Mi Biliv long Ol Enjel
Lod i save yu mo olgeta jalenj we yu stap fesem. Hem i save yu, Hem i lavem yu, mo bae Hem i sendem ol enjel blong oli helpem yu.
Ol brata mo sista. Mi biliv long ol enjel, mo mi wantem serem wetem yufala ol eksperiens we mi bin gat wetem olgeta. Taem mi mekem hemia, mi hop mo prea se bae yumi luksave hamas nao ol enjel oli impoten long laef blong yumi.
Hemia i toktok blong Elda Jeffrey R. Holland long wan jeneral konfrens we i pas: “Taem yumi tokbaot olgeta we oli ol tul long han blong God, i mekem yumi tingbaot se i no evri enjel i kam long spirit wol. Sam long olgeta yumi wokbaot mo toktok long olgeta—long ples ia, naoia, evri dei. Sam long olgeta oli ol neba blong yumi. … Yes, heven i kolosap taem yumi luk God i soem lav blong Hem long kaen fasin, mo fasin blong pipol blong givim evri samting we i gud tumas, mo i klin klin mekem se enjel i wan toktok ia nomo we i kam long maen blong yu” (“The Ministry of Angels,” Liahona, Nov. 2008, 30).
Hemia i abaot ol enjel we oli stap long wol ia we mi wantem tokbaot. Ol enjel we oli wokbaot wetem yumi long evri dei laef blong yumi oli ol strong rimaenda long lav we God i gat long yumi.
Ol fas enjel we bae mi tokbaot hem i tufala sista misinari we oli tijim gospel long taem mi wan yang man: Sista Vilma Molina mo Sista Ivonete Rivitti. Yangfala sista blong mi mo mi, oli bin invaetem mitufala i go long wan Jos aktiviti we mitufala i mitim tufala enjel ia. Mi no save tingbaot nomo hamas simpol aktiviti ia bae i jenisim laef blong mitufala.
Mama mo papa blong mi wetem ol narafala brata mo sista blong mi oli no gat intres blong lanem moa abaot Jos long taem ia. Oli no iven letem ol misinari oli kam long haos blong mifala, mekem se mi tekem ol misinari lesen long wan bilding blong Jos. Smol rum long japel ia i kam “tabu ples blong mi.”
Wan manis afta ol enjel ia oli presentem gospel, mi baptaes. Mi bin gat 16 yia nomo. Be sore nomo, mi no gat pikja blong tabu taem ia, be mi gat wan pikja blong sista blong mi mo mi, taem we mitufala i tekpat long aktiviti. Mi nid blong help blong eksplenem huia i stap long pikja ia. Mi nao tolwan long raet saed.
Olsem we yu save tingting long hem, stap strong long Jos i bin had olsem wan yangfala we laefstael i stap jenis mo famli i no stap tekem sem rod.
Taem mi stap traem blong stretem mi long niu laef , niu kalja, mo ol niu fren blong mi, mi filim se mi no stap long sem ples wetem olgeta. Mi filim se mi stap miwan mo mi harem nogud plante taem. Mi bin save se Jos i tru, be mi filim i had blong mi kam pat blong hem. Taem we mi stap filim se mi no stap gud o mi no save wan samting taem we mi stap traem blong go wetem niufala relijin blong mi, mi faenemaot strong paoa long tingting blong tekpat long wan tri-dei yut konfrens, we mi ting se hemia bae i helpem mi mekem ol niu fren. Hemia i taem we mi mitim wan narafala enjel we i sevem mi, nem blong hem Mônica Brandão.
Hem i niu long eria ia, we i muv long wan narafala pat blong Brasil i kam. Kwiktaem nomo hem i kasem ae blong mi, laki blong mi, hem i akseptem mi olsem wan fren blong hem. Mi ting se hem i lukluk moa long wanem i stap insaed long mi bitim long olsem mi lukluk long aotsaed.
Be from se hem i kam fren blong mi, mekem se hem i presentem ol fren blong hem long mi, we afta bae oli kam ol fren blong mi tu taem mifala stap gat wan gud taem long plante aktiviti we mi atendem afta. Ol aktiviti ia oli impoten tumas long niufala laef blong mi ia.
Ol gudfala fren ia oli mekem wan bigfala jenis, be blong oli no tijim gospel long hom wetem wan famli we i givim sapot, i bin stap putum progres insaed long laef blong mi long denja. Pat blong mi wetem gospel long Jos i moa impoten blong mi gohed blong jenis long laef. Afta, tu moa enjel, Lod i sendem i kam blong helpem mi.
Wan long tufala hem i Leda Vetori, eli moning seminari tija blong mi. Tru long lav mo ol klas we oli fulap long insperesen, hem i givim long mi wan pis blong “gudfala toktok blong God” (Moronae 6:4), we mi rili nidim truaot long dei blong mi. Hemia i helpem mi blong mi kasem wan strong paoa long saed blong spirit blong mi save gogohed.
Wan narafala enjel we oli sendem blong helpem mi i Yang Man Presiden blong mi, Marco Antônio Fusco. Hem tu i stap olsem senia hom tijing kompanion blong mi. Iven we mi no gat eksperiens wetem ol defren wei blong lukluk, hem i givim mi ol asaenem blong tijim ol pris long kworom miting blong mifala mo ol hom tijing visit. Hem i givim janis long mi blong mi tekem aksen, mo lanem mo blong no stap nomo olsem wan man blong lukluk gospel nomo. Hem i trastem mi moa bitim mi trastem miwan.
Tangkyu i go long ol enjel ia, mo fulap narafala we mi bin mitim olgeta long ol impoten pat long ol eli yia blong mi, mi kasem inaf paoa blong stap strong long rod blong kavenan ia taem mi stap kasem wan witnes abaot trutok.
