Prea se Bae Hem I Yusum Yumi
Ol smosmol efot i kam tugeta blong mekem wan bigfala jenis, blong stap onarem wanwan samting we yumi mekem olsem ol disaepol blong Jisas Kraes.
Biskit ia we oli mekem oli mekem long tintin flaoa mo pistas, i wan tangkyu. Famli Kadado nao oli mekem, mo blong 10 yia, oli bin gat bisnis blong tri bekeri long Damaskes, Siria. Taem wo i bin kam, oli blokem ol kaekae mo ol saplae blong kasem pat blong siti blong olgeta. Ol famli Kadado oli stat blong hanggri. Taem we situesen ia i kam moa nogud, Latter-day Saints Charities (Lata-dei Sent Jareti) mo sam wokman we oli gat strong paoa long tingting, blong Rahma WorldWide, oli stat blong givim hot kaekae evri dei, mo givim melek long ol pikinini. Afta long wan hadtaem, famli ia i statem laef blong olgeta—mo bekeri blong olgeta tu—bakegen, be naoia, long wan niufala kantri.
“Blong moa long tu manis, mifala i bin save kasem kaekae long kijin blong Rahma–Latter-day Saint [Jareti]. Sapos i no hemia, bae mifala save hanggri ded. Plis akseptem hemia … wan samting blong stoa blong mi, olsem wan saen blong talem tangkyu. Mi askem God we i gat Olgeta Paoa blong i blesem yufala … long evri samting we yufala stap mekem.”1
Wan biskit blong talem tangkyu mo wan memori. Oli mekem speseli blong yufala. Long olgeta evriwan we oli bin prea afta we oli wajem wan stori long nius, long olgeta evriwan we oli bin volontia we maet oli gat ol nara samting, o oli mekem donesen i go long yumaniterian basket, mo stap trastem se bae i help long sam wei—tangkyu.
Tabu Responsabiliti blong Lukaotgud long Olgeta we Oli Pua
Jos Ia blong Jisas Kraes i stap andanit long tabu responsabiliti ia blong lukaotem ol pua.2 Hem i wan long ol strong pos blong wok ia blong fasin blong sevem man mo mekem oli kam olsem wan god.3 Wanem i bin tru long taem blong Alma, hem i tru tu long yumi tedei: “Mo long fasin ia nao, long taem we oli stap kam antap gud, oli no sendembak olgeta we oli neked, o olgeta we oli hanggri, o olgeta we oli tosta, o olgeta we oli sik, o olgeta we oli no fidim olgeta; mo oli no putum hat blong olgeta long ol rij samting; from hemia, oli glad blong givim samting long evriwan, ol olfala mo ol yangfala, olgeta long kalabus mo olgeta we oli fri, ol man mo ol woman, i nomata sapos oli blong jos o oli no blong jos. Oli mekem semmak long eni kaen man, nomata huia i stap long nid.”4
Jos i ansa long tabu responsabiliti ia long plante defren wei, we i tekem tu:
-
wok blong givhan we yumi mekem tru long Rilif Sosaeti, ol kworom blong prishud mo ol klas;
-
fasin blong livim kaekae mo wei blong yusum ol fast ofring;
-
ol fam blong welfea mo ol ples blong putum kaekae long tin;
-
ol welkam senta blong ol man defren kantri we oli kam insaed long kantri;
-
program blong kea long olgeta we oli stap long kalabus;
-
ol help we oli kam long Jos yumaniterian;
-
mo JustServe ap, long ol ples we oli stap, we i majem ol volontia i go wetem ol janis blong givim seves.
Hemia i evri wei, we oli oganaesem tru long prishud, long ples we ol smosmol efot i kam tugeta blong mekem wan bigfala jenis, blong stap onarem wanwan samting we yumi mekem olsem ol disaepol blong Jisas Kraes.
Ol Profet Oli Gat Responsabiliti blong Lukaot long Ful Wol
Ol profet oli responsibol blong kea long ful wol, i no blong ol memba blong Jos nomo. Mi save ripotem aot long eksperiens blong miwan, olsem wanem Fas Presidensi oli tekem responsabiliti ia i kam long olgetawan. Taem ol nid i stap gro bigwan, Fas Presidensi i givim responsabiliti ia long mifala blong mekem plante long ol program blong yumaniterian long wan moa impoten wei. Oli intres long ol bigfala divelopmen mo evri smosmol ditel.
I no longtaem i pas, mifala i givim long olgeta, wan klos blong hospital blong proteksen, we Beehive Clothing i bin somap blong ol hospital oli yusum long taem blong wol sik ia. Olsem wan medikol dokta, Presiden Nelson i bin intres bigwan. Hem i no wantem blong luk nomo. Hem i wantem blong traem werem—i jekem ol en blong han, mo longfala blong hem mo wei we oli fasem i go biaen. Afta, hem i talem long mifala wetem wan sofsof voes, “Taem yu mit wetem ol pipol we oli asaenem yu long olgeta, talem tangkyu long olgeta from fasin blong olgeta blong livim kaekae, ol fast ofring blong olgeta mo wok blong olgeta blong givhan long nem blong Lod.
