Wan Paoa blong Stap Lidim Tingting blong Wol blong Mekem Gud

Taem we ol profet mo ol aposol oli gohed long seves blong olgeta, paoa blong olgeta blong mekem gud i stap blesem plante laef, mo i stap sendem wan wol spirit blong seves, koperesen mo hop. Hemia sam haelaet blong seves ia we i bin hapen long ol las sikis manis.

Long taem blong Tokio Sama Olimpik, Presiden Russell M. Nelson i bin putum long sosol media abaot nid ia blong katemaot raorao, mo abaot hamas frensip, respek, mo koperesen i impoten.

Elda Jeffrey R. Holland blong Kworom blong Olgeta Twelef Aposol i bin joenem wan wol vidio konfrens we i stap long Windso, Inglan. Ol spika blong konfrens oli bin tokbaot helt long saed blong tingting mo filing blong plante milian pipol long ol kamp blong ol rifuji. Elda Holland i singaot blong gat sapot blong letem ol rifuji blong talemaot “stret fet ia we i givim aedentiti long olgeta.” Sista Sharon Eubank, Fas Kaonsela insaed long Rilif Sosaeti Jeneral Presidensi mo presiden blong Ol Lata-dei Sent Jareti, i tekpat tu long konfrens.

Elda Quentin L. Cook blong Kworom blong Olgeta Twelef Aposol i bin givim toktok long wan kaonsel long wan kombaen fet koperesen we oli bin holem long Notre Dame yunivesiti long Indiana, YSA. Elda Cook i givim jalenj long olgeta we oli bin kam blong oli “stanap olsem wan laet blong bilif mo yuniti long wan wol we, plante taem, i daonem tufala samting ia.”

Elda Ronald A. Rasband blong Kworom blong Olgeta Twelef Aposol i bin toktok long G20 intafet Forom we oli bin holem long Bolonia, Itali. (Olgeta G20 nesen oli bin mekem wan grup we i moa bigwan long wol, we i tekem ol 20 kantri wetem bigfala ekonomi.) “Taem we relijin i kasem fridom blong gro bigwan, olgeta we oli stap biliv, long evri ples, oli stap mekem ol simpol aksen blong seves, we samtaem i mekem bigfala defren samting,” Elda Rasband i talem. Long semfala forom ia, Sista Eubank i bin tokbaot wanem samting nao fasin blong stap hanggri mo fasin blong no kakae gud i mekem long ol pikinini we oli stap long wan pua ples. Hem i talem: “Jenis i save hapen nomo tru long wan rilesensip blong tras blong yuwan.”

Afta we wan etkwek i prapa spolem gud Haiti, Elda Ulisses Soares blong Kworom blong Olgeta Twelef Aposol i toktok long wan divosen brodkas long olgeta memba blong Karabian we oli toktok Franis, mo mekem olgeta oli tingbaot se “fet i karemaot lok blong paoa blong God i kam insaed long ol laef blong yumi.” Sista Reyna I. Aburto, Seken Kaonsela insaed long Rilif Sosaeti Jeneral Presidensi i bin joenem devosen ia, mo tu, i bin toktok long ol memba long ol lidasip miting mo stek konfrens. Hem i talem: “Yumi save stanap strong, iven sapos ol win oli kam mo wol ia i stap seksek raon long yumi.” Elda Soares i bin toktok tu long wan divosen brodkas blong ol yut long Karabian, i mekem olgeta oli tingbaot se yumi “nidim paoa blong Tabu Spirit i lidim yumi, insaed long laef blong yumi.”