!O Yes!, ?yangfala gel ia,Mônica? Afta we mitufala go long wan misin, hem i kam waef blong mi.
Mi no ting se hem i hapen nating se, ol gudfala fren ia, ol Jos responsabiliti, mo stap kakae long gudfala tok blong God i pat blong wokbaot ia. Presiden Gordon B. Hinckley i tijim yumi wetem waes: “Hem i no isi blong mekem ol samting ol jenis we i hapen blong joenem Jos. Hemia i minim blong stopem sam rabis fasin. Hemia i minim blong lego sam fren. Ating bae i minim bae yumi putum long saed ol kastom we yumi laekem blong folem. I nidim blong jenisim o katemaot sam samting we bodi i wantem. Long plante kes hem i minim blong yu stap yuwan mo fraet long wanem we yu no save. I mas gat fasin blong fidim man mo mekem man i kam moa strong long ol hadtaem ia blong laef blong wan konvet” (“There Must Be Messengers,” Ensign, Oct. 1987, 5).
Afta hem i tijim, “Evriwan i nidim tri samting: wan fren, wan responsabiliti, mo blong oli fidim hem wetem gudfala toktok blong God’” (“Converts and Young Men,” Ensign, May 1997, 47).
?From wanem mi serem ol eksperiens ia wetem yu?
Faswan, hem i sendem mesej i go long olgeta we oli stap pas tru long sem rod ia naoia. Mebi yu wan niu konvet, o stap kambak long Jos afta we yu stap wokbaot raon blong sam taem, o yu yu wan we yu stap traehad wetem laef blong yu. Plis, plis, yu no givap long efot blong yu blong stap pat blong bigfala famli ia. !Hemia i tru Jos Ia blong Jisas Kraes!
Taem i kam long fasin long stap glad mo sevem man, hem i oltaem wan efot. Efot ia i blong yu jenisim laef stael mo ol kastom blong yu. Lod i save yu mo olgeta jalenj we yu stap fesem. Hem i save yu, Hem i lavem yu, mo bae Hem i sendem ol enjel blong oli helpem yu.
Long toktok blong Hemwan Sevya i talem: “mi go long fored blong yufala. Bambae mi stap long raet han blong yufala, mo long lef blong yufala,mo Spirit blong mi bambae i stap insaed long [hat] blong yufala, mo ol enjel blong mi oli stap raonem yufala, blong sapotem yufala” (Doktrin mo Ol Kavenan 84:88
Nambatu stamba tingting blong serem ol eksperiens ia i blong sendem wan mesej i go long evri memba blong Jos—long yumi evriwan. Yumi mas tingbaot se i no isi long ol niu konvet, ol fren we oli stap kambak, mo olgeta we oli stap laef long defren laef stael blong oli joen. Lod i save ol jalenj we oli stap fesem, mo Hem i stap lukaotem ol enjel we oli wantem blong help. Lod oltaem i lukaotem ol volontia we oli wantem kam ol enjel long laef blong ol narafalawan.
Ol brata mo sista. ?Yu wantem glad blong kam wan tul long han blong Lod? ?Bae yu glad blong kam wan long ol enjel ia? Blong kam wan mesenja, we God i sendem, long wol ia, blong wan man we Hem i stap wari long hem? Hem i nidim yu. Olgeta oli nidim yu.
!Yes!, yumi save yusum ol misinari. Oltaem oli stap, ol faswan blong mekem wok blong enjel ia. Be oli no inaf blong mekem wok ia.
Sapos yu lukluk gud, bae yu faenem se i gat fulap we i nidim help blong ol enjel. Ol pipol ia oli no nid blong werem waet sot, ol dres, o klos blong Jos. Samtaem oli sidaon olgetawan, biaen long japel o klasrum, samtaem oli filim se man i no save luk olgeta. Mebi hea stael blong olgeta i tumas o lanwis we oli yusum hem i defren, be oli stap ia, oli stap traem.
Sam oli stap tingting, “?Bae mi gohed blong kambak? ?Bae mi gohed blong traem? Ol narafalawan oli stap tingting sapos wan dei bae oli akseptem olgeta mo lavem olgeta. Oli nidim ol enjel, naoia; ol enjel we oli wantem lego ol samting we oli laekem blong mekem blong save helpem ol narawan; “ [ol pipol ia we oli] gud tumas mo klin tumas we i mekem se, enjel , i wan toktok ia nomo we i kam long maen [blong tokbaot olgeta]” (Jeffrey R. Holland, “Seves blong Ol Enjel,” 30).
!Ol brata mo sista. Mi biliv long ol enjel! Yumi evriwan i stap ia tedei, olsem wan bigfala ami blong enjel we oli setem yumi apat blong ol las dei ia, blong givhan long ol narafalawan, we yumi olsem han we Sevya, we i Krieta we i lavem yumi, i pusum i go long olgeta. Mi promes se sapos yumi wantem tumas blong givim seves, Lod bae i givim janis long yumi blong kam olsem wan enjel blong givhan. Hem i save huia i nidim help blong enjel, mo bae Hem i putum olgeta long rod blong yumi. Lod i putum olgeta we oli nidim help blong enjel evri dei long rod blong yumi.
Mi talem tangkyu from plante enjel we Lod i putum long rod blong mi truaot long laef blong mi. Oli nidim olgeta. Mi talem tangkyu from gospel blong Hem we i help blong jenisim yumi mo givim janis long yumi blong kam moa gud.
Hemia i gospel blong lav, wan gospel blong givhan. Long hemia, mi testifae long nem blong Jisas Kraes, amen.