Putumbak Yu Evri Dei
Yumi nidim laet blong heven blong i gohed blong kam evri dei. Yumi nidim ol taem blong “kasem niu paoa.” Ol taem blong putumbak yuwan.
Yumi kam tugeta long naes Sabat moning ia blong tokbaot Kraes, glad long gospel blong Hem, mo sapotem, mo sastenem wanwan long yumi taem yumi stap wokbaot long “rod ia” blong Sevya blong yumi.1
Olsem ol memba blong Jos Ia blong Jisas Kraes blong Ol Lata-dei Sent, yumi kam tugeta from stamba tingting ia evri Sabat dei, truaot long yia. Sapos yu no wan memba blong Jos, bigfala welkam long yu mo tangkyu blong joenem mifala blong wosipim Sevya mo lan abaot Hem. Olsem yufala, mifala i stap traehad—we mifala i no stret evriwan—blong kam ol moa gud fren, neba, mo man mo woman,2 mo mifala i lukaotem blong mekem hemia taem mifala i stap folem Eksampol blong yumi, Jisas Kraes.
Mifala i hop se yufala i save filim se testemoni blong mifala i tru. !Jisas Kraes i stap laef! Hem i Pikinini blong God we i stap laef, mo Hem i stap lidim ol profet long wol ia tedei. !Mifala i invaetem evriwan blong kam harem toktok blong God, mo tekem gudfasin blong Hem! Mi talem witnes blong mi se God i stap long medel blong yumi, mo bae Hem i kam kolosap long evriwan we oli go kolosap long Hem.3
Mifala i tekem se i wan ona blong wokbaot wetem yufala long rod ia we i stret mo i no isi blong Masta blong stap olsem disaepol.
Talen blong Wokbaot Folem Wan Laen we I Stret
I gat wan toktok we i talem se ol pipol we oli lus, oli stap wokbaot raonraon nomo. I no longtaem i pas, ol man blong saens long Max Plank Institiut blong Baeyolojikol Saeba oli testem tingting ia. Oli tekem sam pipol i go long wan bigfala dak bus, mo oli givim olgeta wan simpol instraksen: “Wokbaot folem wan laen we i stret nomo.” I no gat sam mak i stap raon. Olgeta pipol ia oli mas dipen nomo long filing se oli wokbaot stret.
?Yu yu ting se wanem i hapen?
Ol man blong saens oli talem: “Pipol i rili wokbaot raonraon taem oli no gat eni aedia long daereksen we oli stap wokbaot long hem.”4 Taem oli kwestinim olgeta afta, sam we oli tekpat, oli gat tras long olgetawan se oli bin wokbaot stret nomo. Nomata long tras blong olgeta, GPS data i soem se oli bin wokbaot raon, we daemeta blong raon i 20 mita.
?From wanem yumi faenem i had blong wokbaot long wan stret laen? Sam man blong stadi oli ting se, taem man i wokbaot, bae i kamaot smol smol long rod, mo hemia nao i mekem i defren. Sam narawan oli talem se evriwan i gat wan leg we i strong moa long narawan. Be, ating i moa stret blong talem se yumi gat hadtaem blong wokbaot stret fored from we yumi no savegud se stret fored, i weaples stret.5
Nomata wanem i risen, i fasin blong man: sapos i no gat mak long graon we yumi save dipen long ol, yumi stap kamaot long rod.
Stap Kamaot long Rod
?I no intresting blong save se, ol smol samting nating oli save mekem wan bigfala defren samting insaed long laef blong yumi?
Mi save hemia aot long eksperiens blong mi olsem wan paelot. Evri taem we mi stat blong kam kolosap long wan eapot, mi bin save se plante wok blong mi we i stap yet, bae i blong mekem fulap smol jenis blong daerektem sef plen long stret rod blong foldaon long hem.
Samtaem yumi gat semfala eksperiens olsem wetem trak. Win, rod we i no stret, wil we i no stret gud, no kea—i no blong talem aksen blong nara draeva bakegen—evriwan i save pusum yu aot long rod we yu wantem folem. Spos yu no lukaotgud long ol smol ples ia, bae yu save gat wan nogud dei.6
I semmak long yumi long bodi.
I semmak tu long yumi long spirit.
