wol bigwan.
Wan Promes Sapos Yu Rere
Mi promesem yufala se, taem yufala i stap mekem yufala i rere, olsem Presiden Nelson i bin mekem, bambae yufala tu i kam defren, bae yufala i tingting moa abaot Sevya, bae yufala i tokbaot Hem moa oltaem, mo nomo stap fraet blong tokbaot. Taem yufala i kam blong save mo lavem Hem moa bigwan, ol toktok blong yufala oli kamaot gud nomo, olsem we oli kamaot taem yufala i toktok wetem wan long ol pikinini o wan dia fren blong yufala. Olgeta we oli stap lisin long yufala bae oli no filim tumas blong toktok, mo sakemaot yufala be bae oli wantem moa blong lanem samting long yufala.
Yu mo mi, i tokbaot Jisas Kraes, be ating yumi save mekem i gud smol moa. Sapos wol ia i stap go blong nomo tokbaot Hem tumas, ?huia nao bae i tokbaot Hem moa? !Yumi ia nao! !Wetem evri nara Kristin Man!
Stap Tokbaot Kraes Insaed long Ol Hom blong Yumi
?I gat ol pikja blong Sevya insaed long hom blong yumi? ?Yumi stap toktok plante long ol pikinini blong yumi abaot ol parabol blong Jisas? “Ol stori blong Jisas oli olsem wan win we i blo strong long ol asis blong fet insaed long hat blong ol pikinini blong yumi.”12 Taem we ol pikinini blong yu oli askem yu ol kwestin, wetem ful gud tingting, tingting blong tijim wanem we Sevya i bin tijim. Eksampol, sapos pikinini i askem: “Papa, ?From wanem yumi stap prea?” Yu save ansa: “Hemia wan gudfala kwestin. ?Yu yu tingbaot taem we Jisas i bin prea? Bae yumi tokbaot from wanem Hem i bin prea mo olsem wanem Hem i bin prea.”
“Yumi tokbaot Kraes, yumi glad long Kraes, … blong mekem se ol pikinini blong yumi oli save gat save long wanem ples oli save lukluk long hem blong kam klin aot long ol sin blong olgeta.”13
Stap Tokbaot Kraes Insaed long Jos
Semfala skripja ia i ademap, “blong yumi prij abaot Kraes.”14 Long ol wosip seves blong yumi, bae yumi lukluk nomo long Sevya, Jisas Kraes, mo presen ia we i sakrifaes we i pem praes blong sin. Hemia i no minim se yumi no save talemaot eksperiens blong laef blong yumi, o serem ol tingting we i kam long wan narawan. Ol topik blong yumi, maet i abaot ol famli, o ol seves, o ol tempol, o wan misin we i jes pas, evri samting long wosip blong yumi i mas poenem rod long Lod Jisas Kraes.
Teti yia i pas, Presiden Dallin H. Oaks i bin tokbaot wan leta we hem i bin kasem long “wan man we i talem se hem i go long wan sakramen miting, mo i lisin long seventin testemoni, mo i neva harem we oli tokbaot Sevya.”15 Presiden Oaks, i teknot se: “maet toktok ia i go tumas be mi kwotem from se i givim wan strong tok blong rimaenem yumi evriwan.”16 Afta, hem i invaetem yumi blong tokbaot moa abaot Jisas Kraes, insaed long ol toktok mo klas storian blong yumi. Mi bin luk se yumi stap lukluk moa mo moa long Kraes long ol miting blong yumi long Jos. Wetem tingting, bae yumi gohed strong long ol gudfala hadwok ia.
Stap Tokbaot Kraes Wetem Ol Nara Man
Wetem olgeta raon long yumi, bae yumi open moa, yumi wantem moa blong tokbaot Kraes. Presiden Nelson i talem: “ol tru disaepol blong Jisas Kraes oli wantem blong oli luk olgeta, oli toktok, mo oli defren long ol pipol blong wol ia.”17
Samtaem yumi ting se wan storian wetem wan, risal blong hem i we, wan ia, i mas kam long jos o luk ol misinari. Letem Lod i soem rod long olgeta taem we tingting blong olgeta i wantem, taem we yumi tingting moa abaot responsabiliti blong yumi blong stap olsem wan voes blong Hem, we yumi gat tingting mo yumi open abaot bilif blong yumi. Elda Dieter F. Uchtdorf i tijim yumi se, taem wan i askem yumi abaot wiken blong yumi, yumi sapos blong wantem smael mo talem se yumi lavem blong harem ol Praemeri pikinini oli singsing “Mi traem blong kam olsem Jisas.”18 Bae yumi kaen mo stap wan witnes blong fet blong yumi long Kraes. Sapos wan i serem wan problem blong praevet laef blong hem, maet bae yumi talem: “Jon, Meri, yu yu save se mi mi biliv long Jisas Kraes. Mi stap tingting long wan samting we Hem i bin talem, we i save helpem yu.”
