Nid blong Gat Wan Jos
Ol skripja, oli tijim klia stamba mo nid blong gat wan jos we atoriti blong Lod Jisas Kraes, i daerektem.
Sam yia i pas finis, Elda Mark E. Petersen, wan memba blong Kworom blong Olgeta Twelef Aposol, i statem wan toktok wetem wan eksampol.
“Kenet mo waef blong hem, Lusil, tufala i ol gud pipol, ones mo oli wokbaot stret. Oli no go long jos, mo tufala i filim se oli save stap gud inaf sapos i no gat jos. Tufala i tijim pikinini blong tufala blong stap ones, gat klin fasin, mo tufala i talem long tufalawan bakegen se hemia nomo bae Jos i mekem long olgeta.
“Mo eni wei, tufala i strong se oli nidim ol wiken blong gat gud taem wetem famli, mo blong go long jos, bae i blokem olgeta.”1
Tedei, mesej blong mi i lukluk long ol pipol we oli gud, mo oli tingting long relijin be oli stop blong go o tekpat long jos blong olgeta.2 Taem mi talem “ol jos,” mi tokbaot tu ol haos blong prea, ol moske, mo ol nara oganaesesen blong relijin. Mifala i wari se, fasin blong go long ol ples ia, i go daon bigwan truaot long kantri.3 Sapos yumi stop blong luk se Jos i impoten from eni risen, yumi putum spirit laef blong yumi long denja, mo wan bigfala namba oli stap seperetem olgetawan long God mo stap daonem ol blesing blong Hem long ol nesen blong yumi.
Blong go mo tekpat long aktiviti long wan jos, i helpem yumi blong kam ol moa gud pipol, mo moa gud paoa long laef blong ol narawan. Long jos, oli tijim yumi olsem wanem blong yusum ol prinsipol blong relijin. Yumi lanem samting aot long wanwan long yumi. Wan eksampol i save winim man i bitim wan toktok long jos we i gat paoa. Yumi kam strong moa taem yumi joen wetem ol narawan we maen blong olgeta i semmak. Taem yumi go mo tekpat long jos, hat blong yumi oli olsem wanem we Baebol i talem: “oli wivim yumi tugeta wetem lav.”4
1.
Ol skripja we God i givim long Ol Kristin man insaed long Baebol, mo long ol revelesen blong tedei, oli tijim se i gat nid blong gat wan jos. Tugeta i soem se Jisas Kraes i bin oganaesem wan jos mo i wantem luk se wan jos bae i kareaot wok blong Hem afta long Hem. Hem i bin singaotem Twelef Aposol mo i givim olgeta wan atoriti mo ol ki blong lidim jos. Baebol i stap tijim se Kraes i “stap long hed blong Jos,”5 mo we ol wokman blong Hem oli bin stap blong “mekem ol sent oli kam stret gud, blong mekem wok blong seves ia, mo blong leftemap bodi blong Kraes.”6 I tru. Baebol i klia long weaples nao wan jos i bon long hem, mo nid blong gat wan naoia.
Sam oli talem se, blong go long miting blong jos, i no helpem olgeta. Sam oli se: “Mi no lanem wan samting tedei,” o “I no gat wan i naes long mi,” o “wan i spolem mi.” Ol samting we i spolem yumi, oli no mas holemtaet yumi blong kasem doktrin blong Kraes, we i tijim yumi blong wok, be i no blong oli wok blong yumi.7 Wetem hemia long maen, wan nara memba i tokbaot hao hem i go long Jos mo lukluk nomo long hem.
“Sam yia i pas, mi jenisim fasin blong mi long saed blong fasin blong go long jos. Mi nomo go long jos blong miwan, be blong tingbaot ol narawan. Mi meksua se mi talem halo long ol pipol we oli sidaon olgetawan, blong welkamem ol visita, … blong volontia blong mekem wan smol wok.
“Long sot toktok, mi go long jos evri wik wetem tingting blong mi aktiv, i no stap nating, mo blong mekem samting i defren long laef blong ol pipol.8
Presiden Spencer W. Kimball i bin tijim se “yumi no go long Sabat miting blong oli entetenem yumi, o blong kasem tijing nomo. Yumi go blong wosipim Lod. Hemia i responsabiliti blong wanwan. … Sapos jos seves i no wan gudwan long yu, be yu nao yu mestem. I no gat wan i save wosip blong yu; yuwan yu mas wet long Lod.”9
Blong stap go long wan jos bae i save openem hat mo mekem sol blong yu i tabu.