Plante long ol jenis insaed long laef blong yumi long saed blong spirit— tugeta we i gud o nogud—i hapen sloslo, wan step long wan taem. Semmak olsem olgeta we oli tekpat long Max Planck stadi, maet yumi no luksave taem yumi tanem aotsaed long rod. Maet yumi gat strong tras ia se yumi wokbaot folem stret laen. Be wanem i tru, i we, sapos i no gat help blong ol mak long graon blong lidim yumi, yumi stap kamaot long rod ia nomo, mo yumi go long ol ples we yumi neva ting se bae yumi stap long hem.
Hemia i tru long wanwan man o woman. I tru tu blong ol sosaeti mo ol kantri. Ol skripja oli fulap long ol eksampol.
Buk blong Jajes i raetem se, afta we Josua i ded, “olgeta we oli groap biaen long olgeta ya oli no moa tingbaot Hae God, mo oli fogetem gud ol bigbigfala samting ya we God i mekem long [Isrel].”7
Nomata ol bigfala taem we heven i mekem wok, i visit, i sevem olgeta mo win long merikel fasin we ol pikinini blong Isrel oli bin witnesem long taem blong Moses mo Josua, afta wan jeneresen nomo, ol pipol oli lego Rod ia mo stat wokbaot folem tingting blong olgeta. Mo yes, i no tekem taem bifo oli bin pem praes from kaen fasin ia.
Samtaem, taem man i foldaon, bae i tekem plante jeneresen. Samtaem, i hapen long sam yia nomo, o iven manis.8 Be yumi evriwan i save foldaon. I nomata se hamas strong eksperiens long spirit yumi bin gat bifo, olsem ol man, yumi gat fasin blong wokbaot olbaot. Hemia i bin paten stat long taem blong Adam kasem naoia.
Be hemia Gud Nius.
Be evri samting i no lus. Yumi no olsem ol pipol long tes ia, yumi gat ol mak long graon we yumi save luk, we yumi save yusum blong skelem wokbaot blong yumi.
?Mo wanem nao oli ol mak ia long graon?
I tru, i tekem prea evri dei, mo blong tingting hevi long ol skripja mo stap yusum ol insperesen tul olsem Kam Folem Mi. Evri dei, yumi save kam kolosap long jea blong King we i God, wetem tingting i stap daon mo ones fasin. Yumi save tingting hevi long ol aksen blong yumi, mo luklukbak long ol taem blong yumi tedei—yumi tingting long yumi mo wanem yumi wantem, be i no hemia blong Hem. Sapos yumi bin go long saed rod, yumi plis long God blong i putumbak yumi, mo yumi komitim yumi blong mekem i gud moa.
Taem ia blong lukluk i kambak long yumiwan, i wan janis blong stretem yumi. Hem i wan garen blong tingting i gobak, we yumi save wokbaot wetem Lod, mo kasem instraksen, kam antap, mo kam klin gud tru long toktok blong Papa long Heven we oli raetemdaon mo spirit i talemaot. Hem i wan tabu taem, taem we yumi tingbaot ol tabu kavenan blong yumi, blong folem Kraes ia we i gud, taem yumi skelem progres blong yumi, mo stretem yumi wetem ol mak long saed blong spirit we oli stap long graon, we God i givim long ol pikinini blong Hem.
Tingting long hem olsem yu putumbak yu evri dei. Long wokbaot blong yumi, olsem ol man blong wokbaot long rod blong glori, yumi save se i isi blong foldaon i gowe. Be, olsem we ol smol wokbaot i go long saed i save pusum yumi aot long Rod blong Sevya, ol smol mo simpol aksen blong stretem yumi tu, bae oli lidim yumi gobak, Taem we tudak i krip i kam insaed long laef blong yumi, olsem we hem i mekem oltaem, taem yumi kambak evri dei, bae i openem hat blong yumi long laet blong heven we i saenem sol blong yumi, i ronemaot ol sado, ol fraet, mo ol tu tingting.
Ol Smol Stia, Ol Bigfala Sip
Sapos yumi lukaotem, i tru, “God bae i givim save long yumi, tru long Tabu Spirit blong hem, yes, tru long presen we i Tabu Spirit we man i no save tokbaot.”9 Hamas taem bae yumi askem, bae Hem i tijim yumi long Rod ia mo helpem yumi folem rod ia.
