?I No Gat Oel long Gilead?
Hiling paoa blong Sevya i no blong Hem i save hilim bodi blong yumi nomo, be wanem we i moa impoten, hem i we Hem i save hilim ol hat blong yumi we i brok.
Sot taem afta long misin blong mi, taem mi wan studen long Brigham Yang Yunivesiti, mi kasem wan fon kol long papa blong mi. Hem i talem long mi se hem i kasem kansa long bel, mo se ol janis we bae hem i save laef i nogud tumas, be hem i tingting strong se bae hem i save kam gud bakegen mo blong hem i save gobak long ol samting we hem i stap mekem oltaem. Fon kol ia i mekem mi harem nogud. Papa blong mi i bisop blong mi, fren blong mi, mo advaesa blong mi. Taem mama blong mi, ol brata mo sista blong mi, mo mi i stap tingting long fiuja, be i no gat samting i kamaot nomo. Yangfala brata blong mi, Dave, i stap long misin blong hem long Niu Yok mo i stap tekpat long ol famli taem ia, we oli had.
Ol dokta oli talem se bae i blong oli katem hem mo traem blong stopem kansa ia blong i go long ol narafala pat blong bodi blong hem. Famli blong mi i bin livim kakae, mo prea from wan merikel. Mi bin filim se sapos mi gat inaf fet, bae papa blong mi kam gud bakegen. Kolosap taem we bae papa blong mi bae oli katem hem, bigfala brata blong mi, Norm, mo mi i givim hem wan blesing. Wetem evri fet mitufala i gat, mitufala i prea se bae hem i kam gud bakegen.
Blong oli katem hem ia, bae i stap blong plante aoa, be afta long wan sot taem, dokta i kam long big rum blong mitim famli blong mi. Hem i talem long mifala se kansa i go long evri pat blong bodi blong hem finis. Long wanem mifala stap lukluk long hem, papa blong mi i gat sam manis nomo blong hem i laef. Mifala i harem nogud tumas.
Taem we papa blong mi wekap afta we oli katem hem, hem i wantem tumas blong save sapos evri samting i bin go gud. Mifala i serem rabis nius ia long hem.
Mifala i gohed blong livim kakae, mo prea from wan merikel. Taem we helt blong papa blong mi i stap kam nogud, mifala i stap prea se bae hem i no harem nogud. Be taem kondisen blong hem i stap kam nogud, mifala i askem Lod letem hem i go. Afta sam manis i pas afta we oli katem hem, olsem we dokta blong katem man i talem, papa blong mi i lus.
Ol memba blong wod mo ol famli fren oli soem plante lav mo kea blong olgeta long famli blong mifala. Mifala i gat wan naes fenerol blong givim ona long laef blong papa blong mi. Taem i pas,i longtaem, mifala i stat blong harem nogud mo luk spes blong papa blong mi, mo mi stat blong tingting se from wanem papa blong i no kam gud. Mi stap askem miwan se fet blong mi i bin strong inaf o no. ?From wanem sam famli i kasem wan merikel, be i no famli blong mi? Mi lanem long misin blong mi blong lukluk i go long ol skripja blong faenem ol ansa, mi stat blong luklukgud insaed long ol skripja.
OlTesteman i tijim blong wan oel we i smel naes, we oli yusum blong hilim ol soa, we oli mekem long wan bus we i gro long Gilead. Long ol taem blong OlTesteman, oel ia oli kam blong save long hem olsem “oel blong Gilead”1 Profet Jeremaea i harem nogud long ol hadtaem we hem i bin luk long ol pipol blong hem mo hop blong gat hiling. Jeremaea i askem kwestin ia, “?I no gat meresin long Gilead, i no gat wan dokta long ples ia?”2 Tru long fasin blong raet, miusik, mo dro, Sevya Jisas Kraes samtaem oli stap tokbaot Hem olsem Meresin blong Gilead from paoa blong Hem blong save hilim man. Olsem Jeremaea, mi bin stap askem miwan: “?I no gat oel long Gilead, blong famli blong Nielson?”
