Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko e Nofoʻanga ʻo e Fineʻeikí
ʻOku faʻa tangutu maʻu pē ʻeku faʻeé ʻi he feituʻu tatau ʻi he ʻotu muʻá ʻi he Fineʻofá ʻi he Sāpate kotoa.
Tā ʻo e ʻū seá mei he Getty Images
Naʻá ku nofo mo hoku husepānití ʻi he uooti tatau mo ʻeku faʻē fitá. ʻI heʻeku hoko ko ha mēmipa ʻo e kau palesitenisī ʻo e Fineʻofá, ne u tangutu ai ʻi muʻa he loki Fineʻofá he Sāpate takitaha ʻo hanga mai ki he kau fafiné. Naʻe tangutu maʻu pē ʻeku faʻeé ʻi he feituʻu tatau ʻi he ʻotu muʻá.
Naʻá ku saiʻia he sio ki heʻene ngaahi tali ki he lēsoní mo fanongo ki heʻene vahevahé. ʻI he hili ʻa e fakataha kotoa pē, naʻá ne ʻuma ki hoku kouʻahé mo kuku hoku nimá. Naʻá ku vāofi mo ʻeku faʻeé, ko ia naʻá ku loto-mamahi lahi ʻi he taimi naʻá ne mate fakafokifā aí.
Hili hono meʻafakaʻeikí, naʻe faingataʻa ke u fehangahangai mo ʻeku ngaahi ongo fakaelotó. ʻI he aʻu ki he ʻaho Sāpaté, naʻe ʻeke mai ʻe hoku husepānití pe te u ongoʻi sai pē ke u maʻulotu toko taha. Naʻe faʻa hoko ʻa hono uiuiʻí ke ne mavahe ai mei homau uōtí.
Naʻá ku talaange, “Te u sai pē au kae ʻoua pē naʻá ku sio ki he nofoʻanga ʻa e fineʻeikí ʻoku ʻikai ke nofoʻí. ʻOku ʻikai ke u ʻilo pe te u lava nai ʻo sio ki he seá pea kei mapukepuke pē hoku loʻimatá.”
Naʻe fokotuʻu mai ʻe hoku husepānití ke u feinga ke ʻoua te u sio ki he seá. Naʻá ku fakakaukau te u fai hoku lelei tahá.
Naʻe poupou mo loto-ʻofa ʻa e tokotaha kotoa pē ʻi he lotú. ʻI he hokosia e taimi ke ʻalu ai ki he Fineʻofá, naʻá ku tangutu ʻi hoku nofoʻanga ʻi muʻá, ka naʻá ku hanga pē ki he falikí.
Ka ʻi he kamata ʻa e lēsoní, naʻe ʻikai ke u lava ke taʻe sio ki he nofoʻanga angamaheni ʻo ʻeku faʻeé. Naʻá ku fakakaukau te u sio ki ha sea ʻoku ʻikai nofoʻi, ka naʻá ku sio ki heʻeku fefine ngāue fakaetauhí ʻokú ne tangutu mai ʻi he nofoʻanga ko iá. Naʻá ne malimali mai kiate au. Naʻá ku ongoʻi ʻa e fiemālie mo e houngaʻia ʻi heʻene angaʻofá. Naʻá ku lava lelei ʻo ʻosiki ʻa e fakatahá taʻe te u ongoʻi loto-mamahi. Hili e fakatahá naʻá ku fakamālō ange kiate ia.
“Ko e meʻa pē taha naʻá ku ʻilo he ʻikai te u lavaʻi he ʻaho ní ko e sio ki he nofoʻanga ʻo e Fineʻeikí. Naʻá ke ʻilo mei fē?” Ko ʻeku fehuʻí ange ia.
Naʻá ne tali mai ʻo pehē, “ʻI heʻeku hū mai pē he ʻaho ní, naʻá ku maʻu pē ha ongo ʻe faingataʻa kiate koe ke ke sio ki he nofoʻanga ʻo e fineʻeikí ʻoku ʻikai nofo ai ha tahá. Ko ia ne u fakakaukau leva ke u tangutu ai.”
Naʻe mahuʻinga ʻaupito ange ʻa e ngāue loto-ʻofa ko ʻení kiate au ʻi he meʻa naʻá ne mafakakaukauá. ʻOku ou houngaʻia ʻi heʻene fakafanongo ki he ueʻi ʻa e Laumālié. ʻOku ou ʻilo ʻe lava ʻe he fanga kiʻi ngāue īkí ʻo fakamoʻui ʻa kinautolu ʻoku tau ngāue fakaetauhi ki aí. ʻOku ou tui ko e founga ʻeni ʻoku finangalo ai ʻa e Fakamoʻuí ke tau ngāue fakaetauhi ʻaki ki he niʻihi kehé.