Nem blong Jos Oli No Save Toktok Raon long Hem
Taem yumi mekem glad blong folem kaonsel blong Lod, olsem we i kamaot long revelesen tru long profet blong Hem we i stap laef, (speseli taem kaonsel ia i no folem hao yumi tingting, i nidim tingting we i stap daon mo sakrifaes), nao Lod i blesem yumi wetem sam moa paoa long saed blong spirit.
Long wan toktok i go long ol junalis long 16 Ogis 2018, Presiden Russell M. Nelson i talem: “Lod i talem strong long maen blong mi hamas nem we Hem i talemaot blong Jos blong Hem, i impoten tumas, mo hem i Jos Ia blong Jisas Kraes blong Ol Lata-dei Sent.1 Yumi gat wok i stap long fored blong yumi blong stretem tingting blong yumi wetem tingting blong Hem.”2
Tu dei afta, long 18 Ogis, mi bin stap wetem Presiden Nelson long Morial, Kanada. Afta long miting wetem ol memba insaed long Pale de Kongre, Presiden Nelson i ansarem ol kwestin we oli kam long ol junalis. Hem i luksave se bae i wan jalenj blong stanemap bakegen nem blong Jos, mo karemaot wan kastom we i bin stap ia blong moa long wan handred yia. Be hem i ademap: “nem blong Jos oli no save toktok raon long hem”3
Seven wik afta, Presiden Nelson i toktok long jeneral konfrens: “Lod i toktok strong long maen blong mi abaot hamas nem we Hem i putum blong Jos blong Hem, we hem i Jos Ia blong Jisas Kraes blong Ol Lata-dei Sent. … Sevya Hemwan i talem:‘Bae olsem ia nao oli mas singaotem jos blong mi long ol las dei.” Afta, Presiden Nelson i ripitim “Nem blong Jos oli no save toktok raon long hem.”4
Wan Gud Kwestin
Wan gud kwestin i kam antap: “?From wanem naoia? Afta plante yia we yumi akseptem smol nem ia, “Momon”? ?“Momon Tabenakol Kwaea,” , ol vidio spot, “Mi wan Momon,” Praemeri singsing “Mi wan Momon Boe”?
Doktrin blong Kraes i no stap jenis mo i stap we i no gat en. Be yet, ol spesifik mo impoten step blong wok blong Sevya oli kamaot long stret taem. Long moning ia, Presiden Nelson i talem se Restoresen i wan rod we i gohed, i no wan samting we i hapen wan taem.5 Lod i talem: “Bae evri samting i mas kam blong hapen long stret taem blong olgeta.”6 Naoia, i taem blong yumi blong stanemap bakegen nem blong Jos we i kam tru long revelesen.
Aedentiti mo fiuja blong Jos Ia blong Jisas Kraes blong Ol Lata-dei Sent, i mekem se i nid blong oli singaotem yumi long nem blong Hem. Mi bin stap, i no longtaem i pas, long Ketlan, Ohaeo, ples we Profet Josef Smit, wetem sam memba blong Jos, oli profesae se: “Jos ia bae i fulumap Not mo Saot Amerika—bae i fulumap wol.”7 Lod i tokbaot wok blong dispensesen ia, se hem i “wan gudfala wok mo wan sapraes.”8 Hem i tokbaot wan “kavenan we bae i kamtru long ol lata dei,” we i letem “evriwan … long wol blong i kasem blesing.”9
Ol toktok blong konfrens ia, oli stap transletem ova long 55 lanwis. Long en, ol toktok ia bae oli harem mo ridim long 98 lanwis long moa long 220 kantri mo teritri.
Taem Sevya bae i kambak wetem paoa mo glori, ol fetful memba blong Jos Ia blong Jisas Kraes blong Ol Lata-dei Sent bae oli stap long medel blong evri nesen, evri pipol, evri kaen pipol, mo evri kalja blong wol.
