Putum Taem blong Sevya
Mi plis mo askem strong long yufala tedei, blong blokem ol giaman blong wol ia taem yufala i putum taem blong givim long Lod long laef blong yu—long wanwan mo evri dei.
Ol dia brata mo sista blong mi. Blong tu dei, yumi kasem ol gudfala tijing we oli kam long ol wokman blong Lod we oli bin lukaot wetem strong tingting blong save wanem Hem i wantem olgeta blong talem.
Yufala i bin kasem wok we yumi mas mekem blong ol nekis sikis manis. Naoia, kwestin hem i: ?Hao bae yumi kam defren man from ol samting we yumi bin harem mo filim?
Wol sik ia i soem we laef i save jenis kwik samtaem folem ol situesen we yumi no save kontrolem. Be, i gat plante samting we yumi save kontrolem. Yumi putum ol samting oli kam faswan, mo yumi disaed hao blong yusum paoa, taem, mo samting we yumi gat. Yumi disaed hao bae yumi tritim wanwan long yumi. Yumi jusum huia bae yumi tanem yumi long hem blong kasem trutok mo blong i soem rod.
Ol voes mo fos blong wol ia, oli switim man mo oli plante. Be i gat plante voes oli giaman, oli pulum hat, mo oli save pulumaot yumi long kavenan rod ia. Blong stap longwe long hat i brok afta long hemia, mi plis mo askem strong long yufala tedei, blong blokem ol giaman blong wol ia taem yufala i putum taem blong givim long Lod long laef blong yu—long wanwan mo evri dei.
Sapos plante infomesen we yu kasem i kam long sosol o nara media, paoa blong yu blong harem ol kwaet toktok blong Spirit, bae i godaon. Sapos yu no stap lukaotem Lod tru long evri dei prea mo stadi long gospel, yu stap mekem i isi blong ol tingting blong wol ia oli winim yu, be oli no tru. Iven Ol Sent ia we oli fetful, i save kamaot long rod ia sapos grup blong Babilon i stap kilim dram oltaem.
Ol brata mo sista blong mi. Mi plis mo askem yufala blong putum taem blong givim long Lod. Mekem fandesen long saed blong spirit i strong gud mo i save stanap agensem tes blong taem, taem yufala i mekem olgeta samting ia we i letem Tabu Spirit i stap wetem yufala oltaem.
Neva ting nating long bigfala trutok ia se “Spirit i talem ol samting olsem we oli rili stap, mo olsem we bae oli rili stap.”1 “Bambae Hem i soem long [yumi] evri samting we bae [yumi] mas mas mekem.”2
I no gat wan samting we i invaetem Spirit i moa bitim we yumi putum tingting blong yumi i lukluk nomo long Jisas Kraes. Tokabaot Kraes, glad long Kraes, mo lafet long ol toktok blong Kraes, mo muv strong fored wetem strong tingting long Kraes. Mekem Sabat blong yu i wan glad taem yu stap wosipim Hem, taem yu tekem mo kakae sakramen, mo kipim dei blong Hem i tabu.
Olsem we mi talem gud long moning ia, plis, putum taem blong givim long Lod mo tabu haos blong Hem. I no gat wan samting we bae i mekem spirit fandesen blong yu i kam strong moa, be tempol seves mo tempol wosip nomo.
Mifala i talem tangkyu long evriwan we oli stap wok long ol niu tempol blong yumi. Oli stap bildim olgeta raon long wol. Tedei, mi glad blong anaonsem plan blong mifala blong bildim moa tempol long olgeta ples ia, o long wan ples kolosap long ol ples ia: Kaohsiung, Taewan; Takloban, Filipin; Monrovia, Liberia; Kananga, Dimokratik Ripablik blong Kongo; Antananarivo, Madagaska; Kuliakan, Meksiko; Vitoria, Brasil; La Paz, Bolivia; Santiago Wes, Jile; Fort Wort, Teksas; Kodi, Waeoming; Reksbeg Not, Aedaho; Hiba Vale, Yuta; mo bae oli bildimap Provo Yuta Tempol afta we oli dediketem Orem Yuta Tempol.
Mi lavem yufala ol dia brata mo sista. Lod i save yu mo i lavem yu. Hem i Sevya mo Ridima blong yu. Hem i stap lidim mo gaedem Jos blong Hem. Bambae Hem i lidim mo soem rod long yu long laef blong yuwan sapos yu putum taem blong givim long Hem long laef blong yu—long wanwan mo evri dei.
Bae God i stap wetem yufala kasem taem yumi mit bakegen, mi prea olsem long tabu nem blong Jisas Kraes, amen.