Mi Fetful blong Lukaotem Nao Mi Kasem Praes
Mi invaetem yumi evriwan blong gohed blong mekem fet long Kraes i kam antap, Hem we i gohed blong jenisim laef blong olgeta we oli lukaotem Hem.
Stat long 1846, plante taosen paeonia we i gat ol man, ol woman, mo ol pikinini, oli stap wokbaot i go long Wes blong kasem Saeon. Bigfala fet blong olgeta i bildimap strong paoa long tingting blong olgeta, we i no gat en. Blong sam, trip ia i neva finis from oli ded folem rod i go. Ol narafalawan, oli bin stap fesem bigfala hadtaem, mo muv fored wetem fet.
From olgeta, plante jeneresen afta, famli blong mi i swim long ol blesing blong tru gospel ia blong Jisas Kraes.
Olsem narafala yang man, we bae mi tokbaot afta, mi bin gat 14 yia taem mi stat blong askem ol kwestin long saed blong relijin mo fet blong mi. Mi atendem wan jos we i gat nara bilif, kolosap long haos blong mi, be mi filim se mi wantem visitim plante defren jos.
Wan aftenun mi luk tu yang man we oli werem blak kot mo waet sot, mo stap gat wan gudtaem long haos blong neba blong mi. Ol yang man ia oli luk— spesel.
Nekis dei, mi mitim neba blong mi, Leonor Lopez, mo askem hem abaot tufala man. Leonor i eksplenem se tufala i ol misinari blong Jos Ia blong Jisas Kraes blong Ol Lata-dei Sent. Hem i glad tumas mo talem se famli blong hem oli kasem baptaes insaed long jos wan yia bifo. Hem i luk se mi intres, nao Leonor i invaetem mi blong mitim ol misinari mo lanem abaot Jos.
Tu dei afta, mi joenem famli blong Lopez blong mitim ol misinari. Tufala i introdiusum tufala olsem Elda Jon Messerly, blong Ogden, Yuta, mo Elda Christopher Osorio, blong Wolnat Krik, Kalifonia. Bae mi neva fogetem tufala.
From se mi gat 14 yia nomo, Elda Messerly i askem blong mifala mas go long hom blong mi, mekem se mama blong mi bae i save wanem tufala bae i tijim long mi. Long ples ia, hem i eksplenem, wetem kaen fasin, se tufala i kam blong serem wan mesej abaot Jisas Kraes mo askem hem blong i givim raet long tufala blong i tijim mi. Mama i agri mo hem i joenem mi tu taem tufala i bin tijim mi.
Tufala misinari i askem faswan long Leonor blong givim wan prea. Hemia i tajem mi bigwan from se prea blong hem i no blong stap ripripitim ol toktok we oli lanem baehat, be hem i talem wetem hat blong hem. Mi filim se hem i rili stap toktok long Papa blong hem long Heven.
Afta, ol misinari oli tijim mitufala abaot Jisas Kraes. Tufala i soem wan pikja blong Hem long mi, we i mekem mi glad tumas, from i wan pikja blong Kraes we i laef bakegen long ded, mo i stap laef.
Tufala i gohed blong tijim mitufala long olsem wanem Jisas i stanemap Jos blong Hem long ol taem bifo, wetem Hem long hed mo i joen wetem Olgeta Twelef Aposol. Tufala i tijim mitufala abaot Apostasi—Olsem wanem trutok mo atoriti blong Kraes i bin kamaot long wol afta we ol Aposol blong Hem oli bin ded.
Tufala i talem long mitufala abaot wan yangfala boe we i gat 14 yia, nem blong hem Josef Smit, we long eli 1800, hem i bin visitim ol defdefren jos, blong stap lukaotem trutok. Taem i pas, Josef i konfius moa. Afta we hem i ridim long Baebol se yumi save “askem long God”1 blong kasem waes, Josef i tekem aksen wetem fet, mo go long wan tabu bus blong prea mo askem wijwan jos, hem i mas joenem.
Wan long tufala misinari i ridim stori blong Josef abaot wanem i bin hapen taem we hem i bin prea:
“Mi bin luk wan laet, i saen antap i kamdaon, stret antap long hed blong mi, mo laet blong hem i saen bitim laet blong san, mo hem i saen i kamdaon gogo, i kasem mi.
“… Taem we laet ia i kasem mo stap saenem mi, mi bin luk tufala Man, we i no gat wan toktok we i save tokbaot laet mo glori blong Tufala, mo Tufala i stap flot nomo long ea antap long mi. Wan long Tufala i toktok long mi, i singaotem nem blong mi, mo talem wetem fingga blong Hem i poenem narawan—Hem, Hem i Pikinini blong Mi we Mi Lavem Tumas. !Lisin gud long Hem!”2
Long taem blong lesen ia, Spirit i bin konfemem sam long ol trutok long mi.
