Stap Fesem Ol Hariken long Saed blong Spirit Taem Yumi Stap Biliv long Jisas
Yumi fesem ol hariken blong yumi long saed blong spirit, i mo gud, taem yumi stap bilif long Kraes mo stap obei ol komanmen blong Hem.
Long ol sikis yia we i pas, switat blong mi, Ann mo mi, mitufala i stap laef long Teksas kolosap long Gol Kos, ples ia we i bin gat sam bigbigfala hariken we i bin spolem nogud Amerika, mo i livim biaen ol bigbigfala damej mo iven man i ded. Sore tumas, long ol manis we i jes pas, i bin gat sam hariken we i bin pas mo mekem ol bigfala damej. Lav mo prea blong mitufala i stap go long evriwan we maet oli bin harem nogud long sam wei. Long 2017, mitufala i eksperiensem Hariken Harvey, we i gat wan rekod blong bigfala ren we i bin foldaon mo we i bitim ol narafala hariken.
Ol loa blong neja oli kontrolem hao hariken i bon. Tempereja blong bigfala solwota i mas 27 digri , mo i go kasem 50 meta andanit long solwota. Taem we win i mitim wom wota long bigfala solwota, i mekem se wota i go antap olsem stim i go long ea, long ples ia, hem i kam olsem wota. Ol klaod oli fom mo win i krietem wan paten we i go raonraon antap long solwota.1
Ol hariken oli bigbigwan long saes, i stap kasem 15,240 meta o i go moa long ea mo tantanem hem long kolosap 200 meta i go long wan en mo go long narafala en. Wanem i gud tumas i we, taem we ol hariken oli mitim graon, oli stat blong kam slak from se oli nomo stap antap long wom wota we blong i givim paoa.1
Maet yu neva fesem wan hariken we i nogud tumas. Be, wanwan long yumi i bin fesem, mo bae yumi stap fesem yet ol hariken long saed blong spirit we bae i kam spolem pis blong yumi mo traem fet blong yumi. Long wol blong tedei, hemia i stap hapen plante mo i kam wetem strong paoa. Tangkyu we Lod i givim long yumi wan wei we i stret blong yumi save winim ol taem ia wetem bigfala glad. Taem yumi stap laef folem gospel blong Jisas Kraes, yumi save se “Taem ol trabol i kam i kasem yumi, mo i spolem ol pis blong yumi, yu no wari help hem i stap klosap.”2
Presiden Russell M. Nelson i eksplenem se:
“Ol Sent oli save stap hapi long eni kaen situesen. !Yumi save filim glad iven taem dei i nogud, wik i nogud, o iven taem ful yia i nogud!
“… Glad we yumi filim i no from situesen blong laef blong yumi, be hem i from samting we yumi lukluk faswan long laef blong yumi.
“Taem we laef blong yumi i stap lukluk nomo long … Jisas Kraes mo gospel blong Hem, yumi save filim glad nomata wanem i stap hapen—o i no stap hapen—long laef blong yumi.”3
Semmak olsem loa blong neja we i kontrolem ol saeklon, tabu loa i kontrolem hao yumi filim glad long taem blong ol hariken long saed blong spirit. Glad o sore we yumi filim taem yumi gotru long ol strong win blong laef, oli fasem i go long ol loa blong God we hem i bin putum. Presiden Nelson i bin serem: “Oli singaotem olgeta ol komanmen, be oli semmak nomo mo tru olsem loa blong leftemap samting, loa blong samting i mas foldaon long graon, [mo] loa blong kontrolem hat we i stap pam.”
Presiden Nelson i gohed mo talem: “Be hem i kam wan simpol rod nomo: Sapos yu wantem blong stap glad, obei ol komanmen.”4
Blong gat tu tingting i wan enemi long fet mo glad. Semmak olsem we hariken i stat antap long wom wota blong bigfala solwota, tu tingting i ples we i fidim ol hariken long saed blong spirit. Semmak olsem we bilif i wan joes, so, tu tingting tu i wan joes. Taem yumi jusum blong blong gat tu tingting, yumi jusum blong samting i tekem aksen long yumi, mo stap givim paoa long enemi blong gat paoa, mekem se bae yumi kam slak mo stap long denja.5
Setan i stap lukaotem blong lidim yumi i go long ples we fasin blong gat tu tingting bae i bon long hem. Hem i lukaotem blong mekem hat blong yumi i kam strong mekem se bae yumi no biliv.6 Ples we tu tingting i stat gro long hem, i ples we i save stap invaetem man from se i givim plante pis, wom wota i no nidim yumi blong stap laef folem evri toktok we i kamaot long maot blong God.”7 Long ol wota olsem, Setan i stap temtem yumi blong no wari from ol samting long saed blong spirit. Long wei ia hem i save gat paoa blong pulumaot tingting blong man blong no kea long ol samting long saed blong spirit, mekem se, “yufala i hot gud no yufala i kol gud.”8 Sapos yumi no fasem yumi long Kraes, tu tingting mo ol trik bae oli lidim yumi longwe i go long ples we bae yumi no save faenem ol merikel, hapines we i stap o “pis long laef blong [yumi].”9