Long Mak, japta 2 long Niu Testeman yumi faenem Sevya long Kapaneam. Save ia we Sevya i gat paoa blong hil, i go tru long evri graon, mo plante pipol oli travel i go long Kapaneam blong Sevya i save hilim olgeta. I gat plante oli kam tugeta raon long haos we Sevya i stap long hem we i no gat inaf rum blong Sevya i save risivim evriwan. Fo man i karem wan man we haf bodi blong i ded, blong Sevya i hilim hem. Olgeta oli no save gotru long fulap man, mekem se oli openem ruf blong haos, mo mekem man ia i kam daon blong mitim Sevya.
Taem mi stap ridim stori ia, mi sapraes tumas long wanem Sevya i talem long man ia: “Pikinini blong mi.Ol sin blong yu mi mi tekemaot finis.”3 Mi ting se bae sapos mi bin wan long ol fofala man ia we i bin karem man ia, ating bae mi talem long Sevya: “Mifala i karem man ia i kam long ples ia blong yu hilim hem.” Mi ting se bae Sevya i ansa: “Mi bin hilim hem.” ?Ating i posibol se mi no andastanem fulwan—se hiling paoa blong Sevya i no blong Hem i save hilim bodi blong yumi nomo, be moa impoten, hem i we Hem i save hilim hat blong yumi mo brokbrok hat blong famli blong mi?
Sevya i tijim wan impoten lesen tru long eksperiens ia taem we Hem i hilim man ia. I kam klia long mi se mesej blong Hem, i we, Hem i save tajem ae blong olgeta we oli blaen blong oli save luk. Hem i save tajem sora blong olgeta we oli no save harem samting, blong oli save harem samting. Hem i save tajem ol leg blong olgeta we i no save wokbaot blong oli save wokbaot. Hem i save hilim ol ae blong yumi mo ol sora blong yumi mo ol leg blong yumi, be samting we i moa impoten hem i, Hem i save hilim hat blong yumi taem hem i stap klinim yumi long ol sin mo leftemap yumi tru long ol hadtaem blong yumi.
Taem we Sevya i kamaot long ol pipol long Buk blong Momon afta we Hem i girap long ded, Hem i tokbaot hiling paoa blong Hem. Ol Man blong Nifae oli harem voes blong Hem long heven: “?Bae yufala i no kambak long mi, mo sakem ol sin blong yufala, mo jenisim laef blong yufala blong mi save hilim yufala?”4 Afta, Sevya i tijim: “From yufala i no save sapos bae oli kambak mo sakem sin, mo kam long mi wetem evri tingting blong hat, mo bae mi mekem olgeta i kam oraet.”5 Sevya i no stap tokbaot hiling paoa long saed blong bodi, be hiling paoa blong sol blong olgeta.
Moronae i karem sam moa save , taem hem i stap serem ol toktok blong papa blong hem, Momon. Afta we hem i tokbaot ol merikel, Momon i eksplenem: “Mo Kraes i bin talem: Sapos bae yufala i gat fet long mi, bae yufala i gat paoa blong mekem eni samting we i nid blong mekem long plan blong mi.”6 Mi lanem se wan samting mi wantem, i fet blong mi long Jisas Kraes, mo mi nidim blong mi akseptem wanem Hem i stret long Hem taem mi stap praktisim bilif blong mi long Hem. Mi andastanem naoia se taem we papa blong mi i lus, hem i stret long plan blong God. Naoia, taem mi stap putum han blong mi blong givim wan blesing long wan narawan, fet blong mi i stap long Jisas Kraes, mo mi andastanem se man ia i save kam oraet long bodi, sapos i stret long Kraes.
