Go long Kraes mo No Go Yuwan
Bes wei blong yufala i mekem wol ia i kam gud moa, i blong mekem wol ia i rere from Kraes, taem yufala i stap invaetem evriwan blong folem Hem.
Mi jes kasem wan leta we i kam long wan yang woman we i askem kwestin. Hem i raet i se: “Mi fas i stap. … Mi no sua se huia mi, be mi filim se mi stap ia from wan bigfala samting.”
?Yu yu bin gat wan filing olsem we yu stap lukaotem huia yu, mo askem yuwan sapos Papa long Heven i save huia yu, mo sapos Hem i nidim yu? Ol dia yut blong mi, mo long evriwan. Mi testifae se ansa hem i !yes! !Lod i gat wan plan blong yu! Lod i mekem yu yu rere from dei ia, naoia, blong yu wan paoa mo fos blong mekem gud insaed long bigfala wok blong Hem. !Mifala i nidim yufala! !Bae hem i no bigfala sapos i no gat yufala!
Folem sam tabu situesen, Profet blong yumi we yumi lavem tumas, Presiden Russell M. Nelson i mekem mi tingbaot tu simpol trutok we oli stap olsem fandesen long bigfala mo glori wok ia.
Taem mi sidaon long sofa wetem hasban blong mi, profet i pulum jea blong hem i kam, we ni blong hem i kolosap long ni blong mifala, mo i lukluk mi wetem ol blu ae we i stikim man. Mi no save stret se hat blong mi i hariap o i stop fulwan taem hem i singaotem mi blong holem wok long Yang Woman Jeneral Presiden. Hem i askem wan kwestin we i ring long hat blong mi: “Bonnie. ?Wanem i samting we i moa impoten we ol yut oli nidim blong save?”
Mi tingting hevi blong wan smol taem mo talem: “Oli nidim blong save huia olgeta.”
“!YES!” hem i singaot, “mo oli nidim blong save wanem stamba tingting blong olgeta.”
Tabu Fasin blong Yumi
Yu yu wan pikinini blong Papa long Heven. Hem i lavem yu plante nao, Hem i sendem Pikinini blong Hem, Jisas Kraes, blong pem praes from yu mo from mi.1 Lav we Sevya i gat long yu, i no save stop— iven taem yumi mestem rod! I no gat wan samting we i save seperetem yumi long lav blong God.2 Taem yu tingbaot lav ia, hem i save pusumbak ol tingting we i fasfas blong wol ia we oli stap traem blong daonem tras we yu gat paoa long tabu aedentiti blong yu mo mekem yu no save luk paoa we yu save kasem.
Long wan las FSY Konfrens, mi mitim ol yang woman we oli stap gat hadtaem long laef. Tufala yang woman i talem se tufala i tanem tufala long petriakel blesing blong tufala blong faenembak lav mo rod we Lod i soem long wanwan long tufala. Faenem petriakel blesing blong yufala naoia, waepemaot das long hem sapos yu mas mekem, mo stadi long hem plante taem. Sapos yu no gat wan, kasem wan kwik. No pusumbak taem blong faenemaot wanem we Lod i stap talem long yu abaot huia yu.
Stamba Tingting blong Yumi we I No Save Finis
Nambatu trutok blong Presiden Nelson we hem i talem, i blong save stamba tingting blong yumi. Hemia nao wok blong yumi we i bigwan mo i hae.
Plante yia i pas, boe blong mi, Tanner, i gat faef yia nomo taem hem i bin plei futbol. !Hem i glad tumas!
Taem mifala i kasem gem, mifala i luksave se tim blong hem i stap yusum wan standet saes gol—no i no wan smol gol net, be wan bigfala net we i bigwan tumas blong pikinini blong faef yia.
Gem ia i go defren taem mi luk se Tanner i go stanap long ples blong golkipa. !Mi sapraes tumas! ?Hem i rili andastanem wok blong hem blong gad long net ia?
Wesil i blo, mo mifala i intres tumas long gem nao mifala i fogetem Tanner. Kwiktaem, wan blong opos tim i kasem balong mo i kikim i go from hem. Mi lukluk i go long Tanner blong meksua se hem i rere blong stanap long ples blong hem mo difendem gol ia. Mi luk wan samting we mi no ting long hem.
Long sam poen long gem ia, samting i pulum tingting blong Tanner mo hem i stat blong wivim ol han blong net i go tru long ol defdefren hol blong net. Nao, hem i mekem sem samting wetem raet han. Afta, lef leg. Laswan, raet leg. Tanner i fas gud long net. Hem i fogetem wok blong hem mo wanem hem i bin promesem tim blong mekem.
Nating laef blong Tanner long futbol i no laef longtaem, lesen blong hem long mi long dei ia, i neva go lus. Samtaem, samting i pulum tingting blong yumi aot long ples we yumi stap long hem, mo yumi yusum paoa blong yumi long ol defren ples. Wan long ol tul blong faet we i strong moa, i blong pulumaot tingting blong yumi long wanem i gud, mo ol moa gud samting, we, long taem blong nid, oli save mekem yumi blaen mo fasem yumi longwe long bes wok—stret wok we Hem i singaotem yumi blong mekem long wol ia.3
Stamba tingting blong yumi we i no save finis, i blong go long Kraes mo joen strong wetem Hem long bigfala wok ia. I simpol nomo olsem blong mekem wanem Presiden Nelson i tijim: “Eni taem we yumi mekem eni samting we i stap helpem eniwan … mekem mo kipim ol kavenan wetem God, nao yumi stap help blong mekem Isrel i kam tugeta long wan ples.”4 Taem yumi mekem wok blong Hem tugeta wetem Hem, yumi kam blong save mo lavem Hem moa.
