Maʻá e Mātuʻá
Akonaki fekauʻaki mo e Ikuna ʻia Sīsū Kalaisí
Laʻitā mei he Getty Images
Siʻi Ngaahi Mātuʻa,
ʻOku kau ʻi he pulusinga ʻo e māhina ní ha ngaahi kaveinga mahuʻinga hangē ko Sīsū Kalaisi mo ʻEne Fakaleleí, ko hono ikunaʻi ʻa e ngaahi tokanga ʻo māmaní, mo e ngāue fakaetauhi ʻi he taimi ʻokú ke faingataʻaʻia fakaesino aí pe ko hao kaungāmeʻa. Fakaʻaongaʻi ʻa e ngaahi fakamatala ʻoku lisi atu ʻi laló mo honau ʻīmisí ke kamataʻi ha fepōtalanoaʻaki mo ho fāmilí pea tokoni ke mahino kiate kinautolu ʻa e ngaahi konga ko ʻení mo e ngaahi konga kehe ʻo e ongoongolelei ʻo Sīsū Kalaisi kuo fakafoki maí.
Fealēleaʻaki ʻi he Ongoongoleleí
Nofotaha ʻia Kalaisi
Lolotonga ʻa e faʻahitaʻu Toetuʻu ko ʻení, te tau lava ʻo tokanga lahi ange ki he Fakamoʻuí mo ʻEne feilaulau fakalelei maʻatautolú. Fakaʻaongaʻi ʻa e “Ngaahi Tefitoʻi Meʻa Mahuʻinga ʻo e Ongoongoleleí” ʻi he peesi 6 mo e fakamatala ʻa ʻEletā Jeffrey R. Holland ʻi he peesi 8 ke akoʻi ki hoʻo fānaú ʻa e meʻa kuo fai ʻe Sīsū Kalaisi maʻau pea mo kinautolú. Te mou lava ʻo faʻu fakataha ai ha lisi ʻo e ngaahi founga ʻoku faitāpuekina ai ʻe he tā sīpinga, ngaahi akonaki, moʻui, pekia, Fakalelei, mo e Toetuʻu ʻa Kalaisí ʻa koe mo ho fāmilí he ʻaho ní. Fakalahi hoʻomou fealeaʻakí ʻaki ʻa e fakamatala ʻi he peesi 22 fekauʻaki mo e ngaahi faikehekehe lahi ʻa e Fakamoʻuí mo Sētané.
Fakakaukau ki ha ngaahi founga ʻe lava ke mou fakahoko fakafāmili ai ha meʻa ʻoku anga faka-Kalaisi he faʻahitaʻu Toetuʻu ko ʻení.
Ikunaʻi ʻa e Tokanga ki Māmaní
ʻOku totonu ke tau mahuʻingaʻia ange ʻi he finangalo ʻo e ʻEikí ʻi he ngaahi tokanga ki māmaní. Lau ʻa e fakamatala ʻi he peesi 18 meia ʻEletā Hans T. Boom pea aleaʻi fakafāmili ʻa e ngaahi fehuʻi ko ʻení: Ko e hā ha ngaahi tokanga ki he māmaní ʻoku nau fakafeʻātungiaʻi koé? Te ke lava fēfē ʻo tokanga lahi ange ki he finangalo ʻo e ʻEikí? Kuó ke aʻusia nai ha meʻa tatau mo e meʻa naʻe aʻusia ʻe ʻEletā Pumú? Ko e hā e meʻa naʻá ke akó?
Ngaahi Faingataʻaʻia Fakaesinó mo e Ngāue Fakaetauhí
Lau ʻa e ongo fakamatala ʻi he peesi 30 mo e 32. Fakatokangaʻi ʻa e ngaahi fakakaukau mahuʻinga ʻoku ngali ʻaonga taha ki hoʻo fānaú. Kapau ʻoku faingataʻaʻia fakaesino ha taha ʻi ho fāmilí, nofotaha pē ʻi he lelei ʻokú ne lava ke faí. Kapau ʻokú ke ngāue fakaetauhi ki ha taha ʻoku faingataʻaʻia fakaesino, aleaʻi ʻa e founga ʻe lava ke liliu ai ʻe he ngaahi tefitoʻi moʻoni ko ʻení ʻa e founga te ke lava ʻo tokoniʻi ai ʻa e tokotaha ko iá.
Tokoni ki he Haʻu, ʻo Muimui ʻIate Au
Vakai ki he peesi 25 ki ha fakamatala nounou mei he moʻui ʻa Seini Mēningi Sēmisí, ko ha fefine tui faivelenga ki hono Fakafoki Mai ʻo e Ongoongoleleí ʻi he kuonga muʻá.
Vakai ki he peesi 26 ki he naunau tokoni ki hoʻo ako fakauike mo ho fāmilí ʻa e Haʻu, ʻo Muimui ʻIate Aú.
Fakafiefia ʻa e Ako Fakafāmilí
Faaitaha ʻo Uouangataha
Tokāteline mo e Ngaahi Fuakava 38:24–31
ʻI he Tokāteline mo e Ngaahi Fuakava 38:27, ʻoku folofola ai ʻa e Fakamoʻuí, “ʻOku ou pehē kiate kimoutolu, ke mou taha pē; pea kapau ʻoku ʻikai te mou taha, ʻoku ʻikai ʻaʻaku ʻa kimoutolu.” ʻOku poupouʻi mai ke tau taha koeʻuhí ke tau “hao mei he mālohi ʻo e filí” (Tokāteline mo e Ngaahi Fuakava 38:31).
-
Tuʻu fakataha ʻi he lotomālie ʻo e lokí.
-
Fili ha toko taha ke lue ʻi lotomālie ʻi he kulupú.
-
Toe fai pē ʻa e ʻekitivitií ka ko e taimi ní mou tuʻu fakakulupu vāvāofi, pea fetuiaki e ngaahi nimá ʻo ka lava.
Fealeaʻakí: ʻOku tau malu ange fēfē mei he ngaahi ivi tākiekina mei tuʻá ʻi he taimi ʻoku tau tuʻu mālohi fakataha mo vāvāofi aí? ʻOku maluʻi fēfē kitautolu ʻe he faaitaha angé?
Fakahā Fakatāutahá
Tokāteline mo e Ngaahi Fuakava 42:61
ʻE ʻomi ʻe he ʻEikí ha fakahā ki heʻetau moʻuí. “Kapau te ke kole, te ke maʻu ha fakahā hoko mo e fakahā, pea mo ha ʻilo hoko mo e ʻilo” (Tokāteline mo e Ngaahi Fuakava 42:61).
-
Tangutu takatakai mo e fāmilí. Taufetongi ʻi hono tali ʻa e fehuʻi, “Ko e hā ha ngaahi founga ʻe lava ke u fekumi ai ki ha fakahā fakatāutahá?”
-
ʻOmi ha ngaahi sīpinga mei he folofolá.
-
ʻOku tau “fanongo [fēfē] kiate Iá”?
Fealeaʻakí: Ko e hā ha ngaahi sitepu ʻe lava ke tau foua fakafāmili ke fetokoniʻaki ai ke tau maʻu mo ʻiloʻi ʻa e fakahā fakatāutahá?
ʻEkitivitī filí: Lau fakataha ʻa e lea ʻa Palesiteni Russell M. Nelson, “Fakahā maʻá e Siasí, Fakahā ki Heʻetau Moʻuí,” Liahona, Mē 2018, 93–96.