Hemia, yes i tru, i nidim blong yumi gogohed oltaem blong hadwok from. Yumi no save stap glad wetem ol eksperiens long saed spirit we oli pas finis. Yumi nidim blong gat olgeta oltaem.
Yumi no save dipen long ol testemoni blong ol narawan, olwe. Yumi mas bildimap testemoni blong yumiwan.
Yumi nidim laet blong heven blong i gohed blong kam evri dei.
Yumi nidim ol taem blong “kasem niu paoa.”10 Ol taem blong putumbak yuwan.
“Wota we i ron strong” i no save “stap doti oltaem.”11 Blong kipim ol tingting mo aksen blong yumi i klin gud, !yumi mas gohed blong ron strong!
Long en, Restoresen blong gospel mo Jos i no wan samting we i bin hapen wan taem nomo afta i finis. Hem i wan rod we i gogohed—wan dei afta nara dei, wan hat folem wan nara hat.
Ol dei oli stap go, be laef blong yumi tu. Wan man blong raet i talem olsem: “Wan dei i olsem wan ful laef. Yu stat blong mekem wan samting, be long en, yu mekem nara samting; yu plan blong go mekem wok samples, be yu neva kasem ples ia. … Long en blong laef blong yu, ful laef blong yu i gat kaen kwaliti ia tu. Ful laef blong yu, i semmak sep olsem wan dei nomo.”12
?Yu yu wantem jenisim sep blong laef blong yu?
Jenisim sep blong dei blong yu.
?Yu yu wantem jenisim dei blong yu?
Jenisim aoa ia.
Jenisim wanem we yu ting, yu filim mo mekem long stret taem naoia.
Wan smol stia i save stap stiarem wan bigfala sip.13
Ol smol brikis oli save kam ol bigfala haos.
Ol smol sid oli save kam ol bigfala tri.
Ol minit mo ol aoa we oli spendem gud, oli bildim ol brikis blong wan laef we oli laef gud. Oli save givim insperesen blong gat gud fasin, oli leftemap yumi i aot long kalabus blong ol samting we oli no stret, mo oli lidim bak yumi antap, long tabu rod blong fogivnes mo mekem yumi kam tabu.
God blong Ol Niu Stat
Wetem yufala, mi leftemap hat blong mi wetem tangkyu long bigfala presen ia blong gat niu janis, niu laef, niu hop.
Yumi leftemap voes blong yumi blong presem God blong yumi we i gat fulap mo i fogiv. I tru, Hem i wan God blong ol niu stat. Bigfala stamba blong evri wok blong Hem, i blong helpem yumi, ol pikinini blong Hem, blong winim wokbaot blong yumi blong kasem wan bodi we i nomo save ded, mo laef we i no save finis.14
Yumi save kam ol niu man long Kraes, from God i bin promesem se: “Evri taem we ol pipol blong mi oli sakem sin, bae mi fogivim olgeta long ol rong blong olgeta agensem mi”15 mo “mi nomo tingbaot ol sin ia bakegen.”16
Ol brata mo sista blong mi, ol dia fren we mi lavem yufala. Yumi evriwan i go saed wanwan taem.
Be yumi save kambak long rod blong yumi. Yumi save wokbaot mo faenem rod tru long tudak, mo ol tes blong laef ia, mo faenem rod i gobak long Papa long Heven we i gat lav sapos yumi lukaotem mo akseptem ol mak long saed blong spirit we oli stap long graon ia, we Hem i givim, sapos yumi akseptem revelesen we i blong yuwan, mo sapos yumi traehad blong putumbak yumi evri dei. Hemia nao hao yumi kam ol tru disaepol blong Sevya we yumi lavem tumas, Jisas Kraes.
Taem yumi mekem olsem, God bae i smael long yumi. “Long taem ya we bambae yufala i stap long kantri ya we bambae hem i givim long yufala, oltaem bambae hem i stap blesem yufala. “Hem bambae i mekem yufala i tabu, yufala i man blong hem, olsem we hem i promes.”17
Blong yumi lukaot blong putumbak yumi evri dei, mo gohed blong traehad blong wokbaot long Rod ia blong Jisas Kraes, hem i prea blong mi. Long nem blong Jisas Kraes, amen.