Yumi lukaot blong go kolosap long Hem tru long fet, fasin blong sakem sin we yumi holemtaet, mo stap obei ol komanmen. Taem yumi fasem yumi long Hem tru long ol kavenan mo ol odinens, laef blong yumi i fulap wetem tras,5 mo proteksen,6 mo glad we i dip mo i stap.7
Taem yumi stap go long Hem, yumi luk ol narawan tru long ol ae blong Hem.8 Go long Kraes. Go naoia, be no go yuwan!9
Gospel blong Jisas Kraes i no wan naeswan; hem i wan mas long evriwan. “I no gat narafala rod o wei we bae God i sevem man, be nomo, long Kraes mo tru long Kraes.”10 !Yumi nidim Jisas Kraes! Wol ia i nidim Jisas Kraes.11
Tingbaot. Bes wei blong yufala i mekem wol ia i kam gud moa, i blong mekem wol ia i rere from Kraes, taem yufala i stap invaetem evriwan blong folem Hem.
I gat wan stori we i gat paoa insaed long Buk blong Momon, abaot Sevya we i laef bakegen long ded we i spendem taem wetem Ol Man blong Nifae. ?Yu yu save tingting se taem ia i bin olsem wanem?
Taem we Kraes i anaonsem se Hem i mas gobak long Papa, “i sakem ol ae blong hem raonabaot long grup blong pipol ia.”12 Taem Hem i luk wota blong ae insaed long ae blong ol pipol ia, Hem i bin save se hat blong olgeta i wantem tumas blong Hem i stap smol moa.
Hem i askem: “?Yufala i gat eniwan we i sik long medel blong yufala? Karem olgeta oli kam long ples ia. ?Yufala i gat eniwan we bodi blong olgeta i nogud, o oli blaen, o … we sora blong olgeta i fas, o we oli gat hadtaem long eni fasin? Karem olgeta i kam long ples ia mo bae mi mekem olgeta i oraet.”13
From Hem i gat bigfala lav mo sore, Hem i no gat limit mo Hem i singaotem evriwan “we oli gat hadtaem long eni fasin.” Mi laekem tumas se, i no gat wan samting we i bigwan tumas o smol tumas blong Jisas Kraes i hilim.
Hem i save ol safaring blong yumi tu, mo i singaotem olgeta we oli wari, o oli sik long tingting, olgeta we oli taed, olgeta wetem hae tingting, mo olgeta we oli andastanem rong olgeta, olgeta we oli stap olgetawan, o olgeta we oli “gat hadtaem long eni fasin.”
Mo evriwan ia “… oli go fored …, mo hem i mekem olgeta oli kam oraet. …
“ … Mo olgeta we oli bin kam oraet tugeta wetem olgeta we oli bin stap gud nomo, oli bodaon long ol leg blong hem, mo oli wosipim hem.”14
Evri taem mi ridim stori ia, mi askem miwan: ?Bae mi tekem hu i go long Kraes? ?Hu nao bae yu tekem hem i go?
?Bae yumi save luk raon bakegen, olsem Jisas i bin mekem, blong meksua se yumi no mestem wan, o yumi invaetem evriwan blong kam blong save Hem?
Bae mi serem wan eksampol long hao i simpol blong mekem hemia. Fren blong mi we i gat 15 yia, Peyton, i gat wan gol blong ridim faef ves blong skripja long brekfas, evri dei, be hem i no mekem hemwan. Hem i lukluk bakegen, nao Peyton i invaetem papa mo mama, brata mo sista blong hem, iven brata we i gat faef yia blong mekem semmak. Smol aksen ia i wanem we Kraes i stap tijim taem Hem i bin invaetem: “Karem olgeta oli kam long ples ia.”
Invitesen ia, we i kam long Lod, i stap yet tedei. Ol yang woman mo ol yang man, stat naoia insaed long hom blong yufala. ?Bae yufala i prea mo askem Papa long Heven olsem wanem we yu save sapotem papa mo mama blong yu taem oli gohed blong go long Kraes? Oli nidim yu i semmak olsem we yu nidim olgeta.
Afta, lukluk bakegen long ol brata, sista, ol fren, mo ol neba blong yu. ?Hu nao bae yu tekem hem i go long Kraes?
Sevya i talemaot: “Luk Mi Mi laet; Mi bin mekem wan eksampol blong yufala.”15 Yumi yu filim lav mo pis blong Sevya taem yumi joenem Hem blong sevem famli blong God, from se Hem i promesem se: “Man we i biaen long mi, bambae hem i no save wokbaot long tudak. Hem bambae i gat laet blong laef.”16
!I wan taem blong glori blong joenem wok blong Kraes!
Yes, yufala i stap ia from wan bigfala samting. Mi joenem Presiden Nelson we i talem: “Lod i nidim yufala blong jenisim wol ia. !Taem yufala i akseptem mo folem tingting we Hem i gat from yu, bae yu luk se yu stap mekem samting we i no posibol!”17
!Mi testifae wetem stret tok se Lod i save huia yu !mo Hem i lavem yu! Tugeta, bae yumi muvum stamba tingting blong Hem kasem bigfala dei ia taem we Kraes Hemwan i kambak long wol ia mo i singaotem wanwan long yumi blong go “long ples ia.” Bambae yumi glad blong kam tugeta wanples, from se yumi nao, yumi go long Kraes mo yumi no go yumiwan. Long nem blong Jisas Kraes, amen.