Atonmen blong Sevya, we i mekem se yumi gat tugeta, paoa we i pemaot man mo paoa we i mekem samting i posibol, i hae blesing olgeta we Jisas Kraes i givim long evriwan. Taem we yumi sakem sin wetem ful hat blong yumi, Sevya i klinim yumi long sin blong yumi. Taem yumi glad blong tanem yumi go long Papa, iven long ol taem we i had tumas, Sevya bae i karemaot ol harem nogud blong yumi mo mekem ol samting oli no hevi.7
Be, i gat wan bigfala lesen we mi bin lanem. Mi mistek mo biliv se, hiling paoa blong Sevya i no bin wok long famli blong mi. Taem mi stap lukluk i gobak wetem ae we i save moa samting mo gat moa eksperiens, mi luk se hiling paoa blong Sevya i bin kamaot klia long laef blong wanwan famli memba. Mi lukluk tumas long hiling paoa long bodi, be mi no lukluk merikel we i bin hapen. Lod i leftemap mo mekem mama blong mi i kam moa strong tru long hadtaem ia, mo hem i laef long wan longfala laef we hem i mekem fulap samting. Hem i soem gud eksampol long ol pikinini blong hem mo ol apupikinini blong hem. Lod i blesem mi wetem ol brata mo sista blong mi wetem lav, yuniti, fet mo fasin blong girap bakegen, we i bin kam wan impoten pat blong laef blong mifala mo i gohed tedei.
?Be olsem wanem long papa blong mi? Semmak wetem evriwan we bae i sakem sin, Lod i hilim hem long saed long spirit taem hem i bin lukaotem mo kasem ol blesing we oli stap, from Atonmen blong Sevya. Hem i kam klin aot long ol sin blong hem, mo naoia hem i wet long merikel blong laef bakegen long ded. Aposol Pol i tijim: “Olgeta man we oli joen long Adam oli save ded, mo long sem fasin, olgeta man we oli joen long Kraes oli save laef bakegen long ded.”8 Yu luk, mi bin stap talem long Sevya: “Mifala i karem papa blong mi i kam long Yu, blong Yu hilim hem,” mo Sevya i mekem i klia long mi se Hem i bin hilim papa. Oel blong Gilead, i wok long famli blong Nielson—i no long wei ia we mifala i bin wantem, be long wan wei we i moa impoten, we i blesem mo i gohed blong blesem laef blong mifala.
Long Jon japta 6 long Niu Testeman, Sevya i wantem mekem wan merikel we i moa gud. Wetem sam fis mo sam bred, Sevya i fidim 5000 man. Mi ridim stori ia plante taem, be i gat pat blong eksperiens ia we mi mestem, we tedei, i gat mining long mi. Afta we Sevya i fidim ol 5000 ia, Hem i askem ol disaepol blong Hem blong karem ol haf fis mo bred we i stap, we oli fulumap 12 basket evriwan. Mi stap tingbaot from wanem Sevya i tekem taem blong mekem hemia. I bin kam moa klia long mi se, wan lesen we yumi save lan aot long taem ia, i we, Hem i bin save fidim 5000 man mo i gat haf kaekae i stap yet. “Gladhat blong mi, i naf blong evri man.”9 Paoa blong Sevya blong pemaot mo hilim man i save kavremap eni sin, soa, o tes, i nomata i bigwan o i smol, o i had—bae i gat haf i stap yet. Gladhat blong Hem i inaf.
Wetem save ia, yumi i stap muv i go fored wetem fet, wetem save ia se taem ol hadtaem oli kam, mo bae oli kam, o taem sin i kavremap laef blong yu, Sevya i stanap wetem “hiling long ol wing blong hem,”10 i invaetem yumi blong go long Hem.
Mi talem witnes blong mi long yu long saed blong Oel blong Gilead, we i Sevya Jisas Kraes, Ridima blong yumi, mo naesfala hiling paoa blong Hem. Mi mi witnes se Hem i wantem hilim yu. Long nem blong Jisas Kraes, amen.