Long wan jos, yumi no wok yumiwan, o folem joes blong yumiwan, o olsem i stret long yumiwan. Yumi wok insaed long wan tim. Taem yumi givim seves, yumi faenem ol janis we oli kam long heven, blong girap i go antap long fasin blong stap yuwan folem yia blong yumi. Seves we jos i lidim i helpem yumi blong winim selfis fasin blong yumi we i save sloem daon hamas yumi stap groap.
I gat ol impoten gud saed blong tokbaot, iven blong sot taem. Long jos, yumi joenem ol gudfala pipol we oli traehad blong wok blong God. Hemia i rimaenem yumi se yumi no stap yumiwan long ol aktiviti blong relijin blong yumi. Yumi evriwan i nidim blong joen wetem ol narawan, mo huia yumi joen wetem long jos oli sam long ol bes eksperiens we yumi gat, blong yumi, mo ol kompanion blong yumi mo ol pikinini. Sapos yumi no stap joen olsem, speseli bitwin ol pikinini mo ol fetful papa mo mama, stadi i soem se i had moa blong ol paren oli lukaotem ol pikinini blong olgeta folem bilif blong olgeta.10
II.
Kasem naoia, mi bin tokbaot ol jos, evriwan. Naoia, mi tokbaot ol spesel risen blong gat membasip, go mo tekpat insaed long Jos Ia blong Jisas Kraes Ia blong Ol Lata-dei Sent we i bin kambak.
Yumi, i tru, yumi talem se ol skripja, blong bifo mo tedei, oli tijim klia stamba mo nid blong gat wan jos we atoriti blong Lod Jisas Kraes, i daerektem. Yumi stap testifae tu, se Jos Ia blong Jisas Kraes we i kambak, Hem i stanemap blong tijim ful doktrin blong Hem mo blong Hem i stanap wetem prishud atoriti blong hem blong mekem ol odinens we i nid blong go insaed long kingdom blong God.11 Ol memba we oli lego fasin blong go long Jos, mo oli dipen long spirit laef blong wanwan long olgeta, oli seperetem olgeta long ol stamba blong gospel ia: paoa mo blesing blong prishud, ful doktrin we i kambak, mo wanem i pusum yumi mo ol janis blong praktisim doktrin ia. Oli lego fogud janis ia blong kwalifae blong mekem famli blong olgeta i gogohed blong taem we i no save finis.
Wan nara bigfala gud saed blong jos ia we i kambak, i we, hem i helpem yumi blong groap long saed blong spirit. Blong groap, i minim blong jenis. Long lanwis blong spirit, i minim blong sakem sin mo lukaotem blong go kolosap moa long Lod. Insaed long jos we i kambak, yumi gat doktrin, ol fasin blong wok, mo ol helpa we oli stap helpem yumi blong sakem sin. Stamba tingting blong olgeta, iven long ol membasip kaonsel, i no blong panisim man, olsem taem man i pas long kriminol kot. Ol jos membasip kaonsel, oli lukaot, wetem lav blong helpem yumi kwalifae from sore blong fogivnes we i posibol tru long Atonmen blong Jisas Kraes.
Mak blong spirit long wanwan i no stap mekem wanem i pusum man, mo i no ples blong seves we i no selfis we Jos we i kambak i givim. Ol bigfala eksampol blong hemia, oli ol yang man mo woman, mo ol senia wan, we oli lego skul smol taem mo spel blong olgeta blong akseptem ol misinari koling. Oli wok olsem ol misinari long ol strenja long ol ples we oli no save mo oli no jusum. I tru semmak blong ol fetful memba we oli tekpat long seves we i no selfis, we yumi singaotem “tempol wok.” Bae i no gat kaen seves olsem sapos i no gat Jos we i givim mane from, i oganaesem, mo i lidim.
Fet blong relijin mo seves blong Jos blong ol memba blong yumi oli tijim olgeta olsem wanem blong wok wan blong mekem gud long bigfala komuniti. Kaen eksperiens mo divelopmen ia i no hapen long fasin blong laef wanwan we i popula naoia long sosaeti blong tedei. Long ples we ol lokol wod blong mifala oli stap long hem, yumi joen mo wok wetem ol pipol we bae yumi no jusum olgeta, ol pipol we oli tijim mo testem yumi.
