Stap Jenisim Laef I Go long Jisas Kraes long Wan Moa Tru Fasin
Ol skripja mo save blong yumi abaot God, oli ol presen— presen we plante taem tumas, yumi tekem i nating. Letem yumi holemtaet ol blesing ia long hat blong yumi.
Tangkyu tumas, Elda Nielson, long naesfala mesej blong yu. Yumi nidim hemia.
Ol dia brata mo sista blong mi. I no longtaem i pas, Presiden Russell M. Nelson i bin tijim yumi se: “Blong mekem gud eni samting, i nidim hadwok. Blong kam wan tru disaepol blong Jisas Kraes, i semmak nomo. Blong mekem fet mo tras blong yu long Hem i kam antap moa , i nidim hadwok.” Aot long ol tingting we Hem i givim long yumi blong mekem fet blong yumi long Jisas Kraes i kam antap moa, hem i we, yumi kam ol man we oli givim olgeta fulwan blong lanem samting, mo yumi draonem yumiwan insaed long ol skripja blong andastanem moa gud misin mo ministri blong Kraes. (Luk long “Kraes I Girap Finis; Bilif long Hem bae I Muvumaot Ol Bigfala Hil,” Liahona, Mei 2021.)
Yumi lanem, insaed long Buk blong Momon, se ol skripja we oli bin wan impoten pat blong famli blong Lihae—oli impoten tumas mekem se, Nifae mo ol brata blong hem oli gobak long Jerusalem blong karem ol buk we oli wokem long bras (luk long 1 Nifae 3–4).
Ol skripja oli soemaot wanem God i wantem long yumi, semmak olsem we Liahona i bin mekem blong Nifae mo papa blong hem. Afta we Nifae i brekem bonara blong hem, hem i nidim blong save weaples hem i mas go long hem blong karem kaekae. Papa blong hem Lihae, i lukluk Liahona mo i luk ol samting we oli raetem long hem. Nifae i luk ol nidel blong Liahona ia oli wok folem fet, fasin blong wok strong wetem strong tingting, mo mo hamas oli tekem se Liahona ia i impoten. Hem i luk raeting tu, we i isi blong ridim mo i givim andastaning long olgeta abaot ol rod blong Lod. Hem i kam blong luksave se Lod i stap mekem ol bigfala samting i hapen tru long ol smosmol samting. Hem i obei blong stap folem ol daereksen we Liahona ia i givim long hem. Hem i go antap long bigfala hil mo kasem kaekae blong famli blong hem, we oli bin safa plante from kaekae i no gat. (Luk long 1 Nifae 16:23–31.)
I luk long mi olsem se Nifae i wan studen we i givim hem fulwan long ol skripja. Yumi ridim se Nifae i bin glad tumas long ol skripja, i tingting hevi long hem long hat blong hem, mo i raetem olgeta blong ol pikinini blong hem oli lanem mo yusum blong helpem olgeta (luk long 2 Nifae 4:15–16).
Presiden Russell M. Nelson i bin talem:
“Sapos [yumi] ‘gohed strong, kakae gud long toktok blong Kraes, mo stap strong kasem en, … Bae [yumi] kasem laef we i no save finis’ [2 Nifae 31:20].
“Blong kakae gud, i moa bitim blong testem. Blong kakae gud i minim blong laekem blong kakae. Yumi laekem blong kakae ol skripja taem yumi stadi long olgeta wetem wan spirit we i glad blong faenem niu samting, mo wetem spirit blong stap fetful blong obei. Taem yumi kakae gud long ol toktok blong Kraes, nao yumi ‘raetem long tingting blong [yumi]’ [2 Korin 3:3]. Oli kam pat fulwan blong fasin blong yumi” (“Living by Scriptural Guidance,” Liahona, Jan 2001, 21).
?Wanem Sam long Ol Samting we Bae Yumi Mekem Sapos Sol blong Yumi I Glad long Ol Skripja?
Tingting blong hat blong yumi blong stap pat long kam tugeta blong Isrel long tugeta saed blong vel, bae i kam antap moa. Bae hem i nomol mo i kam fasin blong yumi blong invaetem famli mo ol fren blong yumi blong lisin long ol misinari. Bae yumi klin inaf, mo bae yumi gat wan tempol rekomen we i laef blong mekem se yumi save go long tempol fulap taem olsem we i posibol. Bae yumi wok blong faenem, rere, mo givim ol nem blong ol bubu blong yumi we oli ded finis i go long tempol. Bae yumi stap fetful blong kipim Sabat dei, go long jos evri Sandei blong riniu ol kavenan blong yumi wetem Lod, taem yumi stap klin inaf blong stap tekpat long sakramen. Bae yumi winim laef taem yumi gohed blong stap long kavenan rod, mo stap laef folem evri toktok we i kamaot long maot blong God (luk long Doktrin mo Ol Kavenan 84:44).
?Hem I Minim Wanem long Yu blong Stap Glad long Ol Samting blong Lod?
Blong stap glad long ol skripja hem i moa bitim blong stap hanggri mo tosta from save. Nifae i bin eksperiensem bigfala glad long laef blong hem. Be, hem i bin go tru ol hadtaem mo harem nogud tu (luk long 2 Nifae 4:12–13). “Be,” hem i talem: “Mi save huia mi bin trastem” (2 Nifae 4:19). Taem yumi stadi ol skripja, bae yumi andastanem moa plan blong God blong sevem man mo kam olsem wan god, mo bae yumi trastem ol promes we Hem i mekem long yumi insaed long ol skripja, mo tu, ol promes mo blesing blong ol profet blong tedei.