Semmak olsem we ol paoa blong hariken i kam slak taem i stap ova long graon, fet i tekem ples blong tu tingting taem yumi bildimap fandesen blong yumi long Kraes. Afta, bae yumi save luksave ol hariken long saed blong spirit long wan moa gud wei, mo paoa blong yumi blong winim olgeta bae i kam moa bigwan. Afta, “taem we devel bae i sendemaot ol strongfala win blong hem, yes, ol spia blong hem long wael win, bae oli no gat paoa … blong pulum [yumi] i go daon long bigfala hol blong harem nogud mo trabol we i no gat en; hemia i from strong ston we [yumi] i bin bildimap yufala antap long hem, we i wan sua fandesen.”10
Presiden Nelson i bin tijim:
“Fet long Jisas Kraes i fandesen blong evri bilif mo i wanem i tekem tabu paoa i kam. …
“Lod i no nidim blong bilif blong yumi i stret evriwan blong yumi save yusum paoa blong hem we i blong yumi save yusum paoa blong hem we i stret evriwan Be Hem i askem yumi blong stap biliv.”11
Long Epril jeneral konfrens, famli blong mi mo mi i bin stap lukaotem blong mekem fet blong mifala i kam moa strong long Jisas Kraes mo long Atonmen blong Hem blong helpem mifala blong “tanem ol jalenj ia oli kam janis blong groap bigwan mo openem doa.”12
Apugel blong mitufala Ruby, i bin kasem blesing ia blong gat wan strong hat we i wantem tekem aksen enitaem. Taem hem i bon, paep blong trot blong hem i no konek wetem basket blong kaekae long bel blong hem. Taem hem i wan smol bebi, Ruby, wetem help blong papa mo mama blong hem, oli fesem tes ia wetem wan tingting we i strong bitim oltaem. Ruby i gat faef yia nao. Nomata se hem i smol tumas, eksampol blong hem i gat bigfala paoa, abaot fasin blong no letem ol situesen ia oli winim hapines blong hem. Oltaem hem i stap hapi.
Long manis Mei we i pas, Ruby i fesem wan moa hariken long laef blong hem wetem fet. Taem hem i bon, han blong hem i no develop fulwan mo i nidim blong go tru long operesen. Bifo long operesen ia, mifala i visitim hem mo givim wan naesfala droing blong han blong wan pikinini we i stap holem han blong Sevya. Taem mifala i askem hem sapos hem i fraet tumas, hem i ansa se, “No, !mi mi glad!”
Afta mifala i askem hem: “Ruby. ?Hemia i tru ia?”
Ruby i talem wetem tras: “From se mi save se Jisas bae i holem han blong mi.”
Operesen ia i bin wan merikel mo hem i gohed blong stap hapi. !Hemia i olsem wanem fet blong wan pikinini we i klin i defren long krangke tingting ia blong stap gat tu tingting, we i stap temtem yumi taem bae yumi stap kam bigwan!13 Be yumi evriwan i save kam olsem wan smol pikinini mo jusum blong putum ol tingting blong no stap bilif long saed. Hemia i wan simpol joes.
Wan papa we i kea tumas oltaem i stap toktok wetem Sevya mo talem, “Sapos yu save mekem wan samting, … plis, yu givhan long mifala.”15
Afta, Jisas i talem long hem:
“I stap long yu. man we i biliv, hem i save kasem evri samting.
“Nao wantaem nomo, papa blong pikinini ia … i singaot i talem se, ’ Mi mi biliv be bilif blong mi i smol nomo. Plis yu givhan long mi.”15
Papa ia we i gat tingting i stap daon, i waes blong jusum blong trastem bilif blong hem long Kraes bitim blong stap gat tu tingting. Presiden Nelson i bin talem, “Bambae fasin blong yu blong no biliv bae i holemtaet yu blong God i blesem yu wetem ol merikel ia blong muvumaot ol bigfala hil insaed long laef blong yu.”16
!God blong yumi i gat bigfala sore long yumi blong putum mak blong yumi long wan level blong stap bilif mo i no long level blong stap save samting!
Alma i tijim:
“Hem we i bilivim toktok blong God i kasem blesing.”17
“God i gat fulap sore long olgeta we oli biliv long nem blong hem; from hemia, hem i wantem, se fas samting, yufala i mas bilif.”18
Yes, long stat, God i wantem se yumi bilif long Hem.
Yumi fesem ol hariken blong yumi long saed blong spirit, i mo gud, taem yumi stap bilif long Kraes mo stap obei ol komanmen blong Hem. Bilif mo fasin blong yumi blong stap obei i konektem yumi i go long paoa we i moa blong yumi save winim “[wanem] we i stap hapen, o no stap hapen, long laef blong yumi.”19 Yes, God “bae kwiktaem i blesem yumi” blong stap bilif mo stap obei.20 I tru, ova long taem level blong laef blong yumi we i stap jenis i go long glad, mo “mifala i kam laef tru long Kraes ” taem bae yumi praktisim fet blong yumi long Hem mo stap obei ol komanmen blong Hem.21
Ol brata mo sista. Bae yumi jusum tedei blong “No gat tu tingting, be blong stap bilif.”22 “Raet wei, hem i blong biliv long Kraes.”23 Oli “raetem yumi … insaed long han blong Hem.”24 Hem i Sevya mo Ridima blong yumi we i stap stanap stret long doa blong yumi mo stap noknok.25 Long nem blong Jisas Kraes, amen.