Fakaʻilekitulōnika Pē: Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Te Ke Kei Lava Pē ʻo Hoko ko ha Faʻē
Ko e tuʻunga fakaefaʻeé ko ha uiuiʻi makehe ia ʻoku ʻomi ʻe he ʻOtuá ki he fefine kotoa pē.
Faitā ʻa Charlotte Larcabal
ʻOku ou saiʻia ke tokoni ki he niʻihi kehé. Ko ha meʻa naʻá ku ako mei heʻeku ongomātuʻá, tautautefito ki heʻeku faʻeé. ʻOkú ne hoko maʻu pē ko e fuofua taha ke fakahoko ha tokoni mo fakaafeʻi ʻa e kakaí ke ʻai ha meʻa ke nau kai pe inu.
Naʻá ne akoʻi au ʻe lava ʻe hono fai ha ngaahi meʻa lelei maʻá e niʻihi kehé ʻo fakahoko ha liliu lahi ʻi he moʻuí. ʻI he taimi ʻokú ke tokoniʻi ai ha tahá, te ke lava ʻo tokoniʻi kinautolu ke nau fiefia. Pea ʻi heʻenau fiefiá, te nau loto leva ke fakafiefiaʻi mo e niʻihi kehé. Ko ha meʻa ia ʻoku ou kumuni maʻu ai pē ʻi hoku lotó.
Naʻe ʻi he akoʻanga māʻolungá ʻa Kulisitolo pea naʻe taʻu ono ʻa ʻEnisolo ʻi he taimi naʻe ʻikai ke kei lava ai ʻe heʻenau faʻeé ʻo tauhi kinautolú. Ne u loto leva ke tauhi kinautolu. Naʻá ku talaange, “ʻOku ou palōmesi he ʻikai ke u teitei liʻaki hoʻomo fānaú. Te u tauhi lelei kinautolu.”
Hili ha ngaahi taʻu mei ai, naʻe kole mai ʻe ha faʻē kei talavou ʻe taha ke u tauhi ʻene pēpē ko ʻAlisoní. Naʻe fehangahangai e faʻeé ni mo ha ngaahi tūkunga faingataʻa pea naʻá ne ʻilo te u lava ʻo tauhi lelei ʻene pēpeé. Naʻá ku tauhi ʻa ʻAlisoni.
ʻOku ou feinga ke akoʻi ki he fānaú ni ʻa e ngaahi meʻa mahuʻinga ʻi he moʻuí. ʻOku ou ʻomi kinautolu ki he lotú mo feinga ke tokoniʻi kinautolu ke nau toe ofi ange ki he ʻOtuá. ʻOku ou ʻilo ko e taimi ʻoku ou ofi ange ai kiate Iá, te u lava leva ʻo fai ha meʻa lahi ange, naʻa mo e ngaahi meʻa ʻoku ou pehē he ʻikai malavá. Ko e moʻoni, ʻoku ou fie maʻu ia maʻa Kulisitolo, ʻEniselo mo ʻAlisoni.
Kuo faingataʻaʻia e fānau ko ʻení ʻi he moʻuí, ka kuó u mamata ki hono fakamoʻui ʻe he ongoongoleleí mo e Laumālié honau lotó. Kuó u mamata ki he liliu māmālie ʻenau ngaahi fakakaukaú mo e ʻulungāngá. ʻOku mau lotua fakataha ʻenau mātuʻa totonú, koeʻuhí ʻe tatau ai pē pe ko e hā e meʻa ʻoku hokó, ʻoku ou loto ke nau fakaʻapaʻapaʻi mo ʻofaʻi kinautolu.
ʻOku ou ʻofa ʻia Kulisitolo, ʻEniselo, mo ʻAlisoni ʻo hangē pe haʻaku fānaú. ʻOku faʻa ʻeke mai he kakaí he taimi ʻe niʻihi pe te u fakaʻiseʻisa nai ʻi heʻeku ngaahi filí. Fēfē kapau ʻe fakakaukau ʻa e faʻē ʻa ʻAlisoní ke ne toe fakafoki ʻe ia ʻa ʻAlisoni? Te u fakaʻiseʻisa nai ʻi heʻeku ʻofa mo maheni mo ʻAlisoní? Ka ko e hā ka u ka fakaʻiseʻisa ai? Ko e tokoni ki he kakai kehé ʻoku ʻikai ko ha meʻa ia ke fakaʻiseʻisa ai! Ko ha meʻa ia ke houngaʻia ai.
ʻOku ou houngaʻia ʻia Kulisitolo, ʻEniselo pea mo ʻAlisoni. ʻOku mālō mo kinautolu ke u ako ai ke u hoko ko ha faʻē. Ne u ako e founga ke u ʻā tuʻuapō ai ke fetongi e taipá, ʻa e founga hono akoʻi e fānau īkí ke lotú, ʻa e founga ke ʻofa lahi ange ʻi he meʻa ne u fakakaukau ʻe malavá. Ko ha meʻa ia naʻe ʻikai ke u fakakaukau te u teitei maʻu.
Mahalo ko hoku tufakanga he māmaní ke tauhi ʻa kinautolu ʻoku ʻikai haʻanau faʻeé pe ʻoku nau mamaʻo mei heʻenau faʻeé.
ʻOku ou feinga ke u talitali lelei mo fanongo tokanga ki ha taha pē ʻokú ne fie maʻu ʻeku tokoní. Ko e taimi ʻoku haʻu ai e ongo faifekaú, ʻoku ou feinga ke fakafōtunga kiate kinaua ʻo hangē pē ka fakahoko ia ʻe heʻena faʻeé. Kapau ʻoku hokosia hona ʻaho fāʻeleʻí, ʻoku ou taʻo ha foʻi keke maʻanaua. ʻOku ou ʻeke ange pe ʻoku ngaohi ʻe heʻena mātuʻá haʻana meʻatokoni makehe pea te u feinga ke ngaohi ia maʻanaua. ʻOku ou ʻilo ʻoku mamaʻo ʻena mātuʻá, ko ia ko ha meʻa leva ʻeni te u lava ʻo fakahoko ke fakalotolahi kiate kinaua.
Naʻá ku faʻa loto-mamahi ʻi heʻeku nofo taʻemalí peá u fakaʻamua haʻaku fānau tonu, ka ko e fatongia fakaefaʻeé ko ha uiuiʻi makehe ia ʻoku foaki ʻe he ʻOtuá ki he fefine kotoa pē. Mahalo pē ʻoku ʻikai haʻo fānau tonu, ka te ke kei lava pē ʻo hoko ko ha faʻē.