Antap long fasin blong helpem yumi blong lanem ol kwaliti blong Spirit olsem lav, lav mo sore, fogivnes, mo longfala tingting, hem i givim yumi ol janis blong lanem olsem wanem blong wok wetem ol pipol we oli kam long defren situesen mo laekem ol defren samting. Gud saed ia i bin helpem plante memba blong yumi mo plante oganaesesen oli kasem blesing from oli bin tekpat. Oli save gud Ol Lata-dei Sent from oli save lidim man, mo kam wan long ol joen wok. Tradisen ia i stat wetem ol paeonia we oli bin gat strong paoa long tingting we oli bin rul long ol Intamaonten Wes mo oli stanemap ol impoten tradisen ia blong wok wan we i no gat selfis fasin, blong gud blong evriwan.
Plante hadwok blong yumaniterian mo jareti oli nid blong hapen taem oli pulum tugeta mo stap manejem wanwan pipol long wan bigfala level. Jos we i kambak i mekem hemia wetem bigfala yumaniterian wok blong hem raon long wol. Hemia i tekem blong serem ol saplae blong edukesen, mo medikol saplae, fidim olgeta we oli hanggri, stap kea long ol rifuji, helpem tanembak adiksen, mo lukaotem ol narawan. Ol memba blong Jos blong yumi, oli save gud olgeta from Han blong Help blong olgeta long ol projek long ol disasta. Jos membasip blong yumi i letem yumi pat blong ol bigfala wok ia. Ol memba oli pem fast ofring tu blong helpem olgeta we oli pua long ples blong olgeta.
Antap long fasin blong filim pis mo glad tru long kampani blong Spirit, ol memba we oli stap go long Jos, oli stap glad long ol frut blong laef folem gospel, olsem ol blesing blong stap laef folem Tok blong Waes mo blong kam antap long laef long wol mo long spirit we i promes blong stap laef folem loa blong taeting. Yumi gat blesing tu blong gat kaonsel we i kam long ol lida wetem insperesen.
Antap long evri samting ia, i gat ol odinens anda long prishud atoriti, we i nid blong taem we i no save finis, wetem hemia blong sakramen we yumi kasem evri Sabat dei. Hae odinens insaed long Jos ia we i kambak, i kavenan we i no gat en, blong mared, we i mekem i posibol blong ol gudfala famli rilesensip oli gohed afta. Presiden Russell M. Nelson i tijim prinsipol ia long wan wei we yu no save fogetem. Hem i talem: Yumi no save wantem nomo blong gat rod i go long ples we God i stap long hem. Yumi mas obei ol loa we blesing ia i kam wetem.12
Wan long ol loa ia, i blong wosip insaed long Jos evri Sabat dei.13 Wosip blong yumi mo hamas yumi praktisim ol prinsipol we oli no save finis, bae i tekem yumi i go kolosap long God mo mekem yumi gat moa paoa blong lavem man. Parli P. Prat, wan long ol fas Aposol blong dispensesen ia, i tokbaot olsem wanem hem i bin filim taem we Profet Josef Smit i bin eksplenem ol prinsipol ia: “Mi bin filim se God i Papa blong yumi long Heven; se Jisas i brata blong mi, mo waef blong hat blong mi i wan kompanion we i no save finis: wan enjel we i kaen mo i givhan, we oli givim long mi olsem wan kamfot, mo wan hat blong king blong oltaem mo oltaem. Long sot toktok, mi save lavem man wetem spirit mo wetem save tu.14
Blong endem toktok, mi wantem rimaenem yumi evriwan se yumi no biliv se gud samting, i save hapen nomo tru long wan jos. Aotsaed long wan jos, yumi luk ol milian pipol we oli sapotem mo mekem plante we plante gudfala wok. Wanwan long yumi, ol Lata-dei Sent, yumi tekpat long olgeta. Yumi luk ol wok ia, olsem se i soem trutok we i no save finis, se “Spirit i givim laef long evri man we i kam long wol ia.15
I nomata long ol gudfala wok we oli save wokem aotsaed long wan jos, bae ful doktrin mo ol odinens we oli sevem man mo mekem olgeta i kam wan god, oli stap nomo insaed long Jos ia we i kambak. Antap long hemia, blong go long Jos i givim yumi paoa mo moa fet ia we i kam taem yumi joen wetem ol man we oli biliv mo stap wosip tugeta, taem yumi joen wetem olgeta we oli stap traehad blong stap long kavenan rod mo stap ol moa gud disaepol blong Kraes. Mi prea se bae yumi evriwan bae i stap strong long ol eksperiens blong Jos taem yumi stap lukaotem laef we i no save finis, presen ia we i moa hae long olgeta presen blong God, long nem blong Jisas Kraes, amen.