Leʻo ʻo e Kau Māʻoniʻoni ʻi he Ngaahi ʻAho Kimui Ní
ʻUhinga ʻo ʻEku ʻi Hení
ʻOku ʻofa ʻa e Tamai Hēvaní ʻiate kitautolu pea ʻokú Ne finangalo ke tāpuekina kitautolu ʻi ha ngaahi founga taʻeʻamanekina.
Laʻitā ʻo e ʻū tohí mei he Getty Images
Naʻe taʻu kakato ʻe taha ʻa ʻeku ngāue fakafaifekau ʻi Netaleni mo Pelisiumé ʻi hono ui au ʻe heʻeku palesiteni fakamisioná ʻo talamai te u hiki ki ha ʻēlia foʻou.
Naʻá ne talamai ʻa e feituʻu te u ʻalu ki aí pea mo e tokotaha te ma hoá, peá ne fakamālō mai ʻi heʻeku vilitaki ke ngāué. Naʻá ku fakaʻamu ke u ʻalu ki ha ʻēlia kehe, ka naʻá ku hiki ki hoku ʻēlia foʻoú peá u fai hoku lelei tahá ke fakangaloki au kae fai e ngāué.
Talu mei he taimi ne u tūʻuta aí, ne u fifili pe ko e hā e ʻuhinga naʻe vahe ai au ki aí. ʻI ha ʻaho ʻe taha naʻe talamai ʻe hoku hoá ne ʻi ai ʻema ʻapoinimeni mo ha fefine māmālohi mei Pueto Liko. Naʻá ne lea pē ʻi he lea faka-Sipeiní. Ko e meʻa mālié he naʻe poto hoku hoá ʻi he lea faka-Sipeiní, he naʻe ʻikai pē ke u poto au ai!
Lolotonga e talanoa hoku hoá mo e fefiné ʻi heʻema ʻapoinimení, naʻá ku malimali pē mo kamokamo. Kimuʻa pea fai ʻema pōpoakí, naʻe ʻeke ange ʻe hoku hoá ki he fefiné pe ʻoku ʻi ai haʻane Tohi ʻa Molomona ʻi he lea faka-Hōlaní ʻe lava ke u ngāue ʻaki ke u muimui atu ai. Naʻá ma tufa ʻema tohi fakaʻosí ʻi he pongipongi ko iá. Naʻá ne toʻo mai ha tohi mei heʻene tukuʻanga tohí.
Naʻe fakaava hake ʻe hoku hoá ʻa e tohí ʻo ne lau ʻa e peesi talamuʻakí. Naʻá ne sio mai kiate au mo ne fehuʻi mai, “ʻOkú ke ʻiloʻi nai ʻa e tokotaha ko ʻení?”
Naʻá ne fakaʻaliʻali mai ʻa e pēsí, ʻa ia naʻe hiki ai ha fakamoʻoni naʻe tohi ʻe ha ʻEletā Moleli ʻe taha. Naʻá ku fakatokangaʻi ʻa e tuʻasila naʻe tohi ʻi he pōpoakí.
ʻI he ngaahi taʻu kimuʻá, naʻe ngāue fakafaifekau ha taha ʻoku ou tokoua ʻaki ʻi he uooti ʻa e fefine ko ʻení ʻi Pueto Liko. ʻI he taimi naʻá na ʻilo ai ʻe hiki ʻa e fefine ko ʻení ki Netalení, naʻá na foaki ange ha Tohi ʻa Molomona faka-Hōlani naʻe tohi ai ʻena fakamoʻoní.
Hili ʻeku lau ʻa e fakamoʻoni ʻa hoku kāsiní, ne u maʻu ha ongo mālohi. Ne hangē naʻe pehē mai ʻe he Laumālié, “ʻOku ʻi ai e ʻuhinga ʻokú ke ʻi heni aí. ʻOku ʻi ai e kakai ʻi he feituʻú ni ʻoku nau tatali ke ʻomi kinautolu ki he ongoongoleleí ʻo fakafou ʻiate koe.”
Ko e taimi naʻá ma fakamatalaʻi ai ki he fefiné ʻoku ou kāinga mo e faifekau naʻá ne hiki ʻene fakamoʻoní, naʻe pehē mai ʻe he fefiné ni ʻokú ne ongoʻi ʻoku ala mai ʻa e ʻOtuá ke fakahaaʻi kiate ia ʻa ʻEne ʻofa ʻiate iá pea ʻokú Ne finangalo ke ne foki mai ki he lotú.
ʻOku ʻofa ʻa e Tamai Hēvaní ʻiate kitautolu pea ʻokú Ne finangalo ke tāpuekina kitautolu ʻi ha ngaahi founga taʻeʻamanekina. Ne u ongoʻi loto-fakatōkilalo ʻi heʻeku hoko ko ha meʻangāue ʻi he toʻukupu ʻa e ʻEikí ke faitāpuekina ʻa e moʻui ʻa e fefine ko ʻení.