Paoa blong Jos blong Lidim Tingting I Stap Kam Antap
Paoa blong Jos we i kambak blong Jisas Kraes, blong lidim ol tingting, bae i no stap long olgeta we oli memba blong Jos nomo. From ol samting we heven i soemaot long taem blong yumi tedei, mo from ol tabu skripja ia we i kambak long wol, mo strong presen we I Tabu Spirit, bae yumi stap olsem wan laet we i saen antap long hil taem we ol tudak klaod blong fasin blong no biliv long Kraes bae oli kavremap wol ia. Nomata se plante bae oli letem wol ia i putum klaod ova long bilif blong olgeta long Ridima, bae yumi no save “muvumaot yumi long ples blong yumi.”10 Ol Kristin man we oli no memba blong yumi bae oli akseptem rol blong yumi mo sua witnes blong yumi abaot Kraes. Iven olgeta we oli Kristin pipol, we oli bin luk yumi wetem wan nogud ae, bae oli akseptem yumi olsem ol fren. Long ol dei we oli stap kam, bae oli singaotem yumi tru long nem blong Jisas Kraes.
Tangkyu long yufala from ol tabu hadwok blong yufala blong putum stret nem blong Jos. Long konfrens, tri yia i pas, Presiden Nelson i promesem yumi se sapos yu strik blong yusum stret nem blong Jos Ia blong Sevya, … bae yumi gat moa fet, mo kasem moa paoa long spirit.”11
Promes ia i bin kamtru tru long ol strong disaepol raon long wol.12
Brata Lauri Ahola blong Is Yunaeted Stet, i talem se i tru, nomata se, samtaem, hem i faenem se i defren blong serem ful nem blong Jos. Be from kaonsel ia blong ol profet, nao hem i bin gohed. Long wan taem, hem i stap visitim wan fren long jos haos blong wan nara jos. Hemia i ol toktok blong hem:
“Wan we mi save i askem: “?I tru se yu wan Momon?”
“Mi wan memba blong Jos Ia blong Jisas Kraes blong Ol Lata-dei Sent,” yes, mi talem long hem. Hem i stat blong askem mi sam kwestin, we wanwan long olgeta i stat wetem: “?Momon Jos i bilif se … ?” Mo evri taem, mi statem ansa blong mi wetem toktok ia: “Long Jos Ia blong Jisas Kraes we i kambak, mifala i biliv se…”
Taem hem i luksave se bae mi neva akseptem taetol ia “Momon”, hem i askem mi stret: “?Yu yu no wan Momon?”
Afta mi askem hem sapos hem i save huia Momon—hem i no save. Mi talem long hem se Momon hem i wan profet … mo mi glad blong oli joenem mi wetem hem.
“Be,” mi gohed, “Momon i no ded from ol sin blong mi. Momon i no safa long Getsemane, o ded long kros from mi. … Jisas Kraes Hem I God mo Sevya blong mi. … Mo mi wantem se oli save mi tru long nem blong Hem.” …
Afta sam seken we ples i kwaet, fren blong mi i talem, “?So, yu wan Kristin Man?”13
?Tingbaot ol toktok blong Presiden Nelson? “Mi promesem yufala se sapos yumi mekem bes blong yumi blong stretem nem blong Jos blong Lod, Hem we i Jos blong Hem, bae i kapsaetem paoa mo blesing blong Hem long hed blong ol Lata-dei Sent,ol kaen ia we yumi neva luk bifo.”14
Lod I Openem Rod Oltaem
Lod i kipim ol promes blong Hem oltaem. Hem i openem rod blong yumi taem yumi stap mekem wok blong Hem.
Blong plante yia, mifala i bin wantem pem intanet domen saet ChurchofJesusChrist.org (JosIablongJisasKraes.org) mo ChurchofJesusChrist.com (JosIablongJisasKraes.com) I no stap blong oli salem. Be samples long taem we Presiden Nelson i mekem anaonsmen, tufala i open i kam. I bin wan merikel.15
Lod i bin mekem hadwok blong mifala i kam gudtaem mifala i luklukbak long ol nem ia we oli blong Jos blong longtaem.
Mifala i muv fored wetem fet, nem blong Momon Tabenakol Kwaea, i jenis i go long Tabenakol Kwaea long Tempol Skwea. Websaet ia LDS.org we i stap kasem 21 milian visit evri manis, i jenis i go long ChurchofJesusChrist.org.16 LDS Business College i jenis i kam Ensign College. Websaet ia, Mormon.org, i gobak long ChurchofJesusChritst.org. I gat moa long wan taosen prodak we i bin gat “Mormon” long hem o “LDS” we oli bin jenisim nem. Ol fetful Lata-dei Sent oli stretem ol websaet blong olgeta, wetem ol podkas, mo ol Twitter akaon.
Yumi gat wan niu simbol we Jisas Kraes i stap long medel blong hem.
