Haʻu, ʻo Muimui ʻIate Au
ʻOku faitāpuekina fēfē ʻe he ʻEikí ʻa kinautolu ʻoku nau tauhi kiate Iá?
Tokāteline mo e Ngaahi Fuakava 30–36
5–11 ʻEpeleli
Hili hono uiuiʻi ʻo Tōmasi B. Māʻasi ke mavahe mei hono fāmilí ke ʻalu ʻo ngāue fakafaifekaú, naʻe talaʻofa kiate ia ha ngaahi tāpuaki lahi koeʻuhí ko e ngaahi feilaulau naʻá ne fakahoko ke ngāué (vakai, Tokāteline mo e Ngaahi Fuakava 31:2, 5, 7).
Kuo tokolahi ha niʻihi kuo nau maʻu ha ngaahi tāpuaki fakataha mo Misa Māʻasi ʻi heʻenau feinga ke fokotuʻu ʻa e Siasi ʻo e ʻEikí kuo fakafoki maí ʻi he funga ʻo e māmaní. Ko ha sīpinga ʻe taha ko Sohani mo Telēsia Hupa, ʻa ia naʻá na tokoni ke fokotuʻu ʻa e Siasí ʻi ʻAositulia ʻi he konga kimuʻa ʻo e 1900 tupú.
Tui ʻi he Uhouhonga ʻo e Faingataʻá
Ko e taimi naʻe papitaiso ai ʻa e fāmili Hupá ki he Siasí pea nau mavahe mei he tui faka-Katoliká, ʻa e tui naʻe lahi taha ʻi ʻAosituliá, naʻe lahi ha ngaahi palopalema fakasōsiale mo fakalao naʻe tupu mei ai. ʻI hono ʻiloʻi pē ʻe he kakaí naʻe ʻikai ʻalu ʻa e fānau ʻo e fāmili Hupá ki he kofesió, ne nau fakamanamana ke faʻao ʻa e fānaú mei honau ʻapí. Naʻe aʻu ʻo talaange ʻe ha niʻihi kia Telēsia ke ne liʻaki ʻa Sohani.
Ngaahi Tāpuaki mo ha Ngaahi Faingamālie Foʻou
Hili e Tau Lahi I ʻa Māmaní, naʻe movete ʻa e ngaahi fakangatangata fakalotu kimuʻá, pea naʻe ʻatā ai ki he kakaí ke nau fakahoko tauʻatāina ange ʻenau tui fakalotú. Naʻe tauhi ʻe he ʻEikí ʻa e fāmili Hupá ʻi heʻenau hokohoko atu ke vahevahe ʻa e ongoongoleleí, pea naʻe ʻikai fuoloa kuo kamata ke fakataha ha kiʻi kolo tokosiʻi [ʻa e Siasí] ʻi he feleoko ʻa e fāmili Hupá. Naʻe uiuiʻi ʻa Sohani ke ne hoko ko e fuofua palesiteni fakakolo ʻi ʻAositulia. Naʻá ne fua fatongia ʻi ha taʻu ʻe 25.1
Fealēleaʻakí
Ko e hā ha founga kuo faitāpuekina ai koe mo ho fāmilí ʻe he ʻEikí ʻi hoʻo tauhi kiate Iá?