Apdeit long Revisen blong Hymbuk

Long Jun 2018, oli bin anaonsem revisen blong hymbuk blong Jos mo buk blong singsing blong ol pikinini, mo tu, oli bin askem blong ol memba oli givim tingting abaot tabu miusik, mo oli bin singaotem ol memba blong oli sendem ol hym, ol singsing, mo ol toktok blong ol hym we oli raetem. Kolosap 50,000 memba oli bin ansa mo givim tingting blong olgeta long wan sevei long saed blong tabu miusik we i stap naoia. Olgeta we oli bin ansa o givim tingting, oli bin serem filing blong olgeta tu abaot sam singsing blong ol nara fet we i gud blong tingting blong putum insaed long buk.

I gat ova long 16,000 miusik we jos i kasem long ol memba long 66 kantri. Olgeta hym mo singsing ia, oli stap luklukbak long olgeta, plante taem, we i no folem wan oda; i gat wan intanasonol grup blong ol memba we oli gat talen we oli luklukbak long olgeta, mo i gat ol revisen komiti long hedkwota blong Jos oli wok long olgeta.

Ol komiti ia, oli talem tangkyu long ol memba raon long wol blong save givim taem mo talen blong olgeta blong helpem ol narawan oli kam kolosap moa long Sevya tru long tabu miusik ia. Taem we oli stap luklukgud long evri samting we oli sendem i kam, mo evri tingting we oli givim i kam, i luk se niu koleksen bae oli mekem i kam pablik long samfala yia we i stap kam yet.