Yumaniterian Ripot
Folem daereksen blong Presiden Nelson, mi stap ripot i kambak long yu abaot hao Jos Ia blong Jisas Kraes blong Ol Lata-dei Sent i stap ansa long ol saeklon, ol etkwek, olgeta we oli muvumaot olgeta long ol hom blong olgeta—mo iven wan wol sik—tangkyu long kaen fasin blong ol Lata-dei Sent mo plante fren. Long wan taem we i gat moa long 1,500 COVID-19 projek we Jos i stap lukluk bigwan long olgeta blong help ova long 18 manis, Jos i givhan tu long 933 disasta mo ol hadtaem long olgeta we oli lusum ol hom blong olgeta long 108 kantri. Be ol namba i no talem stori fulwan. Letem mi serem fo sot eksampol blong givim wan smol lukluk abaot wanem we i stap hapen.
KOVID Help long Saot Afrika
Dieke Mphuti we i gat sikstin yia, blong Saot Afrika, i bin lusum papa mo mama blong hem sam yia i pas, we i mekem hem i mas lukaotem ol tri yangfala brata mo sista, hemwan. I wan had samting finis blong faenem kaekae, be ol saplae we i sot mo ol kwarantin blong KOVID i mekem i no posibol nating. Oltaem oli hanggri, oli faenem i had blong kasem inaf kaekae be tru long bigfala help we i kam long ol neba.
Long wan naesfala dei long Ogis 2020, Dieke i bin sapraes long wan noknok long doa blong hem. Hem i openem mo faenem tu strenja—wan i wan ripresentativ blong Jos long eria ofis long Joanesbeg, mo narafalawan, wan ofisol blong Dipatmen blong Saot Afrika long Sosol Divelopmen.
Tufala oganaesesen ia oli bin joen tugeta blong karem kaekae i go long ol famli we oli stap long denja. Filing blong nomo wari i kavremap Dieke taem ae blong hem i kasem hip blong kon mo ol narafala krop we oli nidim, we oli pem tru long yumaniterian basket blong Jos. Hemia bae i helpem hem blong sapotem famli blong hem blong sam wik kasem taem we help blong gavman bae i stat blong kasem hem.
Stori blong Dieke i wan long ol taosen eksperiens we i bin hapen raon long wol long taem blong COVID wol sik ia, tangkyu long ol tabu kontribusen blong yufala.
Afgan Help long Ramsten
Yumi evriwan i bin luk ol pikja blong wanem i stap hapen naoia tru long nius—plante long ol pipol we oli stap long denja oli stap flae aot long Afganistan. Plante oli kam kasem ol ples we ol plen oli stap long hem o ol ples we bae oli stap blong smoltaem long Kata, Yunaeted Stet, Jemani mo Spen bifo oli gohed blong kasem ples we bae oli stap long hem. Ol nid blong olgeta i hariap, mo Jos i bin givhan wetem ol saplae mo ol volontia. Long Ramsten Easfos Bes, long Jemani, Jos i givim wan bigfala donesen blong ol daepa, melek blong ol bebi, kaekae mo ol sus.
Sam long ol Rilif Sosaeti sista oli bin luk se plante long ol woman long Afganistan oli stap yusum ol set blong ol hasban blong olgeta blong kavremap hed blong olgeta from se oli bin karemaot ol kastom kaliko blong werem long hed, from ol muvmuv mo fasfas olbaot long Kabul eapot. Long wan fasin blong frensip we i krosem eni biliv o laen blong kastom, ol sista blong Ramsten Fas Wod oli kam tugeta blong somap ol kastom klos blong ol Muslim blong ol woman blong Afganistan. Sista Bethani Halls i bin talem, “Mifala harem se ol woman oli gat nid long saed blong ol gamen blong prea, mo mifala i stap somap blong mekem se oli fil gud long taem blong prea.”5
Haiti Etkwek Help
Nekis eksampol ia i stap soem se yu no nid blong kam rij o olfala blong kam wan tul blong mekem gud. Marie “Djadjou” Jacques we i gat eitin yia, i blong Kavaelon Branj long Haiti. Taem we etkwek i damejem gud wan ples kolosap long taon blong hem long Ogis, haos blong famli blong hem i wan long olgeta ten taosen bilding we i bin foldaon. I had blong pikjarem harem nogud we i kam taem yu lusum hom blong yu. Be tingting ia blong letem harem nogud ia i win, Djadjou—wetem sapraes—i lukluk long defren wei.