“Long medel blong simbol ia, oli ripresentem mabol statiu blong Kristus, we Thorvaldsen i kavem. Pikja blong hem i Lod ia we i laef bakegen long ded, we i stap laef we i openem han blong Hem blong akseptem evriwan we bae oli go long Hem.
“Antap long hem, Jisas Kraes i stap andanit long wan ak, we i rimaenem yumi abaot taem ia we Sevya i kamaot long tumb.”17
Wei we oli raetem Jos Ia blong Jisas Kraes blong Ol Lata-dei Sent, oli bin stretem long moa long 50 lanwis. Oli tekem plante niu domen nem raon long wol.
Stap Talem Tangkyu from Help blong Ol Narawan
Mifala i talem tangkyu long ol gudfala pipol we oli givim ona long tingting blong hat blong yumi blong oli singaotem yumi long stret nem blong yumi. Mi ridim wan atikol i no longtaem i pas, we i kwotem wan Katolik kadinol we i tokbaot “Ol Lata-dei Sent.”18 Taem mi visitim wan lida blong wan Kristin jos, wan manis i pas long Is Yunaeted Stet, hem i tokbaot Jos wetem ful nem blong Jos, mo afta, i singaotem “Jos Ia blong Jisas Kraes.”
Mifala i luksave se blong ademap sikis moa toktok long nem blong yumi bae i no wan gud samting long media, be olsem we Presiden Nelson i bin talem finis: “media we i tekem responsabiliti bae i mekem folem wanem yumi askem.”19 Tangkyu blong tingting long mifala long saed blong kalja, atletik, politik, o komuniti oganaesesen mo yusum nem ia we mifala i wantem.
Bae i gat sam, we oli wantem daonem series misin blong yumi, we bae oli gohed blong singaotem yumi, “Ol Momon,” o “Momon Jos.” Wetem kaen fasin, yumi askem bakegen wan stret fasin i go long media blong givim ona long nem we mifala i wantem oli singaotem mifala long hem, we i stap finis ova 200 yia.
Strong Paoa long Tingting Ia blong Ol Lata-dei Sent
I gat plante taosen mo taosen blong Lata-dei Sent we oli gat strong paoa long tingting blong talemaot nem blong Jos. Taem yumi mekem pat blong yumi, ol narawan bae oli folem. Mi lavem stori ia blong Tahiti.
Iriura Jean we i gat ten yia, i mekem tingting blong folem kaonsel blong Presiden Nelson.
“Long skul klas, oli tokbaot wiken blong olgeta … mo Iriura i tokbaot Jos.
“Tija blong hem, Vaite Pifao, i talem: ‘O, ?yu yu wan Momon?’
“Iriura i talem stret: ‘No. !Mi wan memba blong Jos Ia blong Jisas Kraes blong Ol Lata-dei Sent!’
Tija blong hem i ansa: ‘yes, … yu wan Momon?’
“Iriura i strong: ‘No tija. !Mi mi wan memba blong Jos Ia blong Jisas Kraes blong Ol Lata-dei Sent!’
“Mis Pifao i sek long strong tingting blong Iriura mo i wantem save from wanem hem i strong olsem blong yusum longfala nem blong Jos blong hem. [Hem i disaed blong lanem moa abaot Jos.]
“Afta long hemia, taem Sista Vaite Pifao i bin kasem baptaes, hem i talem tangkyu se Iriura i folem kaonsel blong Presiden Nelson.”20
“Nem blong Jos, yumi no save toktok raon long hem.” Yumi muv fored wetem fet. Taem yumi mekem glad blong folem kaonsel blong Lod, olsem we i kamaot long revelesen tru long profet blong Hem we i stap laef, (speseli taem kaonsel ia i no folem hao yumi tingting, i nidim tingting we i stap daon mo sakrifaes), nao Lod i blesem yumi wetem sam moa paoa mo i sendem ol enjel blong hem blong sapotem yumi mo i stanap long saed blong yumi.21 Lod bae i talem se Hem i agri mo i apruvum.
Mi mi wan ae witnes long paoa blong heven we i stap wetem profet we yumi lavem, Presiden Russell M. Nelson. Tru hat blong hem i blong God i glad mo i wantem blesem ol pikinini blong Papa blong yumi long Heven. Wetem tabu eksperiens ia blong miwan, mi testifae we Lod i lavem hem. Hem i profet blong God.
Mi witnes se Jisas Hem I Kraes, Pikinini Ia blong God. Long nem blong Jisas Kraes, amen.