Yu open moa long sosol media blong stap tokbaot tras blong yu long Kraes. Plante bae oli respektem bilif blong yu, be sapos wan i sakemaot taem yu tokbaot Sevya, tekem strong paoa long tingting long promes blong Hem: “Yufala we ol man oli … stap talem ol rabis tok agens long yufala from we yufala i man blong mi, yufala i save harem gud … From we i gat bigfala pei blong yufala i stap long heven.”19 Yumi mas kea moa blong stap folem Hem i bitim blong wantem se ol man we oli folem Hem oli “laekem” yumi. Pita i givim kaonsel ia: “Oltaem yufala i mas rere blong givim ansa long olgeta [from] yufala i putum tingting blong yufala i stap long Kraes.”20 Bae yumi toktok abaot Kraes.
Buk blong Momon, hem i wan strong witnes abaot Jisas Kraes. Kolosap evri pej i testifae long saed blong Sevya mo tabu misin blong Hem.21 Ol pej blong hem i fulap blong yu andastanem Atonmen mo gladhat blong Hem. Olsem wan kompanion blong Niu Testeman, Buk blong Momon i helpem yumi blong andastanem moa from wanem Sevya i bin kam blong sevem yumi, mo olsem wanem yumi save kam long Hem wetem moa strong tingting.
Sam long ol nara Kristin fren blong yumi, long sam taem, oli no save stret abaot bilif blong yumi, mo ol tingting blong yumi. Bae yumi glad tru wetem olgeta long bilif ia we yumi serem long Jisas Kraes mo long ol skripja blong Niu Testeman we yumi evriwan i lavem. Long ol dei we oli stap kam, olgeta we oli biliv long Jisas Kraes bae oli nidim wan fren mo sapot blong wanwan long yumi.22
Taem we wol ia i nomo toktok abaot Jisas Kraes tumas, bae yumi tokbaot moa long saed blong Hem. Taem we yumi stap soemaot tru kala blong yumi olsem disaepol blong Hem, plante raon long yumi bae oli rere blong lisin. Taem we yumi serem laet we yumi kasem long Hem, bambae laet blong Hem mo hae paoa blong Hem we i sevem yumi bae i saen long olgeta we oli wantem openem hat blong olgeta. Jisas i bin talem: “Mi mi olsem [wan] laet … long wol ya.”23
Gat Moa Hat blong Wantem Toktok Abaot Kraes
I no gat wan samting i leftemap filing blong mi blong toktok abaot Kraes i bitim pikja ia we mi gat abaot kambak blong Hem. Yumi no save wetaem bae Hem i kambak, be !taem we bae Hem i kam, win blong yumi bae i sot! Bae Hem i kam long ol klaod blong heven, wetem olgeta paoa mo glori, wetem evriwan long ol tabu enjel blong Hem. I no jes samfala enjel nomo, be evriwan long ol tabu enjel blong Hem. Olgeta ia oli no ol smol fatfat jerubim we Rafael i pentem we oli stap long ol Valentaen kad ia. Olgeta ia, oli ol enjel blong ol handred yia, ol enjel we oli sendem blong sarem maot blong ol laeon,24 blong openem ol doa blong kalabus,25 blong talemaot se bae Hem i bon i kam long wol,26 blong givim kamfot long Hem long Getsemane,27 blong talem bakegen long ol disaepol se bae Hem i go antap long Heven,28 mo blong openem glori dei blong putumbak gospel ia long wol.29
?Yu yu save tingting se bae yu mitim Hem haf rod blong joenem Hem long saed ia o nara saed blong vel?30 Hemia i promes blong Hem blong yu stap stret mo gud. Bae i wan eksperiens we bae i makem sol blong yumi blong oltaem.
Bae yumi glad tumas from profet we yumi lavem tumas, Presiden Russell M. Nelson, we i leftemap filing blong yumi blong wantem lavem Sevya mo talemaot se Hem i Hae tumas. Mi mi wan ae witnes we han blong Lod i stap wetem hem, mo witnes abaot revelesen ia we i stap soem rod long hem. Presiden Nelson, mifala i wantem tumas harem kaonsel blong yu.
Ol dia fren blong mi raon long wol. Bae yumi tokbaot Kraes, mo hop long glori promes blong Hem: “man we i talemaot nem blong mi long fes blong ol man, bambae mi tu, mi talemaot … hem long fes blong Papa blong mi long heven.”31 Mi testifae sed Hem i Pikinini blong God. Long nem blong Jisas Kraes, amen.