Wan aftenun, wan fren i bin invaetem waef blong mi mo mi blong go long hom blong hem. Boe blong tufala we i gat seven yia, David, i neva harem Baebol stori blong Deved mo Golaeat, mo hem i wantem blong harem. Taem mi stat blong talem stori, wei we Deved i gat fet long nem blong God blong Isrel, i givim kil mo kilim ded man Filistia ia wetem wan sling mo wan ston, mo i no gat wan naef blong faet long han blong hem, i bin tajem hat blong David (luk long 1 Samuel 17).
Wetem ol bigfala blak ae blong hem, hem i lukluk mi mo askem strong, “?Huia hem i God?” Mi eksplenem long hem se God i papa blong yumi long Heven mo we yumi lanem abaot Hem insaed long ol skripja.
Afta hem i askem mi, “?Wanem ia ol skripja?” Mi talem long hem se ol skripja hem i tok blong God mo we insaed long hem, bae hem i save faenem ol naesfala stori we bae i helpem hem blong save moa abaot God. Mi askem mama blong hem blong yusum Baebol we hem i gat long hom blong olgeta mo hem i no mas letem David blong go silip sapos hem i no ridim wan ful stori long hem. Hem i glad tumas taem hem i stap lisin long stori. Ol skripja mo save blong yumi abaot God, oli ol presen— presen we plante taem tumas, yumi tekem i nating. Letem yumi holemtaet ol blesing ia long hat blong yumi.
Taem mi stap givim seves long misin blong mi olsem wan yang man, mi kam blong luk se, blong stap tij wetem ol skripja, i jenisim laef blong fulap man. Mi kam blong luksave paoa insaed long ol skripja ia, mo olsem wanem oli i save jenisim laef blong yumi. Wanwan man we mifala i bin tijim gospel ia we i kambak bakegen, hem i bin ol defdefren man o woman wetem ol defdefren nid. Ol tabu skripja—yes, ol profesi we ol tabu profet oli raetem—oli tekem olgeta i go blong oli gat wan fet long Lod, mo blong oli sakem sin mo jenisim hat blong olgeta.
Ol skripja i fulumap olgeta wetem glad taem oli kasem insperesen, daereksen, kamfot long harem nogud blong olgeta, paoa, mo ansa long ol nid blong olgeta. Plante long olgeta oli disaed blong mekem ol jenis insaed long laef blong olgeta mo stat blong kipim ol komanmen blong God.
Nifae i leftemap tingting blong yumi blong stap glad long toktok blong Kraes, from se ol toktok blong Kraes bae i talem long yumi, evri samting we yumi mas mekem (luk long 2 Nifae 32:3).
Mi invaetem yufala blong gat wan plan we i no save jenis, blong stadi ol skripja. Kam Folem Mi i wan gudfala risos we yumi gat blong tijim mo lanem gospel, stap jenisim laef i go long Jisas Kraes long wan moa tru fasin, mo stap helpem yumi blong kam moa olsem Hem. Taem yumi stadi long gospel, yumi no stap lukaotem niu infomesen nomo; be, yumi stap lukaotem blong kam wan “niu man o woman” (2 Korin 5:17).
Tabu Spirit i stap gaedem yumi i go long trutok mo i testifae long long yumi abaot trutok (luk long Jon 16:13). Hem i givim laet long maen blong yumi, i mekem yumi andastanem moa samting long wan niu wei, mo i tajem hat blong yumi tru long revelesen blong God, we i stamba blong evri trutok. Tabu Spirit i mekem hat blong yumi i klin evriwan. Hem i givim insperesen mo i mekem yumi wantem laef folem trutok ia mo i talem kwaet long yumi, ol wei blong mekem samting ia. “Tabu Spirit … bambae i tijim yufala long olgeta samting” (Jon 14:26).
Ol toktok we Sevya i talemaot long Profet Josef Smit, Hem i talem:
“Ol toktok ia, i no ol man oli talem o i no wan man i talem, be mi nao mi talem; …
“From voes blong mi nao i talem [ol toktok ia] long yufala; from Spirit blong mi i givim long yufala, …
“Taswe, yufala i save testifae se yufala i bin harem voes blong mi, mo yufala i save ol toktok blong mi” (Doktrin mo Ol Kavenan 18:35–36).
Yumi mas lukaotem blong Tabu Spirit i stap wetem yumi oltaem. Gol ia, i mas rul ova long ol joes blong yumi, mo i mas lidim ol tingting mo aksen blong yumi. Yumi mas lukaotem evri samting we i invaetem paoa blong Spirit mo i no akseptem eni samting we bae i pusumaot paoa ia.
Mi testifae se Jisas Kraes i Pikinini blong Papa blong yumi long Heven we Hem i lavem tumas. Mi lavem Sevya blong mi. Mi talem tangkyu from ol skripja blong Hem mo from ol profet blong Hem we oli stap laef. Presiden Nelson hem i profet blong Hem. Long nem blong Jisas Kraes, amen.