Ko e Fuʻu Faikehekehe Lahi ʻi he Fakamoʻuí mo e Filí

Fai ʻe Kathryn Thomas

Seminelí mo e ʻInisititiutí

ʻOku tokoni ʻa hono fakafehoanaki ʻa e ngaahi faikehekehe ʻi he vahaʻa ʻo Sīsū Kalaisi mo Sētané ke tau houngaʻia lahi ange ai ʻi he misiona mo e ʻofa ʻa e Fakamoʻuí.

Christ standing in a field and watching over sheep

Fakakaukau ki he fakaʻeiʻeiki ʻo e meʻaʻofa naʻe foaki ʻe he Fakamoʻuí ki he fānau kotoa ʻa e ʻOtuá ʻi he taimi naʻá Ne finangalo ai ke fakahoko ʻa e palani ʻa e Tamaí. ʻI he fakataha alēlea ʻi he maama fakalaumālié, ʻi he taimi naʻe folofola ai ʻa e Tamaí ʻo pehē, “Ko hai te u fekauʻí?” naʻe tali ʻe he Fakamoʻuí ʻi he angavaivai ʻo pehē, “Ko au ʻeni, fekauʻi au” (ʻĒpalahame 3:27) pea naʻá Ne toe folofola, “ʻE Tamai, ke fai pē ʻa ho finangaló, pea ke ʻoʻou ʻa e lāngilangí ʻo taʻengata” (Mōsese 4:2).

Naʻe tuʻunga ʻi he ʻofa ʻa Sīsū Kalaisi ʻiate kitautolú ʻa ʻene foaki Ia ke Ne hoko ko hotau Fakamoʻuí.¹ Ka ko e tali ʻa Sētane ki he palani ʻa e Tamaí, naʻe siokita ia. Neongo naʻá ne tala te ne “huhuʻi ʻa e faʻahinga kotoa pē ʻo e tangatá” (vakai, Mōsese 4:1), ka “naʻe ʻikai ke ne vilitaki ke hoko ko hotau fakamoʻui. Naʻe ʻikai ke ne fie faingataʻaʻia pe mate maʻá ha taha. Naʻe ʻikai ke ne fie lilingi ʻa hono totó. Naʻá ne fie maʻu ha nāunau, langilangi, mo e mālohi ʻo e ʻOtuá ʻo ʻikai ke fie totongi ha faʻahinga mahuʻinga. … ʻE māʻolunga taha pē ia pea he ʻikai lava ha taha ke fakalakalaka hake.”²

ʻI hono fehangahangai funganí, ko e meʻa kotoa pē ʻoku fakahoko pea ʻe fakahoko ʻe Kalaisí ʻoku fakaʻaiʻai ia ʻe Heʻene ʻofa haohaoa ʻiate kitautolú (vakai, 2 Nīfai 26:24) mo e loto-holi ke fakalāngilangiʻi ʻa e Tamai Hēvaní (vakai, Sione 8:28–29). ʻOku fakatōkilalo mo fakalotoa ʻa e fakakaukau “naʻe fakafonu ʻaki ʻa Sīsū Kalaisi ʻa e ʻofa taʻefakangatangata ʻi Heʻene kātekina ʻa e mamahi taʻe-hano-tataú, ngaohikoviá, mo e fakamaau taʻe totonu maʻatautolú. Naʻe tuʻunga ʻi Heʻene ʻofa ʻiate kitautolú, naʻá Ne ikunaʻi ai ʻa e ngaahi faingataʻa ne hulutuʻá … koeʻuhí ke tau lava mo kitautolu ʻo ikunaʻi ʻa e mamahi mo e ngaohikovia mo e fakamaau taʻe totonu ʻa e māmani ko ʻení pea tokoni mo fakamolemoleʻi mo faitāpuekina.”³ ʻOku tau fifili nai ʻi heʻetau hiva, “ʻOku fakaofo ʻa ʻEne pekiá koeʻuhí ko aú”?⁴

ʻOku hā ʻi he folofolá ha ngaahi fakafehoanaki taʻefaʻalaua ki he ʻulungaanga ʻo Sīsū Kalaisí pea mo e filí. ʻE lava ke tokoni ʻa hono sivisiviʻi kinautolú ke mahino kiate kitautolu ʻa e lahi ʻo e ʻofa haohaoa ʻa hotau Fakamoʻuí.

Christ in the midst of people of various races or nationalities

Sētane	Sīsū Kalaisi
“Ko e tēvoló, ʻoku ʻalu fano holo, ʻo hangē ha laione ngungulú, ʻo ne kumi pe ko hai te ne faʻapuku haké” (1 Pita 5:8) pea “ʻalu hake mo ʻalu hifo, mo feʻaluʻaki fano ʻi he māmaní, ʻo feinga ke fakaʻauha ʻa e laumālie ʻo e tangatá” (Tokāteline mo e Ngaahi Fuakava 10:27).	“Ko au ko e tauhi lelei: ʻoku foaki ʻe he tauhi leleí ʻene moʻuí koeʻuhí ko e fanga sipí. … Pea ʻoku ou tuku hifo ʻeku moʻuí koeʻuhí ko e fanga sipí. … [ʻOku ou] tuku hifo ʻeku moʻuí, kau toe toʻo ia. ʻOku ʻikai ke toʻo ia ʻe ha taha ʻiate au, ka ʻoku ou tuku hifo ia ʻe au pē.” (Sione 10:11, 15, 17–18).
“Naʻá ne angatuʻu kiate au, ʻo pehē, Tuku mai kiate au ho lāngilangí, ʻa ia ko hoku mālohí; pea naʻá ne fakatafokiʻi atu foki meiate au ha vahe tolu ʻe taha ʻo e fuʻu kau tau ʻo e langí koeʻuhi ko ʻenau tauʻatāina ke filí” (Tokāteline mo e Ngaahi Fuakava 29:36).	“ʻOku ʻikai ke u fai ha meʻa ʻiate au pē; ka ko ia kuo akoʻi au ʻe heʻeku Tamaí. … ʻOku ou fai maʻu ai pē ʻa e ngaahi meʻa ʻoku lelei ai iá. … ʻOku ou fakaʻapaʻapa ki heʻeku Tamaí. … Pea ʻoku ʻikai te u kumi ʻa e ongoongo lelei ʻoʻokú” (Sione 8:28–29, 49–50).
Naʻá ne “fakamafola ʻa e ngaahi ngāue ʻo e fakapoʻulí mo e ngaahi meʻa fakalieliá ʻi he funga kotoa ʻo e fonuá, kae ʻoua kuó ne toho hifo ʻa e kakaí ki ha fakaʻauha fakaʻaufuli, pea ki ha heli taʻengata” (Hilamani 6:28).	“Ko au ko e maama ʻo māmaní: ko ia ʻoku muimui ʻiate aú, ʻe ʻikai ʻalu ia ʻi he poʻulí, ka ʻe ʻiate ia ʻa e maama ʻo e moʻuí” (Sione 8:12).
Naʻá ne “feinga ke fakaʻauha ʻa e tauʻatāina ke fili ʻa e tangatá” (Mōsese 4:3) mo “feinga ke mamahi ʻa e tangata kotoa pē ʻo hangē pē ko iá” (2 Nīfai 2:27).	“Kuó u haʻu au ke nau maʻu ʻa e moʻuí, pea ke nau maʻu ia ʻo lahi ʻaupito” (Sione 10:10) pea “ke fakamoʻui ʻa e loto mafesí, ke malanga ʻaki ʻa e huhuʻí ki he kau pōpulá, mo e fakaʻā ʻo e kuí, ke vete ange ʻa kinautolu kuo laveá” (Luke 4:18).
ʻOku “ʻikai ke maluʻi ʻe he tēvoló ʻa ʻene fānaú ʻi he ʻaho fakaʻosí” (ʻAlamā 30:60), “fakahekehekeʻi ʻa kinautolu, mo ne tākiakiʻi atu ʻa kinautolu kae ʻoua kuó ne fusi hifo ʻa honau laumālié ki heli” (Tokāteline mo e Ngaahi Fuakava 10:26), “kae ʻoua kuó ne puke ʻa kinautolu ʻaki ʻa ʻene ngaahi seini fakamanavaheé” (2 Nīfai 28:22).	“ʻOku ou ʻi homou lotolotongá, pea ko homou taukapo au ki he Tamaí” (Tokāteline mo e Ngaahi Fuakava 29:5), “ʻa ia ko Sīsū Kalaisi, ko homou taukapó, ʻa ia ʻokú ne ʻiloʻi ʻa e vaivai ʻo e tangatá pea mo e founga ke tokoniʻi ai ʻa kinautolu kuo ʻahiʻahiʻí” (Tokāteline mo e Ngaahi Fuakava 62:1).
“ʻOkú ne ueʻi hake ʻa e loto ʻo e kakaí ke fefakakikihiʻaki ʻi he ʻita, ʻiate kinautolu” (3 Nīfai 11:29), pea “ʻokú ne ueʻi hake ʻa kinautolu ke faikovi ki he meʻa ʻoku leleí” (Tokāteline mo e Ngaahi Fuakava 10:20).	“ʻOku ou tuku ʻa e melinó kiate kimoutolu, ko ʻeku melinó ʻoku ou foaki kiate kimoutolú: ʻoku ʻikai hangē ko e foaki ʻa māmaní, ʻa ʻeku foaki kiate kimoutolú. ʻOua naʻa mamahi homou lotó, pea ʻoua naʻa manavahē ia” (Sione 14:27).
Naʻá ne “fakakui [ʻa e] loto taʻetuí” (2 Kolinitō 4:4), “[fakakaukau ke] ikuʻi ʻa hoʻo fakamoʻoní” (Tokāteline mo e Ngaahi Fuakava 10:33), pea “[haʻu ʻo] toʻo atu ʻa e māmá mo e moʻoní” (Tokāteline mo e Ngaahi Fuakava 93:39).	“Kapau te ke kole, te ke maʻu ha fakahā hoko mo e fakahā, pea mo ha ʻilo hoko mo e ʻilo, koeʻuhí ke ke ʻiloʻi ʻa e ngaahi meʻa liló mo e ngaahi meʻa fakamelinó—ʻa e meʻa ʻoku ʻomi ʻa e fiefiá, ʻa e meʻa ko ia ʻoku ʻomi ʻa e moʻui taʻengatá. … Ko ia, ko ia ia ʻoku masiva ʻi he potó, tuku ke ne kole kiate au, pea te u foaki kiate ia ʻo lahi pea ʻikai valokiʻi ia (Tokāteline mo e Ngaahi Fuakava 42:61, 68).

Fakatauange te tau “fakakaukauloto ki he ʻaloʻofa taʻengata [ʻa e Fakamoʻuí], ko [ʻEne] ʻofa taʻefakangatangatá” pea mataʻikoloa ʻaki ʻa e foʻi moʻoni naʻe makatuʻunga ʻiate Ia, “naʻe foaki ai kiate kitautolu ʻa e meʻaʻofa ʻo e moʻuí ki hono kotoa ʻo ʻitānití.”⁵