Faswan, God i lisin long ol prea blong evri pikinini blong Hem we oli mekem wetem tru hat, mo heven i open long evriwan—i no long sam nomo.
Nambatu, God we i Papa, Jisas Kraes mo Tabu Spirit, oli tri seperet man, oli wok wan long stamba tingting blong Olgeta, we “i blong mekem man i nomo save ded mo i kasem laef we i no save finis.”3
Nambatri, oli bin krietem yumi folem pikja blong God. Papa blong yumi long Heven mo pikinini blong Hem, Jisas Kraes, oli gat bodi blong mit mo bun olsem yumi, be Tufala i gat glori mo stret evriwan mo Tabu Spirit hem i no gat wan bodi blong mit mo bun, be hem i wan we i Spirit.4
Nambafo, tru long Josef Smit, Jisas Kraes i putumbak gospel mo tru Jos blong Hem long wol. Ol Aposol blong Kraes oli bin kasem prishud atoriti 2000 yia i pas, i semmak prishud we oli givim long Josef Smit mo Oliva Kaodri tru long Pita, James mo Jon.5
Laswan, mifala i lanem abaot wan narafala testeman abaot Jisas Kraes: Buk blong Momon. Ol profet blong bifo oli bin raetem, i tokbaot ol pipol we oli bin stap laef long Ol Amerika bifo, long taem bifo mo afta we Jisas i bon. Long hemia, yumi lanem olsem wanem oli save, oli lavem mo wosipim Kraes, we i bin kamkamaot long olgeta olsem Sevya ia we i laef bakegen long ded.
Spirit i tajem mi bigwan taem mi lanem abaot dikleresen blong Sevya long olgeta: “Luk, mi mi Jisas Kraes, we ol profet oli bin testifae se bambae mi kam long wol.”6
Tufala misinari i givim kopi blong Buk blong Momon long mitufala. Mifala i ridim mo akseptem invitesen ia long en blong Buk blong Momon, we i rid olsem:
“Mo taem we bae yufala i kasem ol samting ia, mi wantem askem strong long yufala se bae yufala i askem God, Papa we i No Save Finis, long nem blong Kraes, sapos ol samting ia i no tru; mo sapos bae yufala i askem wetem wan tru hat, wetem tingting we i tru blong wantem save, wetem fet long Kraes, bae hem i soemaot trutok blong ol samting ia long yufala, tru long paoa blong Tabu Spirit.
“Mo tru long paoa blong Tabu Spirit, bae yufala i save trutok long saed blong evri samting.”7
I bin kolosap 45 yia nao we mi mo mama blong mi i lanem faswan abaot glad mo paoa blong gat fet long Kraes. Hem i from bilif blong olgeta long Kraes mekem se famli blong Lopez oli bin serem niufala biliv blong olgeta wetem mi. Hem i from bilif blong olgeta long Kraes mekem se tufala misinari i lego hom blong tufala long Yunaeted Stet blong faenem mama blong mi mo mi. Hem i bilif blong evri dia fren we oli bin planem wan smol sid blong fet insaed long mitufala, mo i stat blong gro long taem ia, i kam wan bigfala strong tri blong ol blesing we oli no save finis,
Long ol yia blong blesing ia, mitufala i bin save, olsem we Presiden Russell M. Nelson i bin talemaot: “Evri samting we i gud long laef—evri blesing we oli save kam we oli gat mining long taem we i no save finis—i stat wetem fet. Blong stap letem God i win insaed long laef blong yumi, i stat wetem fet. Blong stap letem God i win insaed long laef blong yumi, i stat wetem fet se Hem i glad blong soem rod long yumi. Tru fasin blong sakem sin, we i stat wetem fet se Jisas Kraes i gat paoa ia blong klinim yumi, hilim yumi mo mekem yumi kam strong moa.”8
Mi invaetem yumi evriwan blong gohed blong mekem fet long Kraes i kam antap, Hem we i bin jenisim laef blong mama blong mi we mi lavem, mo mi, mo gohed blong jenisim laef blong olgeta we oli stap lukaotem Hem. Mi save se Josef Smit i profet blong Restoresen, se Presiden Nelson i profet blong yumi tedei, se Jisas i Kraes ia we i stap laef mo Ridima blong yumi, mo we Papa long Heven i stap laef mo stap ansarem ol prea blong evri pikinini blong Hem. Mi testifae long saed blong ol trutok ia, long tabu nem blong Jisas Kraes, amen.