ʻOku Talitali Lelei Kimoutolu ki he Makasini ko ʻEní
Ko e Falala ki he Ngaahi Talaʻofa ʻa e Fakamoʻuí
ʻOku tau tofuhia kotoa pē he ngaahi faingataʻa ʻo e moʻuí. Ko ha niʻihi ʻoku siʻisiʻi pea fakataimi, ka ko ha niʻihi ʻoku lahi faufaua pea fuofuoloa. ʻI he ngaahi faingataʻa ko ʻení, ʻoku tokoniʻi kitautolu ʻe he ngaahi kaungāmeʻa anga faka-Kalaisí ke tau ongoʻi ʻoku ʻofaʻi mo fakamālohia kitautolu.
ʻI he peesi 32, te ke lava ʻo feʻiloaki ai mo ha taha ʻo hoku ngaahi kaungāmeʻa mamae ko Hetá, ʻa ia kuó ne fakaivia au ʻaki ʻa e ʻofá ʻi ha ngaahi taʻu lahi ʻo e feohi fakakaungāmeʻá. Ko ha fefine tui mālohi ia ʻoku ʻikai ke ne tuku ʻa e ngaahi pole fakamatelié—hangē ko ʻene fefaʻuhi fakaʻaho mo e mahaki teté—ke ne puleʻi ʻene ʻamanaki leleí pe fakalotosiʻiʻi ʻene ngaahi ngāue leleí. Ko ha taha pē ia ʻo hotau kāinga tokolahi ʻoku nau lava ʻo langa ʻa e puleʻanga ʻo e ʻOtuá ʻi ha ngaahi founga mālohi, neongo ʻenau faingataʻaʻia fakaesinó.
Kuó u fanongoa ʻa e fakamoʻoni tuʻo lahi ʻa Heta ki heʻene falala ki he ngaahi talaʻofa ʻa e Fakamoʻuí. ʻOku ongo moʻoni ʻa e pōpoaki ko iá tautautefito ki he faʻahitaʻu Toetuʻu ko ʻení, ʻa ia ʻoku fakaafeʻi ai kitautolu ke tau kiʻi nofo hifo ʻo fakalaulauloto ki he meʻa ʻoku malava koeʻuhí ko Sīsū Kalaisí. ʻOku malava ʻe Heʻene ʻofá ʻo liliu hotau ngaahi faingataʻaʻiá ko ha meʻa ke tau fakalakalaka ai. Koeʻuhí ko ʻEne Fakaleleí, ʻoku ʻikai leva ha mamahi, mahaki, pe fakangatangata ʻo e tuʻunga malavá ʻe taʻemahino kiate Ia. ʻOkú Ne ʻomi ha fakamoʻui kakato. Ko e fiefia ia ʻoku tau fakamanatua ʻi he Toetuʻú.
Tuʻa ʻofa atu,
Marissa Widdison
Tokoni ʻĒtita Pule ki he Gospel Living App