Associated Press
Hem i luk wan olfala neba we i stap traehad mo hem i stat blong lukaotem hem. Hem i helpem hem blong karemaot ol toti. Nomata se hem i taet, hem i joenem ol narafala memba blong Jos blong givimaot kaekae mo ol samting blong yusum long taem blong imejensi i go long ol narafala man. Stori blong Djadjou i wan long plante eksampol blong seves we i gat paoa, we wan yut mo ol yang adalt i save mekem, taem oli traehad blong folem eksampol blong Jisas Kraes.
Rilif blong Hevi Ren we Foldaon long Jemani
Sam wik nomo bifo long etkwek, wan narafala grup blong ol yang adalt oli stap givim seves narasaed long Atlantik. Bigfala hevi ren we foldaon long wes Yurop, long Julae oli moa series bitim ol nara taem blong 10 yia.
Taem we ol wota i go daon, wan stoa kipa long saed blong reva long distrik blong Ahrweila, Jemani, i lukluk ol damej mo i filim i tumas long hem. Man ia we tingting blong hem i stap daon, wan strong Katolik, i prea long wan sofsof voes, se God bae i sendem wan blong helpem hem. Long nekis moning nomo, Presiden Dan Hammon blong Jemani Frankfet Misin i kam long rod wetem wan smol grup blong ol misinari we oli werem ol yelo set blong Ol Han blong Help. Wota i bin kasem kolosap 3 mita long wol blong stoakipa ia, mo i lego bigfala sofmad i stap. Ol volontia oli karemaot sofmad, karemaot kapet mo ol wol we i drae, mo hipimap evri samting ia long rod blong trak blong toti i karemaot. Stoa kipa ia we i glad tumas i wok saed long olgeta blong plante aoa, i sapraes se Lod i bin sendem wan grup blong ol wokman blong Hem blong ansarem prea blong hem—!mo blong 24 aoa taem nomo!6
“So, Mi Prea se Hem Bae I Yusum Yumi”
Taem hem i stap tokbaot ol efot we yumaniterian blong Jos i stap mekem, Elda Jeffrey R. Holland i talem: “Ol ansa blong ol prea oli kam … plante taem … tru long ol narafala pipol we God i stap yusum. So, Mi prea se Hem bae i yusum yumi. Mi prea se bae yumi kam ol ansa blong ol prea blong pipol.”7
Ol brata mo sista, tru long givhan blong yufala, ol donesen, taem mo lav, yu bin ansa long prea blong plante prea. Be yet i gat plante moa blong mekem. Olsem ol memba blong Jos we oli baptaes, yumi stap andanit long kavenan blong lukaot long olgeta we oli stap long nid. Ol efot blong yumi wanwan i no nidim mane o blong yumi go longwe;8 oli nidim Tabu Spirit blong i lidim yumi, mo wan hat we i wantem blong mekem samting, mo talem long Lod: “Mi hemia, sendem mi.”9
Yia we Lod I Akseptem
Luk 4 i rekodem se Jisas i kam long Nasaret, long ples ia we hem i groap long hem, mo i stanap long ol kona blong haos blong prea blong rid. Hemia i kolosap long stat blong seves blong Hem long wol ia, mo Hem i kwotem wan sentens long buk blong Aesea:
“Hae God i jusumaot mi, mo paoa blong Spirit blong hem i kam fulap long mi blong mi talemaot gud nius long ol puaman. Hem i sanem mi blong mi talemaot long ol man we oli stap long kalabus se, ‘Yufala i go fri,’ mo blong mi talemaot long ol man we oli blaen se, ‘Ae blong yufala i save kam gud,’ Hem i sanem mi blong mi mekem ol man we oli stap harem nogud andanit long han blong narafala man oli go fri,
“Mo blong mi talemaot se, taem i kam finis we Hae God bambae i sevem ol man blong hem. …
“… Tedei, long taem ya we yufala i stap lisin long ol tok ya.”10
Mi testifae se skripja ia i bin kam tru tu long taem blong yumi tedei. Mi testifae se Jisas Kraes i kam blong hilim hat we i brokbrok. Gospel blong Hem i blong mekem olgeta we oli blaen oli save lukluk. Jos blong Hem i blong prijim paoa blong karemaot man long kalabus i go fri mo ol disaepol blong Hem raon long wol oli stap traehad blong helpem olgeta we oli kasem kil blong oli harem gud bakegen.
Letem mi ripitim kwestin ia we Jisas i askem long ol Aposol blong Hem, Saemon Pita: “?Yu yu lavem mi?”11 Hamas gospel i impoten, i stap insaed long olsem wanem yumi ansa long kwestin ia blong yumiwan mo “fidim sipsip blong [Hem].”12 Wetem bigfala respek mo lav long Jisas Kraes, Masta blong yumi, mi stap invaetem wanwan long yumi blong kam pat blong bigfala seves blong Hem, mo “mi prea se bae Hem i yusum yumi.” Long tabu nem blong